1. Siak eti edu kiet emi ikọt Jehovah ẹnyenede.

 BIBLE ama etịn̄ ete ke ikọt Jehovah ẹyesio esịt ẹnam n̄kpọ esie, ke Jesus edida mmọ usụn̄. (Ps. 110:3) Prọfesi oro ke osu mfịn. Kpukpru isua, ikọt Jehovah ẹsida ediwak miliọn hour ẹsịn idem ẹkwọrọ eti mbụk. Idịghe nte ẹsinyenyịk mmọ yak ẹnam oro, mmọ isinyụn̄ inamke ke ukpeokụk. Mmọ ẹsinyụn̄ ẹn̄wam nditọete mmọ ẹnyene se ẹdade ẹdu uwem, ẹsọn̄ọ mmọ idem, ẹnyụn̄ ẹn̄wam mmọ ẹka iso ẹkpere Jehovah. Mbiowo ye mme asan̄autom unamutom ẹsida ediwak hour ẹtịm utịn̄ikọ ẹnyụn̄ ẹka ẹkese nditọete mmọ man ẹsọn̄ọ mmọ idem. Ikọt Jehovah ẹsinam kpukpru emi ke ntak emi mmọ ẹmade Jehovah ye mbọhọidụn̄ mmọ.​—Matt. 22:​37-39.

2. Rome 15:​1-3 ọdọhọ ke nso uwụtn̄kpọ ke Jesus ekenịm ọnọ nnyịn?

² Jesus ekesinen̄ede ekere aban̄a ufọn mbon en̄wen idịghe ufọn idemesie. Ke idomo ofụri ukeme nnyịn ndikpebe enye. (Kot Rome 15:​1-3.) Mbon emi ẹkpebede Jesus ẹyebọ ediwak ufọn. Jesus ọkọdọhọ ke “inemesịt odu ke ndinọnọ akan ke ndibọbọ.”​—Utom 20:35.

3. Nso ke idineme ke ibuotikọ emi?

³ Ke ibuotikọ emi, imọn̄ ineme ndusụk se Jesus akayakde atak man anam n̄kpọ ọnọ mme owo ye nte ikemede ndikpebe enye. Iyeneme n̄ko se ikpanamde man esinen̄ede ọdọn̄ nnyịn ndin̄wam mme owo.

4. Didie ke Jesus okowụt ke se mme owo ẹyomde ebehe imọ akan se imọ iyomde?

⁴ Jesus ama an̄wam mme owo kpa ye emi akakakde enye. Fiak kere se iketịbede usen kiet emi otuowo ẹyịrede udịm ẹbịne enye ke obot kiet; etie nte obot oro ekekpere Capernaum. Jesus ama ada ofụri okoneyo ọbọn̄ akam, anaedi ama enen̄ede akak enye. Edi ini enye okụtde otuowo oro, mbọm mme ubuene ye mbon emi idem mîsọn̄ke ke otu oro ama anam enye. Enye ama ọkọk mmọ udọn̄ọ onyụn̄ ọkwọrọ ikọ ọnọ mmọ. Ukwọrọikọ usen oro ke ẹsikot Ukwọrọikọ Oro ke Obot. Iwakke ukwọrọikọ emi ọsọn̄ọde owo idem nte eke usen oro.​—Luke 6:​12-20.

5. Didie ke mme ibuotufọk ẹsikpebe Jesus ini akakde mmọ ke idem?

⁵ Nte mme ibuotufọk ẹkpebede Jesus. Yak idọhọ ke ibuotufọk ọnyọn̄ utom edi idiọk ini, onyụn̄ akak enye ama ke idem. Usen Utuakibuot Ubon mmọ edi oro. Esịt kiet ọdọhọ enye yak owo okûnịm mfịn aba. Edi enye eben̄e Jehovah ete ọnọ imọ ukeme yak isụk inịm. Jehovah ọbọrọ akam esie, ndien mmọ ẹnịm Utuakibuot Ubon mbubreyo oro. N̄kpọ oro ekpep nditọ esie ata akpan n̄kpọ, ke n̄kpọ Abasi edi akpan n̄kpọ ọnọ ete ye eka mmimọ akan n̄kpọ en̄wen ekededi.

