Abasi okobot idem nnyịn ke utịbe utịbe usụn̄. Edieke n̄kpọ ekpide m̀mê ekịmde owo, m̀mê owo eduede ọkwọhọde idem esie ke n̄kpọ, idem owo esinam nsio nsio n̄kpọ emi ẹdinamde unan oro akpa, edide ekpri m̀mê akamba unan. Ke ini owo adade unan, idem esie esisọsọp ọtọn̄ọ ndinam n̄kpọ man iyịp etre ndiwọrọ ke unan oro, man obufa obụk ọkọri ke enyịn unan oro, man unan oro onyụn̄ ọtọn̄ọ ndikpa.

KERE ISE: Edieke Abasi okobotde idem nnyịn ke usụn̄ emi ekemede ndinam unan oro idade akpa, ndi nnyịn ikpenịmke ke enye ọyọdọn̄ nnyịn esịt ke ini n̄kpọ obụn̄de nnyịn esịt? Andiwet Psalm ọkọdọhọ ete: “Enye ọkọk mbon oro esịt mmọ obụn̄ọde, onyụn̄ ọbọp mme nde unan mmọ.” (Psalm 147:3) Edieke n̄kpọ emi eketịbede ke ini edem m̀mê n̄kpọ emi etịbede ọnọ fi idahaemi anamde esịt enen̄ede etịmede fi, nso ikeme ndinam enịm ke Jehovah ọyọdọn̄ fi esịt idahaemi ye ke ini iso?

Abasi ọdọhọ ete: “Kûkop ndịk, koro ami ndude ye afo. Kûsuan enyịn, koro ami ndide Abasi fo. Ami nyọsọn̄ọ fi idem. Ami nditreke ndin̄wam fi.” (Isaiah 41:10) Esịt esina owo sụn̄ ke ini enye ọfiọkde ke Jehovah ama enye, ndien oro esinam enye ekeme ndiyọ nsio nsio n̄kpọ oro ọwọrọde enye. Apostle Paul ọkọdọhọ ke “emem Abasi emi akande kpukpru ekikere” esinam esịt ana nnyịn sụn̄. Paul ama afiak ọdọhọ ete: “Mmenyene ukeme ndinam kpukpru n̄kpọ ebe ke enye emi ọnọde mi odudu.”​—Philippi 4:​4-7, 9, 13.

N̄wed Abasi anam inim ke Jehovah ayanam kpukpru se enye ọn̄wọn̄ọde ndinam nnọ nnyịn ke ini iso. Ke uwụtn̄kpọ, Ediyarade 21:​4, 5 (emi ẹwetde ke page 15) etịn̄ se Abasi edinamde ye ntak emi ikpenịmde ke enye ayanam se enye ọn̄wọn̄ọde:

• “Enye ọyọkwọhọde kpukpru mmọn̄eyet ke enyịn” nnyịn efep. Jehovah ayanam kpukpru se isinamde nnyịn ibọ ufen ye se isitịmerede nnyịn esịt etre, ọkpọkọm mbon en̄wen ẹda ke se ifịnade nnyịn oro edi ekpri n̄kpọ.

• Ata Ọkpọsọn̄ Abasi emi “etiede ke ebekpo” esie ke heaven ayada odudu esie anam ufen etre onyụn̄ an̄wam nnyịn.

• Jehovah ọdọhọ ke se imọ in̄wọn̄ọde emi “edi akpanikọ ye se ẹkemede ndibuọt idem.” Ikọ itien̄wed emi etie nte Jehovah ndikpọdọhọ ke edieke imọ mîsụhu un̄wọn̄ọ imọ emi, ke imọ idịghe Abasi akpanikọ.

“‘Enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.’ Ndien Enye emi etiede ke ebekpo ọdọhọ ete: ‘Sese! Mmanam kpukpru n̄kpọ ẹdi mbufa.’ Enye onyụn̄ ọdọhọ ete: ‘Wet, koro ikọ emi edi akpanikọ ye se ẹkemede ndibuọt idem.’”​—Ediyarade 21:​4, 5.

Se Abasi okobotde ye se Bible ekpepde ẹnam ifiọk utọ Abasi emi Ete nnyịn eke heaven edide. Mme n̄kpọ oro Abasi okobotde ẹwụt ke Abasi oyom nnyịn isan̄a ikpere imọ, edi Bible ọdọhọ nnyịn nnennen nnennen ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Utom 17:27 ọdọhọ ete: ‘Enye iyomke usụn̄ ikpọn̄ nnyịn owo kiet kiet.’

Ke ini ekpepde n̄kpọ aban̄a Jehovah onyụn̄ etịmde ọdiọn̄ọ enye, eyenịm ke enye ‘ekere aban̄a fi.’ (1 Peter 5:7) Mme ufọn ewe ke edidia edieke enịmde ke Jehovah ekere aban̄a fi?

Yak ineme se iketịbede inọ Toru emi otode Japan. Eka esie ekedi Christian, edi Toru ama aka okodụk n̄ka mbon ntịme Japan emi ẹkotde yakuza. Toru ọdọhọ, “N̄kekere ke Abasi asasua mi, ke enye owot mbon mi man amia mi ufen.” Toru ọdọhọ ke n̄ka oro imọ ikodụkde ye se imọ ikesikerede ama anam imọ inyene esịt itiat, ke imọ ikesinyụn̄ ituaha owo mbọm. Enye ọdọhọ ke imọ ikoyom ndiwot owo emi ọwọrọde etop akan imọ ekem iwot idem man mme owo ẹda oro ẹti imọ.

Edi ke ini Toru ye Hannah an̄wan esie ẹketọn̄ọde ndikpep Bible, Toru ama enen̄ede okpụhọde. N̄wan esie ọdọhọ ete: “Mma n̄kụt ke ebe mi idịghe  aba utọ owo emi enye ekesidide.” Idahaemi, Toru ikereke aba ke Abasi asasua imọ. Enye ọdọhọ ete: “Mmenịm ke Abasi enen̄ede ama nnyịn owo kiet kiet. Enye iyomke owo ndomokiet akpa, onyụn̄ eben̄e idem ndifen ndudue nnyịn edieke ikabarede esịt. Ke ini inyenede mfịna oro nnyịn mîkemeke nditịn̄ nnọ mbon en̄wen, enye esikpan̄ utọn̄ ke ini itịn̄de inọ enye. Enye esinyụn̄ ọfiọk se ifịnade nnyịn ọkpọkọm mfịna nnyịn in̄wan̄ake mbon en̄wen. Ibịghike, Jehovah ayanam kpukpru mfịna, ufen, ye ubiak ẹtre. Idem idahaemi, enye esin̄wam nnyịn ke usụn̄ emi nnyịn mîkereke. Enye esikere aban̄a nnyịn onyụn̄ anyan̄a nnyịn ke ini idem ememde nnyịn.”​—Psalm 136:23.

Se iketịbede ye Toru owụt ke ndifiọk ke Abasi ọmọn̄ etetre kpukpru mfịna onyụn̄ ọkwọhọde kpukpru mmọn̄eyet ke enyịn nnyịn efep anam inyene idotenyịn ke ini iso ọyọfọn, onyụn̄ anam ikop inem uwem idahaemi. Ntre, kpa ye oro ufen okponde etieti ke ererimbot emi, ndifiọk ke Abasi ama fi ayanam uwem enem fi.