Mbụme Oro Mme Andikot Ẹbụpde

Ndi Abasi Enyịme Udọ Uwak Iban?

Baba-o; ndọ oro Abasi ọkọtọn̄ọde ke Eden okowụt ke akpana owo ọdọ n̄wan kiet m̀mê ebe kiet kpọt. Nte ini akakade, Jesus Christ ama afiak ọsọn̄ọ idaha emi ẹkenịmde ke Eden mi ọnọ mme anditiene enye.—Genesis 2:18-24; Matthew 19:4-6.

Ndi mme owo nte Abraham, Jacob, David ye Solomon oro ẹkedude uwem mbemiso eyo mme Christian ikọdọhọ uwak iban? Ẹma ẹdọ, edi nso ke Bible etịn̄ aban̄a utọ ndọ oro? Enye owụt ke udọ uwak iban ekesịn mfịna ke ufọk Abraham ye Jacob. (Genesis 16:1-4; 29:18–30:24) Nte ini akakade, Abasi ama ọnọ kpukpru ndidem Israel Ibet ete ‘ẹkûdọ ediwak iban, mbak oro ediwọn̄ọde mmọ esịt.’ (Deuteronomy 17:15, 17) Solomon ikanamke item emi, edi ama ọdọ se iwakde ibe iban 700! Ekedi n̄kpọ mfụhọ ke esịt Solomon ama akabade ọkpọn̄ Jehovah ke ntak ndiọi edu ediwak iban esie. (1 Ndidem 11:1-4) Bible etịn̄ ndiọi utịp emi edidọ uwak iban ẹsidade ẹdi.

Edi ndusụk owo ẹkeme ndikere m̀mê nso ikanam Abasi ayak ikọt esie ẹdọ uwak iban. Kere ise: Ndi akanam amayak n̄kpọ mbanaufọk oro oyomde ẹkpụhọ odu kan̄a ke esisịt ini, ndusụk ekerede ke ufọn idụhe ndimen enye mfep kan̄a mîdịghe ke idinamke ufọk oro eye edieke emende enye efep idahaemi? Edi akpanikọ ke usụn̄ ye ekikere Abasi okon̄ akan eke nnyịn. (Isaiah 55:8, 9) Kpa ye oro, imekeme nditịm mfiọk ndusụk nti ntak oro akanamde enye ayak ẹdọ uwak iban ini oro.

Ti ete ke toto ke In̄wan̄ Eden, Jehovah ama etetịn̄ aban̄a Mfri oro edisobode Satan. Ekem, ẹma ẹdọhọ Abraham ke enye edidi ete akamba idụt ye nte ke Mfri oro ẹken̄wọn̄ọde edito ubon esie. (Genesis 3:15; 22:18) Satan ikoyomke Mfri emi edi. Ntre, enye ama esịn ibuot esịn itọn̄ oyom ndisobo idụt Israel. Enye ama esinam idụt Israel ẹnam idiọk man ẹtaba mfọn ye ukpeme Abasi.

Man Jehovah akpan emi nditịbe, enye ama esidọn̄ mme prọfet esie utom ndien ndien man ẹdụri ikọt esie utọn̄ ke ini mmọ ẹtọn̄ọde ndikpọn̄ ndinen edumbet. Edi enye ama ọfọfiọk ke ikọt esie idinamke idem ata akpan ibet esie kpukpru ini, utọ nte enye oro aban̄ade ukpono ndem. (Exodus 32:9) Edieke edisọn̄de mmọ ndinam mme akpan ibet emi, nso ndien ke mmọ ẹdinam edieke ẹdọhọde mmọ ẹkûdọ aba uwak iban? Sia edide Jehovah enen̄ede ọfiọk nte ubonowo ẹtiede, enye ama ọfiọk ke ufọn idụhe nditịn̄ ikọ ini oro mban̄a udọ uwak iban oro ẹma ẹkenanam ẹbịghi. Edieke enye akpakakpande edinam emi, Satan akpakada emi nte ata mmemmem usụn̄ ndinam Israel ẹnam idiọk.

Abasi ndikayak ẹdọ uwak iban ama enyene ufọn en̄wen. Emi ama anam idụt oro ẹtọt, onyụn̄ anam mmọ ẹdu uwem ẹsịm ini oro Messiah ekedide. Ekeme ndidi udọ uwak iban ama esinyụn̄ anam ndusụk iban oro mîkpekenyeneke ebe ẹnyene ebe oro esede mmọ enyịn akpan akpan ke ini afanikọn̄, anam mmọ ẹnyene ufọkidụn̄ ye ubon n̄ko.

Edi, ti ete ke idịghe Jehovah ọkọtọn̄ọ edinam emi. Enye okonyụn̄ ayayak emi aka iso ke ibio ini, onyụn̄ ọnọ ibet oro mîkayakke mme ebe ẹnam n̄kpọ ye iban mmọ ke idiọk usụn̄. (Exodus 21:10, 11; Deuteronomy 21:15-17) Ke ini Jehovah ekemekde nditre edinam emi ke otu ikọt esie, enye ama anam Eyen esie afiak edinam mme owo ẹfiọk ke akpana owo ọdọ ebe m̀mê n̄wan kiet kpọt nte ẹkenamde ke Eden. Ntem, Jesus ama akpan mme anditiene enye ndidọ uwak iban. (Mark 10:8) Omokụt do ke kpa ye oro Ibet Moses ekenyenede ufọn, ke “ibet Christ” ọfọn akan.—Galatia 6:2.