Mme Oku Emi Ẹdide Ndidem Ke Ufọn Ofụri Ubonowo
Mme Oku Emi Ẹdide Ndidem Ke Ufọn Ofụri Ubonowo
“Mbufo ẹdi ‘orụk eke ẹmekde, ẹdi mme oku emi ẹdide ndidem, ẹdi edisana idụt, mbon emi ẹdide akpan inyene.’”—1 PET. 2:9.
1. Ntak emi ẹsikotde n̄ko “udia mbubreyo Ọbọn̄” Editi, ndien nso idi uduak esie?
KE MBUBREYO Nisan 14 ke isua 33 E.N., Jesus Christ ye apostle esie 12 ẹma ẹnịm akpatre Passover mme Jew. Ke Jesus ama akanam Judas Iscariot ọwọrọ, kpa owo emi okoyomde ndida enye nnọ, enye ama ọtọn̄ọ obufa edinam, emi ẹkedide ẹdikot “udia mbubreyo Ọbọn̄.” (1 Cor. 11:20) Jesus ọkọdọhọ ikaba ete: “Ẹka iso ẹnam emi nditi mi.” Ẹdiọn̄ọ edinam emi n̄ko nte Editi, oro edi, editi Christ, akpan akpan n̄kpa esie. (1 Cor. 11:24, 25) Mme Ntiense Jehovah ke ofụri ererimbot ẹsinam ewụhọ emi ke ndinịm Editi ke isua ke isua. Ke 2012, Nisan 14 ke n̄wed usenọfiọn̄ Bible editọn̄ọ ke utịn ama okosop ke Thursday, April 5.
2. Nso ke Jesus eketịn̄ aban̄a mme n̄kpọ idiọn̄ọ oro enye akadade ọtọn̄ọ Editi?
2 Luke mbet ada ufan̄ikọ iba etịn̄ se Jesus akanamde onyụn̄ etịn̄de ke edinam oro, ete: “Enye emen uyo, ọnọ ekọm, obụn̄, onyụn̄ ayak ọnọ mmọ, ete: ‘Emi ada aban̄a idem mi eke ẹdinọde kaban̄a mbufo. Ẹka iso ẹnam emi nditi mi.’ N̄ko, enye anam kpasụk ntre ye cup ke mmọ ẹma ẹkedia udia mbubreyo ẹma, onyụn̄ ọdọhọ ete: ‘Cup emi ada aban̄a obufa ediomi eke ẹnamde ẹbe ke iyịp mi, emi ẹdiduọkde kaban̄a mbufo.’” (Luke 22:19, 20) Ikọ emi akan̄wan̄a mme apostle didie?
3. Se Jesus eketịn̄de aban̄a mme n̄kpọ idiọn̄ọ oro akan̄wan̄a mme apostle didie?
3 Sia mme apostle ẹkedide mme Jew, mmọ ẹma ẹnen̄ede ẹmehe ye uwa unam oro mme oku ẹkesifọpde ẹnọ Abasi ke temple ke Jerusalem. Ẹkesiwa mme utọ uwa oro man ẹnyene mfọn Jehovah, ndien ediwak ekesidi man ẹfen mme idiọkn̄kpọ. (Lev. 1:4; 22:17-29) Ntre mme apostle ẹma ẹfiọk ke Jesus ndikọdọhọ ke ‘ẹdinọ idem imọ ẹnyụn̄ ẹduọk iyịp imọ kaban̄a mmọ,’ ke ikọ esie ọkọwọrọ ke enye oyom ndinọ mfọnmma uwem esie nte uwa. Enye ekenyene ndidi uwa oro enen̄erede enyene ufọn akan eke mme unam.
