Utom 15;1-41
15 Ndien ndusụk owo ẹto Judea+ ẹsụhọde ẹdi ẹnyụn̄ ẹtọn̄ọ ndikpep nditọete ẹte: “Ibọhọke mbufo ẹna mbobi+ nte ekemde ye ibet Moses,+ mbufo ikemeke ndinyene edinyan̄a.”
2 Edi ke ini Paul ye Barnabas mînyịmeke inọ mmọ ẹnyụn̄ ẹnenide ọkpọsọn̄ eneni ye mmọ, mmọ ẹdiomi ẹte Paul ye Barnabas ye ndusụk owo eken ke otu mmọ ẹdọk ẹbịne mme apostle ye mbiowo ke Jerusalem+ ẹkeneme n̄kpọ emi.
3 Mmọdo, ke esop+ ẹma ẹkeda mmọ ẹkeyak ke usụn̄, mmọ emi ẹsan̄a ẹbe ke Phoenicia ye Samaria, ẹbụk ọyọhọ ọyọhọ nte mbon idụt+ ẹkabarede esịt, mmọ ẹnyụn̄ ẹnam kpukpru nditọete ẹkop akwa idatesịt.+
4 Ke ẹsịmde Jerusalem, esop ye mme apostle ye mbiowo ẹdara+ mmọ edifọn edifọn, mmọ ẹnyụn̄ ẹbụk ediwak n̄kpọ emi Abasi akadade mmọ anam.+
5 Edi, ndusụk mbon n̄ka mme Pharisee emi ẹnịmde ke akpanikọ ẹdaha ẹda ke n̄kpọitie mmọ ẹnyụn̄ ẹdọhọ ẹte: “Ana ẹnịm mmọ+ mbobi ẹnyụn̄ ẹwụk mmọ ẹte ẹnịm ibet Moses.”+
6 Ndien mme apostle ye mbiowo ẹsop idem ọtọkiet ndise mban̄a n̄kpọ emi.+
7 Edi ke ẹma ẹkeneni+ eneni ọkpọsọn̄, Peter adaha ke enyọn̄ ọdọhọ mmọ ete: “Nditọete, mbufo ẹmetịm ẹfiọk ẹte toto ke eset Abasi ama emek mi ke otu mbufo man mbon idụt ẹkpekop ikọ eti mbụk ke inua mi ẹnyụn̄ ẹnịm ke akpanikọ;+
8 ndien Abasi, emi ọfiọkde esịt+ owo, etie ntiense ke ndinọ mmọ edisana spirit,+ kpa nte enye ọkọnọde nnyịn n̄ko.
9 Enye ikonyụn̄ isịnke ubahade ndomokiet ke ufọt nnyịn ye mmọ,+ edi anam esịt mmọ asana ebe ke mbuọtidem.+
10 Ntre ntak emi mbufo ẹdomode Abasi ke ndida ọkpọnọ+ n̄kọn̄ọ mme mbet ke itọn̄, eke mme ete ete nnyịn ye nnyịn nde mîkekemeke ndibiom?+
11 Edi nnyịn imenyene mbuọtidem ite ke ẹyenyan̄a nnyịn ebe ke mfọnido Ọbọn̄ Jesus oro owo mîdotke+ kpa nte mbon oro n̄ko.”+
12 Ntem ofụri udịmowo oro ẹdobo, ndien mmọ ẹkpan̄ utọn̄ ẹkop nte Barnabas ye Paul ẹbụkde ediwak idiọn̄ọ ye mme utịben̄kpọ oro Abasi akadade mmọ anam ke otu mme idụt.+
13 Ke mmọ ẹma ẹkekụre nditịn̄ ikọ, James ọdọhọ, ete: “Nditọete, ẹkop ikọ mi.+
14 Symeon+ omobụk ọyọhọ ọyọhọ nte Abasi ke akpa ini ọkọwọn̄ọrede ntịn̄enyịn esie ọnọ mme idụt ndisio mme owo ke otu mmọ nnọ enyịn̄ esie.+
15 Ndien ikọ mme Prọfet ẹsan̄a ẹkekem ye emi, kpa nte ẹwetde ẹte,
16 ‘Ke mme n̄kpọ emi ẹma ẹkebe nyafiak ndi nditọn̄ọ ntak mbọp ataya David oro ọduọde; nyonyụn̄ ntọn̄ọ ntak mbọp n̄wụre esie nnyụn̄ ntọn̄ọ ntak mmenede enye n̄wụk,+
17 man mbon oro ẹsụhọde ke otu mbio emi ẹkpesịn ifịk ẹyom Jehovah, ọkọrọ ye mme owo ke kpukpru mme idụt, kpa mmọ emi ẹkotde ẹdian enyịn̄ mi, ntem ke Jehovah, emi anamde mme n̄kpọ emi,+ ọdọhọ,
18 emi anamde ẹfiọk n̄kpọ emi toto ke eset.’+
19 Ntem ami mbiere nte ikûfịna mbon oro ẹtode ke otu mme idụt ẹwọn̄ọde ẹtiene Abasi,+
20 edi iwet mmọ ite ẹbet mme n̄kpọ emi ndem+ ẹsabarede ye use+ ye unam eke ẹyịride-yịri,+ ẹnyụn̄ ẹbet iyịp.+
21 Koro toto ke eset Moses ama enyene mmọ emi ẹkwọrọde enye ke obio ke obio, ẹnyụn̄ ẹkotde uwetn̄kpọ esie ke mme synagogue ke kpukpru sabbath.”+
22 Ekem mme apostle ye mbiowo ọkọrọ ye ofụri esop ẹkụt ẹte ke ọfọn ndidọn̄ mme owo emi ẹmekde ke otu mmimọ ẹsan̄a ye Paul ye Barnabas ẹka Antioch, oro edi, Judas emi ekerede Barsabbas+ ye Silas, emi ẹdide mme adausụn̄ ke otu nditọete;
23 ndien mmọ ẹwet leta ẹsịn mmọ oro ke ubọk ẹte:
“Mme apostle ye mbiowo, kpa nditọete mbufo, ẹnọ leta emi ẹsọk nditọete emi ẹdide mbon idụt ke Antioch+ ye Syria ye Cilicia:+ Ekọm do!
