Mbiowo—Ẹkpep Mbon En̄wen Ndibiom Mbiomo

KE ESOP Mme Ntiense Jehovah ke ofụri ererimbot, ẹyom irenowo oro ẹkemede ndikama ifet edise enyịn usọp usọp. Akpan ntak ita ẹdu oro anamde ẹyom emi.

Akpa, Jehovah ke osu un̄wọn̄ọ esie ndinam ‘esisịt akabade edi ọkpọsọn̄ idụt.’ (Isaiah 60:22) Ebede ke mfọnido esie oro owo mîdotke, se ikperede ndisịm mbufa mbet miliọn kiet ẹna baptism nte Mme Ntiense Jehovah ke isua ita emi ẹbede. Ẹyom iren emi ẹdotde man ẹn̄wam mbon oro ẹnade baptism obufa mi ndikọri nsịm ọyọhọ idaha Christian.—Mme Hebrew 6:1.

Ọyọhọ iba, usọn̄ m̀mê mfịna unana nsọn̄idem osụhọde udomo mbiomo oro ndusụk mbon oro ẹma ẹkenanam utom nte mbiowo ke ediwak iduọk isua ẹkemede ndibiom ke esop.

Ọyọhọ ita, ediwak ifịk ifịk mbiowo Christian ẹnam utom idahaemi nte mme andibuana ke Kọmiti Unyene Nneme ye Mbon Ufọkibọk, Kọmiti Ubọpufọk eke Ikpehe ke Ikpehe, m̀mê ke Kọmiti Ufọk Mbono. Ke ndusụk idaha mmọ ẹsinyene ndisana ke nsụhọde n̄kaha ndusụk mbiomo mmọ ke esop n̄kann̄kụk nyak man ẹda ukem ukem.

Didie ke ẹkeme ndiyụhọ usọp usọp udọn̄ emi kaban̄a irenowo oro ẹdotde? Akpan n̄kpọ edi ndinọ ukpep. Bible esịn udọn̄ ọnọ mme esenyịn Christian ete ẹkpep ‘irenowo oro ẹnamde akpanikọ, eke ẹdikemede ndikpep mbon en̄wen.’ (2 Timothy 2:2) Nte n̄wed ukabadeikọ kiet ọdọhọde, ikọedinam oro ‘kpep’ ọwọrọ “ndinọ owo ukpep man odot m̀mê enyene usọ.” Ẹyak nnyịn ikere iban̄a nte mbiowo ẹkemede ndinọ irenowo en̄wen oro ẹdotde ukpep.

Ẹkpebe Uwụtn̄kpọ Jehovah

Jesus Christ ama enen̄ede ‘odot onyụn̄ enyene usọ’ ke utom esie—ndien emi idịghe n̄kpọ n̄kpaidem! Jehovah Abasi ke idemesie ọkọnọ enye ukpep. Mme n̄kpọ ewe ẹkenam ndutịm unọ ukpep emi enen̄ede enyene uforo? Jesus ama asiak n̄kpọ ita, nte ẹwetde ke John 5:20: “Ete [1] amama Eyen, omonyụn̄ [2] owụt Enye kpukpru n̄kpọ eke Enye ke Idem Esie anamde: Enye oyonyụn̄ owụt Eyen [3] mme utom eke ẹkponde ẹkan emi.” (Sịghisịghi ubọkn̄wed edi eke nnyịn.) Ndidụn̄ọde mme n̄kpọ emi kiet kiet ọyọnọ ikike ke ibuot nneme aban̄ade edinọ ukpep.

Tịm fiọk ke Jesus ekebem iso ọdọhọ ete: ‘Ete amama Eyen.’ Toto ke ini ẹketọn̄ọde ndibot mme n̄kpọ, ufiop ufiop ima ama odu ke ufọt Jehovah ye Eyen esie. Mme N̄ke 8:30 esịn un̄wana ke itie ebuana oro: “Ndien [ami Jesus] ndu enye [Jehovah Abasi] ke n̄kan̄, eyen emi enye ọkọde: n̄konyụn̄ ndi se idatde enye esịt [“Eyen emi enye enen̄erede ama,” NW] ofụri usen; ndara ke iso esie kpukpru ini.” (Sịghisịghi ubọkn̄wed edi eke nnyịn.) Jesus ikenyeneke eyịghe ndomokiet nte ke Jehovah ama ‘enen̄ede ama’ imọ. Jesus ikonyụn̄ idịpke idatesịt oro enye ekenyenede ke adan̄aemi okodude Ete esie ke n̄kan̄. Ọfọn didie ntem ufiop ufiop, in̄wan̄-in̄wan̄ itie ebuana ndidu ke ufọt mbiowo Christian ye mbon oro mmọ ẹnọde ukpep!

