Ẹdat Esịt ke Ntak Emi Ẹdide Christian!
Ẹdat Esịt ke Ntak Emi Ẹdide Christian!
“Owo eke obụrede mbụre, yak enye obụre ke Jehovah.”—1 CORINTH 1:31.
1. Nso edu ke mme owo ẹnyene ẹban̄a ido ukpono?
“UNANA UDỌN̄ KE ABASI.” Ewetn̄kpọ mban̄a mbubehe ido ukpono eketịn̄ ikọ oro ke ndondo emi, ndiwụt edu oro ediwak owo ẹnyenede ẹban̄a se mmọ ẹnịmde ke akpanikọ. Enye ọkọdọhọ ete: “Akpan edu oro ẹkụtde ke ido ukpono eyomfịn akam atatuaha ye ndutịm ido ukpono—enye edi ‘unana udọn̄ ke Abasi.’” Ke nditịm nnam an̄wan̄a, enye ọkọdọhọ ke edu emi esịne “owo ndinana udọn̄ ke ido ukpono esie.” Enye ama aka iso ọdọhọ ke ediwak owo “ẹnịm ke Abasi odu . . . ; edi ibeheke mmọ m̀mê anie ke enye edi.”
2. (a) Ntak emi edinana udọn̄ ke n̄kpọ eke spirit mîkpaha owo idem? (b) Nso n̄kpọndịk idu edieke ata mme Christian ẹtiede ndebe ndebe?
2 Utọ unana udọn̄ emi ikpaha nditọ ukpepn̄kpọ Bible idem. (Luke 18:8) An̄wan̄a ntak emi mme owo ẹnanade udọn̄ ntre ke ido ukpono. Ido ukpono otụn mmọ usụn̄ omonyụn̄ okpu mmọ ke anyan ini idahaemi. (Ediyarade 17:15, 16) Nte ededi, edi ata n̄kpọndịk edieke ata mme Christian ẹnyenede esịt iba ẹnyụn̄ ẹtiede ndebe ndebe. Nnyịn ikpenyeneke ndida se inịmde ke akpanikọ didie didie m̀mê ndinam utom Abasi ndebe ndebe nnyụn̄ nda akpanikọ Bible nnam efen. Jesus ama odụri owo utọn̄ aban̄a utọ edu emi ke ini enye ọkọnọde mme Christian akpa isua ikie ke Laodicea item emi: “Afo ubịtke unyụn̄ ufiopke. Afo akpakam ebịt mîdịghe ofiop. . . . Afo [etie] ndebe ndebe.”—Ediyarade 3:15-18.
Ndifiọk Owo Emi Nnyịn Idide
3. Nso idi ndusụk n̄kpọ oro ẹdade ẹdiọn̄ọ mme Christian oro akpanamde mmọ ẹdat esịt?
3 Ana mme Christian ẹnen̄ede ẹfiọk owo emi mmọ ẹdide mbemiso ẹkemede ndibiọn̄ọ unana udọn̄ ke mme n̄kpọ eke spirit. Mmọ n̄ko ẹnyene ndidat esịt mban̄a owo emi mmọ ẹdide. Sia nnyịn idide mme asan̄autom Jehovah ye mme mbet Christ, Bible asian nnyịn se nnyịn idide. Nnyịn ndisịn idem ntan̄a “eti mbụk” nnọ mbon en̄wen anam nnyịn idi ‘mme ntiense’ Jehovah, kpa “nsan̄autom Abasi.” (Isaiah 43:10; 1 Corinth 3:9; Matthew 24:14) Nnyịn ‘imama kiet eken.’ (John 13:34) Ata mme Christian ẹdi “mbon oro ẹnọde ukeme ufiọk n̄kpọ mmọ ukpep ebe ke ndida enye nnam n̄kpọ man ẹdiọn̄ọ se inende ye se idiọkde.” (Mme Hebrew 5:14) Nnyịn imayama “nte se inọde un̄wana ke ererimbot.” (Philippi 2:15) Nnyịn imodomo ndinyene “eti edu uwem ke otu mme idụt.”—1 Peter 2:12; 2 Peter 3:11, 14.