6. Siak ini kiet emi Jesus ọkọkpọn̄de se enye okoyomde ndinam an̄wam mme owo.

⁶ Jesus ama ọkpọn̄ se enye okoyomde ndinam an̄wam mme owo. Ndi emekeme ndikere nte eketiede enye ke idem ini enye okopde ke ẹwot John Andinịm Owo Baptism ufan esie? Anaedi Jesus ama enen̄ede ofụhọ. Bible ọdọhọ ete: “Ke ini Jesus okopde [n̄kpa John] enye ọkpọn̄ do ediere ke ubom aka ndobo ndobo ebiet man okodu ikpọn̄.” (Matt. 14:​10-13) Akpana an̄wan̄a nnyịn se ikanamde Jesus oyom ndidu ikpọn̄. Ediwak nnyịn imesima ndidu ikpọn̄ ke ini ifụhọde. Edi Jesus ikekemeke ndidu ikpọn̄ nte enye okoyomde oro, sia ata ediwak owo ẹma ẹbem enye iso ẹkesịm ndobo ndobo ebiet oro. Nso ke enye akanam? Mark emi eketienede ewet se iketịbede usen oro ọkọdọhọ ke otuowo oro ẹma ẹnam Jesus mbọm. Enye ama ekere aban̄a se idin̄wamde mmọ. Ama an̄wan̄a  enye ke edi se ẹdade Ikọ Abasi ẹn̄wam mmọ ẹnyụn̄ ẹdọn̄ mmọ esịt. Ntre, “enye [ama] ọtọn̄ọ ndikpep mmọ ediwak n̄kpọ.”​—Mark 6:​31-34; Luke 9:​10, 11.

7-8. Siak nte mbiowo ẹsikpebede Jesus ke ini eyenete oyomde un̄wam.

⁷ Nte mbiowo ẹsikpebede Jesus. Imenen̄ede ima nte mbiowo ẹsiwade idem ẹnam n̄kpọ ke ufọn nnyịn! Idịghe kpukpru owo ke esop ẹdiọn̄ọ ata ediwak se mmọ ẹsinamde. Ke uwụtn̄kpọ, ke ini nditọete ẹyomde un̄wam ke ufọkibọk, mbon Kọmiti Unyene Nneme ye Mbon Ufọkibọk ẹsisọsọp ẹken̄wam mmọ. Mme mfịna ntre ẹsiwak nditịbe okoneyo! Edi mbọm esinam ndima mbiowo nnyịn ye mme ubon mmọ ẹbem iso ẹyom ufọn nditọete emi ẹnyenede mfịna do.

⁸ Mbiowo ẹsinyụn̄ ẹtiene ẹn̄wam ẹbọp Ufọkmbono Obio Ubọn̄ ye mme ufọk esop Abasi eken, ẹnyụn̄ ẹtiene ẹn̄wam nditọete ke ini utọ n̄kpọ nte oyobio m̀mê ikan̄ abiatde n̄kpọ mmọ. Mmọ ẹsinyụn̄ ẹda ediwak hour ẹkpep nnyịn n̄kpọ ẹnyụn̄ ẹsọn̄ọ nnyịn idem. Kpukpru mbiowo emi ye mme ubon mmọ ẹdot itoro. Yak Jehovah ọdiọn̄ mmọ! Edi imọdiọn̄ọ ke akpana mbiowo ẹsinyene ini ẹnọ idemmọ ukem nte anade kpukpru nnyịn isinyene ini inọ idem nnyịn. Ikpanaha ebiowo anam utom esop tutu etre ndise mban̄a ubon esie.

9. Philippi 2:​4, 5 ọdọhọ ke nso utọ edu ke akpana kpukpru mme Christian ẹnyene?

⁹ Kot Philippi 2:​4, 5. Idịghe kpukpru nnyịn idi mbiowo, edi ana kpukpru nnyịn isibem iso iyom ufọn nditọete nnyịn ukem  nte Jesus. Bible ọdọhọ ke Jesus ama “emen mbiet ofụn esịne.” (Phil. 2:7) Nso ke oro ekeme ndikpep nnyịn? Eti ofụn m̀mê asan̄autom esiyoyom usụn̄ nte akpanamde se inemde eteufọk esie esịt. Sia afo edide ofụn Jehovah onyụn̄ asan̄ade utom ọnọ nditọete fo, imọdiọn̄ọ ke ọdọdọn̄ fi ndinen̄ede nnyene ufọn nnọ Jehovah ye nditọete fo. Se ndusụk se ikemede ndin̄wam fi mi.

