‘Ewụhọ Jehovah’ Ikemeke Ndikpu

‘Yak ntịn̄ mban̄a ewụhọ Jehovah; enye ọmọdọhọ emi, ete, Afo edi eyen mi. Ben̄e mi, ndien nyọnọ fi mme idụt ke udeme fo.’—PSALM 2:7, 8.

1. Nso ukpụhọde idu ke ufọt uduak Abasi ye eke mme idụt?

 JEHOVAH ABASI enyene uduak ọnọ ubonowo ye isọn̄. Mme idụt n̄ko ẹnyene uduak. Edi mme uduak emi ẹkpụhọrede didie ntem! Akpana nnyịn idori enyịn ke ukpụhọde emi oyodu, koro Abasi ọdọhọ ete: “Kpa nte enyọn̄ okon̄de akan isọn̄, kpa ntre ke mme usụn̄ mi ẹkon̄ ẹkan mme usụn̄ mbufo, mme ekikere mi ẹnyụn̄ ẹkon̄ ẹkan mme ekikere mbufo.” Uduak Abasi enyene ndisu, koro enye aka iso ọdọhọ ete: “Kpa nte edịm ye snow ẹtode ke enyọn̄ ẹsụhọde, ndien ifiakke ika do, tutu ẹbịt isọn̄, ẹnyụn̄ ẹnam enye afiari onyụn̄ etịbe, ẹnyụn̄ ẹda n̄kpasịp ẹnọ andisuan, ẹda udia ẹnọ andidia: kpa ntre ke ikọ mi emi ọwọrọde mi ke inua editie: idifiakke itiene mi ubọk-ubọk, tutu enye anam se mmade, onyụn̄ okụt unen ke utom emi ndọn̄de enye.”—Isaiah 55:9-11.

2, 3. Nso ke ẹnam an̄wan̄a ke udiana psalm, ndien mme mbụme ewe ẹdemerede?

 ² Ẹnam an̄wan̄a ke udiana psalm nte ke uduak Abasi kaban̄a Edidem Messiah oyosu. Abasi ama ọnọ Edidem David Israel eset, kpa andiwet udiana psalm emi, odudu spirit ndibem iso ntịn̄ nte ke oyodu akpan ini emi mme idụt ẹdisịnde editịm. Mme andikara mmọ ẹyedụk odu ẹban̄a Jehovah Abasi ye Messiah esie. Nte ededi, andiwet psalm oro ama ọkwọ n̄ko ete: ‘Yak ntịn̄ mban̄a ewụhọ Jehovah, enye ọmọdọhọ mi ete, Afo edi eyen mi, ben̄e mi, ndien nyọnọ fi mme idụt ke udeme fo, nyọnọ mme utịt ererimbot, nte afo ada enyene.’—Psalm 2:7, 8.

³ Nso ke ‘ewụhọ Jehovah’ ọwọrọ ọnọ mme idụt? Didie ke enye otụk ofụri ubonowo? Ke akpanikọ, didie ke se ewụhọ Jehovah ọwọrọde ọnọ mme idụt otụk kpukpru mme abak-Abasi oro ẹkotde udiana psalm?

Mme Idụt Ẹsịn Editịm

4. Didie ke afo ekeme nditịn̄ mme akpan n̄kpọ oro ẹdude ke Psalm 2:1, 2 ibio ibio?

⁴ Ke etịn̄de aban̄a edinam mme idụt ye mme andikara mmọ, andiwet psalm ọtọn̄ọ ikwọ esie ntem: “Nsinam mme idụt ẹfụtde [m̀mê, ẹsịnde editịm], nsinyụn̄ inam mme obio ẹkerede ikpîkpu n̄kpọ? Ndidem ererimbot ẹdaha ẹda, mbọn̄ ẹnyụn̄ ẹbono ẹdụk odu ẹban̄a Jehovah ye Messiah esie.”—Psalm 2:1, 2. *

5, 6. Nso “ikpîkpu n̄kpọ” ke mme idụt ‘ẹkere’?

