Numbers 19;1-22
19 Ekem Jehovah ọdọhọ Moses ye Aaron ete:
2 “Emi edi ibet ewụhọ oro Jehovah okowụkde ete, ‘Dọhọ nditọ Israel ete mmọ ẹda ididuot enan̄ eke eyede idem, emi mîbiomoke ndo,+ mînyụn̄ ikọn̄ọke ọkpọnọ,+ ẹsọk fi.
3 Mbufo ẹnyụn̄ ẹyak enye ẹnọ Eleazar oku, ndien enye enyene ndida enye n̄wọrọ ke edem itienna, ẹnyụn̄ ẹnyene ndiwot enan̄ emi ke iso esie.
4 Ekem Eleazar oku enyene ndida ubak iyịp enan̄ oro ke nnuenubọk esie nsịme ke iso tent usopidem utịm ikatiaba.+
5 Ndien ẹnyene ndifọp enan̄ oro ke iso esie. Ẹnyene ndifọp ikpa ye obụk ye iyịp ọkọrọ ye ifuọ esie.+
6 Ndien oku enyene ndida eto cedar+ ye hyssop+ ye ididuot+ ndidi ntop nsịn ke ikan̄ emi ẹfọpde enan̄ oro.
7 Ndien oku enyene ndiyet ọfọn̄ esie nnyụn̄ nyere mmọn̄, ndien ke oro ebede enye oyodụk itienna; edi oku eyedehe tutu esịm mbubreyo.
8 “‘Ndien andifọp enan̄ emi eyeyet ọfọn̄ esie ke mmọn̄ onyụn̄ eyere mmọn̄,+ ndien enye eyedehe tutu esịm mbubreyo.
9 “‘Ndien owo emi asanade enyene ndiwobi ntọn̄+ enan̄ oro n̄kobon ke edem itienna ke itie emi asanade; ndien mmọ ẹyedu ẹnọ esop nditọ Israel nte n̄kpọ ndisịn ke mmọn̄ oro ẹdade ẹnam owo asana.+ Emi edi uwa idiọkn̄kpọ.
10 Ndien owo emi owobide ntọn̄ enan̄ oro enyene ndiyet ọfọn̄ esie nnyụn̄ ndehe tutu esịm mbubreyo.+
“‘Ndien emi edidi nsinsi ewụhọ+ ọnọ nditọ Israel ye esenowo emi odụn̄de ke otu mmọ.
11 Owo ekededi eke otụkde okpo ukpọn̄ owo*+ ekededi eyedehe n̄ko ke usen itiaba.+
12 Owo oro enyene ndida mmọn̄ oro nnam idemesie asana ke ọyọhọ usen ita,+ ndien ke ọyọhọ usen itiaba enye ayasana. Edi edieke enye mînamke idemesie asana ke ọyọhọ usen ita, enye idisanake ke ọyọhọ usen itiaba.
13 Owo ekededi emi otụkde okpo owo, kpa ukpọn̄ emi akpade, mînyụn̄ inamke idemesie asana, amasabade tent utuakibuot Jehovah,+ ẹnyụn̄ ẹnyene ndisịbe ukpọn̄ oro mfep ke Israel.+ Sia owo mîkadaha mmọn̄ oro ẹdade ẹnam owo asana+ isịme enye, enye osụk ededehe. Ndek esie osụk ododu enye ke idem.+
14 “‘Emi edi ewụhọ edieke owo akpade ke tent: Owo ekededi emi odụkde esịt tent oro, ye owo ekededi emi odude ke tent oro, eyedehe ke usen itiaba.
15 Ndien kpukpru n̄kpọ udọn̄ n̄kpọ+ emi ẹnade in̄wan̄, oro owo mîdaha urụk itebe okukịp idian, ẹyedehe.
16 Ndien owo ekededi emi odude ke in̄wan̄ onyụn̄ otụkde owo oro ẹwotde ke akan̄kan̄+ mîdịghe otụkde okpo owo m̀mê ọkpọ+ owo m̀mê udi, eyedehe ke usen itiaba.
17 Ndien mmọ ẹnyene ndiwobi ndusụk ntọn̄ uwa idiọkn̄kpọ oro ẹkefọpde nsịn ke eso nnyụn̄ nsịn mmọn̄ idịm ke esịt nnọ owo emi edehede.
18 Ekem owo emi asanade+ enyene ndida hyssop+ ndebi ke mmọn̄ oro nnyụn̄ nda nsịme tent ye kpukpru n̄kpọ udọn̄ n̄kpọ nnyụn̄ nsịme mme ukpọn̄ oro ẹdude do ye owo emi okotụkde ọkpọ owo m̀mê owo emi ẹkewotde m̀mê okpo owo m̀mê udi.
19 Ndien owo emi asanade enyene ndida enye nsịme owo emi edehede ke ọyọhọ usen ita ye ke ọyọhọ usen itiaba onyụn̄ enyene ndinam enye asana ọbọhọ idiọkn̄kpọ ke ọyọhọ usen itiaba;+ ndien enye enyene ndiyet ọfọn̄ esie nnyụn̄ nyere mmọn̄, ndien enye ayasana ke mbubreyo.
20 “‘Edi amaedi owo emi edehede mînyụn̄ inamke idem asana, ẹnyene ndisịbe ukpọn̄ oro mfep+ ke otu mbon esop, koro enye asabarede edisana ebiet Jehovah. Owo ikadaha mmọn̄ oro ẹdade ẹnam owo asana isịme enye. Enye edehe.
21 “‘Ndien emi edidi nsinsi ewụhọ ọnọ mmọ, nte ke owo emi adade mmọn̄ oro ẹdade ẹnam owo asana esịme owo enyene ndiyet ọfọn̄ esie,+ n̄ko ye owo emi otụkde mmọn̄ oro ẹdade ẹnam owo asana. Enye eyedehe tutu esịm mbubreyo.
22 Ndien n̄kpọ ekededi emi owo oro edehede editụkde eyedehe,+ ukpọn̄ eke onyụn̄ otụkde n̄kpọ oro eyedehe tutu esịm mbubreyo.’”+
Mme Ikọ Idakisọn̄
^ M̀mê, “ukpọn̄ eke akpade.”
