Un̄wam Ini Akan̄ ke Edi!

‘AFO emekeme ndibụp, ‘Nso orụk Akan̄?’ Akan̄ udia eke spirit! Prọfet Hebrew kiet ke eset ama ebem iso etịn̄ aban̄a akan̄ emi ete: “Ọbọn̄ Jehovah ọdọhọ, ete, Sese, ini ke edi, ndien nyọdọn̄ akan̄ utom ke isọn̄, idịghe akan̄ udia, inyụn̄ idịghe nsat-itọn̄ mmọn̄, edi eke edikop ikọ Jehovah.” (Amos 8:11) Man ẹsụhọde akan̄ eke spirit, ẹnọ owo 48 eke ọyọhọ otu 112 eke Ufọkn̄wed Enyọn̄-Ukpeme Ukpep Bible eke Gilead, emi odude ke Patterson, New York, ẹka idụt 19 emi ẹdude ke akamba ubak isọn̄ 5 ye mme isuo inyan̄ibom.

Mmọ ẹnen̄ede ẹtịm idem, idịghe ke ndikama ata ata udia, edi ndikama ifiọk, ọniọn̄, ye ukpep. Ke ọfiọn̄ ition, mmọ ẹma ẹsịn idem ke ntotụn̄ọ ukpepn̄kpọ Bible oro ẹketịmde man ọsọn̄ọ mbuọtidem mmọ ke utom isụn̄utom ke an̄wautom esenidụt. Ke March 9, 2002, owo 5,554 oro ẹkedụkde edinam ukụre ukpep oro ẹma ẹkpan̄ utọn̄ ye idatesịt.

Stephen Lett, emi anamde utom nte owo Otu Ukara eke Mme Ntiense Jehovah, ekeberede edinam oro ye nduaidem. Enye ama ọnọ ediwak isenowo oro ẹketode nsio nsio ikpehe ererimbot ẹdi, san̄asan̄a ekọm. Ekem enye ama ada mme ikọ Jesus emi, “Mbufo ẹdi un̄wana ererimbot,” abuan ye utom mme isụn̄utom ini iso emi. (Matthew 5:14) Enye ama anam an̄wan̄a ete: ‘Ke utom mbufo, mbufo “ẹyesịn un̄wana” ke nsio nsio ikpehe utịbe utom Jehovah, ẹnamde mbon esịt akpanikọ ẹkụt uyai Jehovah ye mme uduak esie.’ Brọda Lett ama esịn udọn̄ ọnọ mme isụn̄utom emi ndida un̄wana Ikọ Abasi nyarade ekịm nsunsu ukpepn̄kpọ nnyụn̄ nnọ mbon oro ẹyomde akpanikọ ndausụn̄.

Ẹyom Nnennen Edu man Ẹkụt Unen

Ke ntọn̄ọikọ etieibuot okpokoro ama okokụre, Baltasar Perla, andibuana ke Kọmiti N̄kọk Itieutom United States, ama ọnọ akpa ke otu udịm udịm utịn̄ikọ oro ẹketịmde ndin̄wam mme andikụre ukpep ndidi mme isụn̄utom oro ẹkụtde unen. Enye ama atat ibuotikọ oro “Sọn̄ Idem, Sọn̄ Esịt, Nyụn̄ Nam.” (1 Chronicles 28:20) Ẹma ẹnọ Edidem Solomon eke Israel eset utom oro akakamade n̄kpọ-ata, ndinam n̄kpọ oro akananam enye mînamke—ndibọp temple ke Jerusalem. Solomon ama anam utom oro, ndien ye un̄wam Jehovah, ẹma ẹkụre temple oro. Ke adade ukpepn̄kpọ oro edibuan ye otu nditọ ufọkn̄wed oro, Brọda Perla ama ọdọhọ ete: ‘Mbufo ẹmebọ obufa utom, eke edidi isụn̄utom, ndien oyom mbufo ẹsọn̄ idem ẹnyụn̄ ẹsọn̄ esịt.’ Ke akpanikọ, nditọ ufọkn̄wed oro ẹma ẹbọ ndọn̄esịt ẹto nsọn̄ọ oro nte ke Jehovah idikpọn̄ke mmimọ adan̄a nte mmimọ isan̄ade ikpere enye. Brọda Perla ama eberi ye ọkpọkpọ ifiọk n̄kpọntịbe emi okotụkde otuowo: ‘Nte mme  isụn̄utom, mbufo ẹmekeme ndinam ekese. Mme isụn̄utom ẹkeda akpanikọ ẹsọk mi ye ubon mi!’

