Mme Mbụme Ẹtode Mme Andikot

Nte nnyịn ikpenyene ndida Ediyarade 20:8 mbiere nte ke Satan ayabian̄a ata ediwak owo ke akpatre udomo?

Ediyarade 20:8 etịn̄ aban̄a akpatre en̄wan oro Satan edin̄wanade ye mbon oro ẹdụn̄de ke isọn̄ ke utịt tọsịn isua ukara Obio Ubọn̄ Messiah. Ufan̄ikọ oro etịn̄ aban̄a Satan ete: “Ndien enye ọyọwọrọ edi ndibian̄a mme idụt eke ẹdude ke n̄kan̄ isọn̄ mbinan̄, kpa Gog ye Magog, man enye atan̄ mmọ obok ọtọ kiet, ete ẹn̄wana ekọn̄; ibat mmọ ebiet ibat ntan mben-inyan̄.”

Kpa ye n̄kọri oro ntaifiọk ẹnamde ke usụn̄ unamibat ye masịn unamibat, owo isụk ifiọkke se idide “ibat ntan mben-inyan̄.” Ntem, ẹkeme ndidọhọ ke ikọ emi “ntan mben-inyan̄” ọwọrọ ibat oro owo mîfiọkke. Edi, ndi enye ọwọrọ akwa, akamba, m̀mê akpakịp ibat oro owo mîkemeke ndibat, mîdịghe ndi enye edi sụk ibat oro owo mîfiọkke edi edide uwak, m̀mê ekese?

Ke Bible, ẹsida ikọ oro, “ntan mben-inyan̄” ẹtịn̄ ikọ ke ediwak usụn̄. Ke uwụtn̄kpọ, ke Genesis 41:49, nnyịn ikot ite: “Ndien Joseph obon ibokpot nte ntan inyan̄, ediwak eti-eti, tutu ẹtre ndibat; koro akande ibat.” Mi, ẹdori nsọn̄uyo ke ibokpot ndidi se owo mîkemeke ndibat. Kpasụk ntre, Jehovah ama ọdọhọ ete: “Kpa nte emi mîkemeke ndibat mme udịm enyọn̄, mînyụn̄ ikemeke ndidomo ntan inyan̄; kpa ntre ke ndinam ubon David, owo mi, . . . ẹwak.” Kpa nte owo mîkemeke ndibat mme ntantaọfiọn̄ ke heaven ye ntan inyan̄, kpa ntre ke Jehovah edisu un̄wọn̄ọ esie ọnọ David.—Jeremiah 33:22.

Ediwak ini, ikọ oro “ntan inyan̄” esida aban̄a n̄kpọ oro awakde etieti ke ibat m̀mê ke udomo. Nditọ Israel emi ẹkedude ke Gilgal ẹma ẹnen̄ede ẹkop ndịk ẹban̄a mbonekọn̄ Philistine emi ẹkenamde nna-ekọn̄ ke Michmash, emi ẹketiede “nte ntan emi odude ke mben inyan̄ ke uwak.” (1 Samuel 13:5, 6; Judges 7:12) Ndien “Abasi ọnọ Solomon eti ibuot ye asian eti-eti, ye ọniọn̄ esịt, nte ntan emi odude ke mben inyan̄.” (1 Ndidem 4:29) Okposụkedi se ẹketịn̄de ẹban̄a ke idaha kiet kiet akawakde, enye okosụk enyenyene ibat.

“Ntan mben-inyan̄” ekeme n̄ko ndida mban̄a ibat oro owo mîfiọkke, ye unana edinọ ekikere mban̄a akwa ibat. Jehovah ọkọdọhọ Abraham ete: “Nyọdiọn̄ fi akamba, nyonyụn̄ nnam ubon [“mfri,” NW] fo ẹwak eti-eti nte ntantafiọn̄ enyọn̄, ye nte ntan emi odude ke mben inyan̄.” (Genesis 22:17) Ke ini akafiakde anam un̄wọn̄ọ emi ọnọ Jacob, eyeyen Abraham, Jehovah akada ikọ oro “ntan isọn̄,” emi Jacob akafiakde etịn̄ aban̄a nte “ntan inyan̄.” (Genesis 28:14; 32:12) Nte ini akakade, ke ẹsiode Jesus Christ ẹfep, “mfri” Abraham ekedidi 144,000 ke ibat, emi Jesus okokotde “ekpri otu erọn̄.”—Luke 12:32; Galatia 3:16, 29, NW; Ediyarade 7:4; 14:1, 3.

Nso ke nnyịn ikpep ito mme uwụtn̄kpọ emi? Nte ke ikọ oro “nte ntan mben-inyan̄” kpukpru ini isiwọrọke akpakịp ibat oro owo mîkemeke ndibat; ye nte ke owo isidaha enye kpukpru ini nditịn̄ mban̄a n̄kpọ oro edide akwa m̀mê akpakịp ke ibat. Ediwak ini, enye esida aban̄a ediwak ibat oro owo mîfiọkke. Ntem, owụt eti ibuot ndinịm ke akpanikọ nte ke ọsọn̄ibuot otuowo oro ẹdinọde Satan ibetedem ke akpatre en̄wan oro enye edin̄wanade ye ikọt Abasi ididịghe ata ediwak m̀mê akwa ibat owo kpọt, edi ẹyewak ẹkem ndidi n̄kpọndịk. Nte ededi, kan̄a ke emi, owo ifiọkke ibat.