Utom 28;1-31
28 Ndien ke nnyịn ima ikọbọhọ, nnyịn idifiọk ke isuo oro ekere Malta.+
2 Ndien mme esem esen usem oro ẹwụt nnyịn n̄wọrọnda mfọnido,+ koro mmọ ẹbarade ikan̄ ẹnyụn̄ ẹdarade kpukpru nnyịn, ẹnyụn̄ ẹn̄wamde nnyịn ke ntak edịm emi ekedepde ye ke ntak etuep.+
3 Edi ke ini Paul emende ebek ifia esịn ke ikan̄, ufiop ikan̄ esịn ibọm ọwọrọ ediyịre enye ke ubọk.
4 Ke ini mme esem esen usem oro ẹkụtde nte idiọk unam oro eyịrede enye ke ubọk, mmọ ẹdọhọ kiet eken ẹte: “Ke akpanikọ owo emi edi owotowo, okposụkedi enye ọbọhọde ke inyan̄, unenikpe oro asan̄ade ye ufen inyịmeke enye aka iso odu uwem.”
5 Nte ededi, enye eken̄ idiọk unam oro esịn ke ikan̄, n̄kpọ inyụn̄ inamke enye.+
6 Edi mmọ ẹkedori enyịn ẹte ke enye oyofụt mîdịghe ọduọ akpa kpa idaha oro. Ke mmọ ẹma ẹkebet ke anyan ini mînyụn̄ ikwe nte n̄kpọ anamde enye, mmọ ẹkpụhọde ekikere ẹnyụn̄ ẹdọhọ ẹte enye edi abasi.+
7 Akwa owo ke isuo oro, emi ekerede Publius, ama enyene in̄wan̄ ke n̄kann̄kụk oro; ndien enye atat ubọk adara nnyịn onyụn̄ etịm akama nnyịn esen ke usen ita.
8 Edi ete Publius ọdọn̄ọ ufiopidem ye utọrọiyịp onyụn̄ anana, ndien Paul odụk ekese enye onyụn̄ ọbọn̄ akam, odori enye ubọk+ onyụn̄ anam udọn̄ọ okụre enye.+
9 Ke n̄kpọ emi ama eketịbe ntem, mmọ eken emi ẹdọn̄ọde ke isuo oro ẹdi n̄ko ẹtiene enye ndien ẹnam udọn̄ọ okụre mmọ.+
10 Ndien mmọ ẹkpono nnyịn ke ndinọ nnyịn ediwak enọ, ndien ke ini nnyịn iyomde ndisio, mmọ ẹdọn̄ mme n̄kpọ emi ẹnanade nnyịn ẹnọ nnyịn.
11 Ọfiọn̄ ita ke ukperedem nnyịn isio ke ubom emi otode Alexandria+ oro akadiande ke isuo emi ke ini etuep, emi onyụn̄ enyenede idiọn̄ọ “Nditọ Zeus.”
12 Ndien nnyịn idian ke itiembehe Syracuse inyụn̄ idu do ke usen ita,
13 inyụn̄ ito ebiet oro isan̄a ikanade idisịm Rhegium. Ndien ke usen kiet ebede ofụm usụk ọtọn̄ọ ndifịme, nnyịn inyụn̄ ibe ikesịm Puteoli ke ọyọhọ usen iba.
14 Nnyịn ima ikụt nditọete ke ebiet emi, ndien mmọ ẹkpe nnyịn ubọk ẹte idu ye mmimọ usen itiaba; ntem ke nnyịn ikpere ndisịm Rome.
15 Ndien ke ini nditọete ẹkopde mbụk ẹban̄a nnyịn, mmọ ẹwọn̄ọ do ẹdi ẹdisobo ye nnyịn ke An̄waurua Appius ye Ufọkisen Ita, ndien ke ini Paul okụtde mmọ, enye ọkọm Abasi onyụn̄ ọsọn̄ọ idemesie esịt.+
