San̄a Kpere Abasi

Ndi Abasi Ekeme Nditua N̄kpọfiọk?

JUDGES 2:11-18

NNYỊN mme anana-mfọnmma owo imesitua n̄kpọfiọk ndusụk ini. Ke uwụtn̄kpọ, imekeme ndiseme ke ini ifiọkde ke imanam ndudue. Edi akpa owo idem ndikop Bible ọdọhọde ke Jehovah ekeme nditua n̄kpọfiọk. Afo emekeme ndidọhọ ete, ‘Edi Abasi ọfọn ama nan̄a. Enye isinamke ndidue!’ Didie, ndien, ke Abasi esitua n̄kpọfiọk? Ibọrọ mbụme emi ekeme ndin̄wam nnyịn ifiọk ata akpan n̄kpọ emi: N̄kpọ esinem onyụn̄ ayat Jehovah esịt, ndien edinam nnyịn ekeme ndinem enye esịt m̀mê ọdiọk enye esịt. Kere ban̄a se ẹwetde ke Judges 2:11-18.

N̄wed Judges ke Bible obụk aban̄a ini afanikọn̄ ke idụt Israel. Ini oro, idụt oro ẹma ẹdụn̄ ke Canaan, kpa obio emi Abasi ọkọn̄wọn̄ọde ndinọ Abraham. Ke ofụri ata ediwak isua oro ẹketienede, ẹkeme ndidọhọ ke ofụri uwem Israel ekedi ke usụn̄ inan̄ emi: ẹkpọn̄ Jehovah, ẹfịk mmọ, ẹseme ẹnọ Jehovah, Jehovah onyụn̄ anyan̄a mmọ. *

Ẹkpọn̄ Jehovah. Nditọ Israel ndikpebe idiọkido mbon Canaan ama anam mmọ “ẹkpọn̄ Jehovah” ẹnyụn̄ ẹtiene ẹtuak ibuot ẹnọ mme abasi en̄wen, ke nditịm ntịn̄, mmọ ẹma “ẹnam n̄kpọ Baal ye Ashtaroth.” * Ndiwọn̄ọde n̄kpọn̄ Jehovah ntre ekedi mfiakedem. Imosụk ise nditọ Israel ‘ẹkeyatde Jehovah esịt,’ kpa Abasi emi akanyan̄ade mmọ osio ke Egypt!—Ufan̄ikọ 11-13; Judges 2:1.

Ẹfịk mmọ. Jehovah ama esiyat esịt etre ndikpeme ikọt esie oro ẹkekpọn̄de enye. Oro ama esinam mmọ ẹduọ ẹdụk “ubọk mme asua mmọ,” emi ẹkesidide ẹdibụme idụt mmọ.—Ufan̄ikọ 14.

Ẹseme ẹnọ Jehovah. Nditọ Israel ẹma ẹdu ke nnanenyịn, mmọ ẹma ẹsitua n̄kpọfiọk ẹban̄a idiọk usụn̄ uwem mmọ ẹnyụn̄ ẹseme ẹnọ Abasi ẹte an̄wam mmimọ. Mmọ “[ẹkesiseme] ẹban̄a mmọ eke ẹtụkde mmọ” ẹnọ Jehovah. (Ufan̄ikọ 18) Ndiseme nnọ Abasi ekedi kiet ke otu n̄kpọ oro mmọ ẹkesinamde ndien ndien. (Judges 3:9, 15; 4:3; 6:6, 7; 10:10) Nso ke Abasi ekesinam?

Anyan̄a mmọ. Jehovah ama esikop eseme nditọ Israel, “onyụn̄ atua n̄kpọfiọk.” Ikọ Hebrew oro ẹkabarede “atua n̄kpọfiọk” ekeme ndiwọrọ “owo ndikpụhọ ekikere m̀mê uduak esie.” N̄wed ndụn̄ọde kiet ọdọhọ ete: “Eseme mmọ ama anam Jehovah okpụhọde ufen emi okoyomde ndimia mmọ akabade anyan̄a mmọ.” Mbọm ama anam Jehovah ‘anam mme ebiereikpe ẹdaha ẹda’ man ẹnyan̄a ikọt esie ẹsio ke ubọk mme asua.—Ufan̄ikọ 18, NW.

Ndi omokụt se ikanamde Jehovah atua n̄kpọfiọk m̀mê okpụhọde ekikere? Ekedi ke ntak emi ikọt esie ẹkekpụhọde edu mmọ. Kere ntem ise: Ke ini eyen anamde idiọkn̄kpọ, edima ete ekeme nditụnọ eyen oro ke nditre enye ndinam ndusụk n̄kpọ. Edi edieke enye okụtde ke eyen oro enen̄ede atua n̄kpọfiọk aban̄a se enye akanamde, ete esie ekeme nditre ntụnọ oro.

Nso ke mbụk emi ekpep nnyịn aban̄a Jehovah? Okposụkedi emi esiyatde enye ke ini owo okoide-koi anam idiọkn̄kpọ, enye esitua owo emi akabarede esịt, mbọm. Enen̄ede otụk nnyịn ke ini ifiọkde ke se nnyịn inamde esinem m̀mê ayat Jehovah esịt. Yom usụn̄ kpep nte ekemede ‘ndidat Jehovah esịt.’ (Mme N̄ke 27:11) Udutuaha n̄kpọfiọk tutu amama edieke anamde ntre.

[Mme Ikọ Idakisọn̄]