Ọyọhọ n̄kpọ iba oro Jesus akasiakde edi nte ke Ete ‘owụt Enye kpukpru n̄kpọ oro Enye ke Idem Esie anamde.’ Mme ikọ emi ẹsọn̄ọ se ẹtịn̄de ke Mme N̄ke 8:30, oro edi, nte ke Jesus ‘okodu Jehovah ke n̄kan̄’ ke adan̄aemi ẹkebotde ekondo. (Genesis 1:26) Mbiowo ẹkeme ndikpebe eti uwụtn̄kpọ oro ebe ke ndinam utom ọtọkiet ye mme asan̄autom unamutom, ẹwụtde mmọ nte mmọ ẹkpenamde utom mmọ ke eti usụn̄. Nte ededi, idịghe mme asan̄autom unamutom oro ẹmekde obufa kpọt ẹyom ukpep oro akade-ka iso. Nso kaban̄a mme anam-akpanikọ nditọete iren oro ẹnyanarede ẹbịne itieutom esenyịn ke ediwak isua edi oro owo mîmekke? (1 Timothy 3:1) Mbiowo ẹkpenyene ndinọ utọ irenowo oro  san̄asan̄a item man mmọ ẹkpefiọk ebiet oyomde mmimọ inam ukpụhọde.

Ke uwụtn̄kpọ, asan̄autom unamutom ekeme ndidi se ẹkemede ndiberi edem, esika n̄kpọ ke eti ini, esinyụn̄ etịn̄ enyịn anam mme utom esie. Enye ekeme n̄ko ndidi eti andikpep. Ke ediwak idaha, enye ekeme ndinam ata nti utom ke esop. Nte ededi, ekeme ndidi enye ifiọkke ite ke imọ isinam n̄kpọ nsọn̄ido nsọn̄ido ye mme ekemmọ Christian. Oyom mbiowo ẹwụt “sụn̄-sụn̄ ido eti ibuot.” (James 3:13) Nte ikpowụtke mfọnido ebiowo kiet nditịn̄ ikọ ye asan̄autom unamutom oro, osiode mfịna oro owụt enye in̄wan̄-in̄wan̄, ọnọde mme san̄asan̄a uwụtn̄kpọ, onyụn̄ ọnọde nti ekikere kaban̄a nte enye akpanamde ukpụhọde? Edieke ebiowo oro ke ntịn̄enyịn ‘anamde item esie enyene inem nte n̄kpọ eke esịnde inụn̄ ke esịt,’ eyedi ẹyebọ item esie ke inemesịt. (Colossae 4:6) Nte ededi, asan̄autom unamutom oro ayanam utom ebiowo oro enen̄ede efere ebe ke nditie in̄wan̄-in̄wan̄ nnyụn̄ nnyịme item ekededi oro ẹnọde enye.—Psalm 141:5.

Ke ndusụk esop, mbiowo ke ẹnọ mme asan̄autom unamutom eti ukpep oro akade-ka iso. Ke uwụtn̄kpọ, mmọ ẹsida mme asan̄autom unamutom oro ẹdotde ẹsan̄a ke ini mmọ ẹkade ndise mbon udọn̄ọ m̀mê mbonusọn̄. Ke usụn̄ emi mme asan̄autom unamutom ẹsinyene ifiọk ke nte ẹnamde utom ubọkerọn̄. Edi akpanikọ, ekese n̄kpọ ẹdu oro asan̄autom unamutom ekemede ndinam man aka iso anam n̄kọri ke n̄kan̄ eke spirit.—Se ekebe odude ke idak oro ibuotikọ edide, “Se Mme Asan̄autom Unamutom Ẹkemede Ndinam.”

