Ndi Abasi Oyom Ẹyararede Idiọkn̄kpọ?

Ediyarade idiọkn̄kpọ nnọ oku m̀mê etubom ufọkabasi aka iso ndidi edinam m̀mê utuakibuot ediwak ufọkabasi. Edi ke ererimbot emi ẹnyịmede mme owo ẹnam se ẹmama mi, ndi ke oyoyom ẹyararede idiọkn̄kpọ?

MME owo ẹnyene nsio nsio ekikere ẹban̄a n̄kpọ emi. Ke uwụtn̄kpọ, National Post eke Canada ama etịn̄ aban̄a owo kiet emi ọdọhọde ke okposụkedi emi ọsọn̄de ndisian owo idiọkn̄kpọ oro afo akanamde, ke “esinen̄ede efere owo ke idem ke ini asiande owo idiọkn̄kpọ oro afo akanamde, enye onyụn̄ ọbọn̄ akam ye afo; enye ọdọhọ ke se afo enyenede ndinam edi oro.” Edi n̄wed oro Bless Me, Father, for I Have Sinned okot ikọ owo emi ọkọdọhọde ete: “Ediyarade idiọkn̄kpọ edi kiet ke otu edinam Ufọkabasi emi ọsọn̄de akan. Enye etịmede owo esịt akan.” Nso ke Bible etịn̄ aban̄a n̄kpọ emi?

Se Bible Etịn̄de

Mme akpan n̄kpọ oro owo akpanamde ke ini enye anamde idiọkn̄kpọ ẹdu ke Ibet oro Abasi ọkọnọde idụt Israel. Ke uwụtn̄kpọ, ke ini owo akanamde idiọkn̄kpọ adian owo m̀mê abiat ibet Abasi, enye ekenyene ndiyarade nnọ oku emi okotode esien Levi, emi ekenyenede ndisio isop idiọkn̄kpọ ke ndifọp uwa nnọ Abasi man ẹfen idiọkn̄kpọ esie.—Leviticus 5:1-6.

Ke ediwak isua ikie ẹma ẹkebe, prọfet Nathan ama asua ọnọ Edidem David ke ini enye akanamde idiọkn̄kpọ. Nso ke David akanam? Enye ama ọdọhọ inikiet inikiet ete: “Mmanam idiọk ido ye Jehovah.” (2 Samuel 12:13) Enye ama ọbọn̄ akam n̄ko, ekpe Abasi ubọk ete atua imọ mbọm. Nso ikedi utịp? Nte ini akakade, David ama ewet ete: “Nyasian fi ndudue mi, ndien n̄kofụkke mme ukwan̄-n̄kpọ mi. N̄kọdọhọ nte, Nyetịn̄ mme idiọk ido mi nnọ Jehovah; ndien afo efen ukwan̄-n̄kpọ ye ndudue mi.”—Psalm 32:5; 51:1-4.

Abasi okosụk oyoyom mme owo ke esop Christian ke eyo mme apostle ẹyarade idiọkn̄kpọ mmọ. James eyeneka Jesus, emi okonyụn̄ edide kiet ke otu adaha esop ke Jerusalem, ama eteme mme Christian ete: “Ẹyarade idiọkn̄kpọ mbufo an̄wan̄wa ẹnọ kiet eken ẹnyụn̄ ẹbọn̄ akam ẹban̄a kiet eken, man ẹkọk udọn̄ọ mbufo.” (James 5:16) Do, nso ke ẹdọhọ mme Christian ẹyarade, ndien ẹdiyarade inọ anie?

Nso ke Ẹkpeyararede?

Kpukpru usen, nnyịn mme anana-mfọnmma owo imesinam m̀mê itịn̄ se mîfọnke ndien ke ntem inam idiọkn̄kpọ idian kiet eken. (Rome 3:23) Ndi emi ọwọrọ ke ana isiyarade kpukpru utọ n̄kpri ndudue ntre inọ owo emi akamade itie?

