Wụt ke Idi Ata Anditiene Christ

“Kpukpru nti eto ẹn̄wụm nti mfri, edi kpukpru mbumbu eto ẹn̄wụm mbukpo mfri.”—MATT. 7:17.

1, 2. Didie ke ata mme anditiene Christ ẹkpụhọrede ye mbon oro ẹbian̄ade idem ẹte itiene enye, akpan akpan ke utịt ini emi?

JESUS ọkọdọhọ ke ẹdida mfri—oro edi, se mme owo ẹkpepde ye nte mmọ ẹdude uwem—ẹfiọk ata mme anditiene imọ ye kpukpru mbon oro ẹbian̄ade idem ẹte ke itiene imọ. (Matt. 7:15-17, 20) Se mme owo ẹkpepde ẹsitụk nte mmọ ẹdude uwem. (Matt. 15:18, 19) Mbon emi owo mîkpepke mmọ akpanikọ ẹsin̄wụm “mbukpo mfri,” edi mbon oro ẹkpepde akpanikọ ẹsin̄wụm “nti mfri.”

² Ẹnen̄ede ẹkụt orụk mfri iba emi ke utịt ini emi. (Kot Daniel 12:3, 10.) Mme nsunsu Christian ifiọkke Abasi, ẹsinyụn̄ ẹnyene enyọn̄ enyọn̄ ido uten̄e Abasi, edi idụhe uwem ekekem ye oro. Edi ata mme Christian ẹkpono Abasi ke “spirit ye ke akpanikọ.” (John 4:24; 2 Tim. 3:1-5) Mmọ ẹdomo ndidu uwem nte Christ. Edi nso kaban̄a nnyịn owo kiet kiet? Nte inemede n̄kpọ ition emi ẹdade ẹdiọn̄ọ ata mme Christian, bụp idemfo ete: ‘Ndi se nsinamde ye se nsikpepde mme owo ẹkekem ye Ikọ Abasi? Ndi mmanam akpanikọ ọdọn̄ mbon oro ẹyomde enye?’

Nam Se Ikọ Abasi Ọdọhọde

3. Nso ke Jehovah oyom, ndien nso ke emi ọwọrọ ọnọ ata mme Christian?

³ Jesus ọkọdọhọ ete: “Idịghe kpukpru mbon oro ẹkotde mi ẹte, ‘Ọbọn̄, Ọbọn̄,’ ẹdidụk ke obio ubọn̄ heaven, edi enye emi anamde uduak Ete mi emi odude ke heaven edidụk.” (Matt. 7:21) Ih, Jehovah iyomke mbon oro ẹdọhọde-dọhọ ke idi Christian, edi oyom mbon oro ẹdude uwem nte mme Christian. Ata mme Christian ẹfiọk ke ana iwụt ke idi Christian ke kpukpru usụn̄ uwem mmimọ, emi esịne nte idade okụk, utom, udia uwem, mme usọrọ ererimbot, ndọ, ye mme n̄kpọ eken. Edi mbon oro ẹbian̄ade idem ẹte idi Christian ẹnyụn̄ ẹdu uwem nte mbon ererimbot emi ẹdiọn̄de-diọn̄ ẹdiọk ke mme akpatre usen emi.—Ps. 92:7.

4, 5. Didie ke ikeme ndida ikọ Jehovah oro odude ke Malachi 3:18 ndu uwem?

⁴ Prọfet Malachi ekewet ete: “Mbufo ẹyetọn̄ọ ntak ẹkụt nte eti ye idiọk ẹsan̄ade isio, ye nte anam n̄kpọ Abasi ye owo eke mînamke n̄kpọ esie ẹsan̄ade isio.” (Mal. 3:18) Nte osụk ekerede aban̄a ikọ itie N̄wed Abasi emi, bụp idemfo ete: ‘Ndi ntie nte mbon ererimbot, mîdịghe, ndi mmokpụhọde ye mmọ? Ndi nsinyụn̄ nyom ndinam n̄kpọ nte nditọ ufọkn̄wed nnyịn, m̀mê mbon itieutom nnyịn, m̀mê mbon mbubehe mi, mîdịghe, ndi mmesisọn̄ọ nnam se Bible etemede nnyụn̄ nsioro uyo ntịn̄ ikọ ke ini oyomde ẹnam oro?’ (Kot 1 Peter 3:16.) Emi iwọrọke ndinam n̄kpọ nte imọfọn ikaha, edi akpana inen̄ede ikpụhọde ye mbon oro mîmaha Jehovah, mînyụn̄ inamke n̄kpọ esie.

⁵ Edieke okụtde ke oyom anam ukpụhọde, bọn̄ akam nọ Jehovah ban̄a oro, kpep Bible nyụn̄ dụk mbono esop kpukpru ini man ọsọn̄ idem ke n̄kan̄ eke spirit. Nte esịnde idem anam Ikọ Abasi, ntre ke edin̄wụm “nti mfri,” emi esịnede “mfri n̄kpọk-inua eke ẹkponode enyịn̄” Abasi.—Heb. 13:15.

 Kwọrọ Etop Obio Ubọn̄ Abasi

6, 7. Didie ke nte ata mme Christian ẹdade etop Obio Ubọn̄ okpụhọde ye nte mme nsunsu Christian ẹdade enye?

⁶ Jesus ọkọdọhọ ete: “Ana ntan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.” (Luke 4:43) Ntak emi Jesus ekemekde Obio Ubọn̄ Abasi nte ibuotikọ ukwọrọikọ esie? Koro enye ama ọfiọk ke imọ emi idide Edidem Obio Ubọn̄ oro iyada ye nditọete imọ oro Abasi eyetde aran isio idiọkn̄kpọ ye Satan emi edide ntak afanikọn̄ ubonowo ifep. (Rome 5:12; Edi. 20:10) Ntak edi oro enye ọkọdọhọde mme anditiene enye ete ẹkwọrọ Obio Ubọn̄ oro tutu editịm n̄kpọ emi esịm utịt. (Matt. 24:14) Mbon oro ẹtienede Christ ke inua inua inamke utom emi—ke akpanikọ, mmọ ikemeke-keme ndinam utom emi. Ntak emi idọhọde ntre? Yak inọ ntak ita kpọt. Akpa, mmọ ẹkpesasan̄a didie ẹkwọrọ se mmọ mîfiọkke? Ọyọhọ iba, ekese mmọ inyeneke nsụhọdeidem ye uko ndiyọ nsahi ye ubiọn̄ọ oro isisobode ke an̄wautom. (Matt. 24:9; 1 Pet. 2:23) Ọyọhọ ita, mmọ inyeneke spirit Abasi.—John 14:16, 17.

⁷ Edi ata mme anditiene Christ ẹfiọk se Obio Ubọn̄ Abasi edide ye se enye edinamde. Ke adianade do, mmọ ẹbem iso ẹyom Obio Ubọn̄ emi, ndien spirit Jehovah an̄wam mmọ ndikwọrọ enye ke ofụri ererimbot. (Zech. 4:6) Ndi emesinam utom emi kpukpru ini? Ndi ke odomo ndinam n̄kọri ke utom emi, oro edi, ndibịghi ke an̄wautom n̄kan nte ekesibịghide m̀mê ndikpep ndikwọrọ ikọ ọfọn akan nte ekesikwọrọde? Ndusụk owo ẹnam utom ukwọrọikọ mmọ ọfọn akan nte ekesidide ke ndisikot Bible ediwak ini ke an̄wautom. Apostle Paul emi ekesimade ndida N̄wed Abasi n̄kọk ibuot ye mme owo ọkọdọhọ ke “ikọ Abasi enyene uwem onyụn̄ enyene odudu.”—Heb. 4:12; Utom 17:2, 3.

8, 9. (a) Bụk ifiọkutom oro owụtde ufọn edikot Bible ke an̄wautom. (b) Nso idin̄wam nnyịn inen̄ede idiọn̄ọ itie N̄wed Abasi oro ikpokotde ke an̄wautom?

⁸ Eyenete kiet ama okot Daniel 2:44 ke an̄wautom ọnọ owo Catholic onyụn̄ anam enye ọfiọk ke Obio Ubọn̄ Abasi ayanam inen̄ede inyene emem ye ifụre. Ete oro ama ọdọhọ ete: “Mmenen̄ede mma nte okụbọrede Bible okot ọnọ mi utu ke ndidọhọ ke Bible ọdọhọ ete.” Ke ini eyenete en̄wen okokotde Bible ọnọ n̄wan Orthodox kiet, n̄wan oro ama obụp ediwak mbụme. Eyenete emi ye n̄wan esie ẹma ẹda Bible ẹbọrọ mbụme esie. Ekem n̄wan oro ama ọdọhọ ete: “Ndi ẹmefiọk ntak emi ntuakde nda nneme nneme ye mbufo? Edi sia ẹkeda Bible ẹdi edem mi, ẹnyụn̄ ẹkụbọde enye ẹkot.”

⁹ N̄wed nnyịn n̄ko edi akpan n̄kpọ, ntak edi oro isinọde mme owo ke an̄wautom. Edi Bible edi ata akpan n̄kpọutom nnyịn. Ntre, ekpedi usukotke Bible kpukpru ini ke an̄wautom, mbọk tọn̄ọ ndisikot. Emekeme ndimek itie N̄wed Abasi ifan̄ oro etịn̄de se Obio Ubọn̄ Abasi edide ye nte enye edikọkde akpan mfịna oro afịnade mme owo ke mbọhọ mbufo. Ekem ben̄e idem ndikot mme itien̄wed emi ke an̄wautom.

 Kop Inemesịt Ndidi Kiet ke Otu Mme Ntiense Jehovah

10, 11. Didie ke Jesus akada enyịn̄ Abasi, edi didie ke ediwak mbon oro ẹdọhọde ke itiene enye ẹda enyịn̄ Abasi?

¹⁰ “Jehovah onyụn̄ ọdọhọ ete, Mbufo ẹdi ntiense mi, ndien ami ndi Abasi.” (Isa. 43:12) Jesus Christ emi edide n̄kponn̄kan Ntiense Jehovah akada nte akwa ukpono ndikere enyịn̄ ndian Abasi nnyụn̄ nnam mme owo ẹfiọk enyịn̄ emi. (Kot Exodus 3:15; John 17:6; Mme Hebrew 2:12.) Ke akpanikọ, se ikanamde ẹkot enye “Ntiense Akpanikọ” edi oro.—Edi. 1:5; Matt. 6:9.

¹¹ Edi mbon oro ẹdọhọde ke ida ke ibuot Abasi ye Eyen esie ẹdia ndọk ẹsion̄o enyịn̄ Abasi ẹfep ke Bible mmọ. Utọ n̄kpọ emi akanam mme akama ukara Ufọkabasi Catholic ẹdọhọ mme bishop Catholic ndondo emi ẹte ke “owo inyeneke ndisiak m̀mê ndikot enyịn̄ Abasi, oro edi, YHWH” ke edinam ufọkabasi. * Utọ ikọ oro ọdiọk ebe nde!

12. Didie ke ẹkenen̄ede ẹdiọn̄ọ ikọt Jehovah ke 1931?

¹² Ata mme Christian mfịn ẹkot enyịn̄ Abasi uko uko nte Christ ye ‘ediwak otu ntiense’ oro ẹkedude ke eset ẹkesikotde. (Heb. 12:1) Ke 1931, ikọt Abasi ẹma ẹnyịme ndikam n̄kere enyịn̄ ndian Jehovah, oro edi, Mme Ntiense Jehovah. (Kot Isaiah 43:10-12.) Ntem ke ata mme anditiene Christ ẹkekabade ẹdi ikọt enyịn̄ Abasi ke ata san̄asan̄a usụn̄.—Utom 15:14, 17.

13. Didie ke ikpodu uwem nte Mme Ntiense Jehovah?

¹³ Didie ke nnyịn owo kiet kiet ikpodu uwem nte Mme Ntiense Jehovah? Akpan n̄kpọ kiet emi anade inam edi ndisịn idem ntie ntiense mban̄a Abasi. Paul ekewet ete: “Ẹyenyan̄a owo ekededi eke edisemede okot enyịn̄ Jehovah. Edi, didie ke mmọ ẹdikot enye emi mmọ mîkọbuọtke idem? Didie, n̄ko, ke mmọ ẹdibuọt idem ye enye emi mmọ mîkokopke iban̄a? Didie, n̄ko, ke mmọ ẹdikop ke owo mîkwọrọke? Didie, n̄ko, ke mmọ ẹdikwọrọ ke mîbọhọke ẹdọdọn̄ mmọ?” (Rome 10:13-15) Ke adianade do, akpana ida usọ iyarade nsu oro nsunsu ido ukpono ẹsude ẹdori Andibot, utọ nte ukpepn̄kpọ ikan̄ hell, emi akam anamde Abasi ima akabade etie nte Devil emi edide ọbọn̄ ibak.—Jer. 7:31; 1 John 4:8; men Mark 9:17-27 domo.

14. Esitie ndusụk owo didie ke idem ke ini ẹdide ẹdifiọk enyịn̄ Abasi?

¹⁴ Ndi esịt inemke fi ndikere enyịn̄ ndian Ete fo eke heaven? Ndi aman̄wam mbon en̄wen ẹtiene ẹdiọn̄ọ edisana enyịn̄ emi? N̄wan kiet ke Paris ke France ama okop ke Mme Ntiense Jehovah ẹdiọn̄ọ enyịn̄ Abasi, ntre enye ama ọdọhọ Ntiense oro enye okosobode ete owụt imọ enyịn̄ Abasi ke Bible imọ. Ke ini eyenete emi okokotde Psalm 83:18 ọnọ enye, n̄kpọ emi ama enen̄ede otụk mma emi. Enye ama ọtọn̄ọ ndikpep Bible, ndien enye idahaemi edidi anam-akpanikọ eyenete oro anamde utom Abasi ke esenidụt. Ke ini n̄wan Catholic emi odụn̄de ke Australia okokụtde enyịn̄ Abasi ke Bible, esịt ama adat enye tutu enye atua. Enye asiak usụn̄ idahaemi ke ediwak isua. Ke ini Mme Ntiense ke Jamaica ẹkewụtde mma kiet enyịn̄ Abasi ke Bible esie ke ndondo emi, idatesịt ama anam mma emi atua eyet n̄ko. Mmọdo, dat esịt ndikere enyịn̄ ndian Abasi, nyụn̄ nam kpukpru owo ẹfiọk ọsọn̄urua enyịn̄ emi kpa nte Jesus akanamde.

“Ẹkûma Ererimbot”

15, 16. Didie ke ata mme Christian ẹse ererimbot, ndien nso ke ikpobụp idem nnyịn?

¹⁵ “Ẹkûma ererimbot m̀mê se idude ke ererimbot. Edieke owo ekededi amade ererimbot, ima Ete idụhe enye ke esịt.” (1 John 2:15) Ererimbot ye mbumek esie ẹbọbiọn̄ọ Jehovah ye edisana spirit esie. Mmọdo, ke adianade ye nditre ndidi ubak ererimbot, ata mme anditiene Christ imaha ererimbot emi, sia mmọ ẹfiọk ke James mbet Christ ọkọdọhọ ke “edidi ufan ye ererimbot edi edidi asua ye Abasi.”—Jas. 4:4.

¹⁶ Ekeme ndinen̄ede nsọn̄ ndinam item James emi sia idomo okpon akaha ke ererimbot  emi. (2 Tim. 4:10) Edi Jesus ama ọbọn̄ akam ke ibuot kpukpru nnyịn emi idide mme anditiene enye ete: “Mben̄eke nte osio mmọ ke ererimbot, edi mben̄e nte ekpeme mmọ ke ntak andidiọk. Mmọ idịghe ubak ererimbot, kpa nte ami mmendịghe ubak ererimbot.” (John 17:15, 16) Bụp idemfo ete: ‘Ndi mmodomo nditre ndidi ubak ererimbot? Ndi mme owo ẹfiọk ke nsitieneke ndia usọrọ m̀mê ndidụk mme edinam oro Bible akpande? Ndi mmọ ẹfiọk n̄ko ke nsitieneke mbuana ke edinam ekededi oro ebietde ererimbot emi ọkpọkọm idịghe mme okpono ndem ẹketọn̄ọ enye?’—2 Cor. 6:17; 1 Pet. 4:3, 4.

17. Nso ikeme ndinam mbon emi ẹnyenede eti esịt ẹdikpono Jehovah?

¹⁷ Imọfiọk ke ndidu uwem nte Bible etemede idinamke ererimbot ẹma nnyịn, edi emi ekeme ndikam nnam mbon oro ẹnyenede eti esịt ẹyom ndifiọk ntak emi idude uwem ntre. Ke akpanikọ, ke ini utọ mbon emi ẹkụtde ke se inịmde ke akpanikọ ẹnen̄ede ẹto N̄wed Abasi, ẹnyụn̄ ẹkụtde nte emi anamde idu uwem, mmọ ẹkeme ndidọhọ mbon oro ẹyetde aran ẹte: “Ẹyak nnyịn ika ye mbufo: koro nnyịn imokop ite ke Abasi odu ye mbufo.”—Zech. 8:23.

Nyene Ima nte Ata Christian

18. Didie ke ikeme ndima Jehovah ye mbọhọidụn̄ nnyịn?

¹⁸ Jesus ọkọdọhọ ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.” “Afo [onyụn̄] enyene ndima mbọhọidụn̄ fo nte idemfo.” (Matt. 22:37, 39) Ima emi (ẹkọtde a·gaʹpe ke usem Greek) edi ima emi ẹmade n̄kpọ sia nnennen n̄kpọ oro ẹkpenamde edi oro. Ima emi esinam owo anam se enye akpanamde, anam se inende onyụn̄ odu eti uwem. Enye n̄ko esinam owo enen̄ede ekere aban̄a mbon en̄wen. (1 Pet. 1:22) Enye idịghe ibụk, sia owo emi enyenede orụk ima emi esiwa idem anam n̄kpọ ọnọ mbon en̄wen, idịghe nditetịn̄ ke inua kpọt.—Kot 1 Corinth 13:4-7.

19, 20. Bụk ifiọkutom oro owụtde nte ima Christian enyenede odudu.

¹⁹ Sia ima edide ubak mbun̄wụm edisana spirit Abasi, enye anam ata mme Christian ẹnam se mbon en̄wen mîkemeke ndinam, utọ nte ndikan kpukpru orụk asari ye usua. (Kot  John 13:34, 35; Gal. 5:22) Utọ ima emi esinen̄ede otụk mbon mbieterọn̄ ke idem. Ke uwụtn̄kpọ, akpa ini oro eyen Jew kiet okodụkde mbono esop nnyịn, idem ama enen̄ede akpa enye ndikụt mme Jew ye mbon Arab ẹtiede kiet ẹkpono Jehovah. Oro ama anam enye esidụk mbono esop kpukpru ini onyụn̄ enyịme ẹsidikpep imọ Bible. Ndi emesima nditọete fo ntre ke ofụri esịt? Ndi emesinyụn̄ ọkọm mbufa owo oro okụtde ke Ufọkmbono Obio Ubọn̄, inamke n̄kpọ m̀mê mmọ ẹto m̀mọ̀n̄, edide mmọ ẹdi ubuene m̀mê imọ?

²⁰ Nnyịn imesidomo ndima kpukpru owo sia idide ata mme Christian. Ekpri asuanetop kiet ke El Salvador ekekpep Bible ye n̄wan Catholic kiet emi edide isua 87. Mma emi ama enen̄ede ama ufọkabasi esie. Edi usen kiet, idem ama enen̄ede ọdiọk enye tutu edi se ẹmende enye ẹka ufọkibọk. Ke ama ọkọnyọn̄ ufọkibọk edi, Mme Ntiense ẹma ẹka ẹkese enye ẹnyụn̄ ẹnọ enye udia. Mmọ ẹma ẹse n̄kpọ ẹban̄a enye ke n̄kpọ nte ọfiọn̄ kiet. Edi enye ikekwe owo Catholic mmọ ndomokiet. Nso ke enye akanam? Mma emi ama ọduọn̄ọ kpukpru ndisọi mbiet esie, esịn n̄wed ọkpọn̄ Ufọkabasi Catholic, onyụn̄ aka iso ekpep Bible ye Mme Ntiense Jehovah. Omokụt nte ima Christian enyenede odudu! Ima emi ekeme nditụk owo akam akan se itịn̄de.

21. Nso ke ikpanam mbak ikûkop ndịk uban̄a n̄kpọn̄?

²¹ Ibịghike, Jesus ọmọn̄ ọdọhọ kpukpru mbon oro ẹbian̄ade idem ẹte itiene enye ete: “Akananam ndiọn̄ọke mbufo! Ẹdianade mi ke idem, mbufo mme abiatibet.” (Matt. 7:23) Nnyịn ikpakam ika iso idu uwem oro ọnọde Abasi ye Eyen esie ubọn̄. Jesus ọkọdọhọ ete: “Ẹyemen kpukpru owo eke ẹkopde ẹnyụn̄ ẹnamde mme ikọ mi emi ẹdomo ye owo ọniọn̄, emi ọkọbọpde ufọk esie odori ke enyọn̄ akamba itiat.” (Matt. 7:24) Ke akpanikọ, edieke iwụtde ke idi ata mme anditiene Christ, Abasi ọyọdiọn̄ nnyịn, ndịk idinyụn̄ inamke nnyịn m̀mê n̄kpọn̄ editie didie; idinyụn̄ itie nte ufọk oro ẹbọpde ẹdori ke enyọn̄ akamba itiat.

[Ikọ Idakisọn̄]

Nte Afo Emeti?

• Didie ke ata mme anditiene Christ ẹkpụhọde ye mbon oro ẹbian̄ade idem ẹte ke itiene enye?

• Siak ndusụk “mfri” oro ẹdade ẹdiọn̄ọ ke owo edi ata Christian.

• Nso ke akpanam man odu uwem nte Christian?

[Mme Mbụme Ukpepn̄kpọ]

[Ndise ke page 13]

Ndi emesikot Bible kpukpru ini ke an̄wautom?

[Ndise ke page 15]

Ndi mme owo ẹfiọk ke usutieneke udia usọrọ emi N̄wed Abasi akpande?