Ọyọhọ n̄kpọ ita oro akanamde ukpep oro ẹkenọde Jesus enen̄ede enyene uforo edi nte ke Jehovah ọkọnọ enye ukpep emi ye n̄kọri ini iso ke ekikere. Jesus eketịn̄ aban̄a Ete esie ete ke enye oyowụt Eyen “utom eke ẹkponde ẹkan emi.” Ifiọk oro Jesus ọkọkọde ke ini okodude ke isọn̄ ama an̄wam enye ndikọri mme edu oro enye ediyomde man ada anam utom ke ini iso. (Mme Hebrew 4:15; 5:8, 9) Ke uwụtn̄kpọ, nso akamba mbiomo ke Jesus edibọ ntem ke mîbịghike—eke edinam ediwak biliọn owo oro ẹkpan̄ade ke emi, ẹset nnyụn̄ mbiere ikpe nnọ mmọ!—John 5:21, 22.

Ke ini ẹnọde mme asan̄autom unamutom ukpep, mbiowo mfịn ẹkpenyene ndikere mban̄a udọn̄ ini iso. Ke adan̄aemi ekemede nditie nte mbiowo ye mme asan̄autom unamutom ẹwak ẹkem ndise mban̄a mme udọn̄ idahaemi, ndi mmọ ẹyewak ẹkem edieke ẹtọn̄ọde obufa esop? Ndi mmọ ẹyewak ekem edieke ẹtọn̄ọde ediwak esop? Ke isua ita emi ẹkebede, se iwakde ibe mbufa esop 6,000 ẹma ẹdu ke ofụri ererimbot. Ẹyom ediwak mbiowo ye mme asan̄autom unamutom didie ntem man ẹse ẹban̄a mbufa esop oro!

Mbiowo, ndi mbufo ẹmekpebe uwụtn̄kpọ Jehovah ebe ke ndikọri ufiop ufiop ọkpọkpọ itie ebuana ye irenowo oro mbufo ẹnọde ukpep? Ndi mbufo ke ẹwụt mmọ nte ẹkpenamde utom mmọ? Ndi mbufo ẹmekere ẹban̄a mme udọn̄ ini iso? Ndikpebe usụn̄ oro Jehovah ọkọnọde Jesus  ukpep ayada akpakịp edidiọn̄ ọsọk ediwak owo.

Ẹkûkop Ndịk Ndiyak Mbiomo Nnọ

Mbiowo emi ẹnyenede ukeme oro emehede mmọ ndise mban̄a ediwak ikpọ utom ẹkeme ndimen̄e ndiyak odudu nnọ mbon en̄wen. Ekeme ndidi mmọ ẹma ẹdomo ndinam oro ke ini edem edi ikekemeke. Ntre mmọ ẹkeme ndinyene edu emi, ‘Edieke oyomde ẹnam n̄kpọ ọfọn, afo enyene ndinam enye ke idemfo.’ Edi nte edu emi odu ke n̄kemuyo ye uduak Jehovah, nte ẹdọhọde ke N̄wed Abasi, ẹte irenowo oro ẹtịmde ẹnyene ifiọk ẹnọ mbon oro mîtịmke inyene ifiọk, ukpep?—2 Timothy 2:2.

Apostle Paul ama okụt edikpu ke ini kiet ke otu nsan̄a ukaisan̄ esie, John Mark, ọkọkpọn̄de utom esie ke Pamphylia ọnyọn̄ ufọk. (Utom 15:38, 39) Nte ededi, Paul ikayakke edikpu oro ọbiọn̄ọ enye ndinọ mbon en̄wen ukpep. Enye ama emek ekpri eyenete eren en̄wen, Timothy, onyụn̄ ekpep enye utom isụn̄utom. * (Utom 16:1-3) Ke Beroea mme isụn̄utom oro ẹma ẹsobo ibak ibak ukọbọ tutu edi se mîwụtke ifiọk Paul ndika iso ndu do. Ntre enye ama ọkpọn̄ obufa esop oro ọnọ Silas, akamba eyenete oro ama ọkọkọri esịm ọyọhọ idaha, ye Timothy, ete ẹse enyịn. (Utom 17:13-15) Nte eyịghe mîdụhe Timothy ama ekpep ekese oto Silas. Ke ukperedem, ke ini Timothy ekeben̄ede idem ndibiom mme mbiomo efen efen, Paul ama ọdọn̄ enye aka Thessalonica ekesịn udọn̄ ọnọ esop do.—1 Thessalonica 3:1-3.