Okposụkedi emi kpukpru idiọkn̄kpọ ẹdide idiọk ke enyịn Abasi, enye esitua nnyịn mbọm ke ntak emi ọfiọkde ke ikadada unana mfọnmma  imana. Ke nditịm ntịn̄, andiwet psalm ekewet ete: “O Jehovah, afo ekpese mme idiọk ido, O Ọbọn̄, anie ekpekeme ndida? Koro edidahado enyenede fi, man ẹten̄e fi.” (Psalm 130:3, 4) Ntre, nso ke ikpanam, yak idọhọ, edieke nnyịn iduede mînyụn̄ ikohokoi inam idiọkn̄kpọ idian mbon en̄wen? Ti ke eben̄e emi esịne ke akam uwụtn̄kpọ oro Jesus ekekpepde mme anditiene enye ete: “Fen nnyịn mme idiọkn̄kpọ nnyịn, koro nnyịn ke idem nnyịn n̄ko ifende kpukpru owo emi ẹkamade nnyịn isọn.” (Luke 11:4) Ih, Abasi edifen inọ nnyịn edieke ibọn̄de akam inọ enye iben̄e emi ke enyịn̄ Jesus.—John 14:13, 14.

N̄kọ omokụt ke Jesus ọkọdọhọ ke ẹdifen inọ nnyịn edieke ifende mbon oro “ẹkamade nnyịn isọn.” Apostle Paul ama eti mme Christian ete: “Ẹfọn ido ye kiet eken, ẹtua owo mbọm, ẹfen kiet eken ke ofụri esịt kpa nte Abasi n̄ko ekefende mbufo ke ofụri esịt ebe ke Christ.” (Ephesus 4:32) Edieke ifende ndudue mbon en̄wen, iyenen̄ede idori enyịn ke Abasi eyefen ndudue nnyịn.

Edi nso kaban̄a mme utọ ikpọ idiọkn̄kpọ nte inọ, nsu emi ẹkoide-koi ẹsu, oburobụt ido idan̄, ukpammịn, ye ntre ntre eken? Owo eke anamde orụk idiọkn̄kpọ oro abiat ibet Abasi ndien ke ntem anam idiọkn̄kpọ adian Abasi. Ndi enye ekpenyene ndiyarade idiọkn̄kpọ emi?

Ẹkpeyarade Idiọkn̄kpọ Ẹnọ Anie?

Abasi inọhọ owo odudu ndifen idiọkn̄kpọ emi ẹnamde ẹdian Abasi; Enye ikpọn̄ ekeme ndinam oro. Bible asian nnyịn in̄wan̄-in̄wan̄ ete: “Edieke iyararede mme idiọkn̄kpọ nnyịn, [Abasi] edi anam-akpanikọ onyụn̄ enen man efen mme idiọkn̄kpọ nnyịn onyụn̄ eyet nnyịn isana ke kpukpru mme ukwan̄ido.” (1 John 1:9) Edi ẹkpeyarade orụk idiọkn̄kpọ emi ẹnọ anie?

Sia edide Abasi ikpọn̄ esifen ọnọ owo, enye ke ẹkpeyarade ẹnọ. Se David akanamde edi oro, nte nnyịn ikokụtde. Edi nso idinam ẹfen ẹnọ owo? Bible asian nnyịn ete: “Ke ntre, ẹkabade esịt ẹnyụn̄ ẹwọn̄ọde ẹkpọn̄ man ẹsọhi mme idiọkn̄kpọ mbufo ẹfep, man mme ini nduọkodudu ẹkpeto iso Jehovah ẹsịm mbufo.” (Utom 3:19) Ih, ẹsifen ẹnọ owo ke ini enye enyịmede ke se imọ ikanamde ọdiọk, ayararede idiọkn̄kpọ esie, onyụn̄ enyịme nditre idiọk edinam oro. Isiwakke ndimem utom nditre idiọk edinam. Edi un̄wam do.

Ti ikọ James emi, oro ikokotde ite: “Ẹyarade idiọkn̄kpọ mbufo an̄wan̄wa ẹnọ kiet eken ẹnyụn̄ ẹbọn̄ akam ẹban̄a kiet eken, man ẹkọk udọn̄ọ mbufo.” James ama adian do ete: “N̄kpeubọk edinen owo, ke ini odude ke edinam, enyene odudu etieti.” (James 5:16) “Edinen owo” emi ekeme ndidi kiet ke otu “mbiowo esop,” emi James etịn̄de aban̄a ke ufan̄ikọ 14. “Mbiowo,” emi ẹmekde man ẹn̄wam mbon oro ẹyomde ẹfen ẹnọ mmimọ, ẹdu ke esop Christian. Edi “mbiowo” emi ikemeke ndibiat idiọkn̄kpọ nnyịn mfep, koro baba owo kiet inyeneke odudu ndifen ekemmọ owo idiọkn̄kpọ emi enye anamde adian Abasi. * Edi spirit Abasi anam mmọ ẹdot ndisua nnọ nnyụn̄ nnen̄ede owo oro anamde akwa idiọkn̄kpọ, ẹn̄wam enye ọfiọk nte  idiọkn̄kpọ esie ọdiọkde ye ntak emi anade enye akabade esịt.—Galatia 6:1.

