Mmọn̄eyet ke Ekpeme Ikpa

AKPARAWA emi ekedi owo nyon̄. Enye ama ofụhọ, esịt onyụn̄ etịmede enye, mmọn̄eyet ama onyụn̄ ọkọhọ enye ke enyịn, enye ama eben̄e Jehovah Abasi esie ete ọfọn ido ye imọ onyụn̄ atua imọ mbọm. Enye ekeben̄e Abasi ete: “Da mmọn̄eyet mi sịn ke ekpeme [“ikpa,” NW] fo.” (Psalm 56:8) Owo emi ekedi David oro akanade edi edidem Israel. Edi nso ikedi ekpeme ikpa oro enye eketịn̄de aban̄a, ndien didie ke Abasi ekeme ndisịn mmọn̄eyet nnyịn ke ekpeme ikpa emi?

David ama enen̄ede ọfiọk ekpeme ikpa. Ẹkesida ekpeme emi ẹdọn̄ mmọn̄, aran, mmịn, ye bọta. Mbon nyon̄ oro ẹdude ke Sahara, utọ nte mbon Tuareg, ẹsụk ẹkakama ekpeme ikpa, ndien ẹsida ikpa ofụri ebot m̀mê erọn̄ ẹnam ekpeme emi. Ekpeme emi ekeme ndidụk ediwak lita mmọn̄ etienede nte unam oro okponde eketre. Ẹdọhọ ke ekpeme ikpa emi esinam mmọn̄ ebịt, idem ke ufiop eyo desat. Ke eset, ẹkesikọn̄ enye ke mme enan̄-mbiomo. Idahaemi, ẹsikọn̄ enye ke iso ikpọ moto!

Ikọ oro David eketịn̄de aban̄a ekpeme ikpa ekeme ndinyene ufọn nnọ nnyịn mfịn. Didie? Ọfọn, Bible anam an̄wan̄a nte ke Satan akara ererimbot emi ye nte ke enye okop “akwa iyatesịt” ke eyo nnyịn. Emi anam ekese afanikọn̄ ẹdu ke isọn̄. (Ediyarade 12:12) Ke ntak oro, ediwak owo—akpan akpan mbon oro ẹdomode ndinem Abasi esịt—ẹsikop mfụhọ ye editịmede esịt, ẹnyụn̄ ẹbọ ufen ukem nte David. Ndi afo emetiene enyene utọ mfịna emi? Utọ mme anam-akpanikọ emi ẹnyene uko ẹnyụn̄ ẹdomo ndisọn̄ọ nda kpa ye ‘mmọn̄eyet.’ (Psalm 126:6) Mmọ ẹkpenyene ndifiọk ke Ete mmọ eke heaven okụt mme idomo oro mmọ ẹsobode onyụn̄ okụt nte mme idomo emi ẹnamde mmọ ẹfụhọ. Enye enen̄ede ọdiọn̄ọ ubiak oro mme asan̄autom esie ẹkopde, enye esinyụn̄ eti mmọn̄eyet ye ufen mmọ nte n̄kpọ eke enye ọdọn̄de mmọn̄eyet emi ke ekpeme ikpa esie.