Numbers 12;1-16
12 Ekem Miriam ye Aaron ẹtọn̄ọ nditịn̄ idiọk ndian Moses ke ntak emi enye ọkọdọde n̄wan emi edide owo Cush, koro n̄wan esie ekedi owo Cush.+
2 Ndien mmọ ẹdọhọ ẹte: “Ndi Moses ikpọn̄ ke Jehovah ada etịn̄ ikọ? Nte enye idaha nnyịn n̄ko itịn̄?”+ Jehovah ke okokop.+
3 Ndien owo oro Moses ekedi ata sụn̄sụn̄+ owo akan kpukpru owo oro ẹkedude ke iso isọn̄.
4 Ndien kpa idaha oro Jehovah ọdọhọ Moses ye Aaron ye Miriam ete: “Mbufo mbita ẹwọn̄ọ ẹka tent usopidem.” Ntre mmọ mbita ẹwọn̄ọ ẹka.
5 Ekem Jehovah osụhọde edi ke adaha obubịt enyọn̄+ edida ke enyịnusụn̄ tent onyụn̄ okot Aaron ye Miriam. Ndien mmọ mbiba ẹwọn̄ọ ẹka.
6 Ndien enye ọdọhọ ete: “Mbọk, ẹkop ikọ mi. Edieke prọfet Jehovah okpodude ke otu mbufo, n̄kpayarade idem nnọ enye ke n̄kukụt.+ N̄kpetịn̄ ikọ nnọ enye ke ndap.+
7 Edi idịghe ntre ye Moses+ asan̄autom mi! Enye ke nyak ofụri ufọk mi nsịn ke ubọk.+
8 Ntịn̄ ikọ ye enye iso ye iso,+ in̄wan̄-in̄wan̄, ntịn̄ke ke n̄ke;+ enye onyụn̄ okụt mbiet Jehovah.+ Ntak, ndien, mbufo mîkefeheke ndịk nditịn̄ idiọk ndian Moses asan̄autom mi?”+
9 Ndien Jehovah ayat esịt etieti ye mmọ, enye onyụn̄ adaha.
10 Ndien obubịt enyọn̄ adaha ọkpọn̄ enyọn̄ tent oro, ndien, sese! ẹtọ Miriam akpamfia, enye onyụn̄ afia nte snow.+ Ndien Aaron ọwọn̄ọde ese Miriam, ndien, sese! ẹma ẹtọ enye akpamfia.+
11 Kpa idaha oro Aaron ọdọhọ Moses ete: “Mbọk, ọbọn̄ mi! Mbọk, kûda idiọkn̄kpọ emi nnyịn inamde ke ndisịme udori nnyịn ke idem!+
12 Mbọk, kûyak enye osụk etie nte akpan̄kpa,+ emi obụkidem esie edem kiet eyemerede ke ini enye ọwọrọde ke idịbi eka esie!”
13 Ndien Moses eseme ọnọ Jehovah ete: “O Abasi, mbọk! Mbọk, nam udọn̄ọ emi okụre enye!”+
14 Ekem Jehovah ọdọhọ Moses ete: “Edieke ete esie akpafiaride enye etap+ ke iso, nte enye ikpodụhe ke itie esuene ke usen itiaba? Yak ẹnam enye odu nsannsan+ ke edem itienna+ ke usen itiaba, ndien ekem yak enye odụk edi.”+
15 Ntre ẹnam Miriam okodu nsannsan ke edem itienna ke usen itiaba,+ mbio emi inyụn̄ idahake isan̄ tutu Miriam odụk edi.
16 Ndien ke oro ebede, mbio emi ẹdaha ke Hazeroth+ ẹkenam nna ke wilderness Paran.+