⁵ Nso “ikpîkpu n̄kpọ” ke mme idụt eyomfịn ‘ẹkere’? Utu ke ndinyịme Messiah—kpa Enye Oro Abasi Eyetde Aran, m̀mê Christ—mme idụt ‘ẹkere’ nte mmimọ ikpakade iso idu ke ukara. Udiana psalm ama osu n̄ko ke akpa isua ikie E.N., ke ini ukara mme Jew ye eke mbon Rome ẹkedianade kiet ẹwot Edidem Oro Abasi Emekde, Jesus Christ. Nte ededi, akpan edisu ọkọtọn̄ọ ke 1914 ke ini ẹkedoride Jesus ke ebekpo nte Edidem eke heaven. Toto ke ini oro, idụhe n̄ka ukaraidem ndomokiet ke isọn̄ oro enyịmede Edidem oro Abasi okodoride ke ebekpo.

⁶ Nso ke ikọ andiwet psalm ọkọwọrọ ke ini enye okobụpde ete: ‘Nso inyụn̄ inam mme idụt ẹkerede ikpîkpu n̄kpọ?’ Uduak mmọ edi ikpîkpu n̄kpọ; enye edi ikpîkpu ye ukpọk idinyụn̄ ikwe unen. Mmọ ikemeke ndinam emem ye edidianakiet ẹdu ke isọn̄. Kpa ye oro, mmọ ẹnam n̄kpọ ẹka anyan ẹkesịm edibiọn̄ọ itie edikara Abasi. Ke nditịm ntịn̄, mmọ ẹdiana kiet ẹnyụn̄ ẹbono ẹdụk odu ndin̄wana ye Andikon̄ N̄kan ye Messiah esie. Nso nditen̄ ke emi edi ntem!

 Edidem Jehovah Oro Akande

7. Ke akam oro mmọ ẹkebọn̄de, didie ke akpa mme anditiene Jesus ẹkebuan Psalm 2:1, 2?

⁷ Mme anditiene Jesus ẹkeda mme ikọ Psalm 2:1, 2 ẹtịn̄ ẹban̄a enye. Ke ini ẹkekọbọde mmọ ke ntak mbuọtidem mmọ, mmọ ẹma ẹbọn̄ akam ẹte: “O Ọbọn̄ [Jehovah], Afo emi edide Andinam enyọn̄ ye isọn̄ ye inyan̄, ye kpukpru se idude mmọ ke esịt: emi ọkọdọhọde ke Edisana Spirit, ke inua ete nnyịn, kpa owo Fo David, ete, Nsinam mme idụt ẹfụtde, mbio-obio ẹnyụn̄ ẹkerede ikpîkpu n̄kpọ? Ndidem ererimbot ẹdaha ẹda, mbọn̄ ẹnyụn̄ ẹsop idem ọtọ kiet, ndin̄wana ye Jehovah, ye Christ Esie. Koro ke akpanikọ ke obio emi, Herod [Antipas] ye Pontius Pilate, ye mme Gentile ye mbon Israel, ẹsop idem ọtọ kiet ndin̄wana ye Edisana Owo Fo Jesus, emi Afo ekenịmde ete edi Christ Fo.” (Utom 4:24-27; Luke 23:1-12) * Ih, ke akpa isua ikie, ẹma ẹdụk odu ẹban̄a asan̄autom emi Abasi ekeyetde aran, kpa Jesus. Nte ededi, akana psalm emi enyene edisu efen ediwak isua ikie ke ukperedem.

8. Didie ke Psalm 2:3 enyene n̄kpọ ndinam ye mme idụt eyomfịn?

⁸ Ke ini Israel eset ekenyenede edidem edide owo, utọ nte David, mme idụt ye mme andikara oro ẹkedide mme okpono ndem ẹma ẹsop idem ọtọkiet ẹnyụn̄ ẹdụk odu ẹban̄a Abasi ye edidem oro Abasi ekeyetde aran emen odori ke ebekpo. Edi nso kaban̄a eyo nnyịn? Mme idụt eyomfịn imaha ndinam n̄kpọ ekekem ye mme n̄kpọ oro Jehovah ye Messiah ẹyomde. Ke ntre, etie nte n̄kpọ eke mmọ ẹdọhọde ẹte: “Ẹyak nnyịn ibụn̄ n̄kpọkọbi mmọ, inyụn̄ ikịbi urụk mmọ ke idem nnyịn iduọk.” (Psalm 2:3) Mme andikara ye mme idụt inyịmeke ukpan ndomokiet oro Abasi ye Messiah esie ẹnịmde. Ke akpanikọ, ukeme ekededi oro mmọ ẹsịnde ndibụn̄ utọ n̄kpọkọbi oro nnyụn̄ n̄kịbi utọ urụk oro mfep ediwọrọ ikpîkpu.

