‘Mbufo Ifiọkke Usen M̀mê Hour Oro’
‘Mbufo Ifiọkke Usen M̀mê Hour Oro’
“Ẹdu ke ukpeme, ndien, koro mbufo mîfiọkke usen m̀mê hour oro.”—MATT. 25:13.
DIDIE KE AFO ỌKPỌBỌRỌ?
Nso ufọn ke inyene ke nditre ndifiọk usen m̀mê hour oro utịt edidide?
Didie ke mbon oro ẹyetde aran ẹdu ke ukpeme?
Didie ke ikeme ndiwụt ke imeben̄e idem inọ edidi Christ?
1-3. (a) Nọ uwụtn̄kpọ iba emi ẹbietde uwụtn̄kpọ Jesus. (b) Mme mbụme ewe ke oyom ibọrọ?
DA NTE ke ata akwa owo ọdọhọ fi ediwat imọ aka akpan n̄kpọ. Edi esisịt ini mbemiso akade ndimen enye, afo okụt ke aranuwat fo idikemke. Ana okoyom ebiet edep. Akwa owo emi edisịm ke ini akade ndidep aranuwat. Enye oyom fi edi ikwe. Enye ikemeke ndibet, ntre enye ọdọhọ owo en̄wen emen imọ. Ọmọsọp ọnyọn̄ edisịm, edi ete mbon ama adaha ọkpọn̄ fi. Ekpetie fi didie ke idem?
2 Idahaemi, da nte ke afo edi akwa owo oro, ndien ke ememek owo ita oro ẹdotde ete ẹse ẹban̄a akpan mbubehe fo. Emetịn̄ ọnọ mmọ mbita se ẹkpenamde, ndien mmọ ẹnyụn̄ ẹnyịme ẹte iyanam. Edi ke ini afiakde edi ke esisịt ini ama ekebe, afo edikụt ke owo iba kpọt ke otu mmọ ẹkenam se ọkọdọn̄de mmọ. Se ikam idiọkde ikan edi ke owo emi mîkanamke utom oro oyom se etịn̄de anyan̄a idem. Edi enye ikakam idomoke-domo ndinam n̄kpọ oro. Ekpetie fi didie ke idem?
3 Mme uwụtn̄kpọ emi ẹbiet uwụtn̄kpọ emi Jesus ọkọnọde aban̄a nditọiban ye talent, ndien emi okowụt ntak emi ndusụk mme Christian emi ẹyetde aran ẹdinamde akpanikọ ẹnyụn̄ ẹnyene ọniọn̄ ke utịt ini, edi mbon eken inamke akpanikọ inyụn̄ inyeneke ọniọn̄. * (Matt. 25:1-30) Enye ama odori nsọn̄uyo ke ọkpọikọ ke ndidọhọ ete: “Ẹdu ke ukpeme, ndien, koro mbufo mîfiọkke usen m̀mê hour oro”—oro edi, nnennen ini emi Jesus edinamde se Abasi ekebiere ọnọ ererimbot Satan. (Matt. 25:13) Nnyịn imekeme ndidu ke ukpeme mfịn. Nso ufọn ke ikeme ndibọ ke ndidu ke ukpeme nte Jesus eketemede? Mmanie ẹdu ke ukpeme? Ndien nso ke ikpanam man idu ke ukpeme?
