“Ẹkpeme”

KE ESET, mme ekpeme inuaotop ẹma ẹsikpeme inuaotop obio ye eke temple, ẹsinyụn̄ ẹkpeme enyịnusụn̄ ufọk owo ke ndusụk idaha. Utom mmọ ekedi ndisiberi inuaotop ke okoneyo nnyụn̄ n̄kpeme enye. Utom emi ekedi ata akamba utom, sia ubọhọ obio ọkọkọn̄ọ ke mmọ nditọt mme owo ke ọkpọsọn̄ uyo mban̄a n̄kpọndịk oro ekedide.

Jesus Christ ama enen̄ede ọfiọk utom mme ekpeme inuaotop, emi ẹkekotde n̄ko mme etie-usụn̄. Isan̄ kiet, enye ekemen mme mbet esie odomo ye mme etie-usụn̄ onyụn̄ esịn udọn̄ ọnọ mmọ ete ẹkpeme koro utịt editịm n̄kpọ mme Jew ama asan̄a ekpere. Enye ọkọdọhọ ete: “Mbufo ẹtịn̄ enyịn ẹse, ẹkpeme, ẹnyụn̄ ẹbọn̄ akam; koro mbufo mîfiọkke edikem ini. Etie nte owo ọkpọn̄de ufọk esie aka akadan̄ ke idụt efen, onyụn̄ . . . ọdọhọ etie-usụn̄ n̄ko ete etie ekpeme. Mbufo ẹkpeme ndien; koro mbufo mîfiọkke ini eke ete-ufọk edidide.”—Mark 13:33-35.

Kpasụk ntre, ke se ibede isua 125 idahaemi, Enyọn̄-Ukpeme emi ọmọnọ item Jesus oro ete “ẹkpeme.” Didie? Nte ẹtịn̄de ke ọyọhọ page 2 ke magazine emi, “Enye aka iso ese mme n̄kpọntịbe ererimbot nte mmọ emi ẹsude ntịn̄nnịm ikọ Bible. Enye ada eti mbụk ọdọn̄ kpukpru owo esịt nte ke ibịghike Obio Ubọn̄ Abasi oyosobo mbon oro ẹfịkde ekemmọ owo ye nte ke enye ayanam isọn̄ akabade edi paradise.” Enyọn̄-Ukpeme edi magazine ido ukpono oro ẹsuande atara akan ke ererimbot, sia ẹsisuande se ibede 26,400,000 ke usem 150. Kpa nte mme ekpeme inuaotop eset ẹkesidọhọde mme owo ẹkpeme, Mme Ntiense Jehovah ẹda Enyọn̄-Ukpeme ẹsịn udọn̄ ẹnọ mme owo ke kpukpru ebiet ẹte “ẹkpeme” ke n̄kan̄ eke spirit koro Eteufọk, kpa Jesus Christ, ọmọn̄ edi edibiere ikpe ọnọ editịm n̄kpọ emi.—Mark 13:26, 37.