Jehovah Asak Mmọ Nsahi

9, 10. Ntak emi Jehovah asakde mme idụt nsahi?

⁹ Jehovah idọn̄ke enyịn iban̄a ukeme ekededi oro mme andikara ẹsịnde ndiwụk ukara idemmọ. Udiana psalm aka iso ete: “Enye etie ke enyọn̄ asak; Ọbọn̄ ababian̄a mmọ [m̀mê, asak mmọ nsahi].” (Psalm 2:4) Abasi aka iso ndinam uduak esie nte n̄kpọ eke mme andikara emi mîdịghe n̄kpọ ndomokiet. Enye asak emiom mmọ onyụn̄ ada mmọ anam n̄kpọ nsahi. Yak mmọ ẹnam inua ẹban̄a uduak mmọ. Edi Jehovah ada mmọ anam n̄kpọ nsahi. Enye asak ubiọn̄ọ mmọ oro mîdiwọrọke usụn̄.

¹⁰ David etịn̄ ke ebiet en̄wen ke psalm esie aban̄a mme owo ye mme idụt emi ẹdide mme asua onyụn̄ ọkwọ ete: “Afo, O Jehovah Abasi mme udịm, Abasi Israel, demede,  nyụn̄ ka kese kpukpru mme idụt: kûtua baba owo mmọ kiet emi ẹnamde idiọk ke abian̄a, mbọm. Mmọ ẹyefiak edem ke mbubịteyo; ẹyomo nte ebua, ẹnyụn̄ ẹkanade obio ẹkụk. Sese, mmọ ẹbehe ibehe ke inua mmọ: ofụt ẹdu mmọ ke n̄kpọk-inua: ẹte: ‘Koro anie owo okop’? Ndien afo, O Jehovah, ayakpa imam; afo ayasak kpukpru mme idụt nsahi.” (Psalm 59:5-8) Jehovah akpa imam aban̄a n̄wọkinua mme idụt ye editịm oro mmọ ẹsịnde ke ntak emi mmọ ẹduakde ndisịme uduak ẹban̄a imọ.

11. Nso iditịbe ke ini mme idụt ẹsịnde ukeme ndibiọn̄ọ uduak Abasi?

¹¹ Mme ikọ Psalm 2 ẹsọn̄ọ mbuọtidem nnyịn nte ke Abasi ekeme ndikan n̄kpọ-ata ekededi. Nnyịn imekeme ndisọn̄ọ nnịm ke Abasi esisu mme uduak esie kpukpru ini inyụn̄ idehede ikpọn̄ mme anam-akpanikọ asan̄autom esie. (Psalm 94:14) Ntre, ndien, nso iditịbe ke ini mme idụt ẹsịnde ukeme ndibiọn̄ọ uduak Jehovah? Nte ekemde ye psalm emi, Abasi ‘ọyọdọhọ ye mmọ ke iyatesịt esie,’ nte n̄kpọ eke asan̄ade ye uyo ọkpọsọn̄ obuma. Akan oro, enye ayada “ikan̄ ifụtesịt esie,” nte n̄kpọ eke asan̄ade ye emịnen̄mịnen̄, “esịn mmọ ndịk” ke idem.—Psalm 2:5.

Ẹdori Edidem Abasi ke Ebekpo

12. Psalm 2:6 enyene ebuana ye edidori anie ke ebekpo?

¹² Nte eyịghe mîdụhe, se Jehovah adade andiwet psalm afiak etịn̄ etịmede mme idụt. Abasi ọdọhọ ete: “Ndien edi ami mmenịm edidem mi ke enyọn̄ Zion [m̀mê, ndori edidem mi ke ebekpo ke Zion] edisana obot mi.” (Psalm 2:6) Obot Zion okodu ke Jerusalem emi ẹkedoride David ke ebekpo nte edidem ofụri Israel. Edi Edidem Messiah iditiehe ke ebekpo ke obio oro m̀mê ke ebiet en̄wen ke isọn̄. Ke akpanikọ, Jehovah ododori Jesus Christ ke ebekpo ke Obot Zion eke heaven, nte Edidem Messiah oro enye emekde.—Ediyarade 14:1.

