Irenowo—Ẹtọ Ẹnọ Spirit Ẹnyụn̄ Ẹyom Ifetutom!

“Owo emi ọtọde ọnọ spirit ọyọdọk nsinsi uwem.”—GAL. 6:8.

1, 2. Didie ke Matthew 9:37, 38 osu mfịn, ndien emi anam ẹyom nso ke esop Abasi?

ENYENE utom emi osụk akade iso odudu odudu idahaemi, emi owo mîdifreke tutu amama! Jesus Christ ama etịn̄ aban̄a utom emi. Enye ọkọdọhọ ete: “Idọk okpon, edi mme anamutom iwakke. Mmọdo, ẹben̄e Enyene idọk ẹte osio mme anamutom ọnọ ẹdi ke idọk esie.” (Matt. 9:37, 38) Jehovah Abasi ke ọbọrọ akam oro ke usụn̄ emi akpade owo idem. Ke isua utom 2009, ibat esop Mme Ntiense Jehovah ama ọdọk ekesịm 105,298, emi owụt ke ẹma ẹsiak mbufa esop 2,031, ye nte ke owo 757 ẹkena baptism kpukpru usen ke ẹbaharede ukem ukem.

² N̄kọri emi anam ẹnen̄ede ẹyom nditọete emi ẹdibọkde mme erọn̄ Abasi inyụn̄ ikpep mmọ n̄kpọ. (Eph. 4:11) Ke ediwak isua idahaemi, Jehovah anam oyonyụn̄ aka iso anam irenowo emi ẹdotde ẹse ẹban̄a mme erọn̄ esie. Ntịn̄nnịm ikọ emi odude ke Micah 5:5 anam idiọn̄ọ ke ikọt Jehovah ẹyenyene “mme ekpemerọn̄ itiaba ye mbọn̄ . . . itiaita,” ke mme akpatre usen emi. Ntịn̄nnịm ikọ emi owụt ke ata ediwak irenowo ẹyedu emi ẹdotde ndida ikọt Abasi usụn̄.

3. Nso ke ‘nditọ nnọ spirit’ ọwọrọ?

³ Edieke edide erenowo emi ama akana baptism, ntak emi okpoyomde ifetutom ke esop? Akpan ntak edi sia afo “ọtọde ọnọ spirit.” (Gal. 6:8) Nditọ nnọ spirit ọwọrọ ndidu uwem emi ayakde edisana spirit Abasi ada fi usụn̄. Mbọk biere ke imọ ‘iditọhọ inọ obụkidem.’ Kûyak inem uwem, ye udia uwem anam ifịk oro ekenyenede ke n̄kpọ Abasi etek. Akpana kpukpru Christian ‘ẹtọ ẹnọ spirit,’ ndien ndusụk irenowo emi ẹnamde emi ẹyedot ndikama ifetutom ke esop. Ibuotikọ emi enen̄ede ebehe irenowo sia ẹnen̄ede ẹyom mbiowo ye mme asan̄autom unamutom ke esop Abasi mfịn. Mbọk nditọete nnyịn iren, ẹbọn̄ akam ẹnyụn̄ ẹnen̄ede ẹtie ẹkere se inemede emi.

Yom Eti Utom

4, 5. (a) Ẹdọhọ irenowo oro ẹnade baptism ẹnam n̄kpọ man ẹdi nso ke esop? (b) Nso ke owo akpanam man odot ndidi asan̄autom unamutom m̀mê ebiowo?

⁴ Isidịghe owo ama ededi erenowo, edi ebiowo m̀mê asan̄autom unamutom. Ana enye anam n̄kpọ man odot ndinam “eti utom” emi. (1 Tim. 3:1) Emi esịne ndinam n̄kpọ nnọ ekemmọ mme Christian ke ofụri esịt. (Kot Isaiah 32:1, 2.) Owo emi oyomde ndidi ebiowo ke eti esịt iyomke ikpọ n̄kpọ. Edi akam oyom nte enye akpawade idem anam n̄kpọ ọnọ mbon en̄wen.