“Beri Edem ke Jehovah man Okụt Unen” ekedi ibuotikọ utịn̄ikọ oro Samuel Herd, owo Otu Ukara en̄wen ọkọnọde. Nditọ ufọkn̄wed oro ẹtọn̄ọ ubọkọkọ ke utom isụn̄utom, ndien mmọ ndikụt unen enen̄ede ọkọn̄ọ ke itie ebuana mmọ ye Jehovah. Brọda Herd ama ọnọ mmọ item ete: ‘Mbufo ẹmebọ ekese ifiọk Bible ebe ke ukpepn̄kpọ mbufo ke Gilead. Mbufo ẹkebọ mmọ ke idatesịt. Edi idahaemi, man ẹkụt ata unen, mbufo ẹnyene nditọn̄ọ ndinọ mme owo se mbufo ẹkekpepde.’ (Utom 20:35) Mme isụn̄utom emi ẹyenyene ediwak ifet ndinam emi nte mmọ ‘ẹn̄wan̄ade idemmọ ẹduọk’ ke ufọn mbon efen.—Philippi 2:17.

Nso item unyọn̄ọ ke mme andikpep ẹkenọ nditọ ufọkn̄wed emi? Mark Noumair ọkọkọn̄ ibuotikọ esie ke Ruth 3:18, “Tetie Mi Tutu Afo Okụt nte N̄kpọ Emi Ediwọrọde.” Ke adade uwụtn̄kpọ Naomi ye Ruth, etịn̄ikọ oro ama esịn udọn̄ ọnọ mme andikụre ukpep ndinyene ọyọhọ mbuọtidem ke mme ndutịm oro esop Abasi eke isọn̄ anamde ndinyụn̄ n̄kpono odudu ukara Abasi. Ke esịmde esịt nditọ ufọkn̄wed, Brọda Noumair ọkọdọhọ ete: ‘Ekeme ndidu mme ini oro mbufo mîfiọkke ntak emi  ẹkenamde ubiere oro otụkde mbufo m̀mê ini oro ekemede ndinen̄ede ntie mbufo ke idem nte ke ẹkpekenam n̄kpọ ke isio isio usụn̄. Nso ke mbufo ẹdinam? Nte mbufo ẹyedaha ẹda ẹnyụn̄ ẹnam n̄kpọ ke usụn̄ idem mbufo mîdịghe nte mbufo “ẹyesụk ẹtetie” ẹberide edem ke ndausụn̄ Abasi, ye mbuọtidem nte ke edikem ini, enye ayanam se ifọnde ada itie.’ (Rome 8:28) Eyịghe idụhe nte ke item oro ẹkenọde mmọ ‘ndiwụk ntịn̄enyịn ke ndinam mme n̄kpọ Obio Ubọn̄ ẹkọri, ẹwụkde ntịn̄enyịn ke se esop anamde utu ke idemmọ,’ eyenyene ufọn ọnọ mme isụn̄utom ini iso emi ke utom esenidụt mmọ.

Wallace Liverance, emi ke idemesie ekedide isụn̄utom emi onyụn̄ anamde utom idahaemi nte andikpep ke Gilead, ọkọnọ akpatre utịn̄ikọ ke akpa udịm udịm utịn̄ikọ. Ibuotikọ esie ekedi “Wụk Ntịn̄enyịn, Sọn̄ọ Du ke Utom Abasi.” Enye ama owụt nte ke prọfet Daniel ama ọfiọk oto edikụt iduọ Babylon ye se Jeremiah ekebemde iso etịn̄, nte ke uwọrọ-ufụn nditọ Israel ama ekpere. (Jeremiah 25:11; Daniel 9:2) Daniel ama ọfiọk ndutịm ini Jehovah, ndien oro ama an̄wam enye ndiwụk ntịn̄enyịn ke mme uduak Abasi oro ẹkeyararede. Ke edide isio, nditọ Israel ke eyo Haggai ẹkedọhọ ẹte: “Ini ikemke.” (Haggai 1:2) Mmọ ẹma ẹfre enyịn ẹban̄a ini oro mmọ ẹkedude uwem, ẹkabarede ẹwụk ntịn̄enyịn ke inemesịt ye ediyụhọ udọn̄ idemmọ, ẹnyụn̄ ẹkpọn̄ utom oro akanamde ẹsion̄o mmọ ke ufụn Babylon, edifiak mbọp temple. Brọda Liverance ama eberi ete: “Ke ntre ẹwụk ntịn̄enyịn ebe ke ndikere mban̄a uduak Jehovah kpukpru ini.”