BỌ UFỌN EDIDU KE UKPEME
4. Ntak emi mîyomke ifiọk ata nnennen ini emi utịt edidide mbemiso ikemede ‘ndidu ke ukpeme’?
4 Enyene mme n̄kpọ emi ẹnyenede akpan ini emi ẹsinamde, utọ nte, ndinam utom ke usiakifia, ndika n̄kokụt abiausọbọ, ndisan̄a ke tren n̄ka isan̄. Edi ndise n̄kanika ke ini ẹnịmede ikan̄ m̀mê ẹnyan̄ade owo ke ini n̄kpọntịbe ekeme ndiwọn̄ọde owo ntịn̄enyịn m̀mê akam ada owo ibuot. Ke mme utọ idaha emi, enen̄ede ọfọn ndiwụk ntịn̄enyịn ke se ẹnamde akan ndinyenyene ini oro akpanade ẹnam. Nte utịt editịm n̄kpọ emi asan̄ade ekpere, enen̄ede oyom ẹteme mme owo se Jehovah anamde man mme owo ẹnyene edinyan̄a. Iyomke ifiọk nnennen ini emi utịt edidide mbemiso ikemede ndidu ke ukpeme nte mme Christian. Ke nditịm ntịn̄, odu ke nsụhọde n̄kaha usụn̄ ition emi ibọde ufọn ito editre ndifiọk ata nnennen usen m̀mê hour emi utịt edidide.
5. Didie ke nditre ndifiọk usen m̀mê hour oro anam ẹfiọk se idude nnyịn ke esịt?
5 Akpa, nditre ndifiọk ini emi utịt edidide anam ẹfiọk se idude nnyịn ke esịt. Ke nditịm ntịn̄, nditre ndifiọk ini oro ọnọ nnyịn uku, ayak nnyịn ibiere ke idem nnyịn ndisọn̄ọ nda ye Jehovah. Kpa ye oro ọdọn̄de nnyịn ndibọhọ utịt editịm n̄kpọ emi, nnyịn inamke n̄kpọ Jehovah ke ntak emi iyomde enye ọnọ nnyịn uwem, edi edi ke ntak ima. (Kot Psalm 37:4.) Esikam enenem nnyịn ndinam uduak Abasi, ndien imonyụn̄ ifiọk ke Abasi ekpep nnyịn n̄kpọ man ibọ ufọn. (Isa. 48:17) Nsa-o, mme ewụhọ esie idobike nnyịn mbiomo.—1 John 5:3.
6. Didie ke esitie Abasi ke idem ke ini inamde n̄kpọ esie ke ima, ndien ntak-a?
6 Ọyọhọ iba, nditre ndifiọk ini m̀mê hour oro ọnọ nnyịn ifet ndinam esịt adat Jehovah. Ke ini inamde n̄kpọ Abasi ke ntak ima—idịghe ke ntak emi ini ekperede m̀mê ke ntak utịp oro enye edinọde—nnyịn iyetiene inam Jehovah owụt ke Satan asua esie edi osu nsu. (Job 2:4, 5; kot Mme N̄ke 27:11.) Ke ikerede iban̄a kpukpru ubiak ye ntuan̄a emi Devil esịnde ke isọn̄ emi, esịt enen̄ede enem nnyịn ndida nnọ ukara Jehovah nnyụn̄ nsịn idiọk ukara Satan.
7. Ntak emi ọfọnde ndidu uwem n̄waidem?
7 Ọyọhọ ita, nnyịn nditre ndidiọn̄ọ akpan usen emi utịt edidide anam nnyịn idu uwem n̄waidem. Ndusụk mbon emi mîfiọkke Abasi mfịn ẹfiọk n̄ko ke ererimbot emi idibịghike aba. Sia mmọ ẹkopde ndịk ke ererimbot ọmọn̄ ọsọp ebe efep, edu mmọ edi: “Ẹyak nnyịn idia inyụn̄ in̄wọn̄, koro nnyịn iyakpa n̄kpọn̄.” (1 Cor. 15:32) Edi ndịk inamke nnyịn. Nnyịn idian̄akede itie ikpọn̄ man iyom ibụk ibụk udọn̄ idem nnyịn. (N̄ke 18:1) Utu ke oro, nnyịn imakan̄ idem nnyịn inyụn̄ inen̄ede ida ini, odudu, ye inyene nnyịn itan̄a eti mbụk Obio Ubọn̄ Abasi inọ mme owo. (Kot Matthew 16:24.) Enenem nnyịn ndinam n̄kpọ Abasi, akpan akpan ndin̄wam mme owo ẹfiọk enye.
