San̄a Kpere Abasi

Ke Ini “Edibụn̄ọ ye Edinuaha Esịt” Oyomde Edifen Nnọ

2 SAMUEL 12:1-14

KPUKPRU nnyịn imesinam idiọkn̄kpọ ediwak ini. Inamke n̄kpọ m̀mê itua n̄kpọfiọk adan̄a didie, imekeme ndisụk n̄kere nte: ‘Ndi Abasi okop akam ofụri esịt oro ndade n̄wụt ke mmakabade esịt? Ndi enye eyefen ọnọ mi?’ Bible ekpep akpanikọ emi ọnọde ndọn̄esịt mi: Okposụkedi emi akananam Jehovah mîsịnke udọn̄ inọ idiọkn̄kpọ, enye esifen ọnọ anamidiọk oro akabarede esịt. Enye ama owụt emi in̄wan̄-in̄wan̄ ke se iketịbede inọ Edidem David eke Israel eset, oro ẹwetde ke 2 Samuel ibuot 12.

Kere se iketịbede. David anam ikpọ idiọkn̄kpọ. Enye ama esịn efịbe ye Bath-sheba, ndien sia enye mîkekemeke ndidịp idiọkn̄kpọ oro, enye ama odiomi man ẹwot ebe n̄wan oro. David ama edịp idiọkn̄kpọ esie, anam nte idi eti owo ke ediwak ọfiọn̄. Edi Jehovah ke ekese. Enye ama okụt mme idiọkn̄kpọ David. Edi enye ama okụt n̄ko ke David ama ekeme ndikabade esịt. (Mme N̄ke 17:3) Nso ke Jehovah edinam?

Jehovah ọdọn̄ prọfet Nathan utom ke ọtọ David. (Ufan̄ikọ 1) Edisana spirit an̄wam Nathan ada mbufiọk aka ebịne edidem, ọfiọk ke ana imọ itịn̄ enyịn imek se iditịn̄de. Enye edisan̄a didie inam David okụt ke imọ ibian̄a idem onyụn̄ an̄wam enye okụt adan̄a nte idiọkn̄kpọ esie okponde?

Nathan obụk mbụk oro mîditreke ndisịm esịt David emi edide akani ekpemerọn̄, ndien ke ntem iyakke enye etịn̄ se ekpetịn̄de anyan̄a idem. Mbụk emi aban̄a iren iba, kiet edi ọbọn̄, enye eken edi ubuene. Ọbọn̄ oro enyene “ata ediwak n̄kpri ufene ye enan̄,” edi ubuene oro inyeneke baba kiet “ke mîbọhọke ekpri uman eyen-erọn̄ kierakiet.” Ọbọn̄ oro enyene esenowo, onyụn̄ oyom nditem udia nnọ enye. Utu ke ndisio kiet ke otu erọn̄ esie, enye ada n̄kukụre eyenerọn̄ ubuene oro. Sia David ekerede ke mbụk emi edi akpanikọ, enye enen̄ede ayat esịt onyụn̄ obụmede ọdọhọ ete: “Owo oro akanamde ntre enyene ndikpa!” Ntak-a? David ọdọhọ ete: “Koro [enye] mînyụn̄ inyeneke mbọm.” *—Ufan̄ikọ 2-6.

N̄ke Nathan esịm David esịt. Ke nditịm ntịn̄, David obiom idem ikpe. Nathan ọdọhọ enye idahaemi in̄wan̄-in̄wan̄ ete: “Edi afo edi owo oro.” (Ufan̄ikọ 7) Sia Nathan adade ke ibuot Abasi etịn̄ ikọ ye David, ana in̄wan̄-in̄wan̄ ke Jehovah ada ke David akanam n̄kpọ oro ye imọ. David ndibiat ibet Abasi owụt ke enye ikponoke Ọnọ-Ibet oro. Abasi ọdọhọ ete: “Afo emesịn mi ke ndek.” (Ufan̄ikọ 10) Nsuannọ oro odụk David ọwọn̄esịt, anam enye eseme ete: “Mmanam idiọk ido ye Jehovah.” Nathan asian David ke Jehovah efen ọnọ enye, edi ke David enyene ndidọk se enye ọkọtọde.—Ufan̄ikọ 13, 14.

Ke ẹma ẹkeyararede idiọkn̄kpọ David, enye ama ewet se idude idahaemi ke Psalm 51. David etịn̄ ofụri esịt esie do onyụn̄ owụt adan̄a nte imọ ikabarede esịt. David ekesịn Jehovah ke ndek ke ndinam idiọkn̄kpọ. Edi ke ini Abasi ekefende ọnọ edidem oro akakabarede esịt do, enye ama ọdọhọ Jehovah ete: “O Abasi, afo usịnke edibụn̄ọ ye edinuaha esịt ke ndek.” (Psalm 51:17) Iwakke-wak ikọ oro ekemede ndinen̄ede nsịn udọn̄ nnọ anamidiọk oro akabarede esịt ke Jehovah ayatua enye mbọm ntem!

[Ikọ Idakisọn̄]