Lawrence Bowen, andikpep ke Gilead ama ada usụn̄ ke ikpehe oro ekenyenede ibuotikọ emi “Jehovah Esidiọn̄ Mbon Oro Ẹdade Odu-Uwem Ikọ Ẹnam N̄kpọ.” (Mme Hebrew 4:12) Ikpehe emi akaban̄a mme ifiọkutom otu nditọ ufọkn̄wed oro, ẹwụtde nte Jehovah esidiọn̄de mbon oro ẹdade Bible ẹnam n̄kpọ ke ini ẹkwọrọde ikọ ẹnyụn̄ ẹkpepde n̄kpọ. Adausụn̄ oro ama osio owụt nte ke Jesus Christ ama enịm eti uwụtn̄kpọ ọnọ kpukpru asan̄autom Abasi: ‘Jesus ama ekeme nditịn̄ nte enende ete ke se imọ ikekpepde ikotoho idem imọ, edi ke imọ iketịn̄ Ikọ Abasi.’ Mbon esịt akpanikọ ẹma ẹfiọk akpanikọ ẹnyụn̄ ẹnam n̄kpọ nte ọfọnde ẹban̄a. (John 7:16, 17) Ntre ke edi mfịn.

Ukpep Gilead Etịm Owo Idem Ndinam Eti Utom Ekededi

Ekem, mbonubon Bethel oro ẹnamde utom ke anyan ini, Richard Abrahamson ye Patrick LaFranca ẹma ẹnam ndụn̄ọde ye owo itiokiet oro ẹma ẹkekụre ukpep ke Gilead, oro ẹdude idahaemi ke nsio nsio orụk san̄asan̄a utom uyọhọ ini. Mme andikụre ukpep ke ọyọhọ otu 112 ẹma ẹbọ nsịnudọn̄ ndikop nte ke ediwak isua ke ukperedem, ke owo itiokiet oro ke ẹka iso ndida ukpep oro mmọ ẹkebọde ke Gilead nnam n̄kpọ ke ebuana ye ukpepn̄kpọ Bible, edinam mme ndụn̄ọde ye ke ndinyene eti itie ebuana ye mme owo inamke n̄kpọ m̀mê nso idi utom mmọ idahaemi.

Theodore Jaracz, owo Otu Ukara, ọkọnọ akpan utịn̄ikọ edinam oro. Ibuotikọ ekedi “Se Ẹnamde ke Ndiyọ Usua Satan.” Ke ọfiọn̄ ition emi ẹbede, nditọ ufọkn̄wed oro ẹkedụn̄ ke ima ima n̄kann̄kụk ukara Abasi. Nte ededi, nte ẹkesiode ẹwụt ke ukpepn̄kpọ ke ubet ukpepn̄kpọ mmọ, nnyịn idu uwem ke ererimbot usua. Ẹn̄wana ye ikọt Jehovah ke ofụri ererimbot. (Matthew 24:9) Ke adade nsio nsio mbụk Bible, Brọda Jaracz ama owụt nte ke ‘nnyịn idi akpan iso en̄wan Devil. Ana nnyịn isọn̄ọ itie ebuana nnyịn ye Jehovah inyụn̄ isọn̄ idem man ikeme ndiyọ mme idomo.’ (Job 1:8; Daniel 6:4; John 15:20; Ediyarade 12:12, 17) Brọda Jaracz ama eberi ete, okposụkedi ẹkade iso ndisua ikọt Abasi, nte Isaiah 54:17 ọdọhọde, ‘baba n̄kpọ ekọn̄ kiet eke ẹbotde ẹban̄a nnyịn idikwe unen. Jehovah oyokụt ete ke ẹnyan̄a nnyịn ke edikem ini ye ke usụn̄ esie.’

Nte eyịghe mîdụhe, sia ‘eben̄ede idem ke kpukpru nde,’ mme andikụre ukpep ke ọyọhọ otu 112 eke Gilead ẹyenam ekese ndisụhọde akan̄ eke spirit ke mme idụt oro mmọ ẹdinamde utom. (2 Timothy 3:16, 17) Nnyịn itie ye ọkpọsọn̄ udọn̄ ibet ndibọ mbụk aban̄ade nte ẹnọde mme owo oro ẹdude ke mme idụt emi ọnọ-nsọn̄idem etop emi.

[Ekebe ke page 23]

IDAHA OTU

Ibat idụt ẹtode: 6

Ibat idụt ẹnọde ẹka: 19

Ibat nditọ ufọkn̄wed: 48

Isua emana ke ẹbaharede ukem ukem: 33.2

Isua ẹdude ke akpanikọ ke ẹbaharede ukem ukem: 15.7

Isua ẹdude ke utom uyọhọ ini ke ẹbaharede ukem ukem:12.2

[Ndise ke page 24]

Ọyọhọ Otu 112 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead

Ke udịm enyịn̄ ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.