4. Didie ke andituak ibuot nnọ Jehovah ekeme ndifiọk se enye mîdịghe?
4 Ata mme andituak ibuot nnọ Jehovah ẹfiọk n̄ko se mmọ mîdịghe. “Mmọ idịghe ubak ererimbot,” kpa nte Adausụn̄ mmọ, Jesus Christ, mîkedịghe ubak ererimbot. (John 17:16) Mmọ ẹda san̄asan̄a ẹkpọn̄ “mme idụt” emi ‘ekikere ekịmde mmọ, ẹnyụn̄ ẹdian̄arede ẹkpọn̄ uwem oro enyenede Abasi.’ (Ephesus 4:17, 18) Oro anam mme anditiene Jesus ‘ẹsọn edu unana uten̄e Abasi ye mme udọn̄ ererimbot ẹnyụn̄ ẹdu uwem ke eti ibuot ye edinen ido ye uten̄e Abasi ke editịm n̄kpọ emi.’—Titus 2:12.
5. Nso ke ikọ oro ‘ndibụre mbụre ke Jehovah’ ọwọrọ?
5 Edieke nnyịn itịmde ifiọk se nnyịn idide inyụn̄ inen̄erede ifiọk itie ebuana nnyịn ye Akakan Andikara ekondo, emi ayanam nnyịn ‘ibụre mbụre ke Jehovah.’ (1 Corinth 1:31) Nso orụk mbụre ke ẹtịn̄ ẹban̄a emi? Sia nnyịn idide ata mme Christian, esịt enem nnyịn ndinyene Jehovah nte Abasi nnyịn. Nnyịn imanam item emi: “Yak owo eke obụrede, obụre ke n̄kpọ emi, ke editịm mfiọk mi, koro ami Jehovah nnamde mfọnido, ye ikpe, ye edinen ido ke ererimbot.” (Jeremiah 9:24) Nnyịn ‘ibụre mbụre’ ke ntak oro ifiọkde Abasi ye ke ntak oro enye adade nnyịn an̄wam mbon en̄wen.
N̄kpọ-Ata Oro Odude
6. Ntak emi ọsọn̄de ndusụk owo ndinen̄ede ndu uwem nte mme Christian?
6 Edi akpanikọ, isimemke utom ndika iso ndu uwem nte mme Christian. Akparawa kiet oro ẹkedade ukpepn̄kpọ Christian ẹbọk toto ke uyen ọkọdọhọ ke imọ ima isikop mmemidem ke n̄kan̄ eke spirit ndusụk ini. Enye ọkọdọhọ ete: “Ndusụk ini, n̄kesifiọkke ntak emi n̄kedide kiet ke otu Mme Ntiense Jehovah. Ẹkekpep mi akpanikọ toto ke nsek. Ndusụk ini ekesitie mi nte ke ido ukpono Mme Ntiense Jehovah okonyụn̄ edi kiet ke otu ido ukpono oro mme owo ẹmade.” Etie nte mbon eken ẹma ẹyak unọ idem inemesịt eke ererimbot, se mmọ ẹkụtde ke TV m̀mê ke ndutịm usuanetop, ye ndiọi edu uwem oro ẹdude mfịn ẹbiat mmọ. (Ephesus 2:2, 3) Ke ini ke ini, ndusụk Christian ẹkeme ndinyene eyịghe mban̄a idemmọ ẹnyụn̄ ẹfiak ẹdụn̄ọde mme idaha ye mme utịtmbuba mmọ.
7. (a) Oyom mme asan̄autom Abasi ẹnam nso orụk ndụn̄ọde? (b) Edi nso n̄kpọndịk idu?
7 Ndi akwan̄a ndidụn̄ọde idem ke ini ke ini? Baba. Anaedi afo emeti ke apostle Paul ama esịn udọn̄ ọnọ mme Christian ndika iso ndụn̄ọde idem, ete: “Ẹka iso ẹdomo ẹse m̀mê mbufo ẹdu ke mbuọtidem, ẹka iso ẹwụt se mbufo ke idem mbufo ẹdide.” (2 Corinth 13:5) Mi, apostle Paul ekesịn udọn̄ ọnọ mme Christian ete ẹdụn̄ọde ẹfiọk m̀mê mmọ ẹnyene mme mmeme eke spirit ẹnyụn̄ ẹnam n̄kpọ ndikan mmọ. Ke ini Christian odụn̄ọrede ese m̀mê imọ ke idu ke mbuọtidem, ana enye ese m̀mê ikọ ye edinam imọ ẹkekem ye se imọ idọhọde nte inịmde ke akpanikọ. Nte ededi, edieke owo akade idiọk itie okodụn̄ọde idem m̀mê akade ebiet efen ke ẹsiode Jehovah ye esop Christian ẹfep, utọ ndụn̄ọde oro inyeneke ufọn onyụn̄ akam ekeme ndinam owo akpa ke n̄kan̄ eke spirit. * N̄wan̄ansa-o! Nnyịn ikpoyomke ‘mbuọtidem nnyịn owụre.’—1 Timothy 1:19.
