Isaiah 24;1-23
24 Sese! Jehovah ke an̄wan̄a se idude ke isọn̄ ọduọk onyụn̄ enịm enye ndon,+ enye omonyụn̄ en̄wịn isọn̄ iso+ onyụn̄ asuan mme andidụn̄ ke esịt.+
2 Ndien editie ye mme owo kpa nte etiede ye oku; editie ye asan̄autom kpa nte etiede ye eteufọk esie; editie ye ofụn an̄wan kpa nte etiede ye ekaufọk esie; editie ye andidep kpa nte etiede ye andinyam; editie ye ọnọ ebuọt kpa nte etiede ye andibọ ebuọt; editie ye andibọ udori kpa nte etiede ye andikpe udori.+
3 Isọn̄ iditreke ndina ukpọk, owo idinyụn̄ itreke ndibụme+ enye, koro edi Jehovah etịn̄ ikọ emi.+
4 Isọn̄ omofụhọ,+ onyụn̄ akpa mba. Isọn̄ emeyemede onyụn̄ akpa mba. N̄kpisọn̄ ke otu mbio obio ẹmeyemede.+
5 Ndien mme andidụn̄ isọn̄ ẹmesabade enye,+ koro mmọ ẹfụmide mme ibet,+ ẹkpụhọ ewụhọ,+ ẹnyụn̄ ẹbiat nsinsi ediomi.+
6 Oro edi ntak emi isụn̄i adiade isọn̄,+ ẹnyụn̄ ẹbiomde mbon oro ẹdụn̄de ke esịt ikpe. Oro edi ntak emi mme andidụn̄ isọn̄ ẹkpride ke ibat, ata esisịt ibat owo ẹnyụn̄ ẹsụhọde ke esịt.+
7 Obufa wine omofụhọ, vine emeyemede,+ kpukpru mbon oro ẹdatde esịt ẹmeseme.+
8 Idara ekọmọ emetre, uyom mbon akwa idatesịt omodobo, idara harp emetre.+
9 Mmọ ikwọhọ ikwọ ke ini ẹn̄wọn̄de wine; ọkpọsọn̄ mmịn amakabade odoro mbon oro ẹn̄wọn̄de enye.
10 Ẹmewụri obio oro ẹkewọrọde ẹkpọn̄;+ ẹmeberi kpukpru ufọk mbak owo edidụk.
11 Ke ẹfiori ke mme efak ke ntak unana wine. Ofụri idatesịt etre; idara emebe efep ke isọn̄.+
12 Ẹmedaha ẹkpọn̄ idaha oro akpade owo idem ke obio; ẹmewụri inuaotop ẹnam akabade ebok n̄kpoho itiat.+
13 Koro ntem ke enye editie ke ufọt isọn̄, ke otu mme owo, nte emi ẹyịbide eto olive,+ nte emi ẹtan̄de nsụhọ ke ini utet grape ama ekesịm utịt.+
14 Mmọ ẹyemenede uyo mmọ ke enyọn̄, ẹyesio n̄kpo idara. Mmọ ẹyedu ke inyan̄ ẹsio n̄kpo ke ntak ubọn̄ Jehovah.+
15 Oro edi ntak emi anade mmọ ẹnọ Jehovah ubọn̄+ ke ikpehe emi un̄wana asiahade,+ ẹnyụn̄ ẹnọ enyịn̄ Jehovah,+ Abasi Israel ubọn̄, ke mme isuo inyan̄ibom.
16 Nnyịn imetie ke utịt isọn̄ ikop ndinem ikwọ emi:+ “N̄kpọmbana Emi Ẹnọde Edinen Owo!”+
Edi ami ndọhọ nte: “Idem ọdiọk mi,+ idem ọdiọk mi! Mbọm mi! Mbon abian̄a ẹmebian̄a abian̄a.+ Mbon abian̄a ẹmeda abian̄a ẹbian̄a abian̄a.”+
17 Ndịk ye obube ye afia ẹna ẹnọ fi, afo andidụn̄ isọn̄.+
18 Ndien ama ekem owo ekededi eke efehede ke ntak uyom n̄kpọndịk ọyọduọ odụk obube, afia oyonyụn̄ omụm owo ekededi eke ọwọrọde ke esịt obube edi.+ Koro ẹyeberede window ke enyọn̄,+ itiat idakisọn̄ isọn̄ oyonyụn̄ enyek.+
19 Isọn̄ amasiaha ofụri ofụri, ẹmenyen̄e isọn̄, ẹmenam isọn̄ eten̄.+
20 Isọn̄ ke eten̄ asan̄a nte akpammịn, enye ke onyụn̄ ofụm aka iso afiak edem nte ataya ukpeme.+ Ndien ndudue esie omodobi enye ke idem,+ enye oyonyụn̄ ọduọ, idinyụn̄ idahake aba ke enyọn̄.+
21 Ndien ama ekem ke usen oro, Jehovah ọyọwọn̄ọde enyịn esie ese udịm enyọn̄ ke enyọn̄, ye ndidem isọn̄ ke isọn̄.+
22 Ndien ẹyetan̄ mmọ ẹbon nte emi ẹtan̄de mbon n̄kpọkọbi ẹdọn̄ ke obube,+ ẹnyụn̄ ẹkọbi mmọ ke n̄kịmn̄kịm ufọk-n̄kpọkọbi idakisọn̄;+ ndien ke ediwak usen ẹbede, ẹyewọn̄ọde ntịn̄enyịn ẹnọ mmọ.+
23 Ndien ẹmetịmede ọyọhọ ọfiọn̄, bụt onyụn̄ anam utịn oro ayamade,+ koro Jehovah mme udịm amakabade edi edidem+ ke Obot Zion+ ye ke Jerusalem, oro akarade ubọn̄ ubọn̄ ke iso n̄kani owo esie.+
