Jeremiah 1;1-19
1 Mme ikọ Jeremiah,+ eyen Hilkiah, kiet ke otu mme oku emi ẹkedude ke Anathoth+ ke isọn̄ Benjamin;+
2 emi uyo Jehovah ekesịmde ke eyo Josiah+ eyen Amon,+ edidem Judah, ke ọyọhọ isua duopeta emi enye akarade.+
3 Ndien uyo oro ọtọn̄ọ ntak esịm enye ke eyo Jehoiakim+ eyen Josiah, edidem Judah, tutu esịm utịt ọyọhọ isua duopekiet emi Zedekiah+ eyen Josiah, edidem Judah akarade, tutu Jerusalem aka ntan̄mfep ke ọyọhọ ọfiọn̄ ition.+
4 Ndien uyo Jehovah esịm mi, ete:
5 “Mbemiso n̄kobotde fi ke idịbi,+ mma mfiọk fi,+ mbemiso afo okonyụn̄ otode itie eyen ọwọrọ, mma nnam fi asana.+ Mma nnam fi edi prọfet ọnọ mme idụt.”
6 Edi ami ndọhọ nte: “O Jehovah Akakan Ọbọn̄ Andikara! Sese ami mfiọkke nditịn̄ ikọ,+ koro ami ndi eyenọwọn̄.”+
7 Ndien Jehovah ọdọhọ mi ete: “Kûdọhọ ute, ‘Ami ndi eyenọwọn̄.’ Edi afo ayaka ebịne kpukpru mbon oro ndidọn̄de fi utom nnọ; afo oyonyụn̄ etịn̄ kpukpru n̄kpọ oro ndiwụkde fi nte etịn̄.+
8 Kûfehe iso+ mmọ, koro ‘ami ndude ye afo man nnyan̄a fi,’+ uyo Jehovah edi emi.”
9 Ntem Jehovah osio ubọk esie anyan onyụn̄ anam enye otụk mi inua.+ Ekem Jehovah ọdọhọ mi ete: “Sese mmesịn fi ikọ mi ke inua.+
10 Sese, mmemek fi mfịn emi nte okon̄ akan mme idụt ye mme obio ubọn̄,+ man edịbede onyụn̄ onụk ọduọk onyụn̄ osobo onyụn̄ owụri,+ man ọbọp onyụn̄ ọtọ.”+
11 Ndien ikọ Jehovah esịm mi, ete: “Jeremiah, nso ke afo okụt?”
Ntre ami ndọhọ nte: “N̄kụt nsehe eto almond.”
12 Ndien Jehovah ọdọhọ mi ete: “Afo emetịm okụt, koro ami ke ndu ke edidemede mban̄a ikọ mi man nnam enye.”+
13 Ndien uyo Jehovah esịm mi ọyọhọ utịm ikaba, ete: “Nso ke afo okụt?”
Ntre ami ndọhọ nte: “N̄kụt an̄wan̄a-inua eso utemudia emi ẹfride ikan̄ ke idak, inua esie onyụn̄ ọwọn̄ọde ọkpọn̄ edem edere.”
14 Ndien Jehovah ọdọhọ mi ete: “Afanikọn̄ ayasiaha ke edem edere esịm kpukpru mme andidụn̄ isọn̄.+
15 Koro ‘sese mmọn̄ n̄kot kpukpru ubon ke mme obio ubọn̄ edem edere,’ uyo Jehovah edi emi;+ ‘ndien mmọ ẹyedi, owo mmọ kiet kiet oyonyụn̄ owụk ebekpo esie ke mme inuaotop Jerusalem,+ onyụn̄ owụk akanade kpukpru mme ibibene esie ye kpukpru mme obio Judah.+
16 Ndien ami nyasian mmọ ubiereikpe mi mban̄a kpukpru idiọkn̄kpọ mmọ,+ koro mmọ ẹmekpọn̄ mi+ ẹnyụn̄ ẹnam nsụn̄ikan̄ uwa ọwọrọ ọdọk ọnọ mme abasi+ en̄wen ẹnyụn̄ ẹnụhọ ẹnọ mme utom ubọk+ mmọ.’
17 “Ndien amaedi afo, bọbọ mbọbọ ke isịn+ fo, nyụn̄ daha ke enyọn̄ tịn̄ kpukpru se ami n̄wụkde fi nọ mmọ. Kûdịghe ke ntak mmọ,+ mbak ami ndinam fi edịghe ke iso mmọ.
18 Koro amaedi ami, sese mfịn emi, mmanam fi edi obio ibibene ye adaha ukwak ye mme ibibene+ okpoho ọnọ kpukpru mme idụt,+ ye ndidem Judah, ye mbọn̄ esie, ye mme oku esie ye mbio obio.+
19 Ndien mmọ ẹyen̄wana ye afo, edi mmọ idikanke fi,+ koro ‘ami ndude ye afo+ man nnyan̄a fi,’”+ uyo Jehovah edi emi.