24 Sia nnyịn ikopde ite ke ndusụk owo ke otu nnyịn ẹmeda ikọ inua ẹtịmede mbufo,+ ẹdomo ndisobo ukpọn̄ mbufo, okposụkedi nnyịn mîkọnọhọ mmọ uyo,+
25 nnyịn imedisịm ubiere ye esịt kiet+ inyụn̄ ikụt ite ke ọfọn ndimek mme owo ndọn̄ ẹsan̄a ye Barnabas ye Paul, kpa mbon emi nnyịn imade, ẹtiene mbufo,+
26 kpa mbon emi ẹyakde ukpọn̄ mmọ ẹnọ kaban̄a enyịn̄ Ọbọn̄ nnyịn Jesus Christ.+
27 Ke ntre nnyịn imosio Judas ye Silas idọn̄,+ man mmọ n̄ko ẹkpeda inua ẹbụk ukem n̄kpọ emi.+
28 Koro edisana spirit+ ye nnyịn ke idem nnyịn imokụt ite ke ọfọn nditre ndidian mbiomo+ en̄wen nnọ mbufo, ke mîbọhọke mme n̄kpọ emi ẹyomde mi,
29 ite ẹka iso ẹbet mme n̄kpọ eke ẹwade ẹnọ ndem+ ye iyịp+ ye unam eke ẹyịride-yịri+ ye use.+ Edieke mbufo ẹtịmde ẹkpeme idem ke mme n̄kpọ emi,+ ọyọfọn ye mbufo. Ẹtie sụn̄!”
30 Mmọdo, ke ini ẹsiode mmọ emi ẹdọn̄, mmọ ẹsụhọde ẹka Antioch, ndien mmọ ẹkot otuowo ẹbon ọtọkiet ẹnyụn̄ ẹyak leta oro ẹnọ mmọ.+
31 Ke ẹma ẹkekot ẹma, mmọ ẹdara ke nsịnudọn̄ oro.+
32 Ndien sia Judas ye Silas ẹkedide mme prọfet+ n̄ko, mmọ ẹda ediwak utịn̄ikọ ẹsịn udọn̄ ẹnọ nditọete ẹnyụn̄ ẹsọn̄ọ mmọ idem.+
33 Ntre, ke mmọ ẹma ẹkedu do ke ndusụk ini, nditọete ẹyak mmọ ẹnyọn̄ọ ke emem+ ẹtiene mbon emi ẹkesiode mmọ ẹdọn̄.
34 * ——
35 Nte ededi, Paul ye Barnabas ẹka iso ẹdu ke Antioch+ ke ndusụk ini ẹkpep mme owo n̄kpọ ẹnyụn̄ ẹtan̄a eti mbụk aban̄ade ikọ Jehovah,+ ọkọrọ ye ediwak owo en̄wen n̄ko.
36 Edi ke ndusụk usen ẹma ẹkebe, Paul ọdọhọ Barnabas ete: “Di, yak ifiak ika ikese nditọete ke kpukpru obio eke nnyịn ikọkwọrọde ikọ Jehovah man ise nte mmọ ẹtiede.”+
37 Edi, Barnabas ebiere ndida John n̄ko, emi ekerede Mark.+
38 Edi Paul ikereke ke ọfọn ndida owo emi, sia enye ọkọkpọn̄de mmọ ke Pamphylia+ mîkonyụn̄ isan̄ake ye mmọ ika utom.
39 Ntem ọkpọsọn̄ eneni etịbe, esịn mmọ ẹdian̄ade ẹkpọn̄ kiet eken; ndien Barnabas+ ada Mark osio aka Cyprus.+
40 Paul emek Silas+ ada adaha ke nditọete ẹma ẹkeyak enye ẹsịn Jehovah ke ubọk ete owụt enye mfọnido oro owo mîdotke.+
41 Edi enye asan̄a ebe ke Syria ye Cilicia, ọsọn̄ọ mme esop idem.+
