Mbon Unọmọ Idio ke Myanmar Ẹbọ Un̄wam

KE May 2, 2008, idio emi ẹkotde Nargris ama ọnọmọ Myanmar idiọk idiọk ndien ẹma ẹsọsọp ẹtọt enye ke mbụk n̄kpọntịbe ofụri ererimbot. * Ẹdọhọ ke se ikperede ndisịm owo 140,000 ẹkekpan̄a m̀mê ẹsop ke idio emi ama okotop akpakịp mmọn̄ ke inyan̄ ofụk ofụri Utan Irrawaddy.

Edi n̄kpọ n̄kpaidem nte ke adan̄a ediwak Mme Ntiense Jehovah oro ẹdude do, ke n̄kpọ ikanamke baba owo mmọ kiet. Akpan n̄kpọ kiet emi akanamde mmọ ẹbọhọ edi emi mmọ ẹkefen̄ede ẹka mme Ufọkmbono Obio Ubọn̄ mmọ oro ẹbọpde ọfọn. Ke ebiet kiet, Ntiense 20 ye owo 80 en̄wen ke obio oro ẹma ẹtie ke ọkọm Ufọkmbono Obio Ubọn̄ ke hour usụkkiet ke ini mmọn̄ ukwọ okokon̄de esịm mita ition. Kpukpru mmọ ẹma ẹbọhọ. Mbọm owo 300 emi ẹkekpan̄ade ke obio oro. Ufọkmbono Obio Ubọn̄ ekedi n̄kukụre ufọk emi okosụhọde ke ediwak obio.

Ke usen iba ẹma ẹkebe tọn̄ọ idio oro ọkọwọrọ, n̄kọk itieutom Mme Ntiense Jehovah ke Yangon ama ọnọ otu mme ọnọ un̄wam ẹka esop emi odude ke Bothingone, ke inua utan oro. Otu emi ẹma ẹda ediwak edesi, mmọn̄, ye tiande ẹbe mme ebiet emi ẹkenade ndon, ẹfep mbon n̄wo, ẹnyụn̄ ẹbe okpo oro ẹtọn̄ọde ndidiahade, ẹkesịm Bothingone. Mmọ ẹkedi akpa otu mme ọnọ un̄wam oro ẹkekade ẹkesịm obio oro. Ke ẹma ẹkenọ Mme Ntiense do mme n̄kpọ un̄wam emi, otu emi ẹma ẹnọ utịn̄ikọ Bible man ẹsịn udọn̄ ẹnọ mmọ ẹnyụn̄ ẹnọ mmọ Bible ye mme n̄wed ukpep Bible, sia idio oro akabiatde kpukpru inyene mmọ.

 Nte Mme Ntiense oro ẹketabade inyene mmọ ke idio oro ẹkenamde n̄kpọ ekenen̄ede edi n̄wọrọnda. Ntiense kiet ke esop emi odude ke obio Irrawaddy emi idio oro ekenen̄erede abiat ọkọdọhọ ete: “Kpukpru n̄kpọ oro ikenyenede ẹtak. Kpukpru ufọk nnyịn ẹwụre. Kpukpru mfri nnyịn ke in̄wan̄ ẹtak. Ukwọ amabiat kpukpru edin̄wọn̄ mmọn̄. Edi nditọete nnyịn isemeke idem nte mbon eken ẹsemede. Mmọ ẹbuọt idem ke Jehovah ye ke esop esie. Iyọbọ item ekededi oro ẹnọde nnyịn, edide idu ke obio emi m̀mê ika ebiet en̄wen.”

Otu Ntiense emi ẹdide owo 30, oro ẹketabade kpukpru n̄kpọ n̄ko, ẹma ẹdat esịt ẹkwọ ikwọ Obio Ubọn̄ ke ufan̄ hour duop oro mmọ ẹkesan̄ade ẹka ebiet oro otu mme ọnọ un̄wam ẹkenamde ndutịm udia, ọfọn̄, ye itie udakibuot ẹnọ mmọ. Mmọ ẹma ẹkop ke usụn̄ ke ẹnịm mbono circuit Mme Ntiense Jehovah ke obio kiet ke mbọhọ oro. Mmọ ẹma ẹwaha kan̄a ẹdụk mbono oro man ẹbọ nsịnudọn̄ emi ẹdade Bible ẹnọ ẹnyụn̄ ẹbuana ye mme Christian eken.

Ke ofụri ebiet oro idio oro ọkọwọrọde, enye okowụri ufọk Mme Ntiense 35, abiat ufọk mmọ 125, onyụn̄ abiat Ufọkmbono Obio Ubọn̄ 8 n̄ko. Imọkọm Abasi sia inyeneke akpan n̄kpọ emi akanamde n̄kọk itieutom.

Ke ntọn̄ọ ntọn̄ọ, idio oro ikayakke mme owo ẹdodụk m̀mê ẹwọwọrọ ke n̄kọk itieutom ke ntak emi ikpọ eto ẹkeduọde ẹsịri usụn̄. Hour ifan̄ ke idio oro ama eketehede ube, se ibede owo 30 ke otu mbonutom n̄kọk itieutom ẹma ẹtiene ẹkpok eto oro ke ubọk ẹtan̄ ẹfep. Mme owo ẹkedada ẹse ke n̄kpaidem nte mmọ ẹkenamde utom emi. Ẹtise, iban Ntiense ẹma ẹda mbịtmbịt edin̄wọn̄ n̄kpọ ye mfri ẹsọk mbonutom oro ọkọrọ ye mme mbọhọidụn̄, ndien idem ama akpa mmọ aban̄a emi. Ke ini ewetmbụk n̄kpọntịbe okokụtde emi, enye ama obụp ete, “Mmanie ẹnam utom ediye ediye ntem?” Ke ẹma ẹkesian enye, enye ama ọdọhọ ete, “Ubaha-e ediwak mbon en̄wen ẹkpemade mbọhọidụn̄ mmọ nte Mme Ntiense Jehovah!”

