Matthew 11;1-30
11 Edikem ke Jesus ama okokụre ndinọ mbet esie duopeba item, enye oto do adaha aka ndikekpep mme owo n̄kpọ nnyụn̄ n̄kwọrọ ikọ ke mme obio mmọ.+
2 Edi ke ini John etiede ke ufọk-n̄kpọkọbi+ okop aban̄a mme utom Christ, enye osio mme mbet esie ọdọn̄
3 ẹkebụp enye ẹte: “Nte afo edi Enye Emi Enyenede Ndidi, m̀mê nnyịn ikpodori enyịn ke owo efen?”+
4 Jesus ọbọrọ mmọ ete: “Ẹka ẹnyụn̄ ẹkebụk se mbufo ẹkopde ẹnyụn̄ ẹkụtde ẹnọ John:
5 Mme nnan ẹkụt usụn̄,+ mbụn̄ọ+ ẹnyụn̄ ẹsan̄a isan̄, ẹnam mbon akpamfia+ ẹsana, inan+ ẹkop n̄kpọ, ẹnyụn̄ ẹnam mme akpan̄kpa+ ẹset, ẹnyụn̄ ẹkwọrọ eti mbụk+ ẹnọ mme ubuene;
6 ndien owo emi mîkwe n̄kpọ iduọ ke idemmi okop inemesịt.”+
7 Ke adan̄aemi mmọ emi ẹma ẹkedụk usụn̄ unyọn̄, Jesus ọtọn̄ọ ndibụp otuowo mban̄a John, ete: “Nso ke mbufo ẹkeka ndise ke wilderness?+ Ndi nnyanyan̄a eke ofụm enyen̄ede?+
8 Nso, ndien, ke mbufo ẹkewọn̄ọ ẹka ndise? Owo emi esịnede ndọdọbọde ọfọn̄idem? Kamse, mbon oro ẹsịnede ndọdọbọde ọfọn̄idem ẹsidu ke mme ufọk ndidem.+
9 Edi, ntak emi mbufo ẹkewọn̄ọde ẹka? Man ẹkese prọfet? Ke akpanikọ, ndọhọ mbufo nte, enye enen̄ede okpon akan prọfet.+
10 Emi edi enye emi ẹkewetde ẹban̄a ẹte, ‘Sese! Mmosio isụn̄utom mi ndọn̄ ebem fi iso, emi edidiọn̄de usụn̄ enịm ọnọ fi!’+
11 Ke akpanikọ ke ndọhọ mbufo nte, Ke otu mmọ eke iban ẹmande,+ akananam owo idahake ida emi okponde akan John Andinịm Owo Baptism; edi owo emi ekpride akan ke obio ubọn̄+ heaven okpon akan enye.
12 Edi ọtọn̄ọde ke usen John Andinịm Owo Baptism tutu esịm emi obio ubọn̄ heaven edi utịtmbuba emi mme owo ẹnyanarede ẹbịne, ndien mbon emi ẹnyanarede ẹbịne ẹda enye ke odudu ẹnyene.+
13 Koro kpukpru mme Prọfet ye Ibet ẹma ẹtịn̄ ntịn̄nnịm ikọ tutu esịm John;+
14 ndien edieke mbufo ẹmade ndinyịme, Enye edi ‘Elijah emi enyenede ndidi.’+
15 Yak owo eke enyenede utọn̄ okop.+
16 “Ndida emana emi ndomo ye mmanie?+ Enye ebiet n̄kpri nditọ emi ẹtiede ke an̄waurua, emi ẹfioride ẹkot n̄ka mbre mmọ,+
17 ẹte, ‘Nnyịn imefri ifiom inọ mbufo, edi mbufo inekke unek; nnyịn imeseme, edi mbufo iyịbike idem ke mfụhọ.’+
18 Ukem ntre, John ama edi idiaha n̄kpọ inyụn̄ in̄wọn̄ke n̄kpọ,+ edi mme owo ẹte, ‘Enye enyene demon’;
19 Eyen owo emedi, adia n̄kpọ onyụn̄ ọn̄wọn̄ n̄kpọ,+ kpa ye oro mme owo ẹte, ‘Sese! Owo udia ye owo mmịn, ufan mme ọbọ a-tax ye mme anamidiọk.’+ Nte ededi, mme utom ọniọn̄ ẹwụt ke ọniọn̄ enen.”+
20 Ekem enye asua ọnọ mme obio emi enye akanamde ata ediwak utom odudu, sia mmọ mîkakabakede esịt, ete:+
21 “Mbọm fo, Chorazin! Mbọm fo, Bethsaida!+ Koro edieke ẹkpekenamde ke Tyre ye Sidon utom odudu emi ẹkenamde ke esịt mbufo, mmọ ẹkpekekabade esịt anyan ini ko ẹsịne ọfọn̄ ntuan̄a ẹtie ke ntọn̄.+
22 Ntem ndọhọ mbufo nte, N̄kpọ ọyọfọn ye Tyre ye Sidon ke Usen Ikpe+ akan ye mbufo.+
23 Ndien afo, Capernaum,+ nte afo eyemenede idem okon̄ esịm enyọn̄? Ẹyesụhọde fi+ ẹsịm Udi;*+ koro edieke ẹkpekenamde ke Sodom utọ utom odudu emi ẹkenamde ke esịt fo, enye okpodu tutu esịm mfịn emi.
24 Ntem ndọhọ mbufo nte, N̄kpọ ọyọfọn ye isọn̄ Sodom ke Usen Ikpe akan ye afo.”+
25 Adan̄aoro Jesus ọdọhọ ete: “Mmotoro fi an̄wan̄wa, Ete, Ọbọn̄ enyọn̄ ye isọn̄, koro afo emedịp mbon ọniọn̄ ye mbon ikike mme n̄kpọ emi onyụn̄ ayarade mmọ ọnọ nseknditọ.+
26 Ih, O Ete, koro afo enyịmede ete edi ntem.
27 Ete mi amayak kpukpru n̄kpọ esịn mi ke ubọk,+ ndien baba owo kiet itịmke ifiọk Eyen ke mîbọhọke Ete,+ owo ndomokiet inyụn̄ itịmke ifiọk Ete ke mîbọhọke Eyen ye owo ekededi emi Eyen enyịmede ndiyarade enye nnọ.+
28 Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo,+ ndien nyọnọ mbufo nduọkodudu.
29 Ẹmen ọkpọnọ+ mi ẹkọn̄ọ ke itọn̄ mbufo ẹnyụn̄ ẹkpebe mi,+ koro ami mmenyene ifụre ifụre ido+ nnyụn̄ nsụhọde idem,* ndien mbufo ẹyekụt nduọkodudu+ ẹnọ ukpọn̄ mbufo.
30 Koro ọkpọnọ mi ememem, mbiomo mi onyụn̄ efefere.”+
