Genesis 49;1-33
49 Ekem Jacob okot nditọiren esie onyụn̄ ọdọhọ ete: “Ẹsop idem ọtọkiet man nsian mbufo se iditịbede ke mme akpatre usen.
2 Ẹsop idem ẹnyụn̄ ẹkpan̄ utọn̄, mbufo nditọ Jacob, ẹkpan̄ utọn̄ ẹnọ Israel, ete mbufo.+
3 “Reuben, afo edi akpan+ mi, nsọn̄idem mi ye ntọn̄ọ odudu ubon eyen,+ ata uku ye ọkpọsọn̄ odudu.
4 Afo akanam n̄kpọ nte mmọn̄ eke mînyeneke ubere, afo uduwọrọke uda iso,+ koro afo ọkọdọkde bed usọ.+ Ini oro ke afo akasabade bed mi.+ Enye ọdọk akana ke esịt!
5 “Simeon ye Levi ẹdi nditọeka.+ Akan̄kan̄ edi n̄kpọ afai mmọ.+
6 O ukpọn̄ mi, kûdụk ke otu mmọ.+ Kûbuana ke esop mmọ,+ koro ke iyatesịt ke mmọ ẹkewot mme owo,+ ndien ke obom ke mmọ ẹkekpok nyara enan̄ esịp.
7 Osụk ọdọdiọk ọnọ iyatesịt mmọ,+ koro edide ibak,+ ye ifụtesịt mmọ, koro edide afai.+ Yak mi mbahade mmọ ndọn̄ ke Jacob, nnyụn̄ nsuan mmọ ke Israel.+
8 “Amaedi afo Judah,+ nditọusọ ẹyetoro fi.+ ubọk fo oyodoro mme asua fo ke obotitọn̄.+ Nditọusọ ẹyenyụn̄ ẹduọ ke isọn̄ ẹnọ fi.+
9 Judah edi eyen ekpe.+ Eyen mi, afo ayadaha ọkpọn̄ se afo omụmde. Enye osụhọde ana onyụn̄ enen̄ede idem nte ekpe, ndien nte ekpe, anie ekeme ndidemede enye?+
10 Esan̄ ubọn̄ idikpọn̄ke Judah,+ esan̄ andikara idinyụn̄ ikpọn̄ke n̄kpatian̄ ukot esie, tutu Shiloh edi;+ ndien enye ke mme owo ẹdikop uyo ẹnọ.+
11 Enye eyịri ass esie emi okponde ọwọrọ ke vine onyụn̄ eyịri nditọ uman ass esie ke eti vine, enye eyeyet edisịnen̄kpọ esie ke wine onyụn̄ eyet ọfọn̄idem esie ke iyịp grape.+
12 Wine ayanam enyịn esie eyịbe, mmọn̄eba oyonyụn̄ anam edet esie akabade edi afia.
13 “Zebulun edidụn̄ ke mbeninyan̄,+ enye edidu ke mbeninyan̄ emi ẹyịride mme nsụn̄ikan̄;+ ndien adan̄a esie eyesịm Sidon.+
14 “Issachar+ edi ass emi ọkpọ esie ọsọn̄de, enye osụhọde ana ke ufọt ekpat iba emi ẹdianade ke ifịm ass.
15 Ndien enye oyokụt nte ke ebiet nduọkodudu ọfọn ye nte ke isọn̄ ọfọn; ndien enye oyonụhọ emen mbiomo ke afara esie, ẹyenyụn̄ ẹnyịk enye anam ọkpọsọn̄ utom nte ofụn.
16 “Dan eyekpe ikpe ikọt esie nte kiet ke otu esien Israel.+
17 Yak Dan edi urụkikọt ke mbenusụn̄, ye ibọm emi anade ke usụn̄, emi odomde nditịn̄ikpat enan̄-mbakara ndien andiwat odorode ọduọ edem edem.+
18 Ami nyebet man n̄kụt edinyan̄a eke otode fi, O Jehovah.+
19 “Amaedi Gad, mbon n̄wo ẹyen̄wana ye enye, edi enye ọyọwọn̄ọde ada an̄wana ye mbon oro ẹdude ke ata edem edem.+
20 “Udia eke otode ke Asher ayawak,+ ndien enye ọyọnọ ndinem udia edidem.+
21 “Naphtali+ edi esan̄-esan̄ uman edop. Enye ke etịn̄ ndinem ikọ.+
22 “Joseph edi n̄kọk eto eke on̄wụmde mfri,+ enye edi n̄kọk eto eke on̄wụmde mfri emi odude ke mben idịm mmọn̄,+ emi ọbiọkde ke enyọn̄ ibibene.+
23 Edi mme otop utịgha ẹyat enye esịt ẹnyụn̄ ẹtop enye ẹnyụn̄ ẹsua enye.+
24 Edi utịgha esie isehekede,+ ubọk esie ọsọn̄ onyụn̄ efere.+ Oto ke ubọk Ọkpọsọn̄ Abasi Jacob,+ Ekpemerọn̄ oto do, kpa Itiat Israel.+
25 Enye oto Abasi usọ,+ ndien enye ayan̄wam fi;+ enye onyụn̄ odu ye Ata Ọkpọsọn̄,+ ndien enye ayada mme edidiọn̄ eke ẹtode heaven ke enyọn̄,+ onyụn̄ ada mme edidiọn̄ udem inyan̄+ ye mme edidiọn̄ eba ye idịbi,+ ọdiọn̄ fi.
26 Mme edidiọn̄ emi usọ ọnọde ẹmefọn ẹkan mme edidiọn̄ nsinsi ikpọ obot,+ ẹfọn ẹkan n̄kpọmbana n̄kpri obot emi odude ke nsinsi.+ Mmọ ẹyesụk ẹdu ke ibuot Joseph, ke etịn̄ibuot enye emi ẹkedian̄arede ẹsio ke otu nditọete esie.+
27 “Benjamin ayawai nte wolf.+ Ke usenubọk enye ayata unam eke enye omụmde ndien ke mbubreyo enye eyedeme mbụme.”+
28 Kpukpru emi ẹdi esien Israel duopeba, emi onyụn̄ edi se ete mmọ akasiande mmọ ke ini enye ọkọdiọn̄de mmọ. Enye ọkọdiọn̄ mmọ kiet kiet nte edidiọn̄ mmọ edide.+
29 Ekem enye owụk mmọ onyụn̄ ọdọhọ mmọ ete: “Ami mmọn̄ ntiene orụk mi.+ Ẹbụk mi ye mme ete mi ke abaitiat emi odude ke in̄wan̄ Ephron eyen Hittite,+
30 ke abaitiat emi odude ke in̄wan̄ Machpelah emi asakde iso ese Mamre ke isọn̄ Canaan, kpa in̄wan̄ oro Abraham ọkọbọde Ephron, eyen Hittite, edep, man ada enyene nte itie ubụkowo.+
31 Do ke mmọ ẹkebụk Abraham ye Sarah, n̄wan esie.+ Do ke mmọ ẹkebụk Isaac ye Rebekah, n̄wan esie,+ do n̄ko ke n̄kobụk Leah.
32 Ẹkedep in̄wan̄ oro ye abaitiat emi odude do ẹto nditọ Heth.”+
33 Ntem ke Jacob okụre ndinọ nditọ esie mme ewụhọ. Ekem enye emenede ukot esie odori ke n̄kpana ọduọk akpatre ibifịk onyụn̄ etiene orụk esie.+
