Ini Ewe ke Obio Ubọn̄ Abasi Edidi?

“ỌBỌN̄, nte afo ọmọn̄ ọtọn̄ọ ntak ayak obio ubọn̄ ọnọ Israel ke emi?” (Utom 1:6) Mme apostle ẹma ẹnen̄ede ẹyom ndifiọk ini oro Obio Ubọn̄ Abasi edidide. Mfịn, ke osụk ọdọdọn̄ mme owo ndifiọk ini emi Obio Ubọn̄ Abasi edidide okposụkedi n̄kpọ nte isua 2,000 ẹma ẹkebe tọn̄ọ ẹkebụp mbụme oro.

Sia Obio Ubọn̄ ekedide ibuotikọ ukwọrọikọ Jesus, afo emekeme ndikere ke enye ama eneme n̄kpọ aban̄a mbụme emi. Ke akpanikọ, enye ama ọbọrọ! Enye ama etịn̄ ediwak ini aban̄a akpan ini oro enye okokotde, “edidu” imọ. (Matthew 24:37) Edidu oro enen̄ede enyene ebuana ye ini oro Obio Ubọn̄ Messiah editọn̄ọde. Nso idi edidu emi? Ẹyak ineme akpan n̄kpọ inan̄ oro Bible ayararede aban̄a edidu Christ.

1. Edidu Christ editọn̄ọ anyan ini ke enye ama akakpa. Jesus ama ọnọ uwụtn̄kpọ kiet oro enye akanamde ẹfiọk ke imọ idi ọbọn̄ ‘oro akakade anyan idụt ndikọbọ ubọn̄ nda.’ (Luke 19:12) Didie ke uwụtn̄kpọ oro okosu? Ọfọn, Jesus ama akpa ẹnyụn̄ ẹnam enye eset; ekem enye ama aka “anyan idụt” emi edide heaven. Nte Jesus ekebemde iso etịn̄ ke mbiet uwụtn̄kpọ oro, enye ekenyene ndibọ ubọn̄ nnyọn̄ ndi “ke anyan ini ama ekebe.”—Matthew 25:19.

 Isua ifan̄ ke Jesus ama ọkọdọk heaven, apostle Paul ama ewet ete: “Owo emi [Jesus] akawa uwa kiet aban̄a mme idiọkn̄kpọ ke nsinsi onyụn̄ osụhọde etetie ke ubọk nnasia Abasi, ọtọn̄ọde ke ini oro enye etie ebet tutu ẹnịm mme asua esie nte udori ukot esie.” (Mme Hebrew 10:12, 13) Ke Jesus ama ekesịm heaven, akana enye ebet ke anyan ini. Jesus ikenyeneke ndibet aba ke ini Jehovah Abasi akanamde enye edi Edidem Obio Ubọn̄ Messiah oro ẹken̄wọn̄ọde. Ini oro ke edidu Christ ọkọtọn̄ọ. Ndi akana mme owo ke isọn̄ ẹkụt akwa n̄kpọntịbe emi?

2. Owo ikwe edidu Christ ke enyịn. Ti ete ke Jesus ama etịn̄ se ididide idiọn̄ọ edidu esie. (Matthew 24:3) Edieke ẹkpekemede ndida enyịn n̄kụt edidu esie, ndi ufọn idiọn̄ọ okpodu? Ke uwụtn̄kpọ: Yak idọhọ ke afo aka ndise inyan̄ibom. Afo emekeme ndikụt idiọn̄ọ oro edin̄wamde fi odụk nnennen usụn̄, edi ke ini afo esịmde esụk, ndi ọkpọfọn ẹwụk akamba idiọn̄ọ ke esụk oro ẹdọhọ, se “Inyan̄ibom” mi? Baba-o! Ufọn idụhe ndida idiọn̄ọ n̄wụt se afo ekemede ndikụt ke enyịn!

Jesus eketịn̄ aban̄a idiọn̄ọ edidu esie man an̄wam mme owo ẹdiọn̄ọ se iditịbede ke heaven, idịghe man owụt se mme owo ẹkemede ndida enyịn mmọ n̄kụt. Ntem, Jesus ọkọdọhọ ete: “Obio ubọn̄ Abasi idịghe nte ẹkụtde ke enyịn.” (Luke 17:20) Didie ndien ke idiọn̄ọ oro ediwụt mbon emi ẹdude ke isọn̄ nte ke edidu Christ ọmọtọn̄ọ?