⁵ Enyene se Bible ọdọhọde mbiowo ye mme asan̄autom unamutom ẹnam, mmọdo, edieke owo esịnde idem anam emi, oro ọwọrọ ke enye eben̄e idem ndidi asan̄autom unamutom m̀mê ebiowo. (1 Tim. 3:1-10, 12, 13; Titus 1:5-9) Edieke edide erenowo  emi ama akayak idem ọnọ Abasi, bụp idemfo ete: ‘Ndi mmesinen̄ede n̄wọrọ an̄wautom, nnyụn̄ n̄n̄wam mbon en̄wen ẹtiene ẹwọrọ? Ndi mmesisịn udọn̄ nnọ ekemmọ nditọete nnyụn̄ nnen̄ede nyom ndifiọk se ifịnade mmọ? Ndi ẹdiọn̄ọ mi nte owo emi ẹnen̄erede ama ndikpep Bible? Ndi mmesibọrọ mbụme idahaemi ọfọn akan nte n̄kesibọrọde? Ndi mmesitịn̄ enyịn nnam se mbiowo ẹdọhọde nnam?’ (2 Tim. 4:5) Ọfọn enen̄ede ekere aban̄a mme mbụme emi.

6. Nso isinam owo odot ndinyene ifetutom ke esop Abasi?

⁶ N̄kpọ en̄wen oro akpanamde man odot ndinyene ifetutom ke esop edi ‘ndinam owo emi edide ke esịtidem okop idem ke odudu oro otode ke spirit Abasi.’ (Eph. 3:16) Ke esop Abasi, owo isimeneke-menede ubọk imek owo asan̄autom unamutom m̀mê ebiowo. Ẹsimek owo edieke ẹkụtde ke enye ke ọkọri ke n̄kan̄ eke spirit. Nso ke akpanam man ọkọri ke n̄kan̄ eke spirit? N̄kpọ kiet oro akpanamde edi ‘ndika iso nsan̄a ke spirit’ nnyụn̄ n̄n̄wụm mbun̄wụm esie. (Gal. 5:16, 22, 23) Edieke anamde n̄kpọ man owụt ke imekeme ndise mban̄a ifetutom onyụn̄ anamde item emi ẹnọde fi, “kpukpru owo [ẹyekụt] n̄kọri fo.”—1 Tim. 4:15.

Oyom N̄waidem

7. Ndinam n̄kpọ nnọ mbon en̄wen oyom nso?

⁷ Ndinam n̄kpọ nnọ mbon en̄wen idịghe ifia ubọk kiet, edi utom emi enen̄erede oyom n̄waidem. Sia mbiowo ẹsede ẹban̄a mme erọn̄ Abasi, esinen̄ede afịna mmọ ke ini mme erọn̄ emi ẹnyenede mfịna. Ti se iketịbede inọ apostle Paul ke ntak emi ekesede aban̄a mme erọn̄ Abasi. Enye ọkọdọhọ nditọete ke Corinth ete: “N̄kodu ke ọkpọsọn̄ ukụt ye editịmede esịt n̄wet mbufo ye ediwak mmọn̄eyet, idịghe man mbufo ẹkop mfụhọ, edi man mbufo ẹkpefiọk ima oro ami nnyenede akpan akpan nnọ mbufo.”  (2 Cor. 2:4) Paul ikadaha utom esie ifen efen.

8, 9. Siak irenowo emi ẹkesinamde n̄kpọ ẹnọ mbon en̄wen ke Bible.

⁸ Ẹdiọn̄ọ irenowo emi ẹnamde n̄kpọ ẹnọ ikọt Jehovah nte mbon n̄waidem. Ke uwụtn̄kpọ, ndi emekere ke Noah eketetie ọdọhọ ikọtufọk esie ete, ‘Ẹma ẹkọn̄ ubom oro ẹma, ẹkot mi’? Moses ikonyụn̄ idọhọke nditọ Israel ke Egypt ite, ‘Ẹsan̄ ke ndi, iyosobo ke Ididuot Inyan̄.’ Joshua ikonyụn̄ idọhọke mmọ ite: ‘Ibibene Jericho ama ọduọ, ẹditịn̄ ẹnọ mi.’ Isaiah ikonyụn̄ inyanke owo en̄wen ubọk idọhọ Abasi ite: ‘Se owo ko! Dọn̄ enye se oyomde ndidọn̄.’—Isa. 6:8.