Mme Ntiense ẹma ẹsọsọp ẹtịm kọmiti unọ un̄wam iba ke ikpehe iba ke idụt oro man ẹse ẹban̄a utom unọ un̄wam emi. Ata ediwak mme anamutom unyịmesịt ẹkenam utom unọ un̄wam emi. Ke ufan̄ usen ifan̄, ẹma ẹbọp mbufa ufọk ẹnọ Mme Ntiense oro ufọk mmọ ẹkewụrede. Ke ini otu mbon unọ un̄wam kiet ẹkedide ndibọp obufa ufọk nnọ Ntiense kiet, mbọhọidụn̄ n̄wan emi ẹkedada ẹse ke n̄kpaidem. Mbọhọidụn̄ esie kiet ọkọdọhọ ete: “Ufọkabasi mma mbon ke ẹfiak ẹbọp ufọk esiemmọ ẹnọ enye. Idụhe owo Buddha nnyịn oro edide edin̄wam mi. Ubaha-e n̄kpekedide Ntiense ini oro mma mbon ọkọkwọrọde ikọ ọnọ mi!”

Ke ini mbonutom ye kọmiti unọ un̄wam ẹkedụn̄ọrede ufọk oro ekekperede ndiwụre ofụri ofụri ke Thanlyn, ama enen̄ede otụk mmọ ke ini ubon Mme Ntiense oro ẹnyenede ufọk oro ẹkedọhọde mmọ ẹte: “Inyeneke se inamde ufọk nnyịn. Eke nnyịn akam ọfọn. Nnyịn iyaka iso idụn̄ mi—mfịna idụhe! Ndusụk Ntiense ikam inyeneke-nyene ufọk. Ẹkam ẹken̄wam mbon oro kan̄a!”

Ndusụk owo ẹma ẹka ndidak ibuot ke ufọkabasi kiet ke mbọhọ kiet ke Yangon. Edi ẹma ẹkọbi usụn̄ ufọkabasi oro, ntre owo ndomokiet ikekemeke ndidụk. Esịt ama ayat mme owo tutu ẹyom ndibiat usụn̄ ufọkabasi oro. Edi Mme Ntiense Jehovah ẹkekam ẹn̄wan̄wam ediwak owo ẹdụk ẹdibọhọ idio oro ke esịt Ufọkmbono Obio Ubọn̄. Ke uwụtn̄kpọ, ebe ye n̄wan emi ẹdide Ntiense ẹma ẹda mbọhọidụn̄ 20 emi enyịn akanande ẹka Ufọkmbono Obio Ubọn̄ ke Dala man ẹbọhọ idio oro. Ke ndan̄nsiere, mme owo oro ikenyeneke ufọk ndinyọn̄ n̄ka, biọn̄ onyụn̄ ọdọn̄ mmọ. Ebe ama okụt owo emi anyamde edesi onyụn̄ edep se idikemde kpukpru owo oro.

Ndusụk owo ke ubon kiet ke Yangon ẹdi Mme Ntiense Jehovah, mbon eken ẹka nsio nsio ufọkabasi. Ke idio oro ama eketre, ofụri ubon oro ẹma ẹdụk mbono esop ke Ufọkmbono Obio Ubọn̄. Ntak-a? Owo kiet ke ubon oro ọkọdọhọ ete: “Ufọkabasi nnyịn ẹkedọhọ ke  iyedi idise nnyịn ke idio oro ama odobo, edi tutu mfịn emi idịghe. Mme Ntiense kpọt ẹkedi. Mbufo ẹkenọ nnyịn edesi ye mmọn̄. Mbufo itiehe nte mme ufọkabasi eken!” Mbonubon oro, emi mîdịghe Mme Ntiense ẹma ẹma se ẹkenemede ke ibuotikọ Enyọn̄-Ukpeme emi ọdọhọde, “Jehovah Esikop Eseme Nnyịn” ẹnyụn̄ ẹtiene ẹbọrọ ediwak mbụme.

N̄wan kiet emi ekekpepde Bible ye Mme Ntiense Jehovah ama edi mbono esop ke urua kiet ama ekebe tọn̄ọ idio oro eketre. Ẹma ẹkot leta emi n̄kọk itieutom ekewetde aban̄a se ẹnamde man ẹn̄wam mme owo ye se mbon oro ẹkebọhọde idio oro ẹkesobode. N̄wan oro ama atua ke ini ẹkekotde leta oro. Ama enen̄ede otụk enye ndikop ke ẹma ẹyom kpukpru Mme Ntiense ẹkụt ndien ke n̄kpọ inamke mmọ. Ke oro ebede, ẹma ẹnọ enye mme n̄kpọ udu uwem ẹnyụn̄ ẹwụk tent ẹnọ enye ẹkpere ufọk esie. Enye ọdọhọ ke Mme Ntiense ẹma ẹnen̄ede ẹse ẹban̄a imọ.

Jesus ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:35) Ndien James mbet ama ọsọn̄ọ etịn̄ ke ata mbuọtidem esisan̄a ye nti utom. (James 2:14-17) Mme Ntiense Jehovah ẹsinam item emi ẹnyụn̄ ẹdomo ndima orụk ima oro ke ndin̄wam nnyụn̄ nsịn udọn̄ nnọ mbon oro ẹdude ke unana.

[Ikọ Idakisọn̄]

[Se ẹwetde ke ikpọ abisi ke page 11]

Bible ọdọhọ ke ata mbuọtidem esisan̄a ye nti utom