Mme Mbụme Oro Mme Andikot Ẹbụpde

Mme ibat oro ẹdude ke ibatutom isua ẹkpen̄wan̄a nnyịn didie?

Kpukpru isua isitetie ibet ibatutom emi ẹsisịnde ke Yearbook ye ke Utom Obio Ubọn̄ Nnyịn. Esinem nnyịn ndikụt se ikọt Jehovah ẹdianade kiet ẹnam ke ndikwọrọ nnyụn̄ n̄kpep mme owo mban̄a Obio Ubọn̄ Abasi ke ofụri ererimbot. Edi man ibatutom emi enen̄ede enyene ufọn ọnọ nnyịn, ana enye an̄wan̄a nnyịn, nnyịn inyụn̄ inyene nnennen ekikere iban̄a enye. Kere ban̄a uwụtn̄kpọ ifan̄ emi.

Isua utom. Esitọn̄ọ ke September esịm August. Yearbook ye Utom Obio Ubọn̄ Nnyịn ẹsisịne ibatutom isua emi ekebede. Emi ọwọrọ ke 2011 Yearbook ye Utom Obio Ubọn̄ Nnyịn eke February 2011 ẹsịne ibatutom isua utom 2010, emi ọkọtọn̄ọde ke September 1, 2009, esịm August 31, 2010.

N̄wakn̄kan ibat mme asuanetop ye mme asuanetop ke ẹbaharede ukem ukem. “Mme asuanetop” ẹdi Mme Ntiense Jehovah oro ẹnade baptism ye mbon oro mînaha, emi ẹdotde ndikwọrọ etop Obio Ubọn̄. “N̄wakn̄kan ibat mme asuanetop” edi n̄wakn̄kan ibat mbon emi ẹkenọde ibatutom ke ọfiọn̄ ekededi ke isua utom oro, ndien emi ekeme ndisịne ibatutom mbon oro ẹkenọde ibatutom mmọ ke idiọk ini, emi mîkesịneke ke ibatutom ọfiọn̄ oro ẹkebede. Emi ekeme ndinam ẹbat ndusụk mme asuanetop ikaba. Nte ededi, ibat emi isisịneke mbon emi ẹkekwọrọde ikọ edi mîketịghi inọ ibatutom mmọ. Emi enen̄ede owụt ke oyom owo kiet kiet emi odotde ndikwọrọ ikọ esibabak ọnọ ibatutom esie kpukpru ọfiọn̄. “Mme asuanetop ke ẹbaharede ukem ukem” edi ibat mbon emi ẹsinọde ibatutom mmọ kpukpru ọfiọn̄.

Ofụri ibat hour. Nte 2011 Yearbook ye Utom Obio Ubọn̄ Nnyịn eke February 2011 ẹwụtde, Mme Ntiense Jehovah ẹma ẹda se ibede biliọn hour kiet ye miliọn ikie itiokiet ẹkwọrọ ikọ. Edi ibat emi idịghe kpukpru hour emi isidade inam n̄kpọ Abasi, sia enye isịneke ibat hour emi ẹsidade ẹnam mme utọ n̄kpọ nte utom ubọkerọn̄, ẹdụk mme mbono esop, ẹnịm ukpepn̄kpọ Bible idemowo ẹnyụn̄ ẹtie n̄kere se ẹkpepde.

Okụk oro ẹbiatde. Ke isua utom 2010, Mme Ntiense Jehovah ẹma ẹbiat se iwakde ibe miliọn $155 ke ndise mban̄a mme akpan asiakusụn̄, mme isụn̄utom, ye mme esenyịn oro ẹsan̄ade-san̄a ke utom an̄wautom mmọ. Edi emi isịneke okụk emi ikadade imịn̄ mme n̄wed oro ẹkọn̄ọde ke Bible ye enye emi ẹkedade ẹse ẹban̄a se ibede mme anamutom unyịmesịt 20,000 emi ẹnamde utom ke Bethel ke ofụri ererimbot.

Mme andidia n̄kpọ idiọn̄ọ Editi. Emi edi ibat mbon emi ẹma ẹkena baptism, emi ẹkediade n̄kpọ idiọn̄ọ ke Editi ke ofụri ererimbot. Ndi emi edi nnennen ibat mbon emi ẹyetde aran emi ẹdude ke isọn̄? Inen̄ekede idi ntre. Ediwak n̄kpọ—emi esịnede se ẹkekpepde mme owo ke akani ido ukpono mmọ m̀mê udọn̄ọ ibuot—ẹkeme ndinam owo edue ekere ke ẹmek imọ. Ntem, nnyịn ikemeke ndifiọk ata nnennen ibat mbon oro ẹyetde aran, emi ẹdude ke isọn̄; ufọn inyụn̄ idụhe ndifiọk. Otu ukara isinịmke enyịn̄ mbon emi ẹsidiade n̄kpọ idiọn̄ọ, sia mbon emi ẹyetde aran ke ofụri ererimbot mîsisopke ibuot ọtọkiet. *

Se idiọn̄ọde edi ke ndusụk “ifịn Abasi nnyịn,” emi ẹyetde aran ẹyedu ke isọn̄ ke ini ẹdisanade ofụm nsobo akwa ukụt iyak. (Edi. 7:1-3) Tutu akwa ukụt ọtọn̄ọ, mbon oro ẹyetde aran ẹyeka iso ẹda iso ke utom emi ẹsiwetde ẹsịn ke ibatutom nnyịn eke isua ke isua—oro edi, akakan utom edikwọrọ nnyụn̄ n̄kpep mme owo n̄kpọ, emi ẹnamde mi ke isọn̄.

[Ikọ Idakisọn̄]