4. Nso ke ikọ Jesus ọkọwọrọ ke ini enye ọkọdọhọde ete: “Cup emi ada aban̄a obufa ediomi eke ẹnamde ẹbe ke iyịp mi”?
4 Nso ke ikọ Jesus emi ọkọwọrọ: “Cup emi ada aban̄a obufa ediomi eke ẹnamde ẹbe ke iyịp mi”? Mme apostle ẹma ẹfiọk ntịn̄nnịm ikọ oro aban̄ade obufa ediomi, emi ẹwetde ke Jeremiah 31:31-33. (Kot.) Ikọ Jesus okowụt ke enye ọtọn̄ọ obufa ediomi oro, emi edidade itie Ibet ediomi oro Jehovah akadade Moses anam ye Israel. Ndi ediomi mbiba oro ẹma ẹnyene ebuana?
5. Nso idotenyịn ke Ibet ediomi ọkọnọ nditọ Israel?
5 Ke akpanikọ, mme uduak ediomi mbiba emi ẹma ẹnyene n̄kpet n̄kpet ebuana. Ke ini Jehovah ọkọtọn̄ọde Ibet ediomi, enye ọkọdọhọ idụt oro ete: “Edieke mbufo ẹditịmde ẹkop uyo mi, ẹdinyụn̄ ẹnịmde ediomi mi, mbufo ẹyekabade ẹdi akpan inyene mi ke otu kpukpru mme owo, koro ofụri isọn̄ enyenede mi. Ndien mbufo ẹyekabade ẹdi obio ubọn̄ mme oku ye edisana idụt ẹnọ mi.” (Ex. 19:5, 6) Ikọ emi akan̄wan̄a nditọ Israel didie?
ẸN̄WỌN̄Ọ NDINỌ MME OKU EMI ẸDIDE NDIDEM
6. Ẹkenam Ibet ediomi man ẹsu un̄wọn̄ọ ewe?
6 Ikọ oro “ediomi” ama an̄wan̄a nditọ Israel, koro Jehovah ama odụk ediomi ye Noah ye Abraham emi ẹkedide mme ete ete mmọ. (Gen. 6:18; 9:8-17; 15:18; 17:1-9) Nte ubak ediomi emi Jehovah akanamde ye Abraham, enye ama ọn̄wọn̄ọ ete: “Kpukpru mme idụt isọn̄ ẹyebọ edidiọn̄ eke otode mfri fo.” (Gen. 22:18) Jehovah akanam Ibet ediomi man ada osu un̄wọn̄ọ emi. Un̄wọn̄ọ emi ama anam Israel ekeme ndikabade ndi “akpan inyene . . . ke otu kpukpru mme owo” nnọ Jehovah. Ntak emi akanade mmọ ẹdi akpan inyene? Man ‘ẹkabade ẹdi obio ubọn̄ mme oku ẹnọ Jehovah.’
7. Nso ke ikọ oro “obio ubọn̄ mme oku” ọkọwọrọ?
7 Nditọ Israel ẹma ẹmehe ye ndidem ye mme oku, edi Melchizedek kpọt edi n̄kukụre owo ke eset emi Jehovah ekenyịmede akama ifetutom mbiba oro. (Gen. 14:18) Edi idahaemi Jehovah ama ọnọ idụt oro ifet ndinyene “obio ubọn̄ mme oku.” Nte mme uwetn̄kpọ eke odudu spirit ẹkewụtde ke ukperedem, emi ekedi ifet ndinyene mme oku emi ẹdide ndidem n̄ko.—1 Pet. 2:9.
8. Nso utom ke mme oku oro Abasi emekde ẹsinam?
8 Nte ido edide, edidem esikara ukara. Edi nso ke oku esinam? Mme Hebrew 5:1 ọdọhọ ete: “Ẹmek kpukpru akwa oku eke ẹsiode ke otu owo ẹnịm ke ibuot mme owo ndise mban̄a mme n̄kpọ Abasi, man enye emen mme enọ ọsọk Abasi onyụn̄ awa uwa kaban̄a mme idiọkn̄kpọ.” Ke ntre, oku emi Jehovah emekde ada ke ibuot mme anamidiọk awa uwa ke iso Abasi onyụn̄ ekpe enye ubọk ete adahado ọnọ mmọ. N̄ko-n̄ko, oku esida ke ibuot Jehovah ke iso mme owo, ekpep mmọ ibet Abasi. (Lev. 10:8-11; Mal. 2:7) Se oku oro Abasi emekde esinamde edi oro man anam mme owo ẹfiak ẹtie ke emem ye Abasi.