13. Nso ediomi ke Jehovah akanam ye Eyen esie?

¹³ Idahaemi Edidem Messiah etịn̄ ikọ. Enye ọdọhọ ete: ‘Yak ntịn̄ mban̄a ewụhọ Jehovah [emi anamde ediomi Obio Ubọn̄ ye Eyen esie]: Jehovah Abasi ọmọdọhọ mi, ete, Afo edi eyen mi, ami mmobon fi mfịn emi.’ (Psalm 2:7) Ediomi Obio Ubọn̄ oro ke Christ eketịn̄ aban̄a ke ini enye akasiande mme apostle esie ete: “Mbufo ẹdi mmọ emi ẹkesọn̄ọde ẹda ye Ami ke idomo Mi; kpa nte Ete Mi ekenịmde Obio Ubọn̄ ọnọ Mi, kpasụk ntre ke Ami nnyụn̄ nnịm nnọ mbufo.”—Luke 22:28-30a.

14. Ntak emi ẹkemede ndidọhọ ke Jesus edi n̄kukụre edidem oro odotde ndikara?

¹⁴ Nte ẹkebemde iso ẹtịn̄ ke Psalm 2:7, Jehovah ama ọdọhọ ke Jesus edi Eyen imọ ke ini Jesus akanade baptism ye ke ini enye akanamde Jesus eset edidu uwem eke spirit. (Mark 1:9-11; Rome 1:4; Mme Hebrew 1:5; 5:5) Ih, ikpọn̄-ikpọn̄ Eyen emi Abasi obonde edi Edidem Obio Ubọn̄ eke heaven. (John 3:16) Nte andito ufọk ubọn̄ Edidem David, Jesus edi n̄kukụre edidem oro odotde ndikara. (2 Samuel 7:4-17; Matthew 1:6, 16) Nte ekemde ye Psalm emi, Abasi ọdọhọ Eyen esie ete: “Ben̄e mi, ndien nyọnọ fi mme idụt ke udeme fo,  nyọnọ mme utịt ererimbot, nte afo ada enyene.”—Psalm 2:8.

15. Ntak emi Jesus eben̄ede mme idụt nte udeme esie?

¹⁵ Odudu ukara Jehovah kpọt okpon akan eke Edidem emi—kpa Eyen Abasi. Jesus edi enye emi Jehovah ama okodomo ọfiọk ke enye edi anam-akpanikọ ye owo emi ẹkemede ndiberi edem. Akan oro, Jesus enyene udeme nte akpa edibon Eyen Abasi. Ke akpanikọ, Jesus Christ “edi mbiet Abasi emi enyịn owo mîkwe; Abasi okobon Enye ete edi Akpan, ndien edibot ofụri ererimbot.” (Colossae 1:15) N̄kukụre se enye enyenede ndinam edi ndiben̄e, ndien Abasi ‘ọyọnọ enye mme idụt ke udeme esie, onyụn̄ ọnọ mme utịt ererimbot, ete enye ada enyene.’ Jesus anam eben̄e emi nte enye emi ‘idatesịt esie odude ke otu nditọ owo’ ye ke ntak ọkpọsọn̄ udọn̄ oro enye enyenede ndinam uduak Ete esie eke heaven kaban̄a isọn̄ ye ubonowo.—Mme N̄ke 8:30, 31.

Uduak Jehovah Kaban̄a Mme Idụt

16, 17. Nte Psalm 2:9 ọdọhọde, nso ina ibet mme idụt?

¹⁶ Sia udiana psalm akade iso ndisu idahaemi, emi edide ini edidu Jesus Christ oro enyịn mîkwe, nso ina ibet mme idụt? Edidem emi ọmọn̄ ọsọp ndinam ewụhọ Abasi emi: “Afo ayanuak mmọ [mme idụt] ke esan̄ ukwak; onyụn̄ obom mmọ nte n̄kpọ eke obot-eso anamde.”—Psalm 2:9.

¹⁷ Esan̄ oro ndidem ẹkesikamade ke eset ẹkedi idiọn̄ọ odudu ubọn̄. Ẹkeda ukwak ẹnam ndusụk esan̄, nte enye oro ẹtịn̄de ẹban̄a ke psalm emi. Ndamban̄a usem oro ẹdade ẹtịn̄ ikọ mi owụt nte Christ kpa Edidem edisobode mme idụt mmemmem mmemmem. Ndida esan̄ ukwak nyịbi aban̄ mbat emi oboteso anamde oyobom enye, anuak enye mbai mbai.