⁹ Jesus Christ edi ata akpan owo emi akayakde spirit Abasi ada enye usụn̄. Enye ama enyịme ndidi ndinyan̄a ubonowo. (John 3:16) Akpana itiene idu uwem n̄waidem nte Jesus. Ebiowo emi ama akanam utom ebiowo ebịghi etịn̄ nte enye adade otuerọn̄ Abasi ete: “Item oro Jesus ọkọnọde Peter ete ọbọk n̄kpri erọn̄ imọ esinen̄ede otụk mi ọkpọ. Mmedikụt ke ndikọm m̀mê ndifọn ido ye owo ekeme ndisịn udọn̄ nnọ enye. Utom ubọkerọn̄ esinem mi etieti.”—John 21:16.

10. Nso idinam nditọete iren ẹkpebe Jesus ẹnyụn̄ ẹben̄e idem ndikama ifetutom?

¹⁰ Irenowo emi ẹyakde idem ẹnọ Abasi ẹyom ndinam n̄kpọ ye otuerọn̄ Abasi nte Jesus akanamde. Jesus ọkọdọhọ ke ‘iyọnọ mmọ nduọkodudu.’ (Matt. 11:28) Utu ke ndikere ke ndikama ifetutom okpon n̄kpọ akaha, m̀mê ke ekeme ndidia owo ini n̄kaha, mbuọtidem emi irenowo ẹnyenede ke Abasi ye ima emi mmọ ẹmade esop esie ẹsinam mmọ ẹnam n̄kpọ man ẹdot ndinam eti utom emi. Edi nso ke owo akpanam edieke mîdọn̄ke enye ndinam n̄kpọ man odot ndikama ifetutom? Ndi enyene se eyenete akpanamde man ọdọn̄ enye ndikama ifetutom?

Yak Ọdọn̄ Fi Ndikama Ifetutom

11. Nso ke owo akpanam man ọdọn̄ enye ndikama ifetutom?

¹¹ Ọyọfọn eben̄e Abasi edisana spirit edieke ekerede ke imọ idotke ndikama ifetutom ke esop. (Luke 11:13) Spirit Jehovah ayanam akan utọ ekikere oro. Sia edide spirit emi esinam ọdọn̄ owo ndikama ifetutom, onyụn̄ ọnọ owo odudu ndinam emi, oro owụt ke idiọkke ndiyom ifetutom. (Phil. 2:13; 4:13) Mmọdo, ọfọn esiben̄e Jehovah ete anam ọdọn̄ fi ndinyene ifetutom.—Kot Psalm 25:4, 5.

12. Nso ke owo akpanam man enyene ifiọk akama ifetutom esie?

¹² Owo emi ekerede ke ndikama ifetutom ọsọn̄ akaha ekeme ndisio n̄kpọ anam mbak ẹdinọ enye ifetutom. Mîdịghe, enye ekeme ndikere ke imọ inyeneke ifiọk ikem ndikama ifetutom. Edieke edide ntre, enye ekeme ndinen̄ede nnyene ọniọn̄ edieke enye esịnde ifịk ekpep Bible ye mme n̄wed esop Abasi. Ọfọn enye obụp idemesie ete: ‘Ndi mmenyene ini emi nsitiede n̄kpep Bible? Ndi mmesiben̄e Abasi ọniọn̄?’ James mbet Christ ekewet ete: “Edieke owo mbufo ekededi ananade ọniọn̄, yak enye aka iso eben̄e Abasi, koro enye ọnọ kpukpru owo ke ntatubọk inyụn̄ isueneke owo; ndien ọyọnọ enye.” (Jas. 1:5) Ndi emenịm se Bible etịn̄de emi? Se Solomon ekeben̄ede Abasi edi oro, Abasi ama onyụn̄ ọbọrọ akam esie, ọnọ enye “esịt ifiọk ye ọniọn̄” emi akanamde enye ọdiọn̄ọ se idide akpanikọ ye nsu ke ini ekpede ikpe. (1 Ndi. 3:7-14) Kpa ye oro nnyịn mîtiehe nte Solomon, imenen̄ede inịm ke Abasi ọyọnọ irenowo emi ẹkamade ifetutom ke esop esie ifiọk man ẹkeme ndinen̄ede nse mban̄a mme erọn̄ Esie.—N̄ke 2:6.

