Ndi Ọdiọk Ndikot Enyịn̄ Abasi?

KE N̄wed Abasi Usem Hebrew, oro ẹsiwakde ndikot “Akani Testament,” ẹwet enyịn̄ Abasi ntem יהוה (ẹkot ẹto nnasia ẹka ufien) ke n̄kpọ nte utịm ike-7,000 ke akpasarade usem Hebrew. Oro ọwọrọ ke ẹwet enyịn̄ Abasi ke abisi usem Hebrew inan̄ emi Yohdh, He, Waw, ye He, emi ẹsiwakde ndiwet nte YHWH.

Ke eset, nsunsu ekikere ama anam mme Jew ẹkere ke ifọnke ẹkot enyịn̄ Abasi. Ntak edi oro mmọ ẹketrede ndikot enyịn̄ Abasi, ẹnyụn̄ ẹkabade ẹwet n̄kpọ en̄wen ke itie esie. Nte ededi, ediwak mme akabade Bible ẹkabade enyịn̄ Abasi nte “Yahweh,” m̀mê “Jehovah.” Kiet ke otu Bible oro ẹkabarede enyịn̄ Abasi ntem edi Edisana Ŋwed Abasi Ibom. Ke ini Moses okobụpde Abasi m̀mê nso ke imọ idibọrọ edieke nditọ Israel ẹbụpde m̀mê anie ọdọn̄ imọ utom, Abasi ọkọbọrọ ete: “Afo edidọhọ nditọ Israel, ete, Jehovah Abasi mme ete mbufo, Abasi Abraham, ye Abasi Isaac, ye Abasi Jacob, ọdọn̄ mi utom ke ọtọ mbufo: emi edi enyịn̄ mi ke nsinsi, emi onyụn̄ edi se ẹdade ẹti mi ke kpukpru emana.”—Exodus 3:15.

Ke ini Jesus ọkọbọn̄de akam, se enye eketịn̄de ama owụt ke enye ama esikot enyịn̄ Abasi. Enye ọkọdọhọ ete: “Mmayarade enyịn̄ Fo nnọ mmọ, nyonyụn̄ nyarade.” Jesus okonyụn̄ ọdọhọ ke akam oro ẹsiwakde ndikot Akam Ọbọn̄, ete: “Ete nnyịn emi odude ke heaven: Yak ikpono enyịn̄ Fo.”—John 17:26; Matthew 6:9, Edisana Ŋwed Abasi Ibom.

Ntre, idem ekeme ndikpa fi ndifiọk ke n̄wed oro Pope Benedict XVI osiode ke ndondo emi, oro ẹkotde Jesus of Nazareth, ọdọhọ ke “nditọ Israel ẹma . . . ẹnen̄ede ẹnen ndiketre ndikot enyịn̄ oro Abasi ọkọnọde idemesie, oro ẹwetde nte YHWH, mbak mme owo ẹdisụhọde enyịn̄ emi itie nnam enye akabade etie nte enyịn̄ ndem. Inyụn̄ ifọnke nte ẹwetde enyịn̄ emi ke mme Bible oro ẹsion̄ode ke ndondo emi—koro nditọ Israel ẹkesida enyịn̄ emi nte ndịben̄kpọ oro owo mîkpenyeneke ndikot—mbak enyịn̄ Abasi edikabade etie nte ikpîkpu enyịn̄ eset.”

Afo ekere didie? Ndi ọdiọk ndikot enyịn̄ Abasi? Edieke Jehovah ke idemesie ọdọhọde ete: “Emi edi enyịn̄ mi ke nsinsi, emi onyụn̄ edi se ẹdade ẹti mi ke kpukpru emana,” ndi odu owo ekededi oro enyenede unen ndifan̄a se enye etịn̄de?

[Ndise ke page 30]

Jesus ama esikot enyịn̄ Abasi