Isaiah 11;1-16
11 Ndien n̄kọk+ eyetịbe ke etak Jesse;+ nsehe+ eke edin̄wụmde mfri+ oyonyụn̄ asiaha ke orụn̄ esie.
2 Ndien spirit Jehovah oyodoro enye ke idem,+ spirit ọniọn̄+ ye asian,+ spirit item ye odudu,+ spirit ifiọk+ ye uten̄e Jehovah;+
3 ndien mbak Jehovah eyenem enye esịt.+
Ndien enye idikpehe ikpe itiene se okụtde ke enyịn, idinyụn̄ inọhọ nsuannọ itiene n̄kpọ emi enye okopde.+
4 Enye eyekpe ikpe mme ubuene+ ke edinen ido, onyụn̄ ọnọ mme owo nsuannọ ke eti ido ke ufọn sụn̄sụn̄ mbon isọn̄. Enye ayada esan̄ inua esie amia isọn̄;+ oyonyụn̄ osobo idiọkowo ke ibifịk n̄kpọkinua esie.+
5 Ndien edinen ido edidi ubọpisịn esie,+ akpanikọ onyụn̄ edi n̄kpahaisịn esie.+
6 Ndien wolf oyodu ye ayara eyenerọn̄+ ndusụk ini, anawụri ekpe oyonyụn̄ osụhọde ana ye eyen ebot, eyen enan̄ ye abak ayara ekpe+ ye unam emi enyenede isek ẹyena ọtọkiet;+ ekpri eyenọwọn̄ oyonyụn̄ edi andida mmọ usụn̄.
7 Enan̄ ye bear ẹyeta mbiet; nditọ mmọ ẹyenyụn̄ ẹsụhọde ẹna ọtọkiet. Ekpe ayata nnyanyan̄a nte ayara enan̄.+
8 Ndien eyen emi awapde eba eyebre mbre ke odudu ebre;+ eyen emi ẹsiode ke eba oyonyụn̄ esịn ubọk ke odudu* idiọk urụkikọt.
9 Mmọ idinamke ibak,+ idinyụn̄ ibiatke n̄kpọ ke ofụri edisana obot mi;+ koro ifiọk Jehovah ọyọyọhọ isọn̄ kpa nte mmọn̄ ofụkde inyan̄.+
10 Ndien ama ekem ke usen+ oro orụn̄ Jesse+ oyodu emi edidahade ada nte idiọn̄ọ ọnọ mme owo.+ Ndien mme idụt ẹyewọn̄ọde ẹtiene enye ẹkeyom ndausụn̄,+ ebiet nduọkodudu esie oyonyụn̄ akabade edi ubọn̄.+
11 Ndien ama ekem ke usen oro Jehovah ọyọtọn̄ọ ntak ọnọ ubọk esie, ọyọhọ utịm ikaba,+ man atan̄ nsụhọ ikọt esie emi ẹdisụhọde ke Assyria+ ye Egypt+ ye Pathros+ ye Cush+ ye Elam+ ye Shinar+ ye Hamath ye mme isuo inyan̄ibom.+
12 Ndien enye eyemenede idiọn̄ọ ke enyọn̄ ọnọ mme idụt onyụn̄ atan̄ nditọ Israel oro ẹkebịnde ẹfep obon ọtọkiet;+ amaedi nditọ Judah oro ẹsuanade, enye ayatan̄ mmọ ke utịt isọn̄ mbinan̄ obon ọtọkiet.+
13 Ndien ufụp Ephraim eyetre,+ ẹyenyụn̄ ẹsịbe mbon oro ẹsuade Judah ẹfep. Ephraim idifịbeke Judah ufụp, Judah idinyụn̄ isuaha Ephraim.+
14 Ndien mmọ ẹyefe ẹbe ke afara mbon Philistia ẹka edem usoputịn;+ mmọ ẹyediana kiet ẹbụme nditọ Edem Usiahautịn.+ Mmọ ẹyeda ubọk mmọ ẹdori Edom ye Moab ke idem,+ ndien nditọ Ammon ẹyedu ke idak mmọ.+
15 Ndien Jehovah eyesịbe edeme inyan̄ Egypt efep,+ onyụn̄ ofụn̄ ubọk esie ke Akpa+ ke ufiop ibifịk esie. Ndien enye ayamia enye ke idịm esie mbitiaba, enye oyonyụn̄ anam mme owo ẹsịne ikpaukot mmọ ẹsan̄a.+
16 Ndien ọkpọusụn̄+ oyodu ke Assyria ọnọ nsụhọ+ ikọt esie oro ẹdisụhọde,+ kpa nte okodude ọnọ Israel ke usen emi enye ọkọwọrọde ke isọn̄ Egypt.
Mme Ikọ Idakisọn̄
^ At. Ed., “odudu un̄wana.”
