Ntụnọ ekeme ndiwọrọ nditeme owo se akpanamde m̀mê ndikpep owo n̄kpọ. Ndusụk ini, enye ekeme ndiwọrọ ndinen̄ede eyenọwọn̄ edieke enye anamde se mîfọnke. Edi ntụnọ esiwak ndiwọrọ ndikpep eyenọwọn̄ nte enye okpodude uwem sia emi ayan̄wam enye ebiere ndinam mme n̄kpọ emi enye mîdituaha n̄kpọfiọk nte ini akade.

Ndusụk ete ye eka imaha nditụnọ nditọ mmọ aba sia ẹkere ke nditụnọ nditọ ayanam mmọ ẹkere ke mmimọ iwọrọke n̄kpọ. Edi mme ete ye eka oro ẹnyenede ifiọk ẹsinọ nditọ mmọ ibet oro mmọ ẹdiọn̄ọde ke ọyọfọn ye nditọ mmọ, ẹnyụn̄ ẹkpep mmọ ndinịm ibet oro.

“Esiyom ẹteme nditọwọn̄ se mmọ ẹkpenamde ye se mmọ mîkpanamke man mmọ ẹwọrọ n̄kpọ ke ini iso. Edieke owo mîtụnọke eyenọwọn̄, enye editie nte ubom emi andiwat mîkamake uden̄. Utọ ubom oro oyosop usụn̄ mîdịghe esịp.”​—Pamela.

Kûdi aka iso afiak edem. Edieke eyen fo mînamke se ọkọdọhọde, tụnọ enye nte ọkọdọhọde. Edi, ti nditoro enye ke ini enye anamde ọfọn.

“Mmesitoro nditọ mi ke mmọ ndikop uyo mi ke ererimbot emi mme owo ẹsọn̄de ibuot nte nso mi. Nditoro mmọ esinam mmọ ẹnyịme ntụnọ oro nnọde mmọ ke ini mmọ mînamke se n̄kọdọhọde.”​—Christine.

SE BIBLE ETỊN̄DE: “Se ededi eke owo ọtọde, oro ke enye edinyụn̄ ọdọk.”​—Galatia 6:7.

Nọ ntụnọ oro odotde. Ke ini oyomde nditụnọ eyen fo, kere ban̄a isua emana esie, se enye ekemede ndinam, ye nte se enye akanamde ọdiọkde eketre. Ntụnọ esinen̄ede enyene ufọn ke ini eyenọwọn̄ okụtde ke otụnọ imọ ke ntak idiọkn̄kpọ oro imọ ikanamde. Ke uwụtn̄kpọ, edieke eyen fo adade fon anam se mîkpanamke, emekeme ndibọ enye fon oro kan̄a mîdịghe akpan enye ndikama fon ndusụk ini. Edi, kûdi eyenọwọn̄ ama ananam ekpri n̄kpọ afo otụnọ enye.

“Mmesidomo ndidiọn̄ọ m̀mê eyen mi okokoi ọsọn̄ ibuot, m̀mê anam ndudue. Eyenọwọn̄ ndinyene idiọk ido emi anade enye etre idịghe ukem ye enye ndinam ekpri ndudue emi oyomde ẹnen̄ede enye.”​—Wendell.

SE BIBLE ETỊN̄DE: “Ẹkûfiomo nditọ mbufo, mbak esịt ediduọ mmọ.”​—Colossae 3:21.

Wụt nditọ fo ke amama mmọ. Isisọn̄ke nditọwọn̄ ndinyịme ntụnọ oro ẹnọde mmọ nnyụn̄ nnam se ete ye eka mmọ ẹdọhọde edieke mmọ ẹfiọkde ke ẹtụnọ mmimọ ke ntak emi ẹmade mmimọ.

“Ke ini eyen nnyịn anamde ndudue, imesidọhọ enye ke esịt enem nnyịn ke kpukpru nti n̄kpọ oro enye akanamde ke ini edem. Imesinam enye ọfiọk ke ndudue oro enye anamde do iwọrọke ke enye edi idiọkowo, ama akam edi enye enyịme ndikpụhọde. Imesinyụn̄ idọhọ enye ke imeben̄e idem ndin̄wam enye okpụhọde.”​—Daniel.

SE BIBLE ETỊN̄DE: “Ima enyenyene anyanime onyụn̄ ọfọn ido.”​—1 Corinth 13:4.