9. (a) Nso ke nditọ Israel ẹkpekenam man mmọ ẹkeme ndinam “obio ubọn̄ mme oku”? (b) Ntak emi Jehovah akanamde ẹnyene mme oku ke Israel? (c) Nso ikọbiọn̄ọ Israel ndinyene “obio ubọn̄ mme oku” ke ini ẹkedude ke Ibet ediomi?
9 Ke ntem, Ibet ediomi ama ọnọ Israel ifet edinyene mme oku emi ẹdide ndidem, emi ẹdidade ufọn isọk “kpukpru mme owo.” Edi akaka ifet emi akasan̄a ye se akanade ẹnam: “Edieke mbufo ẹditịmde ẹkop uyo mi, ẹdinyụn̄ ẹnịmde ediomi mi.” Ndi nditọ Israel ẹma ẹkeme ‘nditịm n̄kop uyo Jehovah’? Ih, ẹma ẹkeme. Ndi mmọ ẹma ẹkeme ndinam ntre ke mfọnmma usụn̄? Baba. (Rome 3:19, 20) Oro akanam Jehovah emek ndusụk owo nte mme oku ke Israel, inyịmeke mmọ ẹdi ndidem, man mmọ ẹkpefọp mme uwa unam kaban̄a idiọkn̄kpọ nditọ Israel. (Lev. 4:1–6:7) Mme idiọkn̄kpọ emi ẹma ẹsịne eke mme oku n̄ko. (Heb. 5:1-3; 8:3) Jehovah ama esibọ mme orụk uwa oro, edi mmọ ikekemeke ndisio isop idiọkn̄kpọ andiwa ofụri ofụri. Mme oku oro ẹkenamde utom ke idak Ibet ediomi ikekemeke ndinam nditọ Israel oro ẹkenyenede esịt akpanikọ ẹnen̄ede ẹtie ke emem ye Abasi. Apostle Paul eketịn̄ aban̄a enye ntem: “Iyịp nyara enan̄ ye eke ebot [ikemeke] ndimen mme idiọkn̄kpọ mfep.” (Heb. 10:1-4) Nditọ Israel ẹkedu ke idak isụn̄i ke ntak emi ẹkebiatde Ibet. (Gal. 3:10) Mmọ ikpekemeke ndinam utom nnọ ofụri ererimbot nte mme oku emi ẹdide ndidem ke utọ idaha oro.
10. Nso ikedi uduak Ibet ediomi?
10 Ke ntre, ndi Jehovah ndikọn̄wọn̄ọ ke mmọ ẹdinyene “obio ubọn̄ mme oku” ekedi ke ikpîkpu? N̄wan̄ansa-o. Edieke mmọ ẹkedomode ke ofụri esịt ndikop uyo esie, mmọ ẹkpekenyene ifet oro—edi idịghe ke idak Ibet. Ntak-a? (Kot Galatia 3:19-25.) Edi akpanikọ ke Ibet ama anam mbon oro ẹkesịnde ifịk ẹdomo ndinịm enye ẹka iso ke edisana utuakibuot. Enye n̄ko ama anam mme Jew ẹfiọk ke mmimọ idi mme anamidiọk ye nte ke imoyom uwa oro akande enye oro akwa oku mmimọ ekemede ndiwa. Edi enye ekedi andikpeme oro ekenyenede ndida mmọ nsịm Christ, m̀mê Messiah, kpa mme udorienyịn̄ emi ẹwọrọde “Enye Oro Ẹyetde Aran.” Nte ededi, ke ini Messiah ekedide, enye ekenyene nditọn̄ọ obufa ediomi oro Jeremiah eketịn̄de enịm. Ẹma ẹkot mbon oro ẹkenyịmede Christ ẹte ẹdidi ubak obufa ediomi oro, ndien mmọ ẹyenen̄ede ẹdi “obio ubọn̄ mme oku.” Ẹyak ise nte oro ekemede nditịbe.
