Mme Andikot N̄wed Nnyịn Ẹbụp Ẹte . . .

Ntak Emi Satan Akadade ke Edem Urụkikọt Etịn̄ Ikọ Ọnọ Eve?

▪ Ima itetịn̄ ke page 8 ke Satan akada ke edem urụkikọt etịn̄ ikọ ọnọ Eve ndien ekeme ndidi emenyịme emi. Se Bible ekpepde edi oro. Edi afo emekeme ndikere m̀mê nso ikpakanam idaha owo nte Satan ada ke edem urụkikọt etịn̄ ikọ ukem nte owo esinamde etie nte eyen ọkpọ etịn̄ ikọ!

Bible ọdọhọ ke Satan okpon n̄kari etieti, ndien se enye akanamde ke In̄wan̄ Eden owụt ke Bible enen. (Ephesus 6:11) Se Bible etịn̄de aban̄a urụkikọt ke Eden itiehe nte n̄ke emi ẹsidọhọde ke ikụt eketịn̄ ikọ ọnọ ekpe; edi edi mbụk emi owụtde ke Satan ekeme ndinam ata idiọk n̄kari man adian̄ade mme owo ọkpọn̄ Abasi. Didie ke Satan esinam emi?

Satan ama enen̄ede ọdiọn̄ọ owo emi enye akakade akabian̄a. Eve ekekpri akan ke ofụri ererimbot. Ntre, Satan ama adaha aka ete ikabian̄a enye sia enye ama ọfiọk ke Eve ikenyeneke ifiọk nte Adam. Satan ama edịp n̄kem ke ndikedịbe ke edem urụkikọt, kpa unam emi enyenede mbufiọk etieti, m̀mê etiede n̄kari n̄kari. (Genesis 3:1) Kere n̄ko se enye akadiade oto ndinam etie nte urụkikọt etịn̄ ikọ.

Akpa, Satan ama enyene Eve ke ndikanam enye okụt n̄kpọ oro akpade owo idem. Eve ama ọfiọk ke urụkikọt isitịn̄ke ikọ. N̄kọ ebe esie okosio urụkikọt ye kpukpru unam eken enyịn̄, ndien enyene ndidi enye akanam emi ke ama ekenen̄ede etịn̄ enyịn ese nte mmọ ẹsinamde n̄kpọ. (Genesis 2:19) Ekeme ndidi Eve ama esitiene etịn̄ enyịn ese n̄kari n̄kari unam emi. Ntre Satan ama ada n̄kari esie omụm Eve; anam enye owụk enyịn ese n̄kpọ kiet oro ẹkekpande ke in̄wan̄ oro. N̄ko-n̄ko, edieke edide urụkikọt oro akasan̄a ke eto oro ẹkekpande, afo ekere ke nso ke Eve ekekere? Okûdi enye ekekere ke anaedi unam emi mîsitịn̄ke ikọ mi akadia mfri eto emi ndien ọtọn̄ọ nditịn̄ ikọ? Mîdịghe ekere ke edieke mfri eto emi ọfọnde ntem ye unam emi, ọwọrọ ke ayakam ọfọn ye imọ akan oro. Nnyịn idiọn̄ọke se Eve ekekerede, inyụn̄ idiọn̄ọke m̀mê urụkikọt ama ebem iso adia mfri eto oro, edi se idiọn̄ọde edi nte ke urụkikọt ọkọdọhọ Eve ke mfri eto oro ayanam enye “etie nte Abasi,” ndien ke Eve ama enịm enye ke akpanikọ.

Nte Satan eketịn̄de ikọ ama owụt n̄ko utọ owo emi enye edide. Enye ama anam Eve ọtọn̄ọ ndinyene eyịghe mban̄a Abasi, anamde etie nte ke Abasi edịp enye eti n̄kpọ, inyụn̄ iyakke enye enyene ifụre. Edieke udọn̄ editie nte Abasi okokponde akan ima emi Eve akamade Abasi emi ọkọnọde enye kpukpru n̄kpọ, Satan ayada oro omụm enye. (Genesis 3:4, 5) Ama onyụn̄ etịbe nte Satan okoyomde; Adam ye Eve ikamaha Jehovah m̀mê ndinyene esịtekọm ke se enye akanamde ọnọ mmọ nte akpanade edi. Ndi idịghe ukem edu emi ke Satan esịn udọn̄ ọnọ mme owo ndinyene mfịn?

Nso ke Satan okoyom? Nso ikanam enye anam kpukpru emi? Enye ikoyomke Eve ọfiọk se imọ idide ye se iyomde. Edi ke ini enye okodomode Jesus, enye ama ọfiọk ke ufọn ikodụhe ndika iso ndịp n̄kem. Ntre enye ama ọdọhọ Jesus nnennen nnennen ete, ‘Duọ ke isọn̄ tuak ibuot nọ mi.’ (Matthew 4:9) Kpukpru emi ẹwụt ke ebịghi ọkọdọn̄ Satan ndiyom ukpono emi ẹkpenọde Jehovah Abasi. Enye eben̄e idem ndinam kpukpru se enye ekekeme man mme owo ẹkûkpono Abasi, m̀mê ndikpono enye ke nnennen usụn̄. Esinenem enye ndinam owo Abasi ọduọ.

Bible owụt ke Satan okpon abian̄a etieti, ke enye onyụn̄ oyom nditata mbon emi ẹdụkde afia esie. Edi nnyịn ikpayakke enye abian̄a nnyịn nte akabian̄ade Eve “koro nnyịn mînanake ifiọk iban̄a mme n̄kukan esie.”—2 Corinth 2:11.