10. Nso mbụme ke ikpobụp idem nnyịn?

¹⁰ Fiak kere nte afo esinamde n̄kpọ. Bụp idemfo utọ mbụme ntem: ‘Ndi mmesinen̄ede mma ndida ini mi ye odudu mi n̄n̄wam nditọete? Ke uwụtn̄kpọ, edieke ẹdọhọde n̄kese akamba eyenete eren ke ufọk esie, mîdịghe n̄ka n̄kemen akamba eyenete an̄wan ndika mbono esop, nso ke n̄kpanam? Ke ini ẹyomde mbon emi ẹdikanamde Itie Mbono asana, mîdịghe ẹdiọn̄ Ufọkmbono Obio Ubọn̄, ndi mmesisọp ntiene n̄n̄wam?’ Ini ikayakde idem inọ Jehovah, ima in̄wọn̄ọ ke idida kpukpru se inyenede inam n̄kpọ esie. Ntre Jehovah esiyom ida ini nnyịn, odudu nnyịn, ye se inyenede in̄wam nditọete nnyịn. Esinem enye ke ini inamde ntre. Edi nso ke akpanam edieke okụtde ke usûnen̄ekede unam se itịn̄de emi?

11. Didie ke akam edinam ọdọn̄ nnyịn ndisiwa idem nnam n̄kpọ nnọ nditọete?

¹¹ Bọn̄ akam ke ofụri esịt nọ Jehovah. Nso ke akpanam edieke okụtde ke edi se awade idem anam n̄kpọ ọnọ nditọete fo akan nte esinamde, edi enye akakak fi ndinam se akpanade anam? Ama etie ntre, bọn̄ akam ke ofụri esịt nọ Jehovah. Kûdịp enye n̄kpọ ndomokiet. Dọhọ Jehovah nte etiede fi oro ke idem, nyụn̄ ben̄e enye anam ọdọn̄ fi ndin̄wam nditọete fo onyụn̄ ọnọ fi ukeme yak anam.​—Phil. 2:13.

12. Didie ke akparawa emi ama akana baptism ekeme ndin̄wam esop?

¹² Ekpedi afo edi akparawa emi ama akana baptism, dọhọ Jehovah anam ọdọn̄ fi ndinen̄ede nnyene ufọn nnọ nditọete. Ke ndusụk idụt, mbiowo ẹwak ẹkan mme asan̄autom unamutom, ndien ediwak ke otu mme asan̄autom unamutom oro idịghe aba n̄kparawa. Nte mme owo ẹbụn̄ọde ẹdọn̄ọ esop Abasi, ntre ke ẹnen̄ede ẹyom mbon oro ẹdin̄wamde ẹse ẹban̄a mme erọn̄ Abasi. Edieke afo enyịmede ndin̄wam nnam se ededi emi ẹyomde, esịt eyenem fi. Nso idinam edi ntre? Sia oro ayanam esịt enem Jehovah, nditọete ẹyema nte afo an̄wamde mmimọ, afo oyonyụn̄ okop idatesịt emi mbon emi ẹn̄wamde owo ẹsikopde.

13-14. Nso ke ikpanam man in̄wam nditọete nnyịn? (Se ndise ikpaedem Enyọn̄-Ukpeme emi.)

¹³ Sisọp diọn̄ọ ini eyenete oyomde un̄wam. Apostle Paul ọkọdọhọ mme Christian emi ẹkedụn̄de ke Judea ete: “Ẹkûfre ndinam eti n̄kpọ ndinyụn̄ mbuana n̄kpọ ye mbon en̄wen, koro orụk uwa emi enen̄erede enem Abasi esịt.” (Heb. 13:16) Ata eti item ekedi oro, sia ikebịghike ke enye ama ọkọnọ mmọ item oro, akana mmọ ẹkpọn̄ ufọk mmọ, mbubehe mmọ, ye mme iman mmọ emi mîkokponoke Jehovah “ẹfehe ẹka ikpọ obot.” (Matt. 24:16) Ama enen̄ede oyom mmọ ẹn̄wam kiet eken ini oro. Ndien ekpedi ama emehe mmọ ndisinam item emi Paul ọkọnọde mmọ do, imenịm ke uwem ikenen̄ekede isọn̄ mmọ ke ini mfịna oro.

¹⁴ Ekeme ndinam nditọete nnyịn isioho idọhọ nnyịn ke imoyom un̄wam. Ke uwụtn̄kpọ, yak idọhọ ke n̄wan brọda kiet ke esop nnyịn akpa ọkpọn̄ enye. Enye akpama yak ẹn̄wam imọ ẹnam udia, ẹmen  imọ ẹka n̄kpọ, mîdịghe ẹn̄wam imọ ẹnam ndusụk n̄kpọ ke ufọk. Edi ekeme ndinam enye isioho itịn̄ sia enye iyomke etie nte imọ imen mfịna imọ isan̄a ifịna mme owo uwem. Edi ekpenen̄ede enem enye edieke idahade ke idem nnyịn ikan̄wam enye. Nnyịn ikpekereke ke owo efen ayan̄wam enye mîdịghe ke enye ọyọdọhọ nnyịn in̄wam imọ edieke enye oyomde un̄wam. Bụp idemfo ete, ‘Ekpedi ami ke se iwọrọde enye ọwọrọ, nso ke n̄kpama ẹn̄wam mi ẹnam?’

