‘Enye Anam Esịt Osụhọde Jehovah’
San̄a Kpere Abasi
‘Enye Anam Esịt Osụhọde Jehovah’
“ESITIE mi nte ke Abasi idifenke inọ mi tutu amama.” Se ete kiet emi eketrede ndinam n̄kpọ Abasi emi ẹkekpepde enye toto ke uyen ọkọdọhọde edi oro. Ke ini enye akakabarede esịt afiak ọtọn̄ọ ndinam n̄kpọ Abasi, enye ekekere ke Abasi idifenke inọ imọ tutu amama. Edi mbụk Manasseh emi odude ke 2 Chronicle 33:1-17 ama ọdọn̄ enye esịt. Kpasụk nte ekedide ye ete emi, edieke idiọkn̄kpọ emi akanamde anamde ekere ke Abasi idifenke inọ fi tutu amama, mbụk Manasseh ekeme ndidọn̄ fi n̄ko esịt.
Manasseh okoto ufọk emi ẹnamde n̄kpọ Abasi. Hezekiah ete esie ekedi n̄wọrọnda edidem ke Judah. Manasseh akamana ke n̄kpọ nte isua ita ẹma ẹkebe ke Abasi ama akadian isua uwem ke utịbe utịbe usụn̄ ọnọ ete esie. (2 Ndidem 20:1-11) Anaedi Hezekiah ama okụt ke mbọm Abasi akanam imọ inyene eyen emi, ntre enye ama odomo ndikpep enye ndima Abasi. Edi idịghe kpukpru nditọ emi ete ye eka mmọ ẹmade Abasi ẹsitiene uwụtn̄kpọ ete ye eka mmọ. Manasseh ekedi utọ eyen oro.
Manasseh ekedi n̄kpọ nte isua 12 ke ini ete esie akakpade. Edi Manasseh ama “anam se idiọkde ke enyịn Jehovah.” (Ufan̄ikọ 1, 2) Ndi mme ọnọitem emi mîmaha Abasi ẹkenam ekpri edidem emi ọkpọn̄ Abasi? Bible itịn̄ke. Edi Bible akam ọdọhọ ke Manasseh ama enen̄ede esịn idem ke ukpono ndem onyụn̄ abak ibak. Enye ama ọbọp itieuwa ọnọ mme nsu nsu abasi, awa nditọiren esie, obụp ekpo, onyụn̄ enịm edisọi mbiet ke temple Jehovah ke Jerusalem. Manasseh ikpakamanake ekpedi Jehovah ikadianke isua uwem inọ ete esie. Ndien kpa Jehovah emi ọkọdọn̄ utom ediwak ini ọnọ enye, edi enye esịn ndikop.—Ufan̄ikọ 3-10.
Ke akpatre, Jehovah ama anam ẹkọbi enye ke ebuka ẹda ẹka Babylon. Manasseh ama eketie do ekere aban̄a utọ uwem emi imọ ikodude. Ndi enye ama edikụt do ke mme nsunsu abasi imọ ikekemeke ndikpeme imọ? Ndi enye ama etie ekere kpukpru se ete esie emi ekedide owo Abasi ekekpepde enye toto ke uyen? M̀mê ntre-e, nnyịn ifiọkke, edi se ifiọkde edi nte ke enye ama akabade esịt. Udiana Chronicle 33:12, 13 ọdọhọ ete: “Enye ekpe Jehovah Abasi esie ubọk onyụn̄ enen̄ede osụhọde idem . . . Enye ọbọn̄ akam ọnọ Enye.” * Edi ndi Abasi ekeme ndifen nnọ utọ idiọkowo emi?
Nte Manasseh ekenen̄erede akabade esịt ama otụk Jehovah. Ntre, Jehovah ama okop n̄kpeubọk Manasseh “onyụn̄ afiak emen enye enịm ke itie edidem esie ke Jerusalem.” (Ufan̄ikọ 13) Manasseh ama anam se enye ekekeme ndiwụt ke imakabade esịt, anam ẹtre ukpono ndem ke obio ukara esie, onyụn̄ ekpek mme owo ete “ẹnam n̄kpọ ẹnọ Jehovah.”—Ufan̄ikọ 15-17.
Mmọdo, edieke idiọkn̄kpọ emi akanamde anamde ekere ke Abasi idifenke inọ fi tutu amama, mbọk yak mbụk Manasseh ọdọn̄ fi esịt. Jehovah ọkọnọ spirit esie ẹda ẹwet mbụk emi. (Rome 15:4) Emi enen̄ede owụt ke Jehovah oyom nnyịn ifiọk ke imọ ‘imenyịme ndifen nnọ’ nnyịn. (Psalm 86:5) Idịghe utọ idiọkn̄kpọ emi owo anamde ke Jehovah esida ebiere m̀mê iyefen, edi akam edi nte esịt anamidiọk etiede esinam enye efen. Anamidiọk emi akam esie owụtde ke esịt enen̄ede obụn̄ọ enye aban̄a idiọkn̄kpọ esie, emi osion̄ode idem ọkpọn̄ idiọkn̄kpọ esie, onyụn̄ esịnde ofụri ukeme anam se inende ekeme ‘ndinam esịt osụhọde Jehovah’ ukem nte Manasseh akanamde.—Isaiah 1:18; 55:6, 7.
Mme itien̄wed Bible emi okpokotde ke January:
[Ikọ Idakisọn̄]
^ ikp. 6 Young’s Literal Translation ọdọhọ ete: “Enye . . . anam esịt osụhọde Jehovah Abasi esie.”