Nnyịn Ibọhọke Afanikọn̄
8, 9. (a) Didie ke Moses okowụt ke imenyene eyịghe iban̄a idem imọ? (b) Jehovah akanam n̄kpọ didie aban̄a eyịghe Moses? (c) Didie ke mme un̄wọn̄ọ Jehovah ẹtụk fi?
8 Ndi mme Christian oro ẹsiwakde ndinyene eyịghe mban̄a idemmọ ẹkpenyene ndikere ke mmimọ imokpu? Baba! Ke akpanikọ, mmọ ẹkeme ndikop ndọn̄esịt ndifiọk ke utọ ekikere oro idịghe obufa n̄kpo. Mme anam-akpanikọ asan̄autom Abasi ke eset ẹma ẹsinyene eyịghe n̄ko. Da Moses ke uwụtn̄kpọ, emi ekenen̄erede enyene mbuọtidem, anamde akpanikọ, onyụn̄ esịnde idem okpono Abasi. Ke ini ẹkenọde enye utom oro eketiede nte okpon akaha, Moses ama ọbọrọ ndịk ndịk ete: “Ami ndi anie?” (Exodus 3:11) Etie nte enye ekekere ke imọ ikedịghe n̄kpọ ndomokiet m̀mê ke imọ ikodotke! Ekeme ndidi nsio nsio n̄kpọ oro ẹketịbede ke uwem Moses ẹkenam enye ekere ke imọ idotke: Enye okoto idụt oro okodude ke ufụn. Nditọ Israel ikamaha enye. Enye ikedịghe owo udọn-ikọ. (Exodus 1:13, 14; 2:11-14; 4:10) Enye ekedi ekpemerọn̄, kpa ubọkọkọ oro nditọ Egypt ẹkenen̄erede ẹsua. (Genesis 46:34) Eyịghe idụhe enye ekekerede ke imọ ikodotke ndika n̄kosio ikọt Abasi ke ufụn!
9 Jehovah ama ọsọn̄ọ Moses idem ebe ke ndinam okopodudu un̄wọn̄ọ iba emi nnọ enye: “Nditreke ndidu ye afo; ndien emi eyedi idiọn̄ọ fo, ete ke edi ami ndọn̄ fi utom: ke ini afo ama [akada] mbio oro ke Egypt ọwọrọ, mbufo ẹyenam n̄kpọ ẹnọ Abasi ke akamba obot emi.” (Exodus 3:12) Abasi ọkọdọhọ asan̄autom esie oro ekenyenede eyịghe do ete ke imọ iyodu ye enye kpukpru ini. Ke adianade do, Jehovah ama owụt ke imọ iditreke ndinyan̄a ikọt imọ. Ke ediwak isua ikie oro ẹkebede, Abasi ama ọn̄wọn̄ọ ukem un̄wọn̄ọ oro ọnọ ikọt esie. Ke uwụtn̄kpọ, ke ini idụt Israel okoyomde ndibe ndụk Isọn̄ Un̄wọn̄ọ, Abasi ama ada Moses asian idụt oro ete: “Mbufo ẹsọn̄ọ idem, ẹnyụn̄ ẹnyene esịt, . . . Jehovah Abasi fo asan̄a ye afo: enye idikpọn̄ke fi, idinyụn̄ iduọkke fi.” (Deuteronomy 31:6) Jehovah ama onyụn̄ ọdọhọ Joshua ete: “Baba owo kiet idibiọn̄ọke fi ke iso, ke ofụri ini uwem fo: nyodu ye afo, . . . ndiyakke fi nduọk, ndinyụn̄ n̄kpọn̄ke fi.” (Joshua 1:5) Enye ọmọn̄wọn̄ọ n̄ko ọnọ mme Christian ete: “Ndikpọn̄ke fi, ndinyụn̄ nsịnke fi.” (Mme Hebrew 13:5) Ndinyene utọ akwa ibetedem oro ekpenyene ndinam nnyịn idat esịt ndidi Christian!
