Genesis 28;1-22
28 Ndien Isaac okot Jacob onyụn̄ ọdiọn̄ enye onyụn̄ owụk enye ete: “Kûdọ n̄wan ke otu nditọiban Canaan emi.+
2 Daha ke enyọn̄, ka ufọk Bethuel ete eka fo ke Paddan-aram nyụn̄ kọdọ n̄wan do ke otu nditọiban Laban, eyeneka uka.+
3 Ndien Ata Ọkpọsọn̄ Abasi ọyọdiọn̄ fi onyụn̄ anam fi ọtọt onyụn̄ awak, afo oyonyụn̄ akabade edi esop ediwak owo.+
4 Ndien enye ọyọnọ fi ye mfri+ fo edidiọn̄ Abraham,+ man afo ada isọn̄ emi odụn̄de mi nte esenowo enyene,+ emi Abasi ọkọnọde Abraham.”+
5 Ntre Isaac ayak Jacob aka, ndien enye adaha aka Paddan-aram, etiene Laban eyen Bethuel owo Syria,+ eyeneka Rebekah,+ eka Jacob ye Esau.+
6 Ke ini Esau okụtde ke Isaac ama ọdiọn̄ Jacob onyụn̄ ọnọ enye aka Paddan-aram ndikọdọ n̄wan do, ye nte ke adan̄aemi ọkọdiọn̄de enye, ete esie ama owụk enye ete: “Kûdọ n̄wan ke otu nditọiban Canaan emi”;+
7 ye nte ke Jacob ama okop uyo ete ye eka esie onyụn̄ adaha aka Paddan-aram;+
8 Esau ndien edikụt ke Isaac, ete esie, imaha nditọiban Canaan.+
9 Ntem Esau aka ke ọtọ Ishmael ọkọdọ Mahalath, eyeneka Nebaioth, eyen Ishmael, eyen Abraham, edidian ye iban esie eken.+
10 Edi Jacob adaha ke Beer-sheba aka Haran.+
11 Ekem enye edisịm ebiet kiet onyụn̄ eben̄e idem ndidan̄ do ke okoneyo oro koro utịn ama osụhọde. Ntre enye ada itiat kiet ke ebiet oro enịm nte udotibuot onyụn̄ osụhọde ana do.+
12 Ndien enye adaba ndap,+ ndien, sese! eberi emi etịn̄e esie esịmde ikpaenyọn̄ owụhọ ke isọn̄; ndien, sese! mme angel Abasi ẹdọdọk, ẹsosụhọde.+
13 Ndien, sese! Jehovah etie ke etịn̄e eberi oro, ọdọhọ ete:+
“Ami ndi Jehovah, Abasi Abraham ete fo ye Abasi Isaac.+ Nyọnọ fi ye mfri+ fo isọn̄ emi afo anade ke esịt.
14 Ndien mfri fo ayawak nte ntan isọn̄,+ afo oyonyụn̄ asiaha esịm edem usiahautịn ye edem usoputịn ye edem edere ye edem usụk,+ ndien edito fi ye mfri fo kpukpru ubon ke isọn̄ ẹbọ edidiọn̄.+
15 Ndien sese ami ndodu ye afo nyonyụn̄ n̄kpeme fi ke kpukpru usụn̄ eke afo edikade nnyụn̄ nda fi nnyọn̄ ndi ke isọn̄ emi,+ koro ndikpọn̄ke fi tutu nnam se ntịn̄de nnọ fi.”+
16 Ekem Jacob edemede ke idap onyụn̄ ọdọhọ ete: “Ke akpanikọ Jehovah odu ke ebiet emi, edi ami n̄kọfiọkke.”
17 Ndien ndịk anam enye, enye onyụn̄ ọdọhọ ete:+ “Ebiet emi enyene uten̄e!+ Emi idịghe ebiet efen ikan ufọk Abasi+ ndien emi edi inuaotop heaven.”
18 Ntre Jacob abak edemede ke usenubọk ada itiat emi enye akadade anam udotibuot anam adaha onyụn̄ ọtọhọ aran ọduọk ke enyọn̄ esie.+
19 Ndien enye okot ebiet oro Bethel,+ edi obio oro ekesikere Luz.+
20 Ndien Jacob akan̄a akan̄a+ ete: “Edieke Abasi edidude ye ami onyụn̄ ekpeme mi ke usụn̄ isan̄ emi onyụn̄ ọnọ mi udia ndia ye ọfọn̄ nsịne+
21 ndien ami nnyọn̄ ndi ke ufọk ete mi ke emem, do Jehovah eyedi Abasi mi.+
22 Ndien itiat emi ndade nnam adaha mi ayakabade edi ufọk Abasi,+ ndien nditreke ndinọ fi mbahade kiet ke itie duop ke otu kpukpru n̄kpọ eke afo edinọde mi.”+
