Nso Idi Uduak Uwem?

NTAK IKPOYOMDE IBỌRỌ MBỤME EMI-E? Iwakke se isinamde owo ofụhọ nte enye ndikere ke uwem inyeneke se ọwọrọde inyụn̄ inyeneke uduak. Ke n̄kan̄ eken, esịt esisọn̄ owo emi etịmde ọfiọk se uwem ọwọrọde. Viktor E. Frankl, ataifiọk esịp, emi ọkọbọhọde nsobo eke orụk ekewet ete: “Owo ndifiọk ke uwem imọ enyene uduak edi n̄kpọ kiet oro ekemede ndinen̄ede n̄n̄wam enye ọbọhọ ndiọkn̄kan idaha ke ererimbot emi.”

Nte ededi, mme owo ẹnyene ediwak nsio nsio ekikere ẹban̄a n̄kpọ emi. Ediwak owo ẹkere ke enyene idem ekpebiere se idide uduak uwem esie. Ke edide isio, ndusụk mbon oro ẹnịmde ke unam okoforo owo ẹkpep nte ke uwem inen̄ekede inyene se ọwọrọde.

Ke akpanikọ, ata nnennen usụn̄ ndifiọk se idide uduak uwem edi ndika mbịne Andinọ Uwem, kpa Jehovah Abasi. Kam kere ise se Ikọ esie, kpa Bible, etịn̄de aban̄a n̄kpọ emi.

Se Bible Etịn̄de

Bible ekpep nte ke Jehovah Abasi ama enyene akpan uduak emi akanamde enye obot erenowo ye n̄wan. Jehovah ọkọnọ akpa ete ye eka nnyịn ewụhọ emi ete.

Genesis 1:28. “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye: ẹnyụn̄ ẹkara iyak ke akamba mmọn̄, ye inuen ke enyọn̄, ye kpukpru n̄kpọ uwem eke ẹnyọnide ke isọn̄.”

Uduak Abasi ekedi Adam ye Eve ye nditọ mmọ ndinam ofụri isọn̄ akabade edi paradise. Enye ikoyomke mme owo ẹsọn̄ ẹnyụn̄ ẹkpan̄a; ikonyụn̄ iyomke ubonowo ẹsabade isọn̄. Nte ededi, ke ntak ndiọi ubiere oro akpa ete ye eka nnyịn ẹkenamde, nnyịn ima ida idiọkn̄kpọ ye n̄kpa imana. (Genesis 3:2-6; Rome 5:12) Kpa ye oro, uduak Jehovah ikpụhọkede. Ke mîbịghike, ofụri isọn̄ ayakabade edi paradise.—Isaiah 55:10, 11.

Ke ini Jehovah okobotde nnyịn, enye ama ọnọ nnyịn ifiọk ye ukeme ndida nnam uduak esie. Enye ikobotke nnyịn ndida ke idem. Kam se nte mme itie Bible oro ẹtienede mi ẹwụtde uduak Abasi.

Ecclesiastes 12:13. “Yak nnyịn ikop utịt ofụri n̄kpọ emi: bak Abasi, nyụn̄ nịm mbet esie: koro emi edi eke kpukpru owo.”

Micah 6:8. “Nso ke Jehovah oyom ye afo, ke mîbọhọke ndinam se inende, nnyụn̄ mma ima Abasi, nnyụn̄ nsụk idem nsan̄a ye Abasi fo?”

Matthew 22:37-39. “‘Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.’ Emi edi n̄kponn̄kan ye akpa ewụhọ. Udiana, eke ebietde enye, edi emi, ‘Afo enyene ndima mbọhọidụn̄ fo nte idemfo.’”

Nte Ibọrọ Bible Anamde Esịt Ana Nnyịn Sụn̄

Man ekpri masịn ekededi ekeme ndinam utom mfọn mfọn, ana ẹda enye ẹnam se ẹkebotde enye ẹnọ, ẹnyụn̄ ẹtiene ndausụn̄ oro mme andibot masịn oro ẹnọde. Ntre n̄ko, man nnyịn ifep mme afanikọn̄—edide ke n̄kan̄ eke spirit, ke ekikere, ke n̄kan̄ eke ntụk, m̀mê ke n̄kan̄ eke ikpọkidem—ana nnyịn idu uwem ekekem nte Andibot nnyịn oyomde.  Se nte ndifiọk uduak Abasi ekemede ndinam esịt ana nnyịn sụn̄ ke mme usụn̄ oro ẹtienede mi.