10, 11. Nso ikan̄wam Asaph emi ekedide Levite enen̄ede ekikere esie kaban̄a ufọn edinam n̄kpọ Jehovah?
10 Ke n̄kpọ nte isua ikie ition ke Moses ama akakpa, anam-akpanikọ Levite kiet oro ekekerede Asaph ama ewet in̄wan̄-in̄wan̄ aban̄a eyịghe oro enye ekenyenede aban̄a ufọn edidu eti uwem. Ke adan̄aemi enye okodomode ndinam n̄kpọ Abasi kpa ye ubiọn̄ọ ye mme idomo, Asaph ama okụt nte ndusụk mbon oro ẹkedade Abasi ẹnam nsahi ẹkenen̄erede ẹforo ẹnyụn̄ ẹkop odudu. Didie ke emi okotụk Asaph? Enye ama enyịme ete: “Ama edi ami, osụk esisịt ukot ọkpọfiọnọde mi; osụk ata esisịt ikpat ekpefebede mi. Koro n̄kefịbede mbon iseri ufụp, n̄kụt ifụre mme idiọk owo.” Enye ama ọtọn̄ọ ndikere m̀mê ufọn odu ndituak ibuot nnọ Jehovah. Kop se enye eketịn̄de: “Mmanam esịt mi asana ikpîkpu ikpîkpu, mmonyụn̄ nyet ubọk mi ke edisana ido. Ndien n̄kụt ufen ofụri usen.”—Psalm 73:2, 3, 13, 14.
11 Didie ke Asaph akanam n̄kpọ aban̄a ọkpọsọn̄ eyịghe emi? Ndi enye ama akan̄ ke imọ ikenyeneke eyịghe? Baba. Enye ama etịn̄ emi in̄wan̄-in̄wan̄ ke akam oro enye ọkọbọn̄de ọnọ Abasi, nte ẹkụtde ke Psalm 73. Se ikokpụhọrede ekikere Asaph ekedi enye ndika temple Abasi. Ke enye ama ekesịm do, enye ama edifiọk ke ndituak ibuot nnọ Abasi osụk edi mfọnn̄kan usụn̄ uwem. Ke ama akafiak ada ọfọn ke n̄kan̄ eke spirit, enye ama edifiọk ke Jehovah asasua idiọkn̄kpọ, ye nte ke ini ama ekem, ke mme idiọkowo ẹyebọ ufen. (Psalm 73:17-19) Emi ama ọsọn̄ọ enye idem ndidat esịt ke ifet oro enye ekenyenede ndidi asan̄autom Jehovah. Enye ama ọdọhọ Abasi ete: “Ami nsụk ndodu ye afo kpukpru ini: afo omụm mi ubọk nnasia. Afo ayada mi usụn̄ ke item fo, ndien ama ekem, ayada mi edisịm ke ubọn̄.” (Psalm 73:23, 24) Asaph ama afiak okop idatesịt ke Abasi esie.—Psalm 34:2.
Mmọ Ẹma Ẹnen̄ede Ẹfiọk Owo Emi Mmọ Ẹkedide
12, 13. Nọ mme uwụtn̄kpọ Bible oro ẹban̄ade mme owo oro ẹkedatde esịt ke ntak itie ebuana mmọ ye Abasi.
12 Usụn̄ kiet ndika iso ndu uwem nte Christian edi ndidụn̄ọde nnyụn̄ n̄kpebe mbuọtidem mme anam-akpanikọ andituak ibuot, oro ẹkenen̄erede ẹma itie ebuana mmọ ye Abasi, kpa ye ndiọi idaha oro mmọ ẹkesobode. Kere ban̄a Joseph eyen Jacob. Ke ini enye ekedide ekpri eyenọwọn̄, ẹma ẹtap enye ẹkenyam nte ofụn ẹnyụn̄ ẹmen enye ẹka Egypt, emi ekenen̄erede oyom usụn̄ ọkpọn̄ ebiet emi ete esie oro ekedide eten̄e-Abasi okodude. N̄ko ebiet oro ẹkemende enye ẹka ama enen̄ede okpụhọde ye inem inem idaha oro okodude ke ufọk mmọ. Ke adan̄aemi enye okodude ke Egypt, Joseph ikenyeneke owo ndomokiet oro ọkpọnọde enye eti item. Enye ama onyụn̄ osobo ndiọi idaha oro ẹkedomode eti ido uwem ye mbuọtidem esie ke Abasi. Nte ededi, enye ama aka iso odu uwem nte asan̄autom Abasi, onyụn̄ ọsọn̄ọ ada anam se enye ọkọdiọn̄ọde ke enen. Esịt ama enem enye ndidi andituak ibuot nnọ Jehovah idem ke idiọk idaha, ndien enye ikokopke bụt nditịn̄ nte eketiede enye ke idem.—Genesis 39:7-10.
