Psalm 33;1-22
33 Ẹsio n̄kpo idara ẹnọ Jehovah, O mbufo ndinen owo.+Odot mmọ eke ẹnende ẹnọ itoro.+
2 Ẹkọm Jehovah ke harp;+Ẹkwọ edinem ikwọ ẹnọ enye ke ndido urụk duop.+
3 Ẹkwọ obufa ikwọ ẹnọ enye;+Ẹsịn ofụri ukeme mbufo ẹbre ndido urụk ẹnyụn̄ ẹsio n̄kpo idara.+
4 Koro ikọ Jehovah edi edinen,+Enye onyụn̄ anam akpanikọ ke kpukpru utom esie.+
5 Enye amama edinen ido ye unenikpe.+Isọn̄ ọyọhọ ye ima-mfọnido Jehovah.+
6 Ẹkeda ikọ Jehovah ẹnam enyọn̄,+Ẹnyụn̄ ẹda ibifịk inua esie ẹnam kpukpru udịm mmọ.+
7 Enye anam mmọn̄ inyan̄ ada ọtọkiet nte n̄kpọ eke esịnde ukpehemmọn̄,+Enịm udem ke ufọk ubonn̄kpọ.
8 Yak kpukpru owo ke ererimbot ẹbak Jehovah.+Yak kpukpru mme andidụn̄ isọn̄ ẹkop ndịk ẹban̄a enye.+
9 Koro enye ọdọhọde, ndien osu;+Enye owụk, ndien edi ntre.+
10 Jehovah amabiat uduak mme idụt;+Enye amabiat ekikere mme owo.+
11 Uduak Jehovah ayada ke nsinsi;+Ekikere esịt esie ododu ọtọn̄ọde ke emana kiet tutu esịm emana efen.+
12 Idụt emi Abasi mmọ edide Jehovah,+Kpa mbon emi enye emekde nte udeme esie, ẹkop inemesịt.+
13 Jehovah etie ke heaven ese,+Enye omokụt kpukpru nditọ owo.+
14 Enye etie ke iwụk ebietidụn̄ esie+Owụk enyịn ese kpukpru mbon oro ẹdụn̄de ke isọn̄.
15 Enye obot esịt kpukpru mmọ;+Enye ekere aban̄a kpukpru utom mmọ.+
16 Idụhe edidem emi uwak udịmekọn̄ anyan̄ade;+Akwa odudu inyan̄ake ọkpọsọn̄ owo.+
17 Enan̄-mbakara edi abian̄a kaban̄a edinyan̄a,+Akwa odudu esie inyụn̄ inọhọ ubọhọ.+
18 Sese! Enyịn Jehovah ke ese mbon oro ẹbakde enye,+Kpa mbon oro ẹbetde ima-mfọnido esie,+
19 Man anyan̄a ukpọn̄ mmọ osio ke n̄kpa,+Onyụn̄ enịm mmọ uwem ke ini akan̄.+
20 Ukpọn̄ nnyịn odori enyịn ke Jehovah.+Enye edi andin̄wam nnyịn ye otuekọn̄ nnyịn.+
21 Koro nnyịn imadat esịt ke enye;+Nnyịn inyụn̄ ibuọt idem ke edisana enyịn̄ esie.+
22 O Jehovah, yak ima-mfọnido fo odu ye nnyịn,+Koro nnyịn ibetde fi.+
