OKPOSỤKEDI inyene enyenede ediwak ufọn, inyene esisịn owo ke mfịna, akpan akpan ke ndiọkeyo emi. (2 Timothy 3:1-5) Ke ediwak idụt, mme inọ ye mbon emi ẹsiyịpde owo ẹyom okụk ẹsida mme imọ owo ẹnam udia.

Kop se mbụk n̄kpọntịbe kiet eketịn̄de aban̄a idụt kiet emi owo mîtịmke inyene n̄kpọ: “Mme ama-uke, mbon nyakri m̀mê mme utọtọ, ye mbon emi ẹsiyịpde owo ẹyom okụk ẹsinam mme enyene-n̄kpọ owo ye mme ubuene ẹsua kiet eken. Idahaemi mbonekọn̄ ẹdikpeme itie unyamudia; mme enyene-n̄kpọ owo ẹdọn̄ waya emi ekemede ndinọ owo unan ke ọkọ ufọk mmọ, ẹdọn̄ ikan̄ ye mme n̄kpọ emi ekemede ndida n̄kụt owo ke kpukpru ebiet, ẹnyụn̄ ẹbon mbon ukpeme.” Nte n̄kpọ etiede edi oro ye mme enyene-n̄kpọ owo ke ediwak idụt.

Edi Bible ọdọhọ ke “owo isisịnke ubuene ndịk ke idem.” Nso ke akpanam man se Bible etịn̄de emi anyan̄a fi? Edieke mme utọ idiọkowo emi isiakde mi m̀mê mbon afai ẹdude ke edem mbufo, mîdịghe edieke oyomde ndika ebiet emi mmọ ẹdude, kûsan̄a nte enyene-n̄kpọ owo. Diọn̄ọ se esịnede ye se akamade, akpan akpan edieke mûkemeke ndidịp se akamade. Mme N̄ke 22:3 ọdọhọ ete: “Owo mbufiọk ada okụt afanikọn̄ ndien edịbe, edi ọkọi ebe aka ọkọbọ ufen.”

Ikọ ọniọn̄ oro ọdọn̄ọde ọyọhọ Bible owụt ke Abasi ama nnyịn etieti. Enye iyomke n̄kpọ anam nnyịn. Ecclesiastes 7:12 ọdọhọ ke utọ ọniọn̄ emi esikpeme owo, onyụn̄ “enịm mbon oro ẹnyenede enye uwem.”