13 Ke n̄kpọ nte isua ikie itiaita ẹma ẹkebe, ekpri eyenan̄wan Israel emi ẹkedade nte mbuotekọn̄ ẹnyọn̄ ama akabade edi ofụn Naaman, kpa akwa owoekọn̄ Syria. Enye n̄ko ikefreke se enye ekedide, kpa andituak ibuot nnọ Jehovah. Ke ini ifet ekebererede, enye ama ọnọ eti ikọ ntiense uko uko aban̄a Jehovah ke ndidọhọ ke Elisha ekedi prọfet ata Abasi. (2 Ndidem 5:1-19) Ediwak isua ke oro ama ekebe, kpa ye oro mbon oro ẹkedude ini oro ẹkenen̄ede ẹdiọk, ekpri Edidem Josiah ama ọtọn̄ọ ndinam ukpụhọde ke ido ukpono, ukpụhọde emi ama ada ini. Enye ama onyụn̄ ọdiọn̄ temple Abasi, anam idụt oro afiak ọtọn̄ọ ndikpono Jehovah. Enye ama okop idatesịt ndidi andituak ibuot nnọ Abasi. (2 Chronicles, ibuot 34, 35) Daniel ye nditọ Hebrew ita eken ke Babylon, ikefreke ke mmimọ ikedi mme asan̄autom Jehovah, ndien idem ke ini mmọ ẹkesobode idomo ye afanikọn̄, mmọ ẹma ẹsọn̄ọ ẹda. Nte an̄wan̄ade, mmọ ẹma ẹdat esịt ndidi mme asan̄autom Jehovah.—Daniel 1:8-20.
Dat Esịt ke Ndidi Christian
14, 15. Nso ke ndidat esịt ke ntak idide Christian abuana?
14 Mme asan̄autom Abasi emi ẹkekụt unen sia mmọ ẹkedatde esịt ke ntak itie ebuana mmọ ye Abasi. Nso kaban̄a nnyịn mfịn? Nso ke ndidat esịt ke ntak idide Christian abuana?
15 Enye abuana edinen̄ede n̄wụt esịtekọm sia idide kiet ke otu ikọt Jehovah oro ẹnyenede edidiọn̄ ye unyịme esie. Abasi etịm ọfiọk mbon oro ẹnyenede enye. Apostle Paul emi okodude uwem ke ini ndutịme ekenen̄erede okpon ke ido ukpono ekewet ete: “Jehovah ọmọfiọk mmọ eke ẹnyenede enye.” (2 Timothy 2:19; Numbers 16:5) Jehovah ama “mmọ eke ẹnyenede enye.” Enye ọdọhọ ete: “Enye emi otụkde mbufo otụk eyen enyịn [mi].” (Zechariah 2:8) Ana in̄wan̄-in̄wan̄ nte ke Jehovah ama nnyịn. Oro edi ntak emi ata ima akpanamde nnyịn inyene itie ebuana ye enye. Paul ekewet ete: “Edieke owo ekededi amade Abasi, Enye ọfiọk owo emi.”—1 Corinth 8:3.
16, 17. Ntak emi mme Christian, n̄kpri ye ikpọ, ẹkpedatde esịt ẹban̄a idaha mmọ ke n̄kan̄ eke spirit?
16 Mme uyen oro ẹkebọkde nte Mme Ntiense Jehovah ẹkpenyene ndidụn̄ọde m̀mê mmimọ imenyene ọkpọkpọ itie ebuana ye Abasi, oro ekemede ndinam mmimọ inen̄ede idu uwem nte mme Christian. Mmọ ikpenyeneke ndikere ke mbuọtidem ete ye eka mmimọ ayanyan̄a mmimọ. Paul ekewet aban̄a asan̄autom Abasi kiet kiet ete: “Enye ọsọn̄ọde ada, ọsọn̄ọ ada ọnọ eteufọk esiemmọ, onyụn̄ ọduọde, ọduọ ọnọ eteufọk esiemmọ.” Ntem Paul ama aka iso ete: “Owo nnyịn kiet kiet ayanam ibat aban̄a idemesie ọnọ Abasi.” (Rome 14:4, 12) Nte an̄wan̄ade, ndida esịt iba ntiene ete ye eka fo n̄kpono Abasi ikemeke ndinam fi enyene itie ebuana oro ebịghide ye Jehovah.
