Mfịna Ofụri Ekondo Oyom Usọbọ Ofụri Ekondo

NDUTỤHỌ ọyọyọhọ kpukpru ebiet, ndien ediwak owo oro ẹnyenede esịtmbọm ẹsin̄wam mbon oro ẹbọde ndutụhọ. Ke uwụtn̄kpọ, mbon ufọkibọk ẹsinam utom ẹbe ini man ẹn̄wam mbon udọn̄ọ m̀mê mbon oro ẹdade unan. Mme enịme-ikan̄, mme bodisi, mme ọbọp-ibet, ye mbon oro ẹsinyan̄ade mme owo ke ini mbabuat n̄kpọntịbe ẹsidomo ndikpan m̀mê ndisụhọde ubiak mbon oro ẹbọde ndutụhọ. Mme utọ ukeme oro ẹsin̄wam mme owo ọkpọkpọ, edi owo ndomokiet m̀mê esop ndomokiet ikemeke nditre ndutụhọ ke ofụri ererimbot. Edi Abasi ekeme, enye oyonyụn̄ etre ndutụhọ ke ofụri ererimbot.

Akpatre n̄wed Bible ọn̄wọn̄ọ ọnọ nnyịn ete: “[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak  idinyụn̄ idụhe aba. Mme akpa n̄kpọ ẹma ẹbe ẹfep.” (Ediyarade 21:4) Kere ban̄a adan̄a akpakịp owo emi un̄wọn̄ọ oro edibehede. Enye etịn̄ ibio ibio nte Abasi aduakde nditre kpukpru nditụhọ. Enye edinam emi ke nditre ekọn̄, biọn̄, udọn̄ọ, ye ufịk, nnyụn̄ nsobo kpukpru ndiọi owo mfep ke isọn̄. Idụhe owo emi ekemede ndinam oro.

Se Obio Ubọn̄ Abasi Edinamde

Abasi edida udiana ata ọkpọsọn̄ owo ke ekondo—kpa Jesus Christ oro ẹkenamde eset—isu mme un̄wọn̄ọ esie. Ini ke edi emi Jesus edidide Edidem emi akarade ofụri isọn̄, owo ndomokiet ibiọn̄ọke enye. Idịghe ndidem, mme adaibuot ukara, m̀mê mme ebre mbre ukara ẹdikara aba ubonowo. Utu ke oro, Edidem kiet ye ukara kiet kpọt, emi edide Obio Ubọn̄ Abasi, edikara ubonowo.

Obio Ubọn̄ oro oyosobo kpukpru ukara owo efep. Bible ama etịn̄ anyan ini ko ete: “Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.” (Daniel 2:44) Edinen ukara kiet kpọt—kpa Obio Ubọn̄ Abasi—ayanam mme owo ke ofụri isọn̄ ẹdiana kiet.

Jesus ama esitịn̄ ediwak ini aban̄a Obio Ubọn̄ oro ke ini enye okodude ke isọn̄. Enye eketịn̄ aban̄a Obio Ubọn̄ oro ke akam uwụtn̄kpọ onyụn̄ ekpep mme mbet esie ete ẹbọn̄ akam ntem: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 6:10) N̄kọ omokụt ke Jesus okowụt ke Obio Ubọn̄ oro enyene ebuana ye edinam uduak Abasi ke isọn̄, ndien edi uduak Abasi nditre ndutụhọ ke ofụri isọn̄.

Edinen ukara Abasi ọyọdiọn̄ ubonowo ke usụn̄ emi baba ukara en̄wen mîkpekemeke. Ti ete ke Jehovah ọkọnọ Eyen esie nte ufak man mme owo ẹkpenyene nsinsi uwem. Mme owo ẹyesịm mfọnmma ke ini edinen ukara Obio Ubọn̄. Nso ididi ufọn? Jehovah “eyemen n̄kpa ke nsinsi; Ọbọn̄ Jehovah [oyonyụn̄] ọkwọhọde kpukpru iso mmọn̄eyet efep.”—Isaiah 25:8.