Ntak Emi Owo Akpayararede Idiọkn̄kpọ Esie?

Edide idiọkn̄kpọ edi ekpri m̀mê akamba, owo emi akanamde idiọkn̄kpọ abiat itie ebuana esie ye ekemmọ owo ye Abasi. Mmọdo, esịt ekeme ndibiom enye. Utom ubieresịt emi Andibot ọkọnọde nnyịn edi oro. (Rome 2:14, 15) Nso ke ẹkpenam?

N̄wed James esịn udọn̄ ọnọ nnyịn ete: “Nte odu owo ekededi oro ọdọn̄ọde [udọn̄ọ eke spirit] ke otu mbufo? Yak enye okot mbiowo esop, ndien yak mmọ ẹbọn̄ akam ẹnọ enye, ẹda aran ẹyet enye ke enyịn̄ Jehovah. Ndien akam mbuọtidem ayanam idem ọsọn̄ owo udọn̄ọ oro, ndien Jehovah eyemenede enye ke enyọn̄. N̄ko, edieke enye akanamde idiọkn̄kpọ, ẹyefen enye.”—James 5:14, 15.

Ẹdọhọ mbiowo mi n̄ko ẹte ẹse ẹban̄a otuerọn̄. Didie? Idịghe ikpîkpu edikop nte ẹyararede idiọkn̄kpọ. Utu ke oro, sia n̄kpọ emi abuanade udọn̄ọ eke spirit, oyom ẹnam n̄kpọ man “[ẹnam] idem ọsọn̄ owo udọn̄ọ oro.” James asiak n̄kpọ iba oro ẹkemede ndinam.

Akpa, ‘ẹyeda aran ẹyet’ owo. Emi aban̄a odudu oro Ikọ Abasi enyenede ndikọk owo. Apostle Paul ama etịn̄ ete ke “ikọ Abasi enyene uwem onyụn̄ enyene odudu . . . onyụn̄ ekeme ndifiọk mme uduak ye ekikere esịt owo,” enen̄erede odụk owo ekikere ye esịt. (Mme Hebrew 4:12) Edieke mbiowo ẹkamade Bible ke usọ, mmọ ẹkeme ndin̄wam owo oro ọdọn̄ọde udọn̄ọ eke spirit okụt ntak mfịna esie onyụn̄ anam se idotde man etre ndinam se idiọkde ke enyịn Abasi.

N̄kpọ en̄wen edi “akam mbuọtidem.” Okposụkedi emi akam mbiowo mîdikpụhọkede edinen ikpe Abasi, akam emi edi akpan n̄kpọ ọnọ Abasi, emi enen̄erede enyene udọn̄ ndida uwa ufak Christ mfen idiọkn̄kpọ. (1 John 2:2) Abasi eben̄e idem ndin̄wam anamidiọk ekededi oro enen̄erede akabade esịt onyụn̄ “[anamde] mme utom eke ẹdotde edikabade esịt.”—Utom 26:20.

Akakan ntak emi akpanamde ẹyararede idiọkn̄kpọ—oro ẹnamde ẹdian ekemmọ owo m̀mê oro ẹnamde ẹdian Abasi—edi man Abasi ama nnyịn. Jesus Christ ama owụt ke ana ibem iso ikọk mfịna nnyịn ye ekemmọ owo inyụn̄ inam emem ye mmọ mbemiso ikemede ndituak ibuot nnọ Abasi ye eti ubieresịt. (Matthew 5:23, 24) Mme N̄ke 28:13 ọdọhọ ete: “Owo eke edịpde idiọk ido esie idikwe unen: edi owo eke ayararede, onyụn̄ ọkpọn̄de mmọ, oyokụt mbọm.” Edieke isụhọde idem ke enyịn Jehovah Abasi iben̄e enye efen ọnọ nnyịn, enye ayama nnyịn onyụn̄ emenede nnyịn enịm ke enyọn̄ ke edikem ini.—1 Peter 5:6.

[Ikọ Idakisọn̄]

[Se ẹwetde ke ikpọ abisi ke page 23]

Abasi edifen inọ nnyịn edieke ibọn̄de akam inọ enye iben̄e emi ke enyịn̄ Jesus

[Ndise ke page 24]

Akakan ntak emi akpanamde ẹyararede idiọkn̄kpọ edi man Abasi ama nnyịn