Ukpepn̄kpọ Bible—Ndi Enyene Fi?

“OWO inyeneke ndikot ke oku mîdụhe.” Ntọt emi odu ke akpa page ndusụk Bible mbon Catholic. Kay Murdy eke Ufọkn̄wed Ukpep Bible mbon Catholic ke Los Angeles ọdọhọ ete: “Nte mbon Catholic nnyịn ikesikotke Bible kpukpru ini, edi oro ke okpụhọde idahaemi.” Ke ndondo oro mbon Catholic ẹdide ẹdifiọk nte Edisana N̄wed Abasi ekemede nditụk uwem mmimọ, “mmọ ẹsikọri udọn̄ ẹnọ Bible,” ntre ke enye ọdọhọ.

Kaban̄a ukpụhọde emi, magazine oro U.S. Catholic okot oto anam ndutịm ukpepn̄kpọ ido ukpono oro ọkọdọhọde ke mbon Catholic oro ẹketienede ẹdụk ukpepn̄kpọ Bible ẹkekere ẹte ke “mmimọ ima itaba n̄kpọ ke ndidi mbon Catholic, ye nte ke ediwak nti n̄kpọ ẹdu ke Bible. Mmọ ẹyom ndinyene ndusụk nti n̄kpọ oro mmọ ẹkerede ke mmimọ ima itaba.”

Se ededi oro idaha ekedide, nso “nti n̄kpọ” idu inọ eyen ukpepn̄kpọ Bible ndifiọk? Kere: Nte afo akpama ndifiọk nte ọkpọyọde mme editịmede esịt ke uwem ofụri usen? Didie ke afo ekeme ndinyene emem ke ubon? Ntak emi nsọn̄ido ye ibak ibak edinam ẹkponide ntem? Nso idi ntak afai ke otu mme uyen mfịn? Ẹkeme ndikụt mme ibọrọ oro ẹkemede ndiberi edem nnọ mme mbụme emi ye mme mbụme efen oro ẹtịmerede owo ekikere ke Ikọ Abasi, kpa Bible, ndien ke akpanikọ, mmọ ididịghe “nti n̄kpọ” inọ mbon Catholic m̀mê mbon Protestant kpọt edi ẹyedi n̄ko ẹnọ mbon Budhist, Hindu, Muslim, Shinto, idem mbon oro mînịmke ke Abasi odu ye mbon oro ẹdọhọde ke owo idiọn̄ọke m̀mê Abasi odu m̀mê idụhe. Nte andiwet Psalm ekesịnde enye, ‘Ikọ Abasi ekedi utuenikan̄ ukot esie, ye un̄wana usụn̄ esie.’ Enye ekeme ndidi ukem oro nnọ fi.—Psalm 119:105.