Ke ini ẹbierede se idide ata akpan n̄kpọ ke uwem, ediwak owo ẹnen̄ede ẹsịn idem ẹyom ediwak inyene mfịn. Edi Bible odụri owo utọn̄ ete ke “mbon oro ẹbierede ndinyene inyene ẹduọ ẹdụk idomo ye ekpọ ye ediwak ndisịme ye idiọk udọn̄.”—1 Timothy 6:9, 10.

Ke n̄kan̄ eken, mbon oro ẹkpepde ndima Abasi utu ke ndima okụk ẹkop inem uwem. (1 Timothy 6:7, 8) Mmọ ẹfiọk ke ọfọn inam utom ọkpọsọn̄ ẹnyụn̄ ẹfiọk ke ana ise iban̄a mme n̄kpọ oro mmimọ iyomde. (Ephesus 4:28) Edi mmọ n̄ko ẹda item Jesus emi ke akpan n̄kpọ: “Baba owo kiet ikemeke ndidụk ufụn nnọ eteufọk iba; koro eyedi enye ayasua kiet onyụn̄ ama enye eken, mîdịghe enye ayadiana ye kiet onyụn̄ esịn enye eken ke ndek. Mbufo ikemeke ndidụk ufụn nnọ Abasi ye Inyene.”—Matthew 6:24.

Ke ntre, utu ke ndiyak utom idịbi udia m̀mê ediyom inyene edi akpan n̄kpọ ke uwem mmọ, mbon oro ẹmade Abasi ẹnịm edinam uduak Abasi akpa ke uwem mmọ. Mmọ ẹfiọk ke Jehovah Abasi eyese aban̄a mmimọ edieke mmimọ iyakde ofụri uwem mmimọ isịn ke edinam uduak Abasi. Ke akpanikọ, Jehovah ada ke obiomo imọ ndise mban̄a mmọ.—Matthew 6:25-33.

Ke ini ẹnamde n̄kpọ ye mbon efen, ediwak owo ẹsibem iso ẹyom ufọn idemmọ. Mme owo inyeneke emem mfịn, ndien akpan ntak unana emem emi edi koro ata ediwak owo ẹdide “mme ama idem, . . . [mînyụn̄ inyeneke] ndammana ima.” (2 Timothy 3:2, 3) Ke ini owo okpude m̀mê afan̄ade n̄kpọ ye mmọ, mmọ ẹsinen̄ede ‘ẹyat esịt ẹnyụn̄ ẹfụt esịt, ẹfiori n̄kpo, ẹnyụn̄ ẹtịn̄ ikọ isụn̄i.’ (Ephesus 4:31) Utọ unana mfara ke idem oro ‘esidemede utọk’ utu ke ndinam esịt ana owo sụn̄.—Mme N̄ke 15:18.

Ke edide isio ye oro, mbon oro ẹnamde ewụhọ Abasi oro ọdọhọde ẹma mbọhọidụn̄ mmọ nte idemmọ, “ẹfọn ido ye kiet eken, ẹtua owo mbọm, ẹfen kiet eken ke ofụri esịt.” (Ephesus 4:32; Colossae 3:13) Idem ke ini mbon en̄wen mîfọnke ido ye mmọ, mmọ ẹsidomo ndikpebe Jesus, emi ‘mîkosụn̄ike owo ke ini ẹsụn̄ide enye.’ (1 Peter 2:23) Ukem nte Jesus, mmọ ẹfiọk ke ndinam n̄kpọ nnọ mbon efen, idem mbon oro mîwụtke esịtekọm iban̄a se ẹnamde ẹnọ mmọ, esinam owo okop uyụhọ. (Matthew 20:25-28; John 13:14, 15; Utom 20:35) Jehovah Abasi ayak spirit esie ọnọ mbon oro ẹkpebede Eyen esie, ndien spirit emi anam mmọ ẹnyene emem.—Galatia 5:22.

Didie ndien ke usụn̄ oro afo esede ini iso ekeme ndinam esịt ana fi sụn̄?

[Se ẹwetde ke ikpọ abisi ke page 6]

Oyom owo etịm ọfiọk se uwem ọwọrọde

[Ndise ke page 7]

Jesus ama ekpep nnyịn nte ikemede ndinyene emem