18, 19. Oyom ndidem isọn̄ ẹnam nso man ẹnyene unyịme Abasi?

¹⁸ Ndi ọwọrọ ke mme andikara ikemeke ndibọhọ utọ nsobo oro? Baba, koro andiwet psalm ada mme ikọ emi ekpe mmọ ubọk ete: “Mbufo ndidem ẹdi ọniọn̄, ndien: mbufo, mme ebiereikpe ererimbot, ẹkop item.” (Psalm 2:10) Ẹdọhọ ndidem ẹnen̄ede ẹnọ n̄kpan̄utọn̄, ẹnyụn̄ ẹdi ọniọn̄. Mmọ ẹkpenyene ndikere mban̄a nte uduak mmimọ ẹdide ikpîkpu, ke edide isio ye se Obio Ubọn̄ Abasi edinamde ke ufọn ubonowo.

¹⁹ Man ẹnyene unyịme Abasi, oyom ndidem isọn̄ ẹkpụhọde usụn̄ edinam mmọ. Ẹteme mmọ ẹte “ẹnam n̄kpọ Jehovah ke ndịk, ẹnyụn̄ ẹdara ke unyek-idem.” (Psalm 2:11) Nso edieke mmọ ẹkpenamde item emi? Utu ke ndisịn editịm m̀mê ndikop editịmede esịt, mmọ ẹkpedat esịt ẹban̄a se Edidem Messiah edinamde ọnọ mmọ ke iso ini. Oyom mme andikara isọn̄ ẹkpọn̄ ntan̄idem ye iseri oro mmọ ẹdade ẹkara ukara mmọ. Akan oro, oyom mmọ ẹkpụhọde ye unana ubiatini ẹnyụn̄ ẹdi ọniọn̄ man ẹfiọk nte ke itie edikara Jehovah edi akakan, ye nte ke n̄kpọ ndomokiet ikemeke ndibiọn̄ọ odudu Abasi ye eke Edidem Messiah esie.

“Ẹtịm Eyen Inua”

20, 21. Nso ke ‘editịm eyen inua’ ọwọrọ?

²⁰ Idahaemi Psalm 2 ọnọ mme andikara ikot esịtmbọm. Utu ke ndibono ndụk odu man ẹbiọn̄ọ Jehovah, ẹteme mmọ ẹte: “Ẹtịm Eyen inua, mbak Enye ediyat esịt, ndien mbufo ẹbiara ke usụn̄, koro ke ini esisịt iyatesịt esie ayasak.” (Psalm 2:12a) Ẹkpenyene ndikop uyo Jehovah Ọbọn̄ Andikara ke ini enye ọnọde ewụhọ. Ke ini Abasi ekemende Eyen esie odori ke ebekpo, akpakana mme andikara isọn̄ ẹtre ‘ndikere ikpîkpu n̄kpọ.’ Akpakana mmọ ẹnyịme Edidem emi ke ndondo oro ẹnyụn̄ ẹsụk ibuot ẹnọ enye ọyọhọ ọyọhọ.

²¹ Ntak emi mmọ ‘ẹkpetịmde Eyen inua’? Ke ini ẹkewetde psalm emi, ntịminua ekedi idiọn̄ọ itie ufan ndien ẹkesida enye ẹdara isenowo ẹsịn ke ufọk, ekem ẹkama mmọ isen. Ntịminua ekeme n̄ko ndiwụt edinam akpanikọ. (1 Samuel 10:1) Ke ufan̄ikọ emi, Abasi owụk mme idụt ete ẹtịm Eyen imọ inua m̀mê ẹdara enye nte Edidem oro ẹyetde aran.

22. Mme andikara ẹkpenam item ewe?

 ²² Mbon oro ẹsịnde ndinyịme odudu ukara Edidem oro Abasi emekde ẹmiom Jehovah. Mmọ ẹneni unen oro Jehovah Abasi enyenede ndikara ofụri ekondo, ye odudu ye ukeme esie ndimek Edidem oro edide mfọnn̄kan andikara ubonowo. Mme andikara ẹyekụt nte iyatesịt Abasi esịmde mmọ ke mbuari, ke ini mmọ ẹdomode ndinam uduak idemmọ. “Ke ini esisịt iyatesịt esie ayasak,” m̀mê obụbede usọp usọp ke usụn̄ oro n̄kpọ mîdikemeke ndibiọn̄ọ. Akpana mme andikara ẹnyịme item emi ye esịtekọm ẹnyụn̄ ẹnam enye. Ndinam ntre ọwọrọ uwem.