Itie ebuana oro okodude ke ufọt Paul ye Timothy ikedịghe mbịtmbịt itie ebuana ebietde eke mbubehe. Ufiop ufiop ima ama odu ke ufọt mmọ. Ke ini ekewetde n̄wed ọnọ esọk esop Corinth, Paul ama etịn̄ aban̄a Timothy, oro enye akaduakde ndisio ndọn̄ ke ọtọ mmọ, nte “edima eyen mi, emi anamde akpanikọ ke Ọbọn̄.” Enye ama adian do ete: “[Timothy] oyonyụn̄ anam mbufo ẹti mme edu mi emi ẹdude ke Christ.” (1 Corinth 4:17; sịghisịghi ubọkn̄wed edi eke nnyịn.) Timothy ama anam n̄kpọ aban̄a ukpep oro Paul ọkọnọde enye, akabarede odot ndinam utom esie. Ediwak n̄kpri nditọete iren ẹmekabade ẹdi mme asan̄autom unamutom emi ẹnyenede ukeme, mbiowo, m̀mê idem mme esenyịn oro ẹsan̄ade-san̄a koro mmọ ẹkebọde ufọn ẹto ukpep oro mmọ ẹkebọde ẹto mbiowo oro ẹkerede ẹban̄a oro ẹkenyenede ata udọn̄ ke idemmọ, kpa nte Paul ekenyenede ke idem Timothy.

Mbiowo, Ẹnọ Mbon En̄wen Ukpep!

Ye unana ndudue, ntịn̄nnịm ikọ oro ke Isaiah 60:22 ke osu mfịn. Jehovah ke anam ‘esisịt akabade edi ọkpọsọn̄ idụt.’ Man idụt oro aka iso edi “ọkpọsọn̄,” ana ẹnen̄ede ẹtịm enye. Mbiowo, ntak emi mbufo mîkereke iban̄a mme usụn̄ oro ẹkemede ndinọ irenowo oro ẹma ẹkeyak idem ẹnọ ẹnyụn̄ ẹdotde, ukpep efen efen? Ẹkụt ẹte ke asan̄autom unamutom kiet kiet etịm ọfiọk mme ukpụhọde oro oyomde enye anam man enye anam n̄kọri. Ndien mbufo nditọete iren oro ẹma ẹkena baptism, ẹda ọkpọkpọ ntịn̄enyịn oro ẹnọde mbufo ẹnam n̄kpọ nte ọfọnde. Ẹda mme ifet oro ẹbererede ẹnam ukeme ye ifiọk mbufo ẹkọri. Ke akpanikọ, Jehovah ọyọdiọn̄ utọ ima ima ndutịm edinọ un̄wam oro.—Isaiah 61:5.

[Mme Ikọ idakisọn̄]

[Ekebe ke page 30]

Se Mme Asan̄autom Unamutom Ẹkemede Ndinam

Ke adan̄aemi mbiowo ẹkpenyenede ndinọ mme asan̄autom unamutom ukpep, ekese n̄kpọ ẹdu oro mme asan̄autom unamutom ẹkemede ndinam man mmọ ẹka iso ẹnam n̄kọri ke n̄kan̄ eke spirit.

—Mme asan̄autom unamutom ẹkpenyene ndinyene ifịk nnyụn̄ ndi se ẹberide edem ke ndise mban̄a utom mmọ. Mmọ ẹkpenyene n̄ko ndikọri nti edu ukpepn̄kpọ idemowo. Ke ndusụk udomo, n̄kọri ọkọn̄ọ ke edikpep ye edida se ẹkpepde nsịn ke edinam.

—Ke ini asan̄autom unamutom anamde ntịmidem ndinọ utịn̄ikọ ke mbono esop Christian, enye ikpemen̄eke ndiyom ekikere nto ebiowo oro enyenede ukeme ke nte enye ọkpọnọde utịn̄ikọ oro.

—Asan̄autom unamutom ekeme n̄ko ndiben̄e ebiowo kiet ete ese nte imọ inọde utịn̄ikọ Bible onyụn̄ ọnọ imọ item edinen̄ede.

Mme asan̄autom unamutom ẹkpenyene ndiyom, ndinyịme, ndinyụn̄ nda item mbiowo nsịn ke edinam. Ke usụn̄ emi, ‘kpukpru owo ẹyekụt’ n̄kọri mmọ.—1 Timothy 4:15.