8. Ewe uwụtn̄kpọ Bible owụt ntak emi oyomde iberi edem ọyọhọ ọyọhọ ke Jehovah ye Ikọ esie?
8 Ọyọhọ ufọn inan̄ oro inyenede ke emi nnyịn mîfiọkke ini emi utịt edidide edi nte ke emi an̄wam nnyịn inen̄ede iberi edem ke Jehovah inyụn̄ itịn̄ enyịn ida Ikọ esie idu uwem. N̄kpọ kiet emi mme anana-mfọnmma owo ẹsimade ndinam edi ndiberi edem ke idemmọ. Paul eketeme kpukpru Christian ete: “Yak owo eke ekerede ete imọ imọsọn̄ọ ida ekpeme mbak enye ediduọ.” Owo 23,000 ẹma ẹsọn̄ ibuot ye Jehovah ẹnyụn̄ ẹkpan̄a esisịt ini mbemiso Joshua akadade ikọt Abasi odụk Isọn̄ Un̄wọn̄ọ. Paul ọdọhọ ete: “[Ẹkewet mme n̄kpọ emi] ndida ndụri nnyịn utọn̄, kpa nnyịn emi idude ke utịt editịm n̄kpọ emi.”—1 Cor. 10:8, 11, 12.
9. Didie ke idomo ekeme ndinam mbuọtidem nnyịn ọsọn̄ onyụn̄ anam inen̄ede ikpere Abasi?
9 Ọyọhọ ufọn ition oro inyenede ke emi nnyịn mîfiọkke ini emi utịt edidide edi nte ke enye anam nnyịn ikpep n̄kpọ ito mme idomo inyụn̄ iyak mmọ ẹsọn̄ọ mbuọtidem nnyịn. (Kot Psalm 119:71.) Mme akpatre usen editịm n̄kpọ emi ẹnen̄ede ẹdi “ndiọkeyo emi ọsọn̄de ndiyọ.” (2 Tim. 3:1-5) Ediwak owo ke ererimbot Satan ẹsua nnyịn, ntre ẹkeme ndikọbọ nnyịn ke ntak mbuọtidem nnyịn. (John 15:19; 16:2) Edieke isụhọrede idem itiene ndausụn̄ Abasi ke ini idomo, emi ayanam mbuọtidem nnyịn enen̄ede ọsọn̄, kpa nte ikan̄ esinamde gold asana. Nnyịn iditreke ndinam n̄kpọ Abasi. Utu ke oro, nnyịn iyekpere Jehovah ke usụn̄ oro nnyịn mîkekereke.—Jas. 1:2-4; 4:8.
10. Nso isinam etie nte ini ebe usọp usọp?
10 Se nnyịn inamde edibiere nte nnyịn isede ini. Edieke inamde ekese inyụn̄ inen̄erede isịn idem ke se inamde, ini edibe usọp usọp. Ukem ntre, edieke isịnde idem inam edinem utom oro Jehovah ọnọde nnyịn, usen ye hour oro ẹyesọp ẹkan nte nnyịn ikerede. Ata ediwak mbon oro ẹyetde aran ẹnịm eti uwụtn̄kpọ ke afan̄ emi. Ẹyak ineme ibio ibio se iketịbede ke Jesus ama ọkọtọn̄ọ ndikara ke 1914, inyụn̄ ise nte ndusụk owo ẹkedude ke mben̄eidem ke adan̄aemi ndusụk mîkodụhe.