OBUFA EDIOMI ANAM ẸNYENE MME OKU EMI ẸDIDE NDIDEM
11. Didie ke Jesus akakabade edi itiat idakisọn̄ mme oku oro ẹdide ndidem?
11 Ke isua 29 E.N., Jesus eyen Nazareth ama ọbiọn̄ọde nte Messiah. Ke ini enye ekedide n̄kpọ nte isua 30, enye ama edi ndinam akpan uduak oro Jehovah okoyomde enye anam, ayarade emi ke ndina baptism mmọn̄. Jehovah ama etịn̄ aban̄a enye ete, “emi edi edima Eyen mi,” onyụn̄ ada edisana spirit eyet enye aran. (Matt. 3:13-17; Utom 10:38) Aran oro ẹkeyetde enye do ama anam enye edi Akwa Oku ọnọ mbon oro ẹnịmde ke akpanikọ ke otu ubonowo onyụn̄ edi Edidem oro edikarade mmọ ke ini iso. (Heb. 1:8, 9; 5:5, 6) Enye ekenyene ndidi itiat idakisọn̄ mme oku oro ẹdide ndidem.
12. Uwa Jesus akanam ẹkeme ndinam nso?
12 Sia Jesus edide Akwa Oku, nso orụk uwa ke enye ekenyene ndiwa man ofụk idiọkn̄kpọ emi mbon oro ẹnịmde ke akpanikọ ẹkedade-da ẹmana ofụri ofụri? Nte enye ọkọdọhọde ke ini ọkọtọn̄ọde Editi n̄kpa esie, mfọnmma uwem esie ekedi uwa oro. (Kot Mme Hebrew 9:11, 12.) Toto ke ini oro Jesus akanade baptism ke isua 29 E.N., enye nte Akwa Oku, ama osobo mme idomo onyụn̄ ọbọ ukpep tutu esịm ini emi enye akakpade. (Heb. 4:15; 5:7-10) Ke ẹma ẹkenam enye eset, enye ama ọdọk aka heaven ọkọnọ Jehovah ke idem esiemmọ ufọn uwa esie. (Heb. 9:24) Ke oro ebede, Jesus ama ekeme ndinam n̄kpeubọk nnọ Jehovah ke ibuot mbon oro ẹnyenede mbuọtidem ke uwa esie onyụn̄ an̄wam mmọ ẹnam n̄kpọ Abasi ye idotenyịn ndinyene nsinsi uwem. (Heb. 7:25) Uwa esie ọkọsọn̄ọ n̄ko obufa ediomi oro.—Heb. 8:6; 9:15.
13. Nso idotenyịn ke mbon oro ẹdude ke obufa ediomi ẹkenyene?
13 Akana ẹda edisana spirit ẹyet n̄ko mbon oro ẹkotde ẹsịn ke obufa ediomi oro aran. (2 Cor. 1:21) Ẹma ẹyet mme Jew oro ẹkenamde akpanikọ, ndien ekem ẹyet mme Gentile. (Eph. 3:5, 6) Nso idotenyịn ke mbon oro ẹdude ke obufa ediomi ẹkenyene? Ẹyefen mme idiọkn̄kpọ mmọ ofụri ofụri. Jehovah ama ọn̄wọn̄ọ ete: “Nyefen ndudue mmọ, ndinyụn̄ ntịghi aba mme idiọkn̄kpọ mmọ.” (Jer. 31:34) Ke emi ẹma ẹkefen idiọkn̄kpọ mmọ mi, mmọ ẹkeme ndikabade ndi “obio ubọn̄ mme oku.” Peter ekewet mme Christian oro ẹyetde aran ete: “Mbufo ẹdi ‘orụk eke ẹmekde, ẹdi mme oku emi ẹdide ndidem, ẹdi edisana idụt, mbon emi ẹdide akpan inyene, man ke kpukpru ebiet mbufo ẹkpetan̄a nti ido’ enye emi okokotde mbufo osio ke ekịm esịn ke utịbe un̄wana esie.” (1 Pet. 2:9) Peter okot oto ikọ oro Jehovah eketịn̄de ọnọ Israel ke ini enye ọkọnọde Ibet onyụn̄ ada enye etịn̄ aban̄a mme Christian oro ẹdude ke obufa ediomi.—Ex. 19:5, 6.
