Genesis 11;1-32
11 Ndien ofụri isọn̄ ẹkesem usem kiet ẹnyụn̄ ẹtịn̄ ukem ikọ.
2 Edikem nte mmọ ẹsan̄ade ẹka edem usiahautịn mmọ ẹdikụt unaisọn̄ itịghede kiet ke isọn̄ Shinar,+ ndien mmọ ẹdụn̄ do.
3 Ndien mmọ ẹdọhọ kiet eken ẹte: “Mbufo ẹdi! Ẹyak nnyịn inam kọrikọri inyụn̄ ida ikan̄ ifọp mmọ ẹsat.” Ntem mmọ ẹda kọrikọri nte itiat, ẹnyụn̄ ẹda itai nte mbat.+
4 Ndien mmọ ẹdọhọ ẹte: “Mbufo ẹdi! Ẹyak nnyịn ibọp obio inọ idem nnyịn, ye tọwa emi etịn̄e esie esịmde ikpaenyọn̄,+ ẹnyụn̄ ẹyak nnyịn inam ọwọrọetop enyịn̄ inọ idem nnyịn,+ mbak nnyịn idisuana iyọhọ ofụri iso isọn̄.”+
5 Ndien Jehovah osụhọde aka man ekese obio ye tọwa oro nditọ owo ẹbọpde.+
6 Ekem Jehovah ọdọhọ ete: “Sese! Mbon emi ẹdi kiet, kpukpru mmọ ẹnyụn̄ ẹsem usem kiet,+ ndien kamse se mmọ ẹtọn̄ọde ndinam. Sese, idụhe se mmọ ẹdiduakde ke esịt mmọ emi mmọ mîdinamke.+
7 Di! Yak nnyịn+ isụhọde ika do iketịmede+ usem mmọ mbak mmọ ẹdikop usem kiet eken.”+
8 Ntem ke Jehovah anam mmọ ẹdaha do ẹsuana ẹyọhọ ofụri iso isọn̄+ ndien mmọ ẹtre ndibọp obio oro.+
9 Ntak edi oro ẹkotde obio oro Babel,+ koro do ke Jehovah eketịmede usem ofụri isọn̄, ndien Jehovah anam mmọ ẹdaha do ẹsuana+ ẹyọhọ ofụri iso isọn̄.
10 Emi edi mbụk emi aban̄ade Shem.+
Shem ekedi isua ikie ke ini enye okobonde Arpachshad+ isua iba ke ukwọ ama ekebe.
11 Ndien ke Shem ama okobon Arpachshad, enye odu uwem isua ikie ition. Enye onyụn̄ obon nditọiren ye nditọiban.+
12 Ndien Arpachshad odu uwem isua edịp ye efịt. Ekem enye obon Shelah.+
13 Ndien ke Arpachshad ama okobon Shelah, enye odu uwem isua ikie inan̄ ye ita. Enye onyụn̄ obon nditọiren ye nditọiban.
14 Ndien Shelah odu uwem isua edịp ye duop. Ekem enye obon Eber.+
15 Ndien ke Shelah ama okobon Eber, enye odu uwem isua ikie inan̄ ye ita. Enye onyụn̄ obon nditọiren ye nditọiban.
16 Ndien Eber odu uwem isua edịp ye duopenan̄. Ekem enye obon Peleg.+
17 Ndien ke Eber ama okobon Peleg, enye odu uwem isua ikie inan̄ ye edịp ye duop. Enye onyụn̄ obon nditọiren ye nditọiban.
18 Ndien Peleg odu uwem isua edịp ye duop. Ekem enye obon Reu.+
19 Ndien ke Peleg ama okobon Reu, enye odu uwem isua ikie iba ye usụkkiet. Enye onyụn̄ obon nditọiren ye nditọiban.
20 Ndien Reu odu uwem isua edịp ye duopeba. Ekem enye obon Serug.+
21 Ndien ke Reu ama okobon Serug, enye odu uwem isua ikie iba ye itiaba. Enye onyụn̄ obon nditọiren ye nditọiban.
22 Ndien Serug odu uwem isua edịp ye duop. Ekem enye obon Nahor.+
23 Ndien ke Serug ama okobon Nahor, enye odu uwem isua ikie iba. Enye onyụn̄ obon nditọiren ye nditọiban.
24 Ndien Nahor odu uwem isua edịp ye usụkkiet. Ekem enye obon Terah.+
25 Ndien ke Nahor ama okobon Terah, enye odu uwem isua ikie ye efịtenan̄. Enye onyụn̄ obon nditọiren ye nditọiban.
26 Ekem Terah odu uwem isua ata ye duop ndien obon Abram+ ye Nahor+ ye Haran.
27 Ndien emi edi mbụk emi aban̄ade Terah.
Terah obon Abram ye Nahor ye Haran; ndien Haran obon Lot.+
28 Ekem Haran akpa ke adan̄aemi enye osụk odude ye Terah, ete esie, ke isọn̄ emana esie, ke Ur+ mbon Chaldea.+
29 Ekem Abram ye Nahor ẹdọ iban. N̄wan Abram ekere Sarai,+ n̄wan Nahor onyụn̄ ekere Milcah,+ eyen Haran, ete Milcah ye ete Iscah.
30 Edi Sarai edi ada;+ imanke eyen.
31 Ekem Terah ada Abram eyen esie ye Lot, eyen Haran,+ kpa eyeyen esie, ye Sarai+ n̄wan eyen esie, n̄wan Abram, ndien mmọ ẹsan̄a ye enye ẹwọn̄ọ ke Ur mbon Chaldea ẹka Canaan.+ Ndien mmọ ẹdisịm Haran+ ẹnyụn̄ ẹdụn̄ do.
32 Ndien isua uwem Terah edi isua ikie iba ye ition. Ekem Terah akpa ke Haran.