Ndusụk owo ẹkeme ndibụp ẹte: ‘Ntak emi Abasi mîketreke ndutụhọ anyan ini ko? Enye ebebet nso?’ Jehovah ekpeketre m̀mê akpan kpukpru ndutụhọ anyan ini ko. Edi enye enyịme ndutụhọ aka iso man nditọ esie ke isọn̄ ẹkpebọ ufọn ke nsinsi, idịghe ke ntak ufọn idemesie. Edima ete ye eka ẹsiyak eyen mmọ ọbọ ufen edieke mmọ ẹfiọkde ke oro ayada ufọn oro ebịghide ọsọk eyen oro. Kpasụk ntre, nti ntak ẹdu emi ẹnamde Jehovah ayak mme owo ẹbọ ndutụhọ ke ibio ini, ndien Bible etịn̄ mme ntak emi. Mme ntak emi ẹsịne utọ n̄kpọ nte edikeme ndimek se owo amade, idiọkn̄kpọ, ye eneni oro aban̄ade nte ukara Jehovah enende. Bible etịn̄ n̄ko ke Abasi ayak idiọk angel akara ererimbot ke ibio ini. *

Okposụkedi emi ufan̄ mîdụhe ndineme kpukpru ntak mi, odu n̄kpọ iba oro ẹnọde nnyịn idotenyịn ye nsịnudọn̄. Akpa edi: Edidiọn̄ oro Jehovah edinọde nnyịn eyenen̄ede okpon akan ndutụhọ ekededi oro iyọde. Akan oro, Abasi ọn̄wọn̄ọ ọnọ nnyịn ete: “Owo iditịghi aba akpa oro, idinyụn̄ idụkke owo ke esịt.” (Isaiah 65:17) Abasi eyetre mfụhọ ye ndutụhọ oro enye ayakde odu ke ibio ini ofụri ofụri ye ke nsinsi.

Udiana edi emi: Abasi enịm ini oro owo mîkemeke ndikpụhọde man etre ndutụhọ. N̄kọ emeti ke prọfet Habakkuk okobụp Jehovah m̀mê adan̄a didie ke enye ediyak afai ye en̄wan ẹka iso. Jehovah ọkọbọrọ enye ete: ‘N̄kukụt ana kan̄a ọnọ ini emi ẹnịmde, enye idibehe ini.’ (Habakkuk 2:3) Nte idikụtde ke ibuotikọ oro etienede, “ini emi ẹnịmde” do ekpere.

[Ikọ Idakisọn̄]

 [Ekebe ke page 7]

Mme Itie N̄wed Abasi Emi Ẹnọde Ata Idotenyịn

EKỌN̄ IDIDỤHE ABA:

“Mbufo ẹdi ẹdise se Jehovah anamde, emi esịnde n̄wụre ke ererimbot. Enye anam ekọn̄ etre tutu esịm ke utịt ekondo.”—Psalm 46:8, 9.

ẸYENAM MME OWO NNYỊN ẸSET:

“Ndinen owo ye mme anam ukwan̄n̄kpọ ẹyeset ke n̄kpa.”—Utom 24:15.

KPUKPRU OWO ẸYENYENE UDIA:

“Uwak ibokpot ẹyedu ke isọn̄ ke nsom ikpọ obot.”—Psalm 72:16.

UDỌN̄Ọ IDIDỤHE ABA:

“Andidụn̄ ididọhọke ite, Ndọdọn̄ọ.”—Isaiah 33:24.

NDIỌI OWO IDIDỤHE ABA:

“Edi ẹyesobo mme idiọk owo ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.”—Mme N̄ke 2:22.

UTỤK IDIDỤHE ABA:

“Sese, edidem kiet [Christ Jesus] ayakama obio nte enende; ama edi mbọn̄, mmọ n̄ko ẹyeda ubọn̄ ke eti ido.”—Isaiah 32:1.

[Mme ndise ke page 7]

Obio Ubọn̄ Abasi eyetre ndutụhọ ekededi oro ibọde