Ndiyom Ata Uduak Uwem
Ndiyom Ata Uduak Uwem
“Yak kpukpru n̄kpọ eke ẹduọkde ibifịk ẹtoro Jehovah.”—PSALM 150:6.
1. Tịn̄ nte akparawa kiet okoyomde uduak uwem.
“N̄KEKPEP ibọkusọbọ sia n̄koyomde ndida uwem mi n̄n̄wam mme owo. Mma n̄kere n̄ko ke uku ye okụk oro ndinyenede nte abiausọbọ ẹyenam n̄kop inemesịt,” ntem ke Seung Jin emi ọkọkọride ke Korea ọdọhọ. * “Esịt ikenemke mi ke ini n̄kedide ndifiọk ke un̄wam oro abiausọbọ ekemede ndinọ edi ata esisịt. Do mma ntọn̄ọ ndikpep utomusọ, edi utomusọ mi ekenyene ata esisịt ufọn ọnọ mbon en̄wen, ntre eketie mi nte ke nnam n̄kpọ ke ufọn idemmi kpọt. Ntre mma n̄kabade ndi andikpep, ndien ikebịghike mma ndikụt ke n̄kukụre se n̄kanamde ekedi nditịn̄ se n̄kpọ edide nnọ mme owo, nnọhọ mmọ ndausụn̄ oro ekemede ndinọ mmọ ata inemesịt.” Seung Jin okoyom ata uduak uwem, kpa nte ediwak owo ẹsiyomde.
2. (a) Nso ke ndinyene uduak uwem ọwọrọ? (b) Isan̄a didie ifiọk ke ama enyene ntak emi Andibot okobotde nnyịn esịn mi ke isọn̄?
2 Ndinyene ata uduak uwem ọwọrọ ndinyene ntak ndidu uwem, akpan utịtmbuba, ye akpan ntak emi anamde isịn ukeme inam se ededi oro inamde. Nte mme owo ẹkeme ndinen̄ede nnyene utọ uduak oro? Ih! Andibot ndikọnọ nnyịn mbufiọk, ubieresịt, ye ukeme ukere n̄kpọ ọwọrọ ke ama enyene akpan ntak emi akanamde enye obot nnyịn esịn mi ke isọn̄. Ke ntre, ọwọrọ ke n̄kukụre usụn̄ oro ikemede ndinyene ata uduak uwem edi ndidu uwem ekekem ye uduak Andibot.
3. Nso ke se Abasi akaduakde ọnọ ubonowo abuana?
3 Bible asian nnyịn ke se Abasi akaduakde ọnọ nnyịn abuana ekese n̄kpọ. Ke uwụtn̄kpọ, utịbe utịbe usụn̄ oro Abasi okobotde nnyịn enen̄ede owụt ata ima oro enye amade nnyịn. (Psalm 40:5; 139:14) Ntem, ndidu uwem ekekem ye uduak Abasi ọwọrọ ndinen̄ede mma mbon en̄wen nte Abasi amade mmọ. (1 John 4:7-11) Onyụn̄ ọwọrọ n̄ko ndinịm mbet Abasi, emi ẹn̄wamde nnyịn idu uwem ekekem ye ima ima uduak esie.—Ecclesiastes 12:13; 1 John 5:3.
4. (a) Nso ke oyom man inyene ata uduak uwem? (b) Nso idi akakan uduak uwem emi owo ekededi ekemede ndinyene?
4 Abasi akaduak n̄ko ete ubonowo ẹkop inemesịt, ẹdu ke emem ye kiet eken, ẹnyụn̄ ẹdu ke emem ye mme edibotn̄kpọ eken. (Genesis 1:26; 2:15) Nte ededi, nso ke oyom inam man ikop inemesịt inyụn̄ inyene ifụre ye emem? Ukem nte eyenọwọn̄ ekemede ndikop inemesịt nnyụn̄ nnyene ifụre ke ini ọfiọkde ke ete ye eka imọ do ye imọ, oyom inyene eti itie ebuana ye Ete nnyịn eke heaven man inyene ata uduak uwem. (Mme Hebrew 12:9) Abasi anam nnyịn ikeme ndinyene utọ itie ebuana oro ye enye ke ndiyak nnyịn isan̄a ikpere imọ, ye ke ndikop akam nnyịn. (James 4:8; 1 John 5:14, 15) Edieke ‘isan̄ade ye Abasi’ ke mbuọtidem inyụn̄ ikabade idi mme ufan esie, nnyịn iyadat enye esịt inyụn̄ itoro enye. (Genesis 6:9; Mme N̄ke 23:15, 16; James 2:23) Akakan uduak uwem emi owo ekemede ndinyene edi oro. Andiwet psalm ekewet ete: “Yak kpukpru n̄kpọ eke ẹduọkde ibifịk ẹtoro Jehovah.”—Psalm 150:6.
Nso Idi Uduak Uwem Fo?
5. Ntak emi mîwụtke eti ibuot ndida inyene obụkidem nte ebeiso n̄kpọ?
5 Se Abasi akaduakde ọnọ nnyịn esịne ndise mban̄a idem nnyịn ye ubon nnyịn. Emi esịne ndise mban̄a mme n̄kpọ eke obụk ye mme n̄kpọ eke spirit. Nte ededi, oyom ida eti ibuot inam n̄kpọ emi mbak mme n̄kpọ obụkidem ẹdikam ẹbaba ẹnyụn̄ ẹwot mme n̄kpọ eke spirit emi ẹdide akpan n̄kpọ ẹkan. (Matthew 4:4; 6:33) Edi ekpere ndidi n̄kukụre se ibehede ediwak owo edi ndikọ inyene obụkidem. Nte ededi, iwụtke eti ibuot ndidomo ndida n̄kpọ obụkidem kpọt nyụhọ mme udọn̄ nnyịn. Ndụn̄ọde oro ẹkenamde ke ndondo emi ye mme imọ owo ke Asia owụt ke mmọ “isinyeneke ifụre, ẹsinyụn̄ ẹkop editịmede esịt, kpa ye oro inyene mmọ anamde mmọ ẹwọrọ etop ẹnyụn̄ ẹkere ke imenyene se ikoyomde.”—Ecclesiastes 5:11.
6. Nso item ke Jesus ọkọnọ aban̄a ediyom inyene?
6 Jesus ama etịn̄ aban̄a “abian̄a abian̄a odudu inyene.” (Mark 4:19) Inyene esibian̄a owo didie? Enye esinam owo ekere ke imekeme ndinọ owo inemesịt, ke ini edide enye isinamke ẹkop. Enyene-ọniọn̄ Edidem Solomon ọkọdọhọ ete: “Owo eke amade silver iyụhọke silver.” (Ecclesiastes 5:10) Edi ndi owo ekeme ndiyom inyene obụkidem onyụn̄ osụk anam n̄kpọ Abasi ke ofụri ukpọn̄? Baba, ikemeke. Jesus ọkọdọhọ ete: “Baba owo kiet ikemeke ndidụk ufụn nnọ eteufọk iba; koro eyedi enye ayasua kiet onyụn̄ ama enye eken, mîdịghe enye ayadiana ye kiet onyụn̄ esịn enye eken ke ndek. Mbufo ikemeke ndidụk ufụn nnọ Abasi ye Inyene.” Jesus eketeme mme mbet esie ete ẹkûbon inyene obụkidem ẹnọ idemmọ ke isọn̄, edi “ẹbon n̄kpọuto ẹnọ [idemmọ] ke heaven,” oro edi, ndinyene eti enyịn̄ ye Abasi, emi ‘ọfiọkde mme n̄kpọ emi mmọ ẹyomde idem mbemiso mmọ ẹbeben̄e enye.’—Matthew 6:8, 19-25.
7. Didie ke nnyịn ikeme ‘ndisọn̄ọ mmụm ata uwem n̄kama’?
7 Apostle Paul ama ọsọn̄ọ asua ọnọ owo ke n̄kpọ emi ke ini enye ekewetde n̄wed ọnọ ẹsọk Timothy nsan̄autom esie. Enye ọkọdọhọ Timothy ete: “Nọ mbon oro ẹnyenede inyene . . . uyo ete . . . ẹkûnyụn̄ ẹkọn̄ idotenyịn mmọ ke mme inyene oro mînyeneke iwụk, edi ẹkọn̄ ke Abasi, emi ọnọde nnyịn kpukpru n̄kpọ uwak uwak ete ida ikop inemesịt . . . , ẹtat ubọk, ẹnyịme ndibuana se mmọ ẹnyenede, ẹtịm ẹnịm eti itiat idakisọn̄ nte n̄kpọuto ẹnọ idemmọ kaban̄a ini iso, man mmọ ẹkpesọn̄ọ ẹmụm ata uwem ẹkama.”—1 Timothy 6:17-19.
Nso Idi “Ata Uwem”?
8. (a) Ntak emi ediwak owo ẹyomde inyene ye idaha ke ererimbot? (b) Nso ke mme utọ owo oro mîfiọkke?
8 Ke ini ata ediwak owo ẹkopde ikọ oro “ata uwem,” se isidụkde mmọ ekikere edi ọkpọmiọk ọkpọmiọk uwem ye udia-uwem. Magazine mbụk n̄kpọntịbe kiet ke Asia ọdọhọ ete: “Mbon oro ẹsisede ndise senima m̀mê TV ẹsikpep ndinyene se mmọ ẹdade enyịn ẹkụt, ndikpa ekikere mban̄a se mmọ ẹkpenyenede.” Ediwak owo ẹda edikọ inyene obụkidem ye edinyene idaha ke ererimbot nte uduak uwem mmọ. Ediwak owo ẹsiyak ini uyen, nsọn̄idem, ubon, ye mme n̄kpọ eke spirit mmọ ẹtak man ẹnyene mme n̄kpọ emi. Ibat ibat owo kpọt ẹfiọk ke ọkpọmiọk ọkpọmiọk uwem ye udia-uwem oro ẹsisiode ke ekebe ndise ẹdi “spirit ererimbot”—kpa edu ukere n̄kpọ oro akarade ata ediwak ke otu mme odụn̄ isọn̄ onyụn̄ anamde mmọ ẹnam n̄kpọ emi mîsan̄ake ikekem ye se Abasi akaduakde ọnọ nnyịn. (1 Corinth 2:12; Ephesus 2:2) Eyịghe idụhe emi mbon oro mîkopke inemesịt ẹwakde ntem mfịn!—Mme N̄ke 18:11; 23:4, 5.
9. Nso ke mme owo mîdikemeke ndinam tutu amama, ndien ntak-a?
9 Nso kaban̄a mbon oro ẹwade idem ẹnam n̄kpọ ke ufọn mbon en̄wen, ẹdomo nditre biọn̄, udọn̄ọ, ye ufịk? Nti ukeme oro mmọ ẹsịnde ye n̄waidem oro mmọ ẹnamde ẹsiwak ndinyene ufọn. Nte ededi, kpa ye ofụri ukeme oro mmọ ẹsịnde, tutu amama mmọ idikemeke ndikpụhọ editịm n̄kpọ emi nnam ọfọn. Ntak-a? Koro ke nditịn̄ akpanikọ “ofụri ererimbot esịne ke idak odudu andidiọk”—kpa Satan—ndien enye iyomke ẹkpụhọ editịm n̄kpọ emi.—1 John 5:19.
10. Ini ewe ke mbon oro ẹnamde akpanikọ ẹdidu “ata uwem”?
10 Mbọm owo emi mînyeneke idotenyịn efen ke ẹsiode uwem ke editịm n̄kpọ emi ẹfep! Paul ekewet ete: “Edieke edide ke uwem emi ikpọn̄ ke nnyịn idori enyịn ke Christ, nnyịn imenyene mbọm ikan kpukpru owo.” Mbon oro ẹkerede ke uwem okụre ke emi ẹsidọhọ ete: “Ẹyak nnyịn idia inyụn̄ in̄wọn̄, koro nnyịn iyakpa n̄kpọn̄.” (1 Corinth 15:19, 32) Edi idotenyịn odu, kpa “mbufa enyọn̄ ye obufa isọn̄ . . . emi nnyịn itiede ibet nte ekemde ye un̄wọn̄ọ [Abasi], ndien edi mi ke edinen ido edidụn̄.” (2 Peter 3:13) Ini oro, mme Christian ẹyedu “ata uwem,” oro edi, mfọnmma uwem ke nsinsi, edide ke heaven m̀mê ke idak ima ima ukara Obio Ubọn̄ Abasi!—1 Timothy 6:12.
11. Ntak emi ndisịn idem nnam uduak Abasi man utom Obio Ubọn̄ akaka iso anamde uwem enyene uduak?
11 Obio Ubọn̄ Abasi kpọt edikọk mme mfịna ubonowo ofụri ofụri. Ndisịn idem nnam uduak Abasi man utom Obio Ubọn̄ akaka iso edi akakan uduak uwem oro owo ekededi okpoyomde. (John 4:34) Nnyịn imenyene ata eti itie ebuana ye Ete nnyịn eke heaven nte inamde emi. Imonyụn̄ ikop idatesịt ndinam utom ye akpakịp nditọete nnyịn oro ẹyomde ukem uduak uwem emi.
Ndinam Nnennen N̄waidem
12. Tịn̄ ukpụhọde emi odude ke editịm n̄kpọ emi odude ke emi ye “ata uwem.”
12 Bible ọdọhọ ke ererimbot emi odude ke emi “ke ebebe efep kpasụk ntre n̄ko ye mbumek esie.” Idụhe ikpehe ererimbot Satan, esịnede uwọrọetop ye inyene esie, oro owo mîdisoboke ifep, “edi owo eke anamde uduak Abasi ododu ke nsinsi.” (1 John 2:15-17) Inyene oro mînyeneke iwụk, ubọn̄ oro mîbịghike, ye inemesịt oro mîwọrọke usụn̄ ke editịm n̄kpọ emi odude ke emi ibietke “ata uwem”—kpa nsinsi uwem ke Obio Ubọn̄ Abasi—emi edide ke nsinsi nsinsi, ndien odot inam n̄waidem ke ntak oro, ama akam edi inam nnennen n̄waidem.
13. Didie ke ebe ye n̄wan ẹkenam nnennen n̄waidem?
13 Kere ban̄a Henry ye Suzanne. Mmọ ẹnyene ọyọhọ mbuọtidem ke un̄wọn̄ọ Abasi oro nte ke Imọ iyan̄wam kpukpru mmọ eke ẹbemde iso ẹyom Obio Ubọn̄. (Matthew 6:33) Ntem, utu ke mmọ mbiba ndinam utom, mmọ ẹma ẹmek ndidụn̄ ke ufọk oro mîtịmke isọn̄ urua man mmọ ẹkpenen̄ede ẹnyene ini ẹda ẹnam mme n̄kpọ eke spirit ye nditọ mmọ mbiba. (Mme Hebrew 13:15, 16) Mmọ ndinam orụk ubiere oro ikan̄wan̄ake ufan kiet emi ekerede aban̄a mmọ. N̄wan emi ọkọdọhọ Suzanne ete: “Ufan ima, edieke oyomde ndidụn̄ ke eti ufọk, enyene ndiyak n̄kpọ atak fi.” Edi Henry ye Suzanne ẹma ẹfiọk ke ndinịm Jehovah akpa ke uwem mmọ akama “un̄wọn̄ọ uwem idahaemi ye eke uwem oro edidide.” (1 Timothy 4:8; Titus 2:12) Nditọ mmọ ẹma ẹkọri ẹkponi ẹkabade ifịk ifịk mme ọkwọrọikọ uyọhọ ini. Idụhe owo ke ubon mmọ emi ekerede ke imataba n̄kpọ ndomokiet; utu ke oro, mmọ ẹnen̄ede ẹbọ ufọn ke emi ẹnamde ediyom “ata uwem” edi utịtmbuba mmọ.—Philippi 3:8; 1 Timothy 6:6-8.
Kûda ‘Ererimbot Unam N̄kpọ Ọyọhọ Ọyọhọ’
14. Ndifre enyịn mban̄a ata uduak oro idude uwem ekeme ndida n̄kesịm nso n̄kpọ mmọn̄eyet?
14 Nte ededi, edi akwa n̄kpọ-ndịk edieke ifrede enyịn ke ata uduak oro idude uwem inyụn̄ itre ndimụm “ata uwem” n̄kama. “Editịmede esịt ye inyene ye inemesịt uwem emi” ẹkeme ‘ndimen nnyịn mfep.’ (Luke 8:14) Ọkpọsọn̄ udọn̄ kaban̄a mme n̄kpọ obụkidem ye “editịmede esịt uwem” ẹkeme ndinam owo esịn idem ke editịm n̄kpọ emi nte mîkpesịnke. (Luke 21:34) Mbọm ndusụk owo, koro mmọ ẹyak idem ẹsịn ke eyo eyo uyom-inyene idahaemi tutu “ẹtụn usụn̄ ẹkpọn̄ mbuọtidem ẹnyụn̄ ẹkịm ofụri idem mmọ ẹnọ ediwak unan,” ẹnyụn̄ ẹkam ẹtaba ọsọn̄urua itie ebuana mmọ ye Jehovah! Nso akwa ntakurua ke edi ntem nditre ‘ndisọn̄ọ mmụm ata uwem n̄kama’!—1 Timothy 6:9, 10; Mme N̄ke 28:20.
15. Didie ke ubon kiet ẹkebọ ufọn ke ntak emi mmọ ‘mîkadaha ererimbot inam n̄kpọ ọyọhọ ọyọhọ’?
15 Paul eketeme “mmọ eke ẹdade ererimbot ẹnam n̄kpọ ẹdu uwem nte mmọ eke mîdaha enye inam n̄kpọ ọyọhọ ọyọhọ.” (1 Corinth 7:31) Keith ye Bonnie ẹma ẹnam item emi. Keith ọdọhọ ete: “N̄kakabade ndi kiet ke otu Mme Ntiense Jehovah ke ini oro n̄koyomde ndikụre ukpep ke ufọkn̄wed usọbọ edet. Akana mmek se ndinamde. Mma n̄keme ndisisọbọ ediwak owo nnyụn̄ nnam ediwak okụk, edi oro ikpayakke nnyịn inam mme n̄kpọ eke spirit nte ikpanamde. N̄kesisọbọ ibat ibat owo man n̄kpenen̄ede nnyene ini nse mban̄a nsọn̄idem eke spirit ubon nnyịn, emi ekesịnede nditọiban ition, nnyụn̄ nsidu ye mmọ. Okposụkedi nnyịn mîkesiwakke ndinyene okụk oro ikafamde inịm, nnyịn ima ikpep ndisifafam n̄kpọ, ndien nnyịn ima isinyene mme n̄kpọ udu uwem. Ima inen̄ede idiana kiet ke ubon nnyịn, isinyene nneme, inyụn̄ ikop idatesịt. Nte ini akakade, kpukpru nnyịn ima idụk utom uyọhọ ini. Idahaemi nditọ nnyịn ẹdọ ndọ, ndien ita ke otu mmọ ẹnyene nditọ. Ubon mmọ n̄ko ẹkop inemesịt, sia mmọ ẹkade iso ndinịm uduak Jehovah akpa.”
Ndinịm Uduak Abasi Akpa ke Uwem Fo
16, 17. Mmanie ke Bible ọdọhọ ke ẹma ẹnyene ukeme, ndien ẹti mmọ didie?
16 Bible ọdọn̄ọ ediwak uwụtn̄kpọ mbon oro ẹkenamde uduak Abasi ye mbon oro mîkanamke. Se mme uwụtn̄kpọ emi ẹkpepde ebehe n̄kpri ye ikpọ, mme owo ẹtode kpukpru orụk, oro ẹnyụn̄ ẹdude ke nsio nsio idaha. (Rome 15:4; 1 Corinth 10:6, 11) Nimrod ama ọbọp ikpọ obio, edi enye ọkọbọp emi ndida ‘mbiọn̄ọ Jehovah.’ (Genesis 10:8, 9, NW) Edi ediwak owo eken ẹma ẹnịm nti uwụtn̄kpọ. Ke uwụtn̄kpọ, Moses ikadaha edika iso ndi eyen ufọkubọn̄ Egypt nte uduak uwem esie. Utu ke oro, enye akada utom oro Abasi ọkọnọde enye “nte inyene eke okponde akan n̄kpọuto Egypt.” (Mme Hebrew 11:26) Ekeme ndidi Luke emi ekedide abiausọbọ ama esin̄wam Paul ye mbon eken ke udọn̄ọ mmọ. Edi Luke akanam akakan ufọn ọnọ mme owo ke ndikọkwọrọ ikọ nnyụn̄ ntiene n̄wet Bible. Amaedi Paul, owo ifiọkke enye nte ata ekpepibet, edi ẹfiọk enye nte isụn̄utom, emi ekedide ‘apostle ọnọ mme idụt.’—Rome 11:13.
17 Owo isinen̄ekede iti David nte etubom ekọn̄ m̀mê ebre ikwọ, edi ẹsiti enye nte ‘owo eke ekemde esịt ye Abasi.’ (1 Samuel 13:14) Nnyịn ifiọkke Daniel nte akwa owo ukara Babylon, edi ifiọk enye nte prọfet Jehovah emi ọkọsọn̄ọde ada; nnyịn ifiọkke Esther nte ọbọn̄ an̄wan Persia, edi ifiọk enye nte n̄wan emi ekenịmde uwụtn̄kpọ uko ye mbuọtidem; nnyịn ifiọkke Peter, Andrew, James, ye John nte nta mme ọkọiyak, edi ifiọk mmọ nte mme apostle Jesus. Ndien akakan uwụtn̄kpọ edi Jesus, nnyịn ifiọkke enye nte “anamusọ eto,” edi ifiọk enye nte “Christ.” (Mark 6:3; Matthew 16:16) Kpukpru owo oro itịn̄de iban̄a mi ẹma ẹnen̄ede ẹfiọk ke se ededi ukeme, inyene, m̀mê idaha oro mmimọ ikenyenede, ke akpan n̄kpọ ke uwem mmimọ ikedịghe ubọkọkọ ererimbot edi ekedi ndinam n̄kpọ Abasi. Mmọ ẹma ẹfiọk ke akakan ye mfọnn̄kan uduak uwem oro mmimọ ikekemede ndinyene ekedi ndidi owo Abasi.
18. Akparawa Christian kiet ekebiere ndida uwem esie nnam n̄kpọ didie, ndien nso ke enye ekedi edifiọk?
18 Seung Jin, oro iketịn̄de iban̄a ke ntọn̄ọ ama edifiọk emi n̄ko. Enye ọdọhọ ete: “Utu ke ndida ofụri odudu mi nnam utom unọ usọbọ, utomusọ, m̀mê unọ ukpep ererimbot, mma mbiere ndida uwem mi nnam n̄kpọ nte ekemde ye idem oro n̄kayakde nnọ Abasi. Nnam utom idahaemi ke ebiet emi udọn̄ okponde, n̄n̄wam mme owo ẹdụk usụn̄ oro adade esịm nsinsi uwem. N̄kesikere ke utom uyọhọ ini idinen̄ekede iduai mi idem. Idahaemi mmenen̄ede n̄kop nduaidem n̄kan nte akanam n̄kopde, nte ndomode ndifori edu ye ukeme mi ndikpep mme owo oro ẹtode kpukpru ebiet, Bible. Mmokụt ke ndida uduak Jehovah nte uduak uwem nnyịn edi n̄kukụre usụn̄ uwem oro enyenede se ọwọrọde.”
19. Didie ke nnyịn ikeme ndinyene ata uduak uwem?
19 Ẹnọ nnyịn mme Christian ifiọk oro ọnọde uwem ye idotenyịn edinyan̄a. (John 17:3) Mmọdo, ẹyak nnyịn ikûbọ “mfọnido Abasi oro owo mîdotke edi [itaba] uduak esie.” (2 Corinth 6:1) Utu ke oro, ẹyak ida ọsọn̄urua eyouwem nnyịn itoro Jehovah. Ẹyak ikwọrọ ifiọk emi ọnọde inemesịt idahaemi onyụn̄ adade esịm nsinsi uwem. Edieke inamde ntre, nnyịn iyokop inemesịt nte emi Jesus eketịn̄de ete: “Inemesịt okpon ke ndinọnọ akan ke ndibọbọ.” (Utom 20:35) Ndien emi ayanam nnyịn inyene ata uduak uwem.
[Ikọ idakisọn̄]
^ ikp. 1 Ẹkpụhọ ndusụk enyịn̄.
Nte Afo Emekeme Ndinam An̄wan̄a?
• Nso idi akakan uduak oro ikemede ndinyene ke uwem?
• Ntak emi mîwụtke eti ibuot ndida ofụri uwem nnyịn n̄kọ inyene?
• Nso idi “ata uwem” oro Abasi ọn̄wọn̄ọde?
• Didie ke ikeme ndida uwem nnyịn nnam uduak Abasi?
[Mme Mbụme Ukpepn̄kpọ]
[Mme ndise ke page 18]
Mme Christian ẹnyene ndinam nnennen n̄waidem