Rome 4;1-25
4 Ke edide ntre, nso ke iditịn̄ iban̄a Abraham emi edide ete ete+ nnyịn ke obụkidem?
2 Ke uwụtn̄kpọ, edieke ẹkedade edinam utom ẹbat Abraham ke edinen,+ enye ekpenyene ntak ndibụre mbụre; edi idịghe ke iso Abasi.
3 Koro nso ke N̄wed Abasi ọdọhọ? “Abraham ama ọbuọt idem ye Jehovah, ndien ẹbat oro ẹnọ enye ke edinen ido.”+
4 Edi amaedi owo eke anamde utom,+ owo ibatke okụkutom eke ekpede enye nte mfọnido oro owo mîdotke,+ edi ẹbat nte isọn.+
5 Ke n̄kan̄ eken, amaedi owo eke mînamke utom edi ọbuọtde idem+ ye enye emi abatde mbon unana uten̄e Abasi ke edinen, ẹbat mbuọtidem esie ke edinen ido.+
6 Kpa nte David n̄ko eketịn̄de aban̄a inemesịt owo oro Abasi abatde edinen ido eke mîsan̄ake ye edinam utom ọnọ enye, ete:
7 “Mmọ oro ẹfende mme ukwan̄ido+ mmọ ẹnyụn̄ ẹfụkde mme idiọkn̄kpọ mmọ ẹkop inemesịt;+
8 owo oro Jehovah mîdibatke idiọkn̄kpọ esie inọ enye okop inemesịt.”+
9 Nte inemesịt emi enyene mbon oro ẹnade mbobi m̀mê enyene mbon oro mînaha mbobi n̄ko?+ Koro nnyịn idọhọ ite: “Ẹkebat mbuọtidem Abraham ẹnọ enye ke edinen ido.”+
10 Ini ewe ke ẹkebat emi? Ke ini enye ama akana mbobi m̀mê ke ini enye mîkanaha?+ Idịghe ke ini enye ama akana mbobi, edi ke ini enye mîkanaha mbobi.
11 Ndien enye ama ọbọ idiọn̄ọ,+ oro edi, mbobi, nte ufịkn̄kpọ ndisọn̄ọ edinen ido ke ntak mbuọtidem oro enye ekenyenede ke adan̄aemi enye mîkanaha mbobi, man enye ekpedi ete+ kpukpru mmọ oro ẹnyenede mbuọtidem+ ke adan̄aemi mînaha mbobi, man ẹbat ke edinen ido ẹnọ mmọ;
12 enye okponyụn̄ edi ete nditọ eke ẹnịmde mbobi, idịghe ete mbon oro ẹsọn̄ọde ẹyịre ke mbobi kpọt, edi edi n̄ko ọnọ mbon oro ẹtịmde ẹsan̄a ke mbuọtidem oro ete+ nnyịn Abraham ekenyenede ke adan̄aemi enye mîkanaha mbobi.
13 Koro idịghe ibet akanam ẹnọ Abraham m̀mê mfri esie un̄wọn̄ọ+ nte ke enye eyedi andida ererimbot nnyene, edi, edi edinen ido eke asan̄ade ye mbuọtidem akanam.+
14 Koro edieke mbon oro ẹkedude ke idak ibet ẹdide mme ada udeme nnyene, ẹnam mbuọtidem okûnyene ufọn, ẹnyụn̄ ẹbiat un̄wọn̄ọ ẹfep.+
15 Ke akpanikọ Ibet anam iyatesịt odu,+ edi ke ebiet emi ibet mîdụhe, edibiat ibet inyụn̄ idụhe.+
16 Mmọdo emi okoto mbuọtidem, man ekem ye mfọnido oro owo mîdotke,+ man un̄wọn̄ọ+ oro okposu ọnọ kpukpru mfri esie,+ okûsu ọnọ sụk mbon oro ẹdude ke idak Ibet, edi osu n̄ko ọnọ mbon oro ẹnyenede mbuọtidem Abraham. (Enye edi ete+ kpukpru nnyịn,
17 kpa nte ẹwetde ẹte: “Mmemek fi nte edi ete ediwak idụt.”)+ Emi ekedi ke iso Enye emi enye ọkọbuọtde idem, kpa Abasi, emi anamde mme akpan̄kpa ẹdu uwem+ onyụn̄ okotde se mîdụhe nte mme n̄kpọ eke ẹdude.+
18 Okposụkedi ntak mîkodụhe ndinyene idotenyịn, edi idotenyịn ama anam enye enyene mbuọtidem,+ man enye akpakabade edi ete ọnọ ediwak idụt+ nte ekemde ye se ẹketịn̄de ẹte: “Ntem ke mfri fo editie.”+
19 Ndien, okposụkedi mbuọtidem esie mîkememke, enye ama ekere aban̄a idem esie, emi ama akakpa+ ke emi, sia enye ama ekekpere ndisịm isua ikie ke emana,+ onyụn̄ ekere aban̄a idịbi Sarah emi ama akakpa.+
20 Edi ke ntak un̄wọn̄ọ+ Abasi enye ikoyokke ke unana mbuọtidem,+ edi akabade okop odudu ke mbuọtidem esie,+ ọnọ Abasi ubọn̄
21 onyụn̄ etịm enịm ete enye ekeme ndinam se enye ọkọn̄wọn̄ọde.+
22 Ntem “ẹma ẹbat oro ẹnọ enye ke edinen ido.”+
23 Nte ededi, idịghe ke ntak esie ikpọn̄ ke ẹkewet+ ẹte “ẹma ẹbat+ oro ẹnọ enye,”
24 edi ẹkewet n̄ko ke ntak nnyịn, kpa mbon emi Abasi ẹkenịmde ẹte ẹbat ke edinen, koro nnyịn imenịm enye emi akanamde Jesus Ọbọn̄ nnyịn eset ke n̄kpa, ke akpanikọ.+
25 Ẹkeyak enye ẹnọ ke ntak mme idiọkn̄kpọ+ nnyịn ẹnyụn̄ ẹnam enye eset man ẹbat nnyịn ke edinen.+
