Nte Afo Emekeme Ndisan̄a N̄kpere Abasi Oro Enyịn Mîkwe?
Nte Afo Emekeme Ndisan̄a N̄kpere Abasi Oro Enyịn Mîkwe?
Afo emekeme ndibụp ete: ‘Didie ke ami n̄keme ndikọri n̄kpet n̄kpet itie ebuana ye owo oro ami mmen̄kemeke ndikụt?’ Oro ekeme nditie nte eti mbụme. Edi kere:
EDIKỤT ke enyịn edi akpan n̄kpọ adan̄a didie ke ndikọri ima ima itie ebuana oro ẹbịghide? Nte mme n̄kpọ oro enyịn mîkwe idịghe akpan n̄kpọ ukem ntre, edieke mîkam idịghe-di akpan n̄kpọ ikan oro? Ẹnen̄ede ẹdi! Ke ntak oro ndusụk owo ẹsikọri n̄kpet n̄kpet itie ebuana ye mbon en̄wen ebe ke ndiwet leta kpukpru ini—mme leta mmọ ẹtịn̄de se mmọ ẹmade, se mmọ ẹsuade, mme utịtmbuba, mme edumbet, mbubru, ye mme edu ye n̄kpọ eken.
Mbon oro ẹdide nnan n̄ko ẹsiwụt ẹte ke edikụt ke enyịn idịghe ata akpan n̄kpọ ke ndikọri n̄kpet n̄kpet itie ebuana ye owo en̄wen. Kere ban̄a uwụtn̄kpọ Edward ye Gwen, ebe ye n̄wan oro ẹdide nnan. * Edward okosobo Gwen ke ufọkn̄wed mbon nnan, emi enye ekedide ekemmọ eyen ufọkn̄wed. Enye ama ama mme edu Gwen, akpan akpan edinam akpanikọ esie ke ikọ ye ke edinam, ye eti edu oro enye ekenyenede aban̄a utom. Ke n̄kan̄ eken, Gwen ama ama Edward koro, nte enye ọdọhọde, “enye ama esiwụt kpukpru edu oro ẹkekpepde mi nte ẹdide akpan n̄kpọ.” Uyomima ama ọtọn̄ọ, ndien isua ita ke ukperedem mmọ ẹma ẹdọ ndọ.
Edward ọdọhọ ete: “Ke ini mbufo ẹdude ọtọkiet, edidi nnan ikpanke edikọri itie ebuana ye kiet eken. Ekeme ndidi mbufo idikemeke ndikụt kiet eken, edi mme ntụk idịghe nnan.” Idahaemi, isua 57 ke ukperedem, mmọ ke ẹsụk ẹmama kiet eken ntotụn̄ọ ntotụn̄ọ. Mmọ ẹnam an̄wan̄a nte ke se idide ukpọhọde inọ utịbe utịbe itie ebuana mmimọ abuana n̄kpọ inan̄ ke nsụhọde n̄kaha: (1) ndikụt mme edu owo enye eken, (2) ndikere mban̄a nnyụn̄ mma mme edu oro, (3) ndika iso nnyene eti nneme, ye (4) ndinam mme n̄kpọ ọtọkiet.
N̄kpọ inan̄ emi ẹdi akpan n̄kpọ ẹnọ eti itie ebuana ekededi, edide ke ufọt ufan ye ufan, ke ufọt nsan̄andọ m̀mê, ke edide akpan n̄kpọ akan, ke ufọt owo ye Abasi. Ke ibuotikọ oro etienede, nnyịn iyokụt nte edida mme n̄kpọ emi nsịn ke edinam ekemede ndin̄wam nnyịn ikọri n̄kpet n̄kpet itie ebuana ye Abasi, idem okposụkedi nnyịn mîkemeke ndikụt enye. *
[Mme Ikọ idakisọn̄]
^ ikp. 4 Ẹkpụhọ mme enyịn̄.
^ ikp. 6 Ke mîbietke itie ebuana owo ye owo, itie ebuana ye Abasi ọkọn̄ọ ke mbuọtidem nte ke enye odu. (Mme Hebrew 11:6) Kaban̄a ọyọhọ nneme ke nte ẹkemede ndikọri ọkpọsọn̄ mbuọtidem ke Abasi, mbọk se Is There a Creator Who Cares About You?, emi Watchtower Bible and Tract Society of New York, Inc., osiode.