15. Nso ke ikpanam man inen̄ede inyene ufọn inọ nditọete nnyịn?

¹⁵ Nam emem nditọete utom ndidọhọ an̄wam mmimọ. Imenịm ke ọmọdiọn̄ọ nditọete emi ẹsidade ikpat iba ndin̄wam mme owo ke esop mbufo. Mmọ isinamke nnyịn ikere ke ifafịna mmimọ uwem. Imọdiọn̄ọ ke imekeme ndifehe mbịne mmọ ini ekededi emi inyenede mfịna, onyụn̄ ọdọn̄ nnyịn nditie nte mmọ! Ebiowo kiet emi ekerede Alan edi isua 45. Enye ọdọhọ ke imọ ikpama ndidi utọ owo emi mme owo ẹsọpde ẹfehe ẹbịne ini ẹnyenede mfịna. Ke ini enye afiakde ekere utọ uwem emi Jesus okodude, enye ọdọhọ ete: “Jesus ama esinyene ediwak n̄kpọ ndinam. Edi kpukpru owo, ikpọ ye n̄kpri, ẹma ẹma enye, ẹsinyụn̄ ẹdọhọ enye an̄wam mmimọ. Mmọ ẹma ẹkụt ke enye ama mmimọ onyụn̄ ekere aban̄a mmimọ. Nnen̄ede nyom nditie nte Jesus, mma nditọete, n̄kere mban̄a mmọ, nnyụn̄ ndi utọ owo emi ememde mmọ utom ndifehe mbịne ini mmọ ẹnyenede mfịna.”

16. Didie ke nnyịn ndinam se Psalm 119:​59, 60 ọdọhọde edin̄wam nnyịn inen̄ede ikpebe Jesus?

¹⁶ Nnyịn ikpayakke idem emem nnyịn edieke nnyịn mîkemeke ndikpebe Jesus n̄kpọ isụhọke. (Jas. 3:2) Owo emi ekpepde ndidrọ n̄kpọ idikemeke ndidrọ se eteufọk  esie ọdrọde ata ukem ukem, n̄kpọ isụhọke. Edi nte enye ekpepde n̄kpọ oto ndudue esie onyụn̄ enen̄erede odomo ndikpebe eteufọk esie, enye ọyọdiọn̄ọ ndidrọ n̄kpọ n̄kan nte ekesidiọn̄ọde. Ukem ntre n̄ko, edieke inamde se ikpepde ini ikpepde Bible ke idem nnyịn, inyụn̄ idomode ofụri ukeme nnyịn ndinen̄ede se nnyịn mînamke ọfọn, iyekeme ndinen̄ede n̄kpebe Jesus.​—Kot Psalm 119:​59, 60.

17-18. Nso ufọn ididu edieke isiwade idem inam n̄kpọ inọ mme owo nte Jesus?

¹⁷ Edieke isiwade idem inam n̄kpọ inọ mbon en̄wen, nditọete ẹkeme ndikpebe nnyịn. Ebiowo kiet emi ekerede Tim ọdọhọ ete: “Ẹmek ndusụk n̄kpri n̄kparawa mme asan̄autom unamutom. N̄kpọ kiet emi anamde mmọ ẹdot edi ke mmọ ẹkekpebe nte nditọete en̄wen ẹsiwade idem ẹnam n̄kpọ ẹnọ mme owo. Mmọ ẹn̄wam esop ẹnyụn̄ ẹnen̄ede ẹn̄wam mbiowo.”

¹⁸ Ediwak owo ke ererimbot emi ẹkere ẹban̄a idemmọ kpọt. Edi ikọt Jehovah itiehe ntre ke usụn̄ ndomokiet. Imama nte Jesus ekesiwade idem anam n̄kpọ ọnọ mme owo, imonyụn̄ ibiere ndikpebe enye. Imọdiọn̄ọ ke nnyịn ikemeke nditie nte Jesus ata ukem ukem, n̄kpọ isụhọke. Edi imekeme ndinen̄ede n̄kpebe enye. (1 Pet. 2:21) Nte idomode ukeme ndisiwa idem nnam n̄kpọ nnọ mme owo ukem nte Jesus, esịt eyenem nnyịn koro oro ayanam esịt enem Jehovah.