3. Ẹdida n̄kpọsọn̄ ndutịme ke isọn̄ ẹdiọn̄ọ ini edidu Jesus. Jesus ọkọdọhọ ke ekọn̄, akan̄, unyekisọn̄, ndiọi udọn̄ọ, ye ubiatibet ẹyedu ke isọn̄ ke ini edidu imọ nte Edidem ke heaven. (Matthew 24:7-12; Luke 21:10, 11) Nso idida kpukpru nnanenyịn emi idi? Bible anam an̄wan̄a nte ke esịt enen̄ede ayat Satan oro edide “andikara ererimbot emi” sia enye ọfiọkde nte ke emi edidu Christ nte Edidem ama ọkọtọn̄ọ mi, ke ini imọ enen̄ede edi ibio. (John 12:31; Ediyarade 12:9, 12) Ke akpanikọ, nnyịn imokụt ekese n̄kpọ oro ẹwụtde ke Satan ke ayat esịt ye nte ke edidu Christ ama ọtọn̄ọ. Ẹnen̄ede ẹkụt idiọn̄ọ emi akan nte akanam ẹkụtde akpan akpan toto ke 1914, kpa isua emi mme ewetmbụk ẹdọhọde ke ekedi akwa ini ukpụhọde.

Ofụri emi ẹkeme nditie nte ndiọi mbụk, edi idịghe. Emi ọwọrọ ke Obio Ubọn̄ Messiah ke akara idahaemi ke heaven. Obio Ubọn̄ oro ayakara ofụri isọn̄ emi ke mîbịghike. Mme owo ẹdisan̄a didie ẹfiọk Obio Ubọn̄ oro man ẹnyịme ukara esie ẹnyụn̄ ẹdu ke idak esie?

4. Ẹda utom ukwọrọikọ oro ẹnamde ke ofụri ererimbot ẹdiọn̄ọ edidu Jesus. Jesus ọkọdọhọ ke edidu imọ edidi “nte mme usen Noah ẹkedide.” * (Matthew 24:37-39) Noah ikọkọn̄ke ubom kpọt; enye n̄ko ekedi “ọkwọrọ edinen ido.” (2 Peter 2:5) Noah ama odụri  mme owo utọn̄ ete ke Abasi ọmọn̄ ebiere ikpe ọnọ ererimbot oro ke mîbịghike. Jesus ama ọdọhọ ete ke mme anditiene imọ ẹyenam ukem utom oro ke ini edidu imọ. Enye ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.”—Matthew 24:14.

Nte ikokụtde ke ibuotikọ oro ekebemde iso, Obio Ubọn̄ Abasi oyosobo kpukpru ukara ererimbot emi efep. Utom ukwọrọikọ anam mme owo ẹfiọk ke ukara eke heaven emi ọmọn̄ ọsọp osobo idiọk ererimbot emi. Enye n̄ko ọnọ mme owo ifet ndibọhọ nsobo oro nnyụn̄ ndụk Obio Ubọn̄ Abasi. Akpan mbụme emi anade ọbọrọ ndien edi, Afo edinam n̄kpọ didie aban̄a emi?

Ndi Obio Ubọn̄ Abasi Edidi Eti Mbụk Inọ Fi?

Etop oro Jesus ọkọkwọrọde ama anam mme owo ẹnyene akakan idotenyịn. Ke ẹma ẹkesọn̄ ibuot ke Eden ediwak tọsịn isua emi ẹkebede, Jehovah Abasi ama aduak nditọn̄ọ ukara oro edinamde n̄kpọ ẹfiak ẹfọn, edinyụn̄ anamde mme anam-akpanikọ ubonowo ẹfiak ẹdu uwem nte Abasi okoyomde mmọ ẹdu toto ke editọn̄ọ—oro edi, ndidu uwem ke nsinsi ke Paradise mi ke isọn̄. Nso ikeme ndiduai owo idem n̄kan edifiọk ke ukara emi ẹken̄wọn̄ọde ata anyan ini ko ke akara idahaemi ke heaven? Emi idịghe ikpikpu ekikere, edi n̄kpọ emi eketịbede ke akpanikọ!

Idahaemi, Edidem oro Abasi emekde ke akara ke otu mme asua esie. (Psalm 110:2) Ke mbiara ererimbot emi adianarede ọkpọn̄ Abasi mi, Messiah ke anam uduak Ete esie. Uduak emi edi ndiyom kpukpru mbon oro ẹyomde ndinen̄ede mfiọk Abasi, ẹnyụn̄ ẹyomde ndituak ibuot nnọ enye “ke spirit ye ke akpanikọ.” (John 4:24) Owo ekededi ekeme ndinyene idotenyịn edidu uwem ke nsinsi ke idak Obio Ubọn̄ Abasi. (Utom 10:34, 35) Nnyịn imesịn udọn̄ inọ fi ite anam n̄kpọ man enyene utọ utịbe utịbe idotenyịn emi. Kpep n̄kpọ ban̄a Obio Ubọn̄ Abasi idahaemi, man ekeme ndidu ke idak edinen ukara oro ke nsinsi!—1 John 2:17.

[Ikọ Idakisọn̄]

[Ndise ke page 8, 9]

Ndiọi mbụk oro ikopde kpukpru usen ẹwụt ke ibịghike, nti n̄kpọ ke ẹdi

[Ebiet Ẹdade N̄kpọ Ẹto]

Antiaircraft gun: U.S. Army photo