MBON ORO ẸYETDE ARAN ẸDU KE MBEN̄EIDEM
11. Ke 1914 ama ekebe, ntak emi ndusụk mbon oro ẹyetde aran ẹkekerede ke Ọbọn̄ ebịghi ndidi?
11 Ti uwụtn̄kpọ oro Jesus ọkọnọde aban̄a nditọiban ye talent. Edieke nditọiban m̀mê ifịn oro ẹkpekefiọkde ini emi ebendọ m̀mê eteufọk mmọ edidide, ufọn ikpokodụhe mmọ ndidu ke ukpeme. Edi mmọ ikọfiọkke, ntre ama oyom mmọ ẹdu ke mben̄eidem. Okposụkedi emi mbon oro ẹyetde aran ẹketiede ke ediwak isua ẹbet 1914 nte akpan isua, mmọ ikenen̄ekede ifiọk se iditịbede. Ke ini n̄kpọ mîketịbeke nte mmọ ẹkedoride enyịn, ndusụk mmọ ẹkekere ke Ebendọ ebịghi ndidi. Nte ini akakade, eyenete kiet ọkọdọhọ ete: “Ibat ibat owo ke otu nnyịn ẹma ẹnen̄ede ẹkere ke iyaka heaven ke akpa urua October 1914.”
12. Didie ke mbon oro ẹyetde aran ẹwụt ke imanam akpanikọ inyụn̄ inyene ọniọn̄?
12 Kere nte idem ekemede ndimem owo edieke enye ekerede ke utịt ọmọn̄ edi, edi ekem idịghe! Akan oro, nditọete oro ẹma ẹsobo ubiọn̄ọ ke akpa ekọn̄ ererimbot. Ẹma ẹkpere nditre utom ukwọrọikọ ofụri ofụri. Eketie nte n̄kpọ eke ẹdọhọde ke mbon oro ẹyetde aran ẹdede. Edi ke 1919, n̄kpọ ama edemede mmọ ke idap! Jesus ama edi edise kpukpru mbon oro ẹkedọhọde ke idi Christian. Ndusụk mbon oro ẹyetde aran ikodotke, ndien mmọ ikekemeke ndinam utom nnọ Jesus Eteufọk nnyịn. (Matt. 25:16) Mmọ ikodụhe ke mben̄eidem; edi ẹketie nte ndisịme nditọiban oro mîkesịnke aran oro edikemde ke utuenikan̄ mmọ. Ndien ukem nte ofụn oro ekedide ifu do, mmọ ikenyịmeke ndinam n̄waidem ke ntak Obio Ubọn̄. Edi ata ediwak ke otu mbon oro ẹyetde ẹma ẹnen̄ede ẹsọn̄ọ ẹda ẹnyụn̄ ẹwụt ke imen̄ede iyom ndinam n̄kpọ nnọ Eteufọk mmimọ idem ke ini ekọn̄ oro n̄kpọ ọkọsọn̄de do.
13. Nso ikedi edu otu ofụn ke 1914 ama ekebe, ndien nso idi edu mmọ mfịn?
13 Ke 1914 ama ekebe, Enyọn̄-Ukpeme (Ikọmbakara) ama etịn̄ ọkpọikọ emi ete: “Nditọete, nnyịn oro inyenede nnennen edu iban̄a Abasi ikwe edikpu ke ndutịm Esie ekededi. Nnyịn ikoyomke ẹnam uduak nnyịn; ntre ke ini nnyịn ikokụtde ke nnyịn ikodori enyịn ke se mîkenenke ke October, 1914, do nnyịn ima idat esịt ndifiọk ke Ọbọn̄ ikokpụhọkede Uduak Esie man ekem ye ekikere nnyịn. Nnyịn ikoyomke Enye anam ntre. Akakam ọdọn̄ nnyịn ndinen̄ede mfiọk mme ndutịm ye uduak Esie.” Mbon oro ẹyetde aran ẹsụk ẹnyenyene edu nsụhọdeidem ye ọkpọsọn̄ udọn̄ ndinam uduak Abasi. Mmọ idọhọke ke Abasi esitịn̄ se mmimọ iwetde ọnọ mmimọ, edi ẹbiere ndinam “mbubehe” Ọbọn̄ ke isọn̄. Ndien idahaemi “akwa otuowo” eke “mme erọn̄ en̄wen” emi ẹnyenede idotenyịn ndidu uwem ke isọn̄, ẹdu ke ukpeme ẹnyụn̄ ẹnyene ifịk kpa nte mbon oro ẹyetde aran ẹnamde.—Edi. 7:9; John 10:16.