16 Ke akpatre, ke ini nnyịn idụkde Rome, ẹyak+ Paul odụn̄ ke idemesie ye owoekọn̄ emi ekpemede enye.
17 Edi, ke usen ita ẹma ẹkebe, enye okot mmọ emi ẹdide ikpọ owo mme Jew obon ọtọkiet. Ke mmọ ẹma ẹkesop idem, enye ọdọhọ mmọ ete: “Nditọete, okposụkedi nte mmenamke n̄kpọ ndomokiet mbiọn̄ọ mbio obio m̀mê ido mme ete ete nnyịn,+ ẹma ẹda mi nte owo-n̄kpọkọbi ke Jerusalem ẹsịn ke ubọk mbon Rome.+
18 Ndien ke ẹma ẹkenam ndụn̄ọde,+ mmọ emi ẹyom ndisana mi nyak,+ sia ntak mîdụhe ndiwot+ mi.
19 Edi ke ini mme Jew ẹkediọn̄de-diọn̄ ẹfan̄a, n̄kenyene ndiben̄e+ ẹnọ mi ẹsọk Caesar, edi idịghe koro nnyenede n̄kpọ eke ntịn̄de ndian idụt mi.
20 Ke akpanikọ ntak emi esịn n̄kekpe ubọk nyom ndikụt mbufo nnyụn̄ nnyene nneme ye mbufo, koro idotenyịn+ Israel anam mi ndu ke n̄kpọkọbi emi.”+
21 Mmọ ẹbọrọ enye ẹte: “Nnyịn ikọbọhọ leta ito Judea iban̄a fi, baba kiet ke otu nditọete emi ẹdide ibụkke inyụn̄ itịn̄ke idiọk baba kiet iban̄a fi.
22 Edi nnyịn ikere ke ọfọn ndikop nto fi se idide ekikere fo, koro amaedi n̄ka+ emi nnyịn imọfiọk ke ẹtịn̄ n̄kpọ ẹdian enye ke kpukpru ebiet.”+
23 Ndien mmọ ẹmek usen ndisobo ye enye, ẹnyụn̄ ẹsan̄a ke ata uwak ibat ẹdi ẹbịne enye ke ebietidụn̄ esie. Ndien enye anam n̄kpọ an̄wan̄a mmọ ke ndinọ ọyọhọ ikọ ntiense mban̄a obio ubọn̄ Abasi+ ye ke ndida mbukpek nsion̄o ikọ ke ibet Moses+ ye ke uwetn̄kpọ mme Prọfet+ nneme ye mmọ mban̄a Jesus, ọtọn̄ọde ke usenubọk tutu esịm mbubreyo.
24 Ndien ndusụk mmọ ẹnịm+ mme n̄kpọ eke enye etịn̄de ke akpanikọ; mmọ eken inịmke.+
25 Ntre, sia mmọ ẹnenide ye kiet eken, mmọ ẹtọn̄ọ ndidaha nnyọn̄, ke adan̄aemi Paul etịn̄de ikọ kiet emi ete:
“Odot nte edisana spirit akadade prọfet Isaiah ọdọhọ mme ete ete mbufo,
26 ete, ‘Ka bịne mbon emi kọdọhọ ete: “Amaedi edikop, mbufo ẹyekop edi idifiọkke se ọwọrọde; ama onyụn̄ edi edise, mbufo ẹyese edi idikwe.+
27 Koro esịt mbio emi amakabade odobi, mmọ ẹnyụn̄ ẹda utọn̄ mmọ ẹkop edi iyereke, ẹnyụn̄ ẹbọp enyịn mmọ; mbak mmọ ẹdida enyịn mmọ ẹkụt n̄kpọ ẹnyụn̄ ẹda utọn̄ mmọ ẹkop ikọ ẹnyụn̄ ẹda esịt mmọ ẹfiọk ẹnyụn̄ ẹfiak edem, ndien ami n̄kọk mmọ.”’+
28 Mmọdo mbufo ẹfiọk ẹte ke ẹtan̄a usụn̄ emi Abasi adade ọnọ edinyan̄a ẹnọ mme idụt;+ mmọ ke akpanikọ ẹyekpan̄ utọn̄ ẹkop.”+
29 * ——
30 Ntre enye odu ofụri isua iba ke ufọk+ esie emi enye ọbọde ke ukpeokụk, onyụn̄ adara kpukpru mmọ eke ẹdụkde ẹdise enye,
31 ọkwọrọ obio ubọn̄ Abasi ọnọ mmọ onyụn̄ ada akakan ifụre utịn̄ikọ+ ekpep mmọ mme n̄kpọ emi ẹban̄ade Ọbọn̄ Jesus Christ, owo inyụn̄ ikpanke enye.