23. Ini odu ọnọ mme owo ndinam nso?

²³ Okopodudu psalm emi etre ntem: “Ọfọfọn [“Inemesịt odu,” NW] ọnọ kpukpru mmọ eke ẹbuọtde idem ye Enye [Jehovah].” (Psalm 2:12b) Ini osụk ododu ọnọ mme owo ndiyom ubọhọ. Kpasụk ntre n̄ko ye idem mme andikara emi ẹnamde uduak mme idụt. Mmọ ẹkeme ndifehe mbịne Jehovah, emi adade ukara Obio Ubọn̄ esie ọnọ ubọhọ. Edi, ana mmọ ẹnam n̄kpọ mbemiso Obio Ubọn̄ Messiah anuakde mme idụt oro ẹbiọn̄ọde enye.

24. Didie ke nnyịn ikeme ndidu uwem oro enen̄erede ọnọ uyụhọ idem ke ntịme ntịme ererimbot emi?

²⁴ Edieke nnyịn isịnde ifịk ikpep N̄wed Abasi inyụn̄ idade item esie isịn ke edinam, nnyịn imekeme ndidu uwem oro enen̄erede ọnọ uyụhọ idem ke ntịme ntịme ererimbot emi. Ndida item N̄wed Abasi nsịn ke edinam osụn̄ọ ke inem inem itie ebuana ubon onyụn̄ anam ẹbọhọ ediwak mfịna ye editịmede esịt oro ẹnọmọde ererimbot emi. Nditiene mme edumbet Bible ọsọn̄ọ mbuọtidem nnyịn nte ke nnyịn imenem Andibot nnyịn esịt. Andikara Ekondo kpọt ekeme ndinam nnyịn inyene “uwem emi odude ke emi ye eke uwem emi edidide” ke enye ama okosobo mbon emi ẹsuade se inende efep ke isọn̄, ke ntak emi mmọ ẹsịnde ukara Obio Ubọn̄.—1 Timothy 4:8.

25. Sia ‘ewụhọ Jehovah’ mîkemeke ndikpu, nso ikeme nditịbe ke eyo nnyịn?

²⁵ ‘Ewụhọ Jehovah’ ikemeke ndikpu. Nte Andibot nnyịn, Abasi ọfiọk se inen̄erede ifọn ye ubonowo, enye oyonyụn̄ osu uduak esie ndida emem, uyụhọ, ye nsinsi ifụre ke ini ukara Obio Ubọn̄ edima Eyen esie ndiọn̄ mme okopitem ubonowo. Prọfet Daniel ama ewet aban̄a eyo nnyịn ete: “Ke eyo ndidem oro, Abasi enyọn̄ ayanam ubọn̄ eke mîdisoboke ke nsinsi, adaha ada: . . . Enye ayanuak onyụn̄ ama kpukpru mme idụt emi, ndien enye ayada ke nsinsi.” (Daniel 2:44) Do, ke akpanikọ, ata eti ini edi emi ‘nditịm Eyen inua’ nnyụn̄ nnam n̄kpọ Jehovah, kpa Ọbọn̄ Andikara!

[Mme Ikọ idakisọn̄]

Didie ke Afo Ọkpọbọrọ?

• Nso “ikpîkpu n̄kpọ” ke mme idụt ‘ẹkere’?

• Ntak emi Jehovah asakde mme idụt nsahi?

• Nso idi ewụhọ Abasi kaban̄a mme idụt?

• Nso ke ‘nditịm Eyen inua’ ọwọrọ?

[Mme Mbụme Ukpepn̄kpọ]

[Ndise ke page 16]

David ama ọkwọ aban̄a Edidem Messiah oro akande

[Ndise ke page 17]

Mme andikara ye nditọ Israel ẹma ẹdụk odu ẹban̄a Jesus Christ

[Ndise ke page 18]

Ẹdori Christ ke ebekpo nte Edidem ke Obot Zion eke heaven