NDIDU KE MBEN̄EIDEM
14. Didie ke ndisọn̄ọ nyire ye mbon oro Abasi adade ọnọ udia eke spirit ekpeme nnyịn?
14 Ukem nte mme Christian emi ẹyetde aran, mbon akwa otuowo emi ẹdude ke edidemede ẹsọn̄ọ ẹyire ye mbon oro Abasi adade ọnọ udia eke spirit. Emi anam etie nte n̄kpọ eke mmọ n̄ko ẹdade Ikọ Abasi ye spirit ẹfiak ẹdọn̄ aran ke utuenikan̄ mmọ. (Kot Psalm 119:130; John 16:13.) Emi ọsọn̄ọ mmọ idem onyụn̄ anam mmọ ẹben̄e idem ẹnọ edidi Christ, ẹnyụn̄ ẹkeme ndiyọ n̄kpọsọn̄ idomo. Ke uwụtn̄kpọ, ke ufọk-n̄kpọkọbi mbon Nazi kiet, nditọete ẹkenyene Bible kiet kpọt. Ntre, mmọ ẹma ẹben̄e Abasi ẹte an̄wam mmimọ. Ikebịghike ke oro ebede, mmọ ẹma ẹkop ke eyenete kiet emi ẹkemende ẹdi ufọk-n̄kpọkọbi ama edịp mbufa nsiondi Enyọn̄-Ukpeme ifan̄ ke ukot esie kiet emi ẹkesịnde eto. Kiet ke otu mbon oro mîkakpaha ke ufọk-n̄kpọkọbi oro ekedi Ernst Wauer, eyenete emi ẹyetde aran. Enye ama etịn̄ nte ini akakade ete: “Jehovah ama an̄wam nnyịn ke utịbe utịbe usụn̄ nditi mme n̄kpọ emi ẹkewetde ke Enyọn̄-Ukpeme oro.” Ekem enye ama ọdọhọ ete: “Enen̄ede emem utom ndinyene udia eke spirit idahaemi, edi ndi nnyịn imenen̄ede iwụt esịtekọm iban̄a emi? Mmọfiọk ke Jehovah eyenen̄ede ọdiọn̄ mbon emi ẹbuọtde idem ye enye, ẹsọn̄ọde ẹda ye enye, ẹnyụn̄ ẹdiade udia ke okpokoro esie.”
15, 16. Nso utịp ke ebe ye n̄wan emi ẹkesịnde ifịk ke utom ukwọrọikọ ẹkenyene, ndien nso ke ekpep oto ifiọkutom emi?
15 Mme erọn̄ en̄wen ẹtiene ẹnam utom Eteufọk mmọ ke ndinọ nditọete Christ ọyọhọ ibetedem. (Matt. 25:40) Sia mmọ mîbietke idiọk ofụn ye ifu oro ke uwụtn̄kpọ Jesus, mmọ ẹnyịme ndiyak n̄kpọ atak mmọ ẹnyụn̄ ẹsịn ukeme man ẹbem iso ẹyom mme n̄kpọ Obio Ubọn̄. Ke uwụtn̄kpọ, ke ini ẹkedọhọde Jon ye Masako ẹdin̄wam ke efakutom oro ẹsemde usem Chinese ke Kenya, mmọ ẹma ẹmen̄e ke nsonso oro. Edi ke mmọ ẹma ẹkebọn̄ akam ẹkere ẹban̄a mme idaha mmọ, mmọ ẹma ẹbiere ndiwọrọ n̄ka efakutom oro.
