Leviticus 24;1-23
24 Ndien Jehovah ọdọhọ Moses ete:
2 “Wụk nditọ Israel ete mmọ ẹda ata eti aran emi ẹnyịmide ẹsio ke olive ẹsọk fi, emi ẹdidade ẹnọ un̄wana,+ man ẹda ẹdomo utuenikan̄ kpukpru ini.+
3 Aaron enyene ndinịm enye ke iso ikpehe emi odude ekpere Ntiense ke tent usopidem, ọtọn̄ọde ke mbubreyo tutu esịm usenubọk ke iso Jehovah kpukpru ini. Emi edi nsinsi ewụhọ ke ofụri emana mbufo.
4 Enye enyene nditịm mme utuenikan̄+ emi ke iso Jehovah kpukpru ini,+ ke uwụk utuenikan̄+ emi ẹnamde ke ata gold.
5 “Ndien afo enyene ndida eti ndomuyo nsan̄ ekara uyo duopeba. Mbahade ephah iba ke itie duop ke afo edida asan̄ ekara uyo kiet kiet.
6 Ndien afo enyene ndibon mmọ ke otu iba ke iso Jehovah, uyo itiokiet ke otu kiet,+ ke enyọn̄ okpokoro emi ẹnamde ke ata gold.+
7 Ndien afo enyene ndidori ata eti frankincense ke otu kiet kiet, enye onyụn̄ enyene ndidi uyo editi,+ kpa uwa emi ẹfọpde ke ikan̄ ẹnọ Jehovah.
8 Enye enyene nditịm mmọ ndori ke iso Jehovah kpukpru ini ke kpukpru sabbath.+ Emi edi nsinsi ediomi ye nditọ Israel.
9 Ndien emi edidi eke Aaron ye nditọiren esie,+ mmọ ẹnyụn̄ ẹnyene ndita enye ke edisana ebiet,+ koro enye edide ata edisana n̄kpọ ọnọ oku ke otu uwa Jehovah emi ẹfọpde ke ikan̄, nte nsinsi ewụhọ.”
10 Ekem eyeneren n̄wan Israel kiet emi ete esie edide owo Egypt+ ọwọrọ okodụk otu nditọ Israel, ndien eyen n̄wan Israel emi ye eren Israel kiet ẹn̄wana+ ke itienna.
11 Ndien eyeneren n̄wan Israel oro ọtọn̄ọ ndisuene nnyụn̄ nsụn̄i+ enyịn̄ Abasi.+ Ntre mmọ ẹda enye ẹka iso Moses.+ Ndien eka esie ekekere Shelomith, eyen Dibri an̄wan, owo esien Dan.
12 Ntre mmọ ẹsịn enye ke ufọk-ukpeme+ tutu ẹsian mmọ in̄wan̄-in̄wan̄ se idide uyo Jehovah.+
13 Ndien Jehovah ọdọhọ Moses ete:
14 “Sio owo oro okosụn̄ide enyịn̄ mi wọrọ di edem itienna;+ ndien kpukpru mbon oro ẹkekopde ẹnyene ndidori enye ubọk+ ke ibuot, ofụri esop ẹnyụn̄ ẹnyene nditọn̄ọ enye ke itiat.+
15 Ndien afo enyene ndidọhọ nditọ Israel ete, ‘Edieke owo ekededi osụn̄ide Abasi esie, idiọkn̄kpọ esie oyobiom enye.
16 Ntre ẹkûtre ndiwot owo eke osụn̄ide enyịn̄ Jehovah.+ Ofụri esop ẹkûtre nditọn̄ọ enye ke itiat. Edide esenowo onyụn̄ edide amanaisọn̄, ẹnyene ndiwot enye ke enye ndisụn̄i enyịn̄ Abasi.+
17 “‘Ndien edieke owo eyịbide ukpọn̄ ekededi owot, ẹkûtre ndiwot enye.+
18 Ndien owo emi eyịbide ufene owo owot enyene ndinọ usiene, unam ke ibuot unam.*+
19 Ndien edieke owo obiomode ufan esie ndo, kpa nte enye akanamde ke ẹnyene ndinam enye.+
20 Mbụn̄ọ ọkpọ ke mbụn̄ọ ọkpọ, enyịn ke enyịn, edet ke edet; ukem ndo oro enye okobiomode owo ke ẹnyene ndibiomo enye n̄ko.+
21 Ndien owo emi eyịbide ufene owo owot+ enyene ndinọ usiene,+ edi ẹnyene ndiwot owo eke eyịbide owo owot.+
22 “‘Ubiereikpe kiet ke mbufo ẹdinyene. Esenowo ye amanaisọn̄ ẹnyene ibet kiet,+ koro ami ndi Jehovah Abasi mbufo.’”+
23 Ekem Moses emen ikọ emi etịn̄ ọnọ nditọ Israel, ndien mmọ ẹsio owo oro okosụn̄ide enyịn̄ Abasi ẹwọrọ ẹdi edem itienna, ẹnyụn̄ ẹtọn̄ọ enye ke itiat.+ Ntem ke nditọ Israel ẹnam kpa nte Jehovah okowụkde Moses.
Mme Ikọ Idakisọn̄
^ At. Ed., “ukpọn̄.” Se N̄w. Ik. 4.
