Ezra 1;1-11
1 Ndien ke akpa isua Cyrus+ edidem Persia, man ikọ emi Jehovah akadade inua Jeremiah+ etịn̄ okposu, Jehovah edemede+ spirit Cyrus edidem Persia, ntre enye anam ẹtan̄a+ ke ofụri obio ukara esie, onyụn̄ anam ẹwet,+ ẹte:
2 “Ntem ke Cyrus edidem Persia ọdọhọ ete,+ ‘Jehovah Abasi enyọn̄+ ọmọnọ+ mi kpukpru mme obio ubọn̄ isọn̄, enye omonyụn̄ ọdọn̄ mi ete mbọp ufọk nnọ imọ ke Jerusalem+ emi odude ke Judah.
3 Owo ekededi emi odude ke otu mbufo, ke otu kpukpru ikọt esie, Abasi esie akpakam odu ye enye.+ Ntre yak enye ọdọk aka Jerusalem, emi odude ke Judah, onyụn̄ afiak ọkọbọp ufọk Jehovah Abasi Israel—enye edi ata Abasi+—kpa ufọk emi odude ke Jerusalem.+
4 Owo ekededi emi osụhọde ke kpukpru ebiet emi enye odụn̄de nte esenowo,+ yak mbon ebiet esie ẹn̄wam enye ke silver ye gold ye inyene ye ufene, ọkọrọ ye enọ unyịmesịt+ kaban̄a ufọk ata Abasi emi odude ke Jerusalem.’”
5 Ekem mme etubom+ mme ete ke Judah ye Benjamin ye mme oku ye nditọ Levi ẹdaha ẹda, ọkọrọ ye kpukpru owo emi ata Abasi edemerede spirit+ mmọ, ẹdọk ẹka man ẹfiak ẹkebọp ufọk Jehovah,+ emi odude ke Jerusalem.
6 Ndien kpukpru mbon oro ẹdude ẹkan mmọ ẹkụk ẹsọn̄ọ+ mmọ ubọk ke ndinọ mmọ n̄kpoduoho silver ye gold ye inyene ye ufene ye mme n̄kpọuto, ọkọrọ ye kpukpru enọ oro ẹkenọde ke edinyịme esịt.+
7 N̄ko, Edidem Cyrus osion̄o n̄kpoduoho ufọk Jehovah edi,+ emi Nebuchadnezzar akatan̄de ke Jerusalem+ ọkọdọn̄ ke ufọk abasi+ esie.
8 Ndien Cyrus edidem Persia anam Mithredath akama-inyene okosion̄o mmọ edi man abat mmọ ọnọ Sheshbazzar+ ọbọn̄ Judah.+
9 Ndien ibat mmọ edi emi: n̄kpọ udọn̄n̄kpọ gold edịp ye duop emi ẹbietde akpasa, n̄kpọ udọn̄n̄kpọ silver tọsịn kiet emi ẹbietde akpasa, n̄kpọ udọn̄n̄kpọ edịp ye usụkkiet efen efen,
10 n̄kpri usan+ gold edịp ye duop, nsio nsio orụk n̄kpri usan silver ikie inan̄ ye duop efen efen, ye n̄kpoduoho tọsịn kiet.
11 Kpukpru n̄kpoduoho gold ye eke silver ẹkedi tọsịn ition ikie inan̄. Sheshbazzar+ ada kpukpru n̄kpọ, ọkọrọ ye mbon ntan̄mfep+ oro ẹkedude ke Babylon, ọdọk aka Jerusalem.