16 Ẹma ẹnen̄ede ẹdiọn̄ ukeme oro mmọ ẹkesịnde. Mmọ ẹkedọhọ ẹte: “Utom ukwọrọikọ mi edi utịbe.” Mmọ ẹma ẹtọn̄ọ ukpepn̄kpọ Bible itiaba. Ke oro ebede, mmọ ẹma ẹnyene mme utịbe utịbe ifiọkutom en̄wen. Mmọ ẹkeda ikọ mmọ ẹkeberi ntem: “Isikọm Jehovah kpukpru usen ke ntak emi enye akanamde nnyịn idi mi.” Nte ededi, odu ediwak nditọete iren ye iban emi ubiere mmọ ẹwụtde ke mmọ ẹbiere ndisịn idem ofụri ofụri ke utom Abasi, inamke n̄kpọ m̀mê utịt edidi ini ewe. Kere ban̄a ata ediwak owo oro ẹma ẹkekụre ukpep ke Ufọkn̄wed Gilead, emi ẹnamde utom isụn̄utom. Man ọfiọk esisịt nte san̄asan̄a utom emi etiede, kot ibuotikọ emi, “Nnyịn Inam Se Ikemede!” ke Enyọn̄-Ukpeme eke October 15, 2001. Nte afo okotde inem inem ifiọkutom oro aban̄ade utom isụn̄utom do, kere ban̄a mme usụn̄ emi afo ekemede ndinam utom fo man otoro Abasi, ndien emi ayanam enen̄ede okop idatesịt.
MBUFO N̄KO ẸDU KE UKPEME
17. Nso edidiọn̄ ke inyene ke nditre ndifiọk usen m̀mê hour emi utịt edidide?
17 Imenen̄ede ikụt ke nditre ndifiọk usen m̀mê hour oro utịt edidide enen̄ede edi ke ufọn nnyịn. Utu ke ndiyak emi afịna nnyịn, emi akam ananam inen̄ede ikpere Jehovah, kpa edima Ete nnyịn, nte isịnde idem inam uduak esie. Ndika iso nsịn idem ke ufụn̄isọn̄ ye unana ediyak n̄kpọ ọwọn̄ọde ntịn̄enyịn nnyịn ada ata ediwak edidiọn̄ edi ke utom Eteufọk nnyịn.—Luke 9:62.
18. Ntak emi oyomde ika iso ke utom Abasi?
18 Utịt editịm n̄kpọ emi enen̄ede ekpere, ntre oyom ika iso ke utom Abasi. Idụhe owo nnyịn ndomokiet emi akpamade ndinam Jehovah m̀mê Jesus ofụhọ. Mmọ ẹnọ nnyịn ata akpan utom ndinam ke mme akpatre usen emi. Esịt enen̄ede enem nnyịn nte ke mmọ ẹnyene utọ mbuọtidem emi ke idem nnyịn!—Kot 1 Timothy 1:12.
19. Didie ke ikeme ndidu ke mben̄eidem?
19 Edide inyene idotenyịn ndidu uwem ke heaven m̀mê ke Paradise ke isọn̄, ẹyak ibiere ndika iso nnam utom ukwọrọikọ ye edinam mbet emi Abasi ọnọde nnyịn. Nnyịn idiọn̄ọke usen m̀mê hour emi usen Jehovah edidide, edi ndi ufọn enen̄ede odu ndidiọn̄ọ usen oro? Nnyịn imekeme ndika iso ndu ke mben̄eidem, ndien iyonyụn̄ idu. (Matt. 24:36, 44) Imenen̄ede inịm ke edieke inen̄erede ibuọt idem ye Jehovah inyụn̄ inịm Obio Ubọn̄ esie akpa, ke enye idikpụhu nnyịn.—Rome 10:11.
[Ikọ Idakisọn̄]
[Mme Mbụme Ukpepn̄kpọ]
[Ndise ke page 26]
Yom udia eke spirit idem ke mme ini emi n̄kpọ ọsọn̄de
[Ndise ke page 27]
Ini eyebe usọp usọp edieke iwụkde ntịn̄enyịn ke utom Abasi