17 Idụhe ini ndomokiet oro Jehovah mînyeneke mme ntiense ke isọn̄. Enye ọkọtọn̄ọ ye anam-akpanikọ owo oro Abel—ke n̄kpọ nte tọsịn isua itiokiet emi ẹkebede—tutu edisịm ‘akwa otu’ Mme Ntiense Jehovah eyomfịn. Mme ntiense emi ẹsịne n̄ko kpukpru mbon oro ẹdituakde ibuot ẹnọ Jehovah ẹnyụn̄ ẹnyene nsinsi uwem. (Ediyarade 7:9; Mme Hebrew 11:4) Nnyịn oro idude uwem mfịn isịne ke otu mme anam-akpanikọ andituak ibuot nnọ Abasi eke ndondo emi. Nso n̄wọrọnda idaha eke spirit ke nnyịn inyene ntem!
18. Didie ke mme edumbet ye mme idaha nnyịn ẹnam nnyịn ida san̄asan̄a ikpọn̄ ererimbot?
18 Mme n̄kpọ efen oro ẹdade ẹdiọn̄ọ nnyịn nte mme Christian ẹsịne nti edumbet, nti ido uwem, ye mme edu eken. Enye edi ‘Usụn̄ Uwem,’ kpa n̄kukụre usụn̄ uwem oro enemde Abasi esịt. (Utom 9:2; Ephesus 4:22-24) Mme Christian ẹkpenyene ‘ndidụn̄ọde kpukpru n̄kpọ mfiọk, nnyụn̄ nsọn̄ọ mmụm se ifọnde n̄kama!’ (1 Thessalonica 5:21) Nnyịn imenen̄ede ifiọk akamba ukpụhọde oro odude ke ufọt mme Christian ye ererimbot oro adianarede ọkpọn̄ Abasi. Jehovah enen̄ede anam ẹdiọn̄ọ utuakibuot akpanikọ ye nsunsu utuakibuot. Enye ama ada prọfet esie Malachi atan̄a ete: “Mbufo ẹyetọn̄ọ ntak ẹkụt nte eti ye idiọk ẹsan̄ade isio, ye nte anam n̄kpọ Abasi ye owo eke mînamke n̄kpọ esie ẹsan̄ade isio.”—Malachi 3:18.
19. Nso ke ata mme Christian mîdinamke?
19 Sia edide ata akpan n̄kpọ ndidat esịt ke Jehovah ke ntịme ntịme ererimbot oro mînyeneke iwụk mi, nso ikeme ndin̄wam nnyịn ndika iso ndat esịt ke Abasi nnyịn nnyụn̄ n̄ka iso ndi Christian? Ẹnọ nti ekikere ke ibuotikọ oro etienede. Ke ini inemede nti ekikere emi, ti ete ke ata mme Christian ididehede ‘inana udọn̄ ke Abasi.’
[Ikọ idakisọn̄]
^ ikp. 7 Se itịn̄de mi aban̄a idaha eke spirit nnyịn kpọt. Edi ekeme ndiyom ndusụk mbon oro ẹnyenede udọn̄ọ ibuot ẹka ẹbịne abiausọbọ.
Nte Afo Emeti?
• Didie ke mme Christian ẹkeme ‘ndibụre mbụre ke Jehovah?’
• Nso ke afo ekpep oto uwụtn̄kpọ Moses ye Asaph?
• Mmanie ke Bible asiak nte mbon oro ẹkedatde esịt ke ndinam utom Abasi?
• Nso ke ndidat esịt ke ntak idide Christian abuana?
[Mme Mbụme Ukpepn̄kpọ]
[Ndise ke page 14]
Ama odu ini oro Moses ekenyenede eyịghe aban̄a idemesie
[Mme ndise ke page 15]
Ediwak mme asan̄autom Jehovah ke eset ẹma ẹdat esịt ndisan̄a utom nnọ Abasi