• Owo emi Abasi emekde. ‘Ami, mmodori edidem mi. Nyọnọ fi mme idụt nte udeme fo nnyụn̄ nnọ fi mme utịt isọn̄ nte inyene fo.’—Psalm 2:6, 8.

• Eyen Edidem David. “Eyen amana ọnọ nnyịn, ẹnọ nnyịn eyeneren . . . N̄kọri ke ubọn̄ ye emem idinyeneke utịt ke ebekpo David ye ke obio ubọn̄ esie man ọsọn̄ọ owụk enye.”—Isaiah 9:6, 7.

• Edimana ke Bethlehem. “O Bethlehem . . . , owo oyoto fi ke esịt ọwọrọ ọnọ mi, emi edidide andikara . . . Enye oyonyụn̄ okpon ke emi tutu esịm utịt isọn̄.”—Micah 5:2, 4.

• Mme owo ẹyesịn enye ẹnyụn̄ ẹwot enye. “Ẹma ẹsịn enye ke ndek, nnyịn ikonyụn̄ idaha enye ke n̄kpọ. . . . Ẹkekịm enye ke ntak ubiatibet nnyịn; ẹnuak enye ke ntak mme ndudue nnyịn.”—Isaiah 53:3, 5.

• Ẹyenam enye eset ẹnyụn̄ ẹnọ enye ubọn̄. “Afo [udukpọn̄ke] ukpọn̄ mi ke Udi. Afo uduyakke owo fo emi ọsọn̄ọde ada okụt obube. . . . Inemesịt odu fi ke ubọk nnasia ke nsinsi.”—Psalm 16:10, 11.

Tọn̄ọ ẹkebot owo, Jesus Christ kpọt ke kpukpru se ẹtịn̄de emi ẹban̄a eti Andikara osu ke idem. Angel ọkọdọhọ Mary eka Jesus ete: “Abasi ọyọnọ enye ebekpo ete esie David, . . . obio ubọn̄ esie idinyụn̄ inyeneke utịt.”—Luke 1:31-33.

Jesus ikedịghe edidem ini enye okodude mi ke isọn̄. Utu ke oro, enye editie ke heaven ikara nte Edidem Obio Ubọn̄ Abasi. Nso inam enye enen̄ede odot ndikara? Kop se enye akanamde mi ini enye okodude ke isọn̄.

•   Jesus ama esikere aban̄a mme owo. Jesus ama esin̄wam mme owo—iren ye iban, n̄kpri ye ikpọ, imọ ye ubuene—inamke n̄kpọ m̀mê mmọ ẹto m̀mọ̀n̄. (Matthew 9:36; Mark 10:16) Ke ini owo akpamfia ọkọdọhọde enye ete: “Edieke afo akam amade, emekeme ndinam mi nsana,” mbọm ete oro ama anam Jesus tutu enye anam idem ọsọn̄ ete oro.—Mark 1:40-42.

• Jesus ama ekpep mme owo nte ẹkpenemde Abasi esịt. Enye ọkọdọhọ ete: “Mbufo ikemeke ndidụk ufụn nnọ Abasi ye Inyene.” Enye ama onyụn̄ ọdọhọ yak inam n̄kpọ ye mbon en̄wen nte ikpamade ẹnam ye nnyịn. Enye ama etịn̄ n̄ko ke Abasi esise se ikerede, idịghe se inamde kpọt. Ntre, edieke iyomde ndinem Abasi esịt, ana ikpeme se ikerede. (Matthew 5:28; 6:24; 7:12) Jesus ama owụt ke edieke iyomde ndikop ata inemesịt, ke ana isikpep ikọ Abasi inyụn̄ inanam se ikpepde.—Luke 11:28.

• Jesus ama ekpep nnyịn ndima mme owo. Se Jesus eketịn̄de ye se enye akanamde ama esinen̄ede otụk mme owo. Bible ọdọhọ ke “idem [ama] akpa otuowo aban̄a usụn̄ nte enye ekpepde owo n̄kpọ; sia enye ekekpepde mmọ nte owo emi Abasi ọnọde odudu.” (Matthew 7:28, 29) Enye ekekpep mmọ ete: “Ẹma mme asua mbufo.” Enye ama akam ọbọn̄ akam aban̄a ndusụk mbon emi ẹkenyenede ubọk ke n̄kpa esie. Enye ekeben̄e Ete esie ete: “Ete, fen nọ mmọ, koro mmọ mîfiọkke se mmọ ẹnamde.”—Matthew 5:44; Luke 23:34.

Jesus enen̄ede odot ndikara ofụri ererimbot sia enye ama ndin̄wam mme owo onyụn̄ ọfọn ido. Edi ini ewe ke enye ọkọtọn̄ọ ndikara?