“Nnyịn Inyene Ndikop Uyo Abasi nte Andikara Utu ke Uyo Owo”

‘Nnyịn Ikemeke Nditre Nditịn̄ Mban̄a Jesus’

N̄KPỌ emi etịbe ke isua 33 E.N., ndien mme ebiereikpe mme Jew, oro edi mbon Sanhedrin, ẹda itie ke enyene-uten̄e ufọkesop mme Jew ke Jerusalem. Mmọ ẹben̄e idem ndikpe ikpe owo 12 oro ẹdide mme anditiene Jesus Christ. Ntak-a? Koro mmọ ẹsikwọrọde Jesus. Ọyọhọ ikaba edi emi apostle Peter ye John ẹdade ke iso esop emi. Edi akpa edi emi apostle duop eken ẹdade ke ikpe.

Akwa oku etịn̄ ikọ ye apostle 12 emi aban̄a ewụhọ oro esop oro ekebemde iso owụk mmọ. Ke ẹma ẹkedọhọ Peter ye John ini oro ẹte ẹtre ndikpep mme owo n̄kpọ mban̄a Jesus, mmọ ẹma ẹbọrọ ẹte: “Ẹkere ise ke idem mbufo m̀mê enen ke enyịn Abasi ndikop uyo mbufo n̄kan eke Abasi. Edi amaedi nnyịn, nnyịn ikemeke nditre nditịn̄ mban̄a mme n̄kpọ emi nnyịn ikokụtde inyụn̄ ikopde.” Ke mme mbet Jesus ẹma ẹkebọn̄ akam ẹben̄e uko, mmọ ẹma ẹka iso ẹtan̄a eti mbụk.—Utom 4:18-31.

Sia akwa oku ọfiọkde ke akpa ewụhọ oro ikowụkde ikanamke mmọ ẹtre ndikwọrọ ikọ, isan̄ enye emi enye ọdọhọ ete: “Nnyịn ima isọn̄ọ iwụk mbufo ite ẹkûka iso ẹkpep aba n̄kpọ ke enyịn̄ emi, ndien, sese! mbufo ẹmeda ukpepn̄kpọ mbufo ẹyọhọ Jerusalem, mbufo ẹmenyụn̄ ẹbiere ndinam iyịp owo emi ọkọbọ nnyịn.”—Utom 5:28.

Ẹnen̄ede Ẹbiere Ndisọn̄ọ Nda

“Peter ye mme apostle eken [ẹma ẹbọrọ uko uko] ẹte: ‘Nnyịn inyene ndikop uyo Abasi nte andikara utu ke uyo owo.’” (Utom 5:29) Ih, utu ke ndikop uyo ikpîkpu owo, nnyịn inyene ndikop uyo Jehovah ke ini mme owo ẹdọhọde nnyịn inam se ituahade ye mme ewụhọ esie. *

Ikọ mme apostle emi owụtde ke mmimọ isọn̄ọ ida ye Abasi ekpenyene ndiyụhọ mbon Sanhedrin. Edieke ẹkpebụpde mme adaiso ido ukpono mme Jew emi m̀mê odot ẹkop uyo Abasi, mmọ ẹkpenyene ndibọrọ uyo kiet ẹte: “Kop Uyo Abasi.” Mmọn̄ọ, ndi mmọ ikam inịmke ke Abasi edi Ọbọn̄ Andikara ofụri ekondo?

Anaedi Peter ada ke ibuot kpukpru mme apostle etịn̄ ete ke amaedi se iban̄ade utom ukwọrọikọ, mmimọ inyene ndikop uyo Abasi utu ke uyo owo. Ntem, enye owụt ke ndidọhọ ke mme apostle ẹsọn̄ ibuot inyeneke isọn̄. Nte mbụk idụt mmọ owụtde, mbon Sanhedrin ẹfiọk ke odu ini oro enen̄erede ana in̄wan̄-in̄wan̄ ke enen ndikop uyo Abasi utu ke uyo owo. Mme omụm-uman iba ke Egypt ikabakke Pharaoh, edi ẹkebak Abasi ke ndinịm nditọiren oro ẹkemanade ẹnọ iban Hebrew uwem. (Exodus 1:15-17) Edidem Hezekiah ama okop uyo Jehovah, ikonyụn̄ ikọn̄ọke mfan̄ nte emi Edidem Sennacherib ọkọdọhọde enye. (2 Ndidem 19:14-37) Mbon Sanhedrin ẹma ẹfiọk ke N̄wed Abasi Usem Hebrew owụt ke Jehovah oyom ikọt imọ ẹkop uyo imọ.—1 Samuel 15:22, 23.

Utịp Nsụkibuot

Etie nte ikọ oro, “nnyịn inyene ndikop uyo Abasi utu ke uyo owo” otụk owo kiet ke nsụhọde n̄kaha ke otu mme ebiereikpe oro. Gamaliel,  kpa ebiereikpe oro ẹnen̄erede ẹkpono ke esop Sanhedrin ekpek ekemmọ mme ebiereikpe man ẹkop eti item oro enye ọnọde. Gamaliel ada se ima iketetịbe ọnọ uwụtn̄kpọ emi owụtde ke isịneke ifiọk ndikpan utom mme apostle. Enye ada ikọ esie ekeberi ntem: “Ẹkûsịn idem ye mmọ emi, edi ẹkpọn̄ mmọ; . . . mîdịghe ntre, ndusụk ekeme ndidi mbufo ẹkam ẹn̄wana ye Abasi.”—Utom 5:34-39.

Esop oro ẹkụt ke ikọ Gamaliel esịne ifiọk, ndien oro anam mmọ ẹsana mme apostle ẹyak. Okposụkedi oro ẹmiade mme apostle, oro inamke mmọ ndịk. Utu ke oro, Bible ọdọhọ ete: “Ndien kpukpru usen ke temple ye ke ufọk ke ufọk mmọ ẹka iso ye unana edikpa mba ndikpep nnyụn̄ ntan̄a eti mbụk aban̄ade Christ, Jesus.”—Utom 5:42.

Nso edidiọn̄ ke mme apostle ẹkenyene ntem ke ndisọn̄ọ n̄wụt ke odudu Abasi okpon akan! Ata mme Christian ẹsinam n̄kpọ kpasụk ntre mfịn. Mme Ntiense Jehovah ẹka iso ndida Jehovah nte Akakan Andikara. Edieke se ẹdọhọde mmọ ẹnam atuahade ye se Abasi ọdọhọde, mmọ ẹsibọrọ nte mme apostle ẹkebọrọde ẹte: “Nnyịn inyene ndikop uyo Abasi nte andikara utu ke uyo owo.”

[Ikọ idakisọn̄]

[Ekebe/Mme ndise ke page 9]

NDI AKANAM EMEKERE ABAN̄A EMI?

Luke andiwet gospel akasan̄a didie ọfiọk se Gamaliel eketịn̄de ọnọ ekemmọ mbon Sanhedrin? Ekeme ndidi Abasi akayarade se Gamaliel eketịn̄de ọnọ Luke. Ekeme n̄ko ndidi ke Paul (emi ekedide kiet ke otu nditọ ukpepn̄kpọ Gamaliel) eketịn̄ ọnọ Luke se Gamaliel eketịn̄de. Mîdịghe Luke ke idemesie okobụp owo kiet ke otu mbon esop oro, emi akamade mme apostle.