Se Ikpepde Ito Jesus

Iban̄a Idotenyịn Mme Akpan̄kpa

Jesus ama anam owo ita ke nsụhọde n̄kaha ẹset ke n̄kpa, ntre emi anam inịm ke idotenyịn odu ọnọ mme akpan̄kpa. (Luke 7:11-17; 8:49-56; John 11:1-45) Man ifiọk idotenyịn mme akpan̄kpa, ana ibem iso ifiọk se ikadade n̄kpa idi.

Ntak Emi Mme Owo Ẹsidọn̄ọde Ẹnyụn̄ Ẹkpan̄ade?

Mme owo ẹma ẹsikop nsọn̄idem ke ini Jesus ekefende idiọkn̄kpọ mmọ. Ke uwụtn̄kpọ, ke ini ẹkedade owo akpauben̄ ẹsọk Jesus, enye ọkọdọhọ ete: “‘Ewe emem akan, ndi ndidọhọ, Ẹmefen mme idiọkn̄kpọ fo, m̀mê ndidọhọ, Daha ke enyọn̄ nyụn̄ san̄a? Edi, man mbufo ẹfiọk ẹte ke Eyen owo enyene odudu ke isọn̄ ndifen mme idiọkn̄kpọ—’ ndien enye ọdọhọ ọdọn̄ọ akpauben̄ oro ete: ‘Daha ke enyọn̄, men n̄kpana fo, nyụn̄ nyọn̄ ufọk fo.’” (Matthew 9:2-6) Ntre idiọkn̄kpọ esinam owo ọdọn̄ọ onyụn̄ akpa. Nnyịn ikada idiọkn̄kpọ emi imana ito Adam, kpa akpa owo oro Abasi okobotde.—Luke 3:38; Rome 5:12.

Ntak Emi Jesus Akakpade?

Akananam Jesus inamke idiọkn̄kpọ. Ntre ikpakanaha enye akpa. Jesus ama ekpe utịp idiọkn̄kpọ nnyịn ke ndikpa ke ibuot nnyịn. Enye ọkọdọhọ ke ‘ẹyeduọk iyịp imọ kaban̄a ediwak owo man ẹfen mme idiọkn̄kpọ.’—Matthew 26:28.

Jesus ọkọdọhọ n̄ko ete: “Eyen owo [ikedịghe] man ẹnam n̄kpọ ẹnọ enye, edi man enye anam n̄kpọ ọnọ owo onyụn̄ ọnọ ukpọn̄ esie nte ufak ke ibuot ediwak owo.” (Matthew 20:28) Jesus okokot ekọmurua oro enye ekekpede “ufak,” koro ekọmurua emi ama anam ubonowo ẹbọhọ n̄kpa. Jesus ọkọdọhọ n̄ko ete: “Ami ndi man mmọ ẹkpenyene uwem ẹkpenyụn̄ ẹnyene enye uwak uwak.” (John 10:10) Man inen̄ede ifiọk idotenyịn oro mme akpan̄kpa ẹnyenede, ana ifiọk se itịbede inọ mmọ idahaemi.

 Nso Isitịbe ke Ini Owo Akpade?

Ke ini Lazarus ufan Jesus akakpade, Jesus ama etịn̄ se isitịbede ke ini owo akpade. Enye ọkọdọhọ mme mbet esie ete: “‘Lazarus ufan nnyịn aka ndiduọk odudu, edi ami m̀mọ̀n̄ nnam isan̄ n̄ka [Bethany] man n̄kedemede enye ke idap.’. . . Mmọ [ẹkekere] ke enye eketịn̄ aban̄a ndide idap nduọk odudu. Adan̄aoro, Jesus, ke ntre, ọdọhọ mmọ in̄wan̄-in̄wan̄ ete: ‘Lazarus ama akpa.’” Ke ntre, Jesus ama owụt in̄wan̄-in̄wan̄ ete ke mme akpan̄kpa ẹdede, ifiọkke n̄kpọ ndomokiet.—John 11:1-14.

Lazarus ama akpa usen inan̄ mbemiso Jesus akanamde enye eset. Edi Bible idọhọke ke Lazarus ama etịn̄ n̄kpọ ndomokiet aban̄a se iketịbede ke ini enye akakpade. Lazarus ikọfiọkke n̄kpọ ndomokiet ke ini enye akakpade.—Ecclesiastes 9:5, 10; John 11:17-44.

Nso Idi Idotenyịn Mme Akpan̄kpa?

Ẹyenam mme akpan̄kpa ẹset ẹdidu uwem ke nsinsi. Jesus ọkọdọhọ ete: “Ini ke edi eke kpukpru mme andidu ke udi editi ẹdikopde enye [Jesus] uyo ẹnyụn̄ ẹwọn̄ọ ẹdi.”—John 5:28, 29.

Se iditịbede emi owụt ke Abasi ama nnyịn. Jesus ọkọdọhọ ete: “Koro Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”—John 3:16; Ediyarade 21:4, 5.

Edieke oyomde ndifiọk n̄kpọ efen mban̄a se inemede emi, se ibuot 6 ke n̄wed Nso ke Bible Enen̄ede Ekpep? *

[Ikọ Idakisọn̄]