MME OKU EMI ẸDIDE NDIDEM ẸDA MME UFỌN ẸSỌK OFỤRI UBONOWO
14. M̀mọ̀n̄ ke mme oku emi ẹdide ndidem ẹdinam utom?
14 M̀mọ̀n̄ ke mbon oro ẹdude ke obufa ediomi ẹdinam utom? Mmọ ẹdinam nte otu mme oku mi ke isọn̄, ẹda ke ibuot Jehovah ke iso mme owo ke ‘nditan̄a nti ido esie ke kpukpru ebiet’ nnyụn̄ nnọ udia eke spirit. (Matt. 24:45; 1 Pet. 2:4, 5) Mmọ ẹma ẹkpa ẹnyụn̄ ẹset, mmọ ẹyenam utom ye Christ ke heaven nte ndidem ye mme oku, ẹnam utom mbiba emi ọyọhọ ọyọhọ. (Luke 22:29; 1 Pet. 1:3-5; Edi. 1:6) Apostle John ama ọsọn̄ọ emi, sia enye ama okụt ke n̄kukụt nte ediwak edibotn̄kpọ eke spirit ẹdade ẹkpere ebekpo Jehovah. Mmọ ẹma ẹkwọ ke “obufa ikwọ” oro mmọ ẹkekwọde ẹnọ “Eyenerọn̄” ẹte: “Afo ama ada iyịp fo edep mme owo osion̄o ke kpukpru esien ye usem ye obio ye idụt, ọnọ Abasi, omonyụn̄ anam mmọ ẹdi obio ubọn̄ ye mme oku ẹnọ Abasi nnyịn, ndien mmọ ẹyekara isọn̄ nte ndidem.” (Edi. 5:8-10) Ke n̄kukụt en̄wen oro John okokụtde, enye eketịn̄ ntem aban̄a mme andikara emi: “Mmọ ẹyedi mme oku Abasi ye Christ, ẹyenyụn̄ ẹkara nte ndidem ye enye ke isua tọsịn kiet.” (Edi. 20:6) Mmọ ẹdiana ye Christ ẹdi mme oku emi ẹdide ndidem ke ufọn ofụri ubonowo.
15, 16. Nso edidiọn̄ ke mme oku emi ẹdide ndidem ẹdida isọk ubonowo?
15 Nso ufọn ke owo 144,000 ẹdinam ẹnọ mbon oro ẹdidude ke isọn̄? Ediyarade ibuot 21 okot mmọ obio heaven, Obufa Jerusalem, emi ẹkotde “n̄wan Eyenerọn̄.” (Edi. 21:9) Ufan̄ikọ 2 esịm 4 ọdọhọ ete: “N̄kụt n̄ko edisana obio, Obufa Jerusalem, nte otode Abasi osụhọde ke heaven edi ẹnyụn̄ ẹtịm enye idem nte n̄wanndọ emi ẹbanade ẹben̄e ebe esie. Ndien n̄kop ọkpọsọn̄ uyo emi otode ebekpo nte ọdọhọde ete: ‘Sese! Ebietidụn̄ Abasi omodu ye owo, enye oyonyụn̄ odụn̄ ye mmọ, ndien mmọ ẹyedi ikọt esie. Abasi ke idemesie oyonyụn̄ odu ye mmọ. Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.’” Nso edidiọn̄ ke emi ẹdidi ntem! Nditre n̄kpa oyosio akpan ntak mmọn̄eyet, mfụhọ, ntuan̄a, ye ubiak efep. Emi ediwọrọ ke ẹyenam mme owo oro ẹnamde akpanikọ ẹdi mfọnmma, ẹnyụn̄ ẹtie ke emem ọyọhọ ọyọhọ ye Abasi.
16 Ediyarade 22:1, 2 aka iso etịn̄ mme edidiọn̄ oro mme oku oro ẹdide ndidem mi ẹdidade idi, ete: “Enye owụt mi akpa mmọn̄ uwem, emi asanade nte crystal, nte otode ebekpo Abasi ye eke Eyenerọn̄ ewet osụhọde ke ufọt akwa efak [Obufa Jerusalem]. Ndien mme eto uwem ẹdu ke edem akpa emi ye ke edem akpa oko ẹn̄wụm orụk mfri duopeba, ẹn̄wụm mfri mmọ ke ọfiọn̄ ke ọfiọn̄. Ndien ẹda mme ikọn̄ eto oro ẹkọk mme idụt udọn̄ọ.” N̄kukụt emi owụt nte ẹdikọkde ofụri unana mfọnmma oro “mme idụt,” m̀mê mme otu ubonowo, ẹkedade ẹmana ẹto Adam. Ke akpanikọ, etisịm ini oro, “n̄kani n̄kpọ ẹma ẹbe ẹfep.”
MME OKU EMI ẸDIDE NDIDEM ẸKỤRE UTOM MMỌ
17. Nso ke mme oku emi ẹdide ndidem ẹdinam ke utịt utom mmọ?
17 Ke utịt tọsịn isua oro mme oku emi ẹdide ndidem ẹdidade ẹnam utom, mmọ ẹyenam mme andidu ke idak ukara oro ke isọn̄ ẹdi mfọnmma. Christ emi edide Akwa Oku ye Edidem ayayak ubonowo emi ẹnamde ọfọn ama ofụri ofụri ọnọ Jehovah. (Kot 1 Corinth 15:22-26.) Etisịm ini oro, mme oku emi ẹdide ndidem ẹkụre utom mmọ ofụri ofụri.
18. Nso utom ke Jehovah edinọ mme oku emi ẹdide ndidem ke mmọ ẹma ẹkekụre utom mmọ?
18 Ke oro ebede, nso utom ke Jehovah edinọ mme nsan̄a Christ emi ẹnyenede akwa ifetutom mi? Ediyarade 22:5 ọdọhọ ke “mmọ ẹyenyụn̄ ẹkara nte ndidem ke nsinsi nsinsi.” Edi mmanie ke mmọ ẹdikara? Bible itịn̄ke. Edi orụk uwem oro mmọ ẹdude ye ifiọk oro mmọ ẹnyenede ke ndin̄wam anana-mfọnmma ubonowo ẹyenam mmọ ẹdot ndidi ndidem emi Jehovah adade anam uduak esie ke nsinsi.
19. Nso ke mbon oro ẹdụkde Editi ẹditi?
19 Ke ini isopde idem ndidụk Editi n̄kpa Jesus ke Thursday, April 5, 2012, iyeti mme ukpepn̄kpọ Bible emi. Esisịt ibat mme Christian oro ẹyede aran, emi ẹsụhọde ke isọn̄, ẹyedia n̄kpọ idiọn̄ọ emi ẹdide uyo ye wine, emi owụtde ke mmọ ẹdi ubak obufa ediomi oro. Mme n̄kpọ idiọn̄ọ uwa Christ emi ẹyeti mmọ utịbe utịbe ifet ye mbiomo oro mmọ ẹnyenede ke nsinsi uduak Abasi. Kpukpru nnyịn ikpakam idụk ye ntotụn̄ọ esịtekọm oro inyenede inọ mme oku oro ẹdide ndidem, emi Jehovah Abasi ọnọde ke ufọn ofụri ubonowo.
NTE AFO EMEKEME NDINAM AN̄WAN̄A?
․․․․․
Ini ewe ke ẹkebem iso ẹn̄wọn̄ọ ndinọ mme oku oro ẹdide ndidem?
․․․․․
Didie ke obufa ediomi anam enyene mme oku emi ẹdide ndidem?
․․․․․
Nso ufọn ke mme oku emi ẹdide ndidem ẹdinam ẹnọ ubonowo?
[Mme Mbụme Ukpepn̄kpọ]
[Ndise ke page 29]
Mme oku emi ẹdide ndidem ẹyeda nsinsi ufọn ẹsọk ubonowo
