“Mmobiomo Ndo Idahaemi, Edi Ididịghe ke Nsinsi!”

Nte Sara van der Monde obụkde

Mme owo ẹsiwak ndidọhọ mi ẹte, “Sara, mmama nte afo esisakde imam-e. Nso isinam esịt enem fi ntre kpukpru ini?” Nsidọhọ mmọ ke mmenyene ata san̄asan̄a idotenyịn. Ke idotenyịn oro edi ntem, “Mmobiomo ndo idahaemi, edi ididịghe ke nsinsi!”

N̄KAMANA ke 1974, ke Paris ke France. Eka mi ama enyene mfịna ke ini okoyomde ndiman mi, ndien ekem ẹma ẹdikụt ke mmenyene udọn̄ọ mfre emi esibiomode nseknditọ ndo. N̄kesikemeke ndimenede ukot ye ubọk mi ọfọn, ndien ama esisọn̄ mme owo ndikop se ntịn̄de. Mma ndọn̄ọ mbukpi, udọn̄ọ esinyụn̄ awak ndibe mi.

Nnyịn ima iwọrọ ikodụn̄ ke Melbourne ke Australia ke ini n̄kedide isua iba. Ke ini n̄kedide isua inan̄, ete mi ama efehe ọkpọn̄ nnyịn. Akpa ini emi ntide nte n̄kọtọn̄ọde ndikụt ke mmekpere Abasi ekedi oro. Eka mi, emi edide kiet ke otu Mme Ntiense Jehovah, ama esida mi aka mbono esop kpukpru ini, emi n̄kekpepde ke Abasi ama onyụn̄ ekere aban̄a mi. Se n̄kekpepde oro, ọkọrọ ye ima ye mme ikọ emi eka mi ekesidade ọsọn̄ọ mi idem ẹma ẹnam mi nnyene ifụre kpa ye oro idaha nnyịn ẹkekpụhọrede.

Eka mi ama ekpep mi n̄ko ndibọn̄ akam nnọ Jehovah. Ke nditịm ntịn̄, esinen̄ede emem mi utom ndibọn̄ akam akan nditịn̄ ikọ. Ke ini mbọn̄de akam, nsifịnake idemmi nditịn̄ ikọ uyo ọwọrọ, edi esitie nte mmenen̄ede n̄kop se ntịn̄de ke esịt. Ndien sia esisọn̄de mme owo ndikop se ntịn̄de, enen̄ede enem mi esịt ndifiọk ke Jehovah esikop se ntịn̄de, edide ntịn̄ ke esịt m̀mê ntata ikọ.—Ps. 65:2.

Ndiyọ Mme Mfịna

Ke ini n̄kedide isua ition, udọn̄ọ mi ama ọdiọk tutu oyom nsịne ikpọ ukwak ke ukot man n̄keme ndisan̄a. N̄kesiteten̄ ke ini nsan̄ade! Ke ini n̄kedide isua 11, n̄kekemeke ndisan̄a aba. Nte ini akakade, n̄kekemeke aba ndidọk nnyụn̄ nsụhọde ke bed edieke mmendaha n̄kpọ ilektrik oro esidịberede mi etem ke n̄kpọitie mbon n̄kpọnnam mi emi esiwatde ke batri.

Ke nditịm ntịn̄, udọn̄ọ emi esinam mi mfụhọ ndusụk ini. Edi ke utọ ini oro mmesiti ufiet ubon nnyịn: “Kûfịna idem uban̄a se mûkemeke ndinam. Kam nam mbon oro ekemede ndinam.” Emi an̄wam mi n̄keme ndiwat enan̄-mbakara, ubom afara, ubom ubọk, ndụn̄ ke tent, nnyụn̄ n̄wat ubomisọn̄ n̄kanade ekpri efak! Mmesiwet ndise, n̄kịm ọfọn̄, n̄kịm ndiye ọfọn̄ bed, ndọn̄ fansi ke ọfọn̄, nnyụn̄ mbot ọtọ-akpa.

Sia nnen̄erede mbiomo ndo, ndusụk owo ẹsikere ke mfiọkke n̄kpọ n̄kem ndituak ibuot  nnọ Abasi. Ke ini n̄kedide isua 18, andikpep kiet ke ufọkn̄wed nnyịn ama ọdọhọ mi n̄kpọn̄ ufọk man mbọhọ ido ukpono mme eka mi. N̄wan emi ama akam ọdọhọ ke iyoyom ufọk inọ mi. Edi mma ndọhọ enye ke tutu amama ndikpọn̄ke ido ukpono mi, ke ndikpọn̄ ufọk ke ini n̄kụtde ke nyekeme ndise mban̄a idemmi.

Ikebịghike tọn̄ọ andikpep oro eketịn̄ n̄kpọ oro ye ami, mma nna baptism nte kiet ke otu Mme Ntiense Jehovah. Ke isua iba ẹma ẹkebe, mma n̄wọrọ n̄kodụn̄ ke ekpri ufọk kiet. Mmokop inemesịt mi sia ẹsinọ mi un̄wam oro nyomde nnyụn̄ n̄keme ndinam se mmade ke idemmi.

Ẹbụp Mi Ndọ ke Ini Mmen̄kodorike Enyịn

Ke ediwak isua oro ẹbede, mmosobo mme idomo mbuọtidem en̄wen. Idem ama enen̄ede akpa mi usen kiet ke ini eyen ufọkn̄wed nnyịn—emi obiomode ndo n̄ko—okobụpde mi ndọ. Ke akpa, ibuot ama okpon mi. Esidọn̄ mi ndidọ ebe kpa nte esidọn̄de ata ediwak n̄kaiferi. Edi enye ndibiomo ndo nte ami mbiomode iwọrọke ke ndọ ọyọfọn. Akan oro, akparawa oro ikedịghe Ntiense. Se enye enịmde ke akpanikọ, esinamde, onyụn̄ ebịnede ke uwem ẹdi ata isio isio ye okịmmọ. Ntem, ikpanam didie idu uwem ọtọkiet? Mma mbiere n̄ko ndinam in̄wan̄-in̄wan̄ item Abasi emi ọdọhọde idọ ekemmọ andinịm ke akpanikọ ikpọn̄-ikpọn̄. (1 Cor. 7:39) Ke ntak oro, mma ndọhọ akparawa oro ukpono ukpono ke ndidọhọ enye.

Idem tutu mfịn, mmọfiọk ke n̄kanam nnennen ubiere. Ndien mmenen̄ede nnịm ke nyokop inemesịt ke obufa ererimbot emi Abasi ọn̄wọn̄ọde. (Ps. 145:16; 2 Pet. 3:13) Mbemiso ini oro, mmenen̄ede mbiere ndika iso nsọn̄ọ nda ye Jehovah nnyụn̄ nnem esịt ke se nnyenede.

Enen̄ede ọdọn̄ mi ndikụt usen emi ndifrọde ke n̄kpọitie mbon n̄kpọnnam nnyụn̄ mfehe nte mmama. Ini oro nyofiori nte: “Mma mbiomo ndo, edi idahaemi idem ọsọn̄ mi ke nsinsi!”