13, 14. (a) Tịn̄ nte “ima Christ” akanamde Paul anam n̄kpọ. (b) Nso ke “ima Christ” akpanam nnyịn inam?

¹³ N̄kpọ en̄wen oro edinamde ọdọn̄ nnyịn ndinam n̄kpọ nnọ mbon en̄wen edi ndinen̄ede  n̄kere mban̄a se Jehovah ye Eyen esie ẹnamde ẹnọ nnyịn. Se se 2 Corinth 5:14, 15 etịn̄de. (Kot.) Didie ke ima Christ onụk nnyịn? Esịt esinen̄ede enem nnyịn tutu nnyịn ikemeke aba ndime ke ini itiede ikere utọ akakan ima oro Christ akamade nnyịn tutu enye enyịme ndidi ndikpa ke ibuot nnyịn nte Ete esie ọkọdọhọde. Ima Christ akanam Paul esịn ifịk ke utom Abasi. Ima emi ikayakke enye ekere aban̄a idemesie kpọt, edi akakam anam enye ada utom Abasi ye edinam n̄kpọ nnọ ekemmọ nditọete ye mbon oro mîdịghe nditọete ke ata akpan n̄kpọ.

¹⁴ Esịt esinen̄ede enem nnyịn ke ini itiede ikere nte Christ amade nnyịn. Ndien emi anam ikụt ke ekpenen̄ede ọdiọk edieke ikade iso ‘itọ inọ obụkidem,’—oro edi, ndisịn ibuot nsịn itọn̄ nnam se imade ye se ibehede nnyịn kpọt. Utu ke ndidu utọ uwem oro, nnyịn imenyịme ndinam ukpụhọde ke nte isidude uwem man ikeme ndibem iso nnam utom oro Abasi ọnọde nnyịn. Akam enenem nnyịn ‘ndidụk ufụn’ nnọ nditọete nnyịn sia imama mmọ. (Kot Galatia 5:13.) Edieke idade idem nte ifịn emi ẹsụhọrede idem ẹnam n̄kpọ ẹnọ owo, idinam n̄kpọ ukpono ukpono ye otuerọn̄ Jehovah. Nnyịn ididehedei itie nte Satan emi amade ndidori ikọt Abasi ikọ.—Edi. 12:10.

N̄kpọ Ofụri Ufọk

15, 16. Nso ke ofụri ufọk ẹkpenam man ibuot ufọk odot ndidi asan̄autom unamutom m̀mê ebiowo?

¹⁵ Ke ini ẹsede m̀mê owo odot ndidi asan̄autom unamutom m̀mê ebiowo, edieke edide enye ọdọ n̄wan onyụn̄ enyene nditọ, nte mmọ ẹsinamde n̄kpọ ekeme ndinam enye odot mîdịghe ẹbọ n̄kpọ ẹbiat ẹnọ enye. Ke nditịm ntịn̄, se n̄wan ye nditọ esie ẹdide ke esop ye nte mmọ ẹsidude uwem ẹkeme ndinam enye odot m̀mê okûdot. Emi owụt ke idịghe enyene idem kpọt esinam n̄kpọ man odot ndidi asan̄autom unamutom m̀mê ebiowo, ke edi n̄kpọ ofụri ufọk.—Kot 1 Timothy 3:4, 5, 12.

¹⁶ Jehovah esinem esịt ke ini ubon ẹdianade kiet. (Eph. 3:14, 15) Man ibuot ufọk ese aban̄a ifetutom esie ke esop onyụn̄ ese aban̄a ubon esie “ke eti usụn̄,” oyom enye enyene eti ibuot. Ntem, akpana ebiowo m̀mê asan̄autom unamutom esinịm Utuakibuot Ubon ye ubon esie kpukpru urua man mmọ ẹbọ ufọn. Enye okponyụn̄ enyene ndisisan̄a ye mmọ ke an̄wautom kpukpru ini. Okponyụn̄ ana n̄wan ye nditọ esie ẹnen̄ede ẹbere ye enye.

Ndi Akpama Ndifiak N̄kama Ifetutom?

17, 18. (a) Nso ke owo akpanam edieke ẹkebọde enye ifetutom? (b) Nso ke owo oro ẹkebọde ifetutom mîkpefreke?

¹⁷ Ekeme ndidi ekedi ebiowo m̀mê asan̄autom unamutom ini kiet ko, edi idahaemi udịghe aba. Amama Jehovah omonyụn̄ ọdiọn̄ọ ke enye ekere aban̄a fi. (1 Pet. 5:6, 7) Ndi enyene ukpụhọde emi ẹkedọhọde anam? Nyịme ndinam, kûfan̄a; Abasi oyonyụn̄ an̄wam fi. Kûyat esịt. Wụt ke emenyene eti ibuot, kûduọk idotenyịn. Eyenete emi ẹkebọde ifetutom ke ama ekedi ebiowo ke ediwak isua ọdọhọ ete: “Mma mbiere ke nditreke ndidụk mbono esop kpukpru ini, ndika ukwọrọikọ kpukpru ini, nnyụn̄ n̄kot Bible nte n̄kesikotde ke ini n̄kedide ebiowo,  ndien se n̄kesinyụn̄ nnamde edi oro. Emi ama ekpep mi ime sia n̄kekere ke isua kiet m̀mê iba ama ebebe, ke ẹyefiak ẹmek mi ebiowo, edi ama ekpere ndisịm isua itiaba mbemiso ẹkefiakde ẹmek mi. Ẹma ẹsịn udọn̄ ẹnọ mi ẹte n̄kûyak idem emem mi, yak n̄ka iso nnam se idinamde mfiak ndot ndidi ebiowo; emi ama enen̄ede an̄wam mi.”

¹⁸ Edieke oro onyụn̄ etịbede ọnọ fi idahaemi, kûyak idem emem fi. Ti mfọn Jehovah oro ekemde fi ye ubon fo udeme. Sịn udọn̄ nọ ubon fo ẹka iso ẹnam n̄kpọ Jehovah, sikise mbon emi idem mîsọn̄ke, nyụn̄ sịn udọn̄ nọ mbon emi idem ememde. Nen̄ede kop inemesịt ndisịne ke otu mbon emi ẹtorode Abasi ẹnyụn̄ ẹkwọrọde eti mbụk Obio Ubọn̄ esie nte kiet ke otu Mme Ntiense Jehovah. *—Ps. 145:1, 2; Isa. 43:10-12.

Fiak Tie Kere

19, 20. (a) Ẹdọhọ irenowo emi ẹma ẹkena baptism ẹnam nso? (b) Nso ke idineme urua en̄wen?

¹⁹ Ẹnen̄ede ẹyom mbiowo ye mme asan̄autom unamutom mfịn. Mmọdo, isịn udọn̄ inọ irenowo emi ẹnade baptism ite ẹfiak ẹtie ẹkere idaha mmọ ẹnyụn̄ ẹbụp idemmọ ẹte: ‘Edieke mmendịghe kan̄a ebiowo m̀mê asan̄autom unamutom, ndi mmekeme nditịn̄ ntak emi mmendịghe?’ Yak spirit Abasi anam ebiere nnennen n̄kpọ oro akpanamde aban̄a emi.

²⁰ Kpukpru owo ke esop ẹsibọ ufọn n̄waidem oro ekemmọ nditọete ẹnamde. Ke ini isifọnde ido inyụn̄ inamde n̄kpọ inọ mbon en̄wen ke ofụri esịt, imesikop inemesịt sia itọde inọ spirit. Edi ikpanaha iyat spirit emi esịt. Nso ke ikpanam mbak emi iditịbe? Se idinemede urua en̄wen edi oro.

[Ikọ Idakisọn̄]

Didie ke Afo Ọkpọbọrọ?

• Nso ke ntịn̄nnịm ikọ emi odude ke Micah 5:5 anam idiọn̄ọ?

• Tịn̄ se ndinam n̄waidem abuanade.

• Nso ke owo akpanam man ọdọn̄ enye ndikama ifetutom?

• Ntak emi idọhọde ke owo ndidi ebiowo m̀mê asan̄autom unamutom edi n̄kpọ ofụri ufọk-ọ?

[Mme Mbụme Ukpepn̄kpọ]

[Ndise ke page 25]

Nso ke akpanam man odot ndinyene ifetutom?