Ndi Nnyịn Imekeme Ndinen̄ede Mfiọk Abasi?

“Nsinsi uwem ọwọrọ mmọ ndinyene ifiọk mban̄a . . . ata Abasi kierakiet.”—JOHN 17:3.

 APOSTLE PAUL ọkọdọhọ ntem ete: “Inyene ye ọniọn̄ ye ifiọk Abasi ẹtụn̄ọ adan̄a didie!” Enye ama adian do ete: “Mme ikpe esie ẹkak owo ndidụn̄ọde adan̄a didie onyụn̄ ayan̄a owo ndifiọk mme usụn̄ esie didie ntem!” (Rome 11:33) Ndi emi ọwọrọ ke owo ikemeke ndinyene ọniọn̄ ye ifiọk Abasi, oro edi ke owo ikemeke ndifiọk Abasi ye mme uduak esie?

Ndusụk mbon oro ẹnịmde ukpepn̄kpọ ido ukpono emi ẹkotde etikwo etikwo ekikere, ẹkere ke owo ikemeke ndifiọk Abasi. The Encyclopedia of Religion etịn̄ ntem aban̄a utọ ukpepn̄kpọ oro: “Abasi okpon akan kpukpru se ẹdiọn̄ọde ẹban̄a enye. . . . Owo ikemeke ndinọ Abasi enyịn̄ m̀mê nditịn̄ se enye edide. Abasi okon̄ akan enyịn̄ ekededi oro ẹnọde enye m̀mê se ededi oro ẹdọhọde ke enye edi. . . . Owo ikemeke ndidiọn̄ọ enye, koro enye okpon akan se ẹdiọn̄ọde.” *

Magazine oro ẹkotde Newsweek ọdọhọ ke ediwak owo oro mînyeneke ido ukpono ẹnyịme “obufa ukpepn̄kpọ” oro ẹdọhọde ke “n̄kpọ kiet kpọt edi akpanikọ, oro edi ke akpanikọ idụhe.”

Kpa ye oro, ediwak owo isụk ifiọkke se idide uduak uwem. Mmọ ẹsikop iduọesịt ndikụt mme mfịna oro ubuene, udọn̄ọ, ye afai ẹdade ẹdi. Ndien nte uwem ananade iwụk ekeme ndinen̄ede mfịna mmọ. Mmọ ẹkeme ndiyom ndifiọk ntak emi n̄kpọ etiede ntre, edi ẹkeme ndikere ke ibọrọ idụhe sia mmọ mînyeneke ibọrọ. Mmọdo, mme utọ owo oro ẹwọn̄ọ ke ido ukpono ẹnyụn̄ ẹyom ndifiọk Abasi ke usụn̄ idemmọ, ke akam edide mmọ ẹnịm ke enye odu.

Se Bible Etịn̄de

Akpana mbon oro ẹnịmde Bible ke akpanikọ ẹnyụn̄ ẹnyịmede ke Jesus Christ edi Etịn̄ikọ ke ibuot Abasi ẹyom ndifiọk se Bible etịn̄de aban̄a n̄kpọ emi. Eyedi afo emeti ke ini kiet ko Jesus ama etịn̄ aban̄a usụn̄ iba, ke “usụn̄ emi adade owo esịm nsobo atatara onyụn̄ an̄wan̄a” ndien enye emi “adade owo esịm uwem afafaha.” Enye ama etịn̄  nte ẹkemede ndidiọn̄ọ mbon oro ẹsan̄ade ke mme usụn̄ emi ete: “Mbufo ẹyeda mfri mmọ ẹfiọk mmọ.” Nso orụk mfri? Idịghe ke se mmọ ẹtịn̄de, edi edi ke se mmọ ẹnamde, kpa nte Jesus akanamde an̄wan̄a ete: “Idịghe kpukpru mbon oro ẹkotde mi ẹte, ‘Ọbọn̄, Ọbọn̄,’ ẹdidụk ke obio ubọn̄ heaven, edi enye emi anamde uduak Ete mi emi odude ke heaven edidụk.” Ndidọdọhọ ke imenịm ke Abasi odu ikemke. Ana inam uduak Abasi. Mmọdo, owụt ifiọk ndidọhọ ke ana ibem iso ifiọk se inen̄erede idi uduak Abasi.—Matthew 7:13-23.

Jesus ama owụt in̄wan̄-in̄wan̄ ke mme owo ẹkeme ndifiọk Abasi. Enye ọkọdọhọ ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Ana in̄wan̄-in̄wan̄ ke nnyịn imekeme ndinyene ọniọn̄ ye ifiọk oro Abasi ayararede—edi idinyene edieke isịnde ukeme iyom mmọ. Nte ededi, Abasi ọyọnọ mbon oro ẹnamde oro nsinsi uwem, ntre enen̄ede odot isịn ukeme iyom ifiọk Abasi.

[Ikọ idakisọn̄]

[Ndise ke page 4]

Jesus ọkọdọhọ ke